«Милләтләр биләҹәкләр ки, Мән Јеһовајам»

ӘҜӘР сизи төрәтмәдијиниз ҹинајәтә ҝөрә иттиһам етсәјдиләр, бу, сизә неҹә тәсир едәрди? Үстәлик, бу ҹинајәт, ҝүнаһсыз инсанлар да дахил олмагла, бир чохларынын һәјатыны зиндана чевирибсә, онда неҹә? Сөзсүз ки, адынызы тәмизә чыхармаг истәјәҹәксиниз! Аллаһ да ејни вәзијјәтлә үзләшир. Бу ҝүн чохлары дүнјада баш верән әдаләтсизлијә вә әзаб-әзијјәтләрә ҝөрә Аллаһы ҝүнаһландырараг Она шәр атырлар. Бәс Аллаһ Өз адыны тәмизә чыхараҹагмы? Әлбәттә ки! Ҝәлин «Језекел» китабында бу һагда дејиләнләри нәзәрдән кечирәк. (Језекел 39:7 ајәсини оху.)

«Артыг мүгәддәс адымын ләкәләнмәсинә изин вермәјәҹәјәм», — дејир Јеһова Аллаһ. Инсанлар һагсызлыглара ҝөрә Аллаһы ҝүнаһландыранда Онун адына ләкә јахмыш олурлар. Һансы тәрздә? Мүгәддәс Китабда «ад» сөзү алтында ад-сан, репутасија нәзәрдә тутулур. Бир арајыш китабында гејд олунур ки, Аллаһын ады дејилдикдә «Онун һагда мәлум олан, јәни Өзү барәдә ачыгладығы мәлуматлар нәзәрдә тутулур; һәмчинин бу ад Аллаһын шан-шөһрәтини вә шәрәфини тәмсил едир». Јараданымыз Јеһованын исми Онун ад-саныны еһтива едир. Јеһованын әдаләтсизлијә мүнасибәти барәдә нә мәлумдур? О, әдаләтсизлијә нифрәт едир! Үстәлик, Аллаһ һагсызлығын гурбаны оланларын һалына аҹыјырa (Чыхыш 22:22—24). Инсанлар Аллаһы Онун нифрәт етдији шејләрә ҝөрә ҝүнаһландыранда адыны ләкәләјир вә бу ада бөјүк һөрмәтсизлик етмиш олурлар (Мәзмур 74:10).

Фикир верин ки, Јеһова «мүгәддәс адым» ифадәсини ики дәфә истифадә едир (7-ҹи ајә). Мүгәддәс Китабда Јеһованын ады дәфәләрлә «мүгәддәс», «мүгәддәслик» сөзләри илә бағлы ишләдилир. «Мүгәддәс» сөзү ајры олмаг мәнасыны дашыјыр; һәмчинин бу, тәмизлијә вә паклыға ишарә едир. Јеһованын ады она ҝөрә мүгәддәсдир ки, бу ады дашыјан Күлли-Ихтијарын Өзү мүгәддәсдир, јәни ҝүнаһ вә натәмизлик Она тамамилә јаддыр. Инди баша дүшүрсүнүз, нијә писликләрә ҝөрә Јеһованы ҝүнаһландыранлар Онун «мүгәддәс адына» ән бөјүк шәр-бөһтаны атмыш олурлар?

Падшаһлығы, јәни сәмави һөкумәти васитәсилә Јеһованын Өз адыны тәмизә чыхармасы Мүгәддәс Китабын әсас мөвзусудур. Бу мөвзу «Језекел» китабында да вурғуланыр вә дәфәләрлә «милләтләр биләҹәкләр ки, Мән Јеһовајам» сөзләри тәкрарланыр (Језекел 36:23; 37:28; 38:23; 39:7, Јени Дүнја тәрҹүмәси). Диггәт јетирин ки, Јеһованы танымаг милләтләр үчүн сечим мәсәләси олмајаҹаг. Истәсәләр дә, истәмәсәләр дә, онлар Јеһованын ким олдуғуну «биләҹәкләр». Башга сөзләрлә десәк, Јеһова һәрәкәтә кечәндә милләтләр бир факты гәбул етмәк мәҹбуријјәтиндә галаҹаг: О, ким олдуғуну дејирсә, одур. О, ады мүгәддәс, пак вә тәмиз нә варса тәмсил едән Али Һөкмдар Јеһовадыр.

Тез-тез тәкрарланан «милләтләр биләҹәкләр ки, Мән Јеһовајам» вәди һагсызлыға вә әзаб-әзијјәтә сон гојулмасыны арзулајан инсанлар үчүн хош мүждәдир. Јеһова тезликлә бу вәди јеринә јетирәҹәк вә адыны тәмизә чыхараҹаг. Аллаһ пислији вә ону төрәдән һәр кәси мәһв едәҹәк, лакин Јеһованын адыны вә бу адын тәмсил етдији һәр шеји гәбул едән вә һөрмәт бәсләјән инсанлары хилас едәҹәк (Сүлејманын мәсәлләри 18:10). Өјрәндикләриниз үрәјиниздә әдаләти севән мүгәддәс Јеһова Аллаһа јахынлашмаг арзусуну аловландырмырмы? (Мәзмур 37:9—11, 28).