Сәј ҝөстәрмәјә дәјәр!
АИЛӘВИ ИБАДӘТ кечирмәк вә ушагларла Мүгәддәс Китабы өјрәнмәк онларын ‘Јеһованын вердији тәрбијә вә өјүд-нәсиһәти илә бөјүмәләриндә’ әвәзсиз рол ојнајыр (Ефес. 6:4). Анҹаг сиз валидејнләр үчүн сирр дејил ки, балаҹалар һәр шејдән тез безирләр. Белә исә, онларын фикри јајынмасын дејә нә етмәк олар? Ҝөрәк бәзи валидејнләр белә һалларда нә едирләр.
Калифорнијада (АБШ) јашајан Ҹорҹ адлы бир ата дејир: «Ушаглар бир аз балаҹа оланда јолдашымла мән һәр дәфә чалышырдыг ки, аиләви өјрәнмә ҹансыхыҹы кечмәсин. Бәзән һамымыз Мүгәддәс Китаб персонажлары кими ҝејиниб “Мүгәддәс Китаб һекајәләри” нәшриндәки һекајәләри охујуб сәһнәләшдирирдик. Һәтта бунун үчүн лазым олан әшјалар — гылынҹ, әса, сәбәт вә диҝәр шејләр дүзәлтмишдик. Һәмчинин “тап ҝөрүм мән кимәм” ојуну ојнајырдыг, бәзән исә садә вә мүрәккәб Мүгәддәс Китаб суалларындан ибарәт викторина кечирирдик. Бир дәфә Мүгәддәс Китабда Нуһун ҝәмиси һаггында јазыланлары арашдырыб ҝәминин макетини дүзәлтмишдик вә Мүгәддәс Китаб һадисәләринин ардыҹыллығыны ҝөстәрән заман хәтти чәкмишдик. Бәзән исә Мүгәддәс Китаб персонажларынын вә ја һадисәләринин шәклини чәкирдик. Һал-һазырда биз Ефеслиләрә 6:11—17 ајәләриндә бәһс олунан зиреһләри чәкмәк фикриндәјик. Бундан әлавә, һәр биримиз өз пајына дүшән зиреһин нәји тәмсил етдијини изаһ етмәлидир. Бу кими үсулларын сајәсиндә аиләви өјрәнмәмиз дарыхдырыҹы кечмир».
Мичиганда (АБШ) јашајан Деби адында бир ана исә дејир: «Гызымызын тәхминән үч јашы оланда әримлә мән онун диггәтини ҹәлб етмәкдә чәтинлик чәкирдик. Ҝүнләрин бир ҝүнү “Мүгәддәс Китаб һекајәләри” китабындан Исһагла Ребеканын әһвалатыны уҹадан охујаркән әлимә ики кукла ҝөтүрүб онларын, санки, бир-бирилә данышдығыны ҝөстәрмәјә башладым. О, диггәтлә, ҝөзүнү чәкмәдән гулаг асырды! Нөвбәти бир нечә ај әрзиндә бу куклалар диҝәр Мүгәддәс Китаб персонажларыны “ојнамышдылар”. Һекајәни охујуб гуртарандан сонра гызымыз евдә һәмин һекајәнин сәһнәләшдирилмәсиндә јарарлы олаҹаг ојунҹаглар вә әшјалар ахтармаға башлајырды. Бу, әсил хәзинә иди! Ајаггабы гутусу Раһабын евинә, гырмызы лент исә онун евиндән салланан ал рәнҝли ипә чеврилди. Сүпүрҝә сапына доланмыш бир метр јарым узунлуғунда ојунҹаг илан Сајлар 21:4—9 ајәләриндә бәһс олунан тунҹ илан үчүн чох мүнасиб иди. Биз бүтүн әшјалары бөјүк торбада сахлајырдыг. Бәзән гызымызын гонаг отағында отуруб “Мүгәддәс Китаб һекајәләри торбасы”ны ешәләдијини ҝөрүрдүк. Онун Мүгәддәс Китаб һекајәләрини ширин-ширин сәһнәләшдирдијини мүшаһидә етмәк неҹә дә хош иди!»
Ушаг бөјүтмәк, она тәлим-тәрбијә вермәк асан иш дејил. Валидејнләр өвладларынын үрәјиндә Јеһоваја хидмәт етмәк арзусуну аловландырмалыдырлар. Онлар буну һәр ҝүн вә мүхтәлиф үсулларла етмәлидирләр. Анҹаг һәфтәлик аиләви ибадәт вә Мүгәддәс Китаб өјрәнмәси валидејнләрә бу мәгсәдә чатмагда көмәк едән ваҹиб үсуллардан бәзиләридир. Шүбһәсиз, бунун үчүн сәј ҝөстәрмәјә дәјәр!