Ибраһим тәвазөкарлыг нүмунәси

Ибраһим ҝүнәшин гызмар чағында чадырын көлҝәсиндә отурур. Бирдән узагдан үч кишинин ҝәлдијини ҝөрүрa. Јубанмадан онларын јанына гачараг евинә дәвәт едир. Ибраһим онлара «бир парча чөрәк» кәсмәји тәклиф етдикдән сонра тәзә биширилмиш чөрәк, јағ, сүд вә көрпә бузов әтиндән ибарәт сүфрә һазырлајыр. Гонаглара бу сүфрәни ачмагла Ибраһим нәинки гејри-ади гонагпәрвәрлик, еләҹә дә, ҝөрәҹәјимиз кими, әсил тәвазөкарлыг ҝөстәрир (Јарадылыш 18:1—8).

ТӘВАЗӨКАРЛЫГ НӘДИР? Тәвазөкарлыг дикбашлығын вә мәғрурлуғун әксидир. Тәвазөкар адам гәбул едир ки, һәр кәс бу вә ја диҝәр саһәдә ондан үстүндүр (Филипилиләрә 2:3). Белә инсан башгаларынын тәклифләрини динләјир вә онларын рифаһы наминә бир о гәдәр дә нәзәрә чарпмајан иши ҝөрмәјә һазырдыр.

ИБРАҺИМ ТӘВАЗӨКАРЛЫҒЫ НЕҸӘ ҜӨСТӘРИРДИ? Ибраһим башгаларына севинҹлә гуллуг едирди. Јухарыда дејилдији кими, о, үч гонағын ҝәлдијини ҝөрәндә јубанмадан онларын еһтијаҹларыны өдәмәјә чалышды. Арвады Сара исә тез јемәк һазырламаға башлады. Сизҹә, ишин чох һиссәсини ҝөрән ким олду? Гачараг гонаглары гаршылајан, онлара чөрәк тәклиф едән, сүрүјә гачыб кәсмәк үчүн һејваны сечән вә сүфрәни ачан Ибраһим иди. Һәр шеји нөкәрләринә тапшырмаг әвәзинә, бу тәвазөкар инсан лазыми ишләри өзү ҝөрдү. О дүшүнмүрдү ки, башгаларына гуллуг она јарашан иш дејил.

Ибраһим онун табечилијиндә олан инсанларын тәклифинә гулаг асырды. Мүгәддәс Китабда Ибраһимлә Сара арасында олан үнсијјәтдән чох гыса парчалар ҝәтирилир. Мәсәлән, ики јердә јазылыб ки, Ибраһим Саранын тәклифинә гулаг асыб онлара ујғун давраныр (Јарадылыш 16:2; 21:8—14). Бу һадисәләрин бириндә Саранын тәклифи әввәлҹә Ибраһимин хошуна ҝәлмир. Амма Јеһова она арвадынын тәклифинин јахшы олдуғуну дејәндә о, тәвазөкарлыгла разылашыр вә һәмин тәклифи јеринә јетирир.

БУНДАН НӘ ӨЈРӘНӘ БИЛӘРИК? Әҝәр биз сөзүн әсил мәнасында тәвазөкар инсаныгса, башгаларына хидмәт етмәјә шад олаҹағыг. Онларын һәјатынын раһатлығы үчүн мәмнунијјәтлә әлимиздән ҝәләни едәҹәјик.

Башгаларынын тәклифләринә неҹә јанашмағымызла да тәвазөкар олдуғумузу ҝөстәрә биләрик. Диҝәрләринин фикри бизим фикримизлә үст-үстә дүшмәдији үчүн онлары садәҹә инкар етмәк әвәзинә, дедикләрини сәмимијјәтлә гәбул едә биләрик (Сүлејманын мәсәлләри 15:22). Башгаларынын фикрини нәзәрә алмаг сәлаһијјәтли инсанлара хүсусилә ваҹибдир. Нәзарәтчи кими ишләјән Ҹон дејир: «Фикир вермишәм ки, адәтән, јахшы нәзарәтчи инсанларын өз фикирләрини сәрбәст ифадә едә биләҹәкләри мүһит јарадыр». О әлавә едир: «Табечилијиндә олан инсанларын нәдәсә сәндән даһа баҹарыглы олдуғуну гәбул етмәк үчүн тәвазөкарлыг тәләб олунур. Һеч ким, һәтта нәзарәтчи дә дејә билмәз ки, јахшы фикирләри анҹаг о ирәли сүрә биләр».

Ибраһим кими, биз дә башгаларынын тәклифинә гулаг асыб онларын рифаһы наминә нәзәрә чарпмајан ишләри ҝөрүрүксә, Јеһованын лүтфүнү газанырыг. Ахы «Аллаһ мәғрурлара гаршы чыхыр, тәвазөкарлара исә лүтф ҝөстәрир» (1 Петер 5:5).

[Һашијә]