«Шәклимизи чәкә биләрсиниз?»

Мексика Бет-Елиндә хидмәт едән Ҹошуа адлы бир гардаш вилајәт конгресинин икинҹи ҝүнүндән сонра Гуеретаро шәһәринин ҝөрмәли јерләрини ҝәзмәјә чыхмышды. Колумбијадан турист кими ҝәлән Хавјер вә Мару адлы бир әр-арвад Ҹошуадан шәкилләрини чәкмәји хаһиш етди. Ҹошуа вә онун достларынын ҝејимләри сәлигәли иди вә јахаларына конгрес плакетләрини тахмышдылар. Буна ҝөрә дә әр-арвад фикирләшди ки, онлар бурахылыш ҝеҹәсиндән вә ја һансыса хүсуси мәрасимдән ҝәлирләр. Ҹошуа Јеһованын Шаһидләринин конгресиндә иштирак етдикләрини изаһ едиб онлары базар ҝүнү конгресә дәвәт етди.

Хавјерлә Мару фикирләшдиләр ки, белә бир мәрасим үчүн мүнасиб ҝејимдә дејилләр вә орада өзләрини сәрбәст һисс етмәјәҹәкләр. Буна бахмајараг, Ҹошуа онлара өз адыны деди вә хидмәт етдији филиалын телефон нөмрәсини верди.

Дөрд ајдан сонда Хавјер вә Марудан хәбәр ҝәләндә Ҹошуа тәәҹҹүбләнди. Әр-арвад һәмин конгресдә иштирак етмишди вә инди онлар истәјирдиләр ки, Јеһованын Шаһидләри о вахт јашадыглары Мехико шәһәриндә онлара баш чәксинләр. Тезликлә онларла Мүгәддәс Китаб өјрәнмәси башланды вә онлар дәрһал јығынҹаг ҝөрүшләриндә иштирак етмәјә башладылар. Он ајдан сонра Хавјерлә Мару тәблиғчи олдулар. Тезликлә онлар Канаданын Торонто шәһәринә көчмәли олсалар да, руһән тәрәгги едиб вәфтиз олдулар.

Бир гәдәр сонра Ҹошуа Хавјердән мәктуб алды. Бу мәктубда о, һәгигәти гәбул етмәјә ону нә тәшвиг етдијини јазмышды. О дејир: «Конгресдә иштирак етмәздән өнҹә арвадымла бирҝә руһани рәһбәрлијә еһтијаҹ дујдуғумуз барәдә сөһбәт едирдик. Сәнин сәлигәли ҝејимини ҝөрәндә фикирләшдик ки, сән, ола билсин, хүсуси бир ҝөрүшдән ҝәлирсән. Конгресдә киминсә бизә меһрибанлыгла јер тапмаға көмәк етмәси, Мүгәддәс Китабы изләмәји тәклиф етмәси, еләҹә дә иштиракчыларын давранышы бизә бөјүк тәәссүрат бағышламышды. Ҝөрүнүр, бизим турист кими ҝејинмәјимиз онлар үчүн әһәмијјәт кәсб етмирди».

Бурада мүдрик падшаһ Сүлејманын сөзләри неҹә дә јеринә дүшүр! О јазмышды: «Тохумуну сәһәр вахты сәп, ахшама гәдәр дә әлин бош дурмасын. Чүнки билмирсән ки, әввәлки мәһсулдар олаҹаг јохса сонракы јахуд һәр икиси бирликдә» (Ваиз 11:6). Башгаларыны конгресә вә мәрузәјә дәвәт етмәк имканындан истифадә едәрәк һәгигәт тохумуну сәпә биләрсәнми? Јеһова сәни Хавјер вә Мару кими руһани рәһбәрлијә сусајан инсанлары һәгигәтә ҹәлб етмәк үчүн истифадә едә биләр (Јешаја 55:1).

[32–ҹи сәһифәдәки шәкил]

Солдан саға: Алехандро Воҝелин, Мару Пинеда, Алехандро Пинеда, Хавјер Пинеда вә Ҹошуа Рамирес Мексика Бет-Елиндә