Онлардакы боллуг сиздәки әскиклији долдурур
ЕРАМЫЗЫН 49-ҹу или иди. «Јығынҹағын сүтунлары һесаб олунан» Петер, Јагуб вә Јәһја һәвари Павелә вә онун әмәкдашы Барнабаја тапшырыг вердиләр. Онлар башга милләтләрә тәблиғ едәркән касыб мәсиһчиләри дә унутмамалы идиләр (Галат. 2:9, 10). Онлар бу мәсулијјәтин өһдәсиндән неҹә ҝәлдиләр?
Павелин мәктублары ҝөстәрир ки, о, верилән бу тапшырыға мәсулијјәтлә јанашырды. Мисал үчүн, о, Коринфдән олан мәсиһчиләрә белә јазмышды: «Мүгәддәсләр үчүн топланылан мадди јардым мәсәләсинә ҝәлдикдә сиз дә Галатија јығынҹагларына вердијим ҝөстәришә әмәл един. Һәр һәфтәнин биринҹи ҝүнү һәр кәс евиндә имканына ҝөрә мүәјјән мигдарда пул ајырыб сахласын ки, мән ҝәләндә пул јығмаға башламајасыныз. Мән ҝәләндә мәктубларда мәсләһәт ҝөрдүјүнүз адамларын васитәсилә бәхшишинизи Јерусәлимә ҝөндәрәҹәјәм» (1 Кор. 16:1—3).
Коринфлиләрә јаздығы икинҹи мәктубунда Павел пул јығмаг мәсәләсинә јенидән гајыдараг демишди: «Инди сиздәки боллуг онлардакы әскиклији долдурсун» (2 Кор. 8:12—15).
Ерамызын тәхминән 56-ҹы илиндә Павел Ромадакы мәсиһчиләрә јазаркән пул јығымы, демәк олар ки, тамамланмышды. О демишди: «Мүгәддәсләрә хидмәт етмәк үчүн Јерусәлимә јола дүшүрәм. Македонија вә Ахајјадан олан гардашлар Јерусәлимдәки мүгәддәсләрин арасындакы касыблара әл тутмаг үчүн мәмнунијјәтлә бәхшиш һазырлајыблар» (Ром. 15:25, 26). Павелин бу тапшырығы дәрһал јеринә јетирдији Јерусәлимә гајытдыгдан вә орада һәбс олундугдан сонра Рома валиси Феликсә дедији сөзләрдән бәлли олур: «Јерусәлимә ҝәлдим ки, топланмыш ианәләри халгыма чатдырым» (Һәв. иш. 24:17).
Биринҹи әсрдәки мәсиһчиләрин неҹә әһвал-руһијјә тәзаһүр етдирдикләри Павелин македонијалылар барәдә дедији сөзләрдән ајдын ҝөрүнүр. О гејд етмишди ки, «онлар биздән бәхшишләрини гәбул етмәји... дөнә-дөнә хаһиш едирдиләр». Һәвари коринфлиләри онларын нүмунәсини изләмәјә тәшвиг едәрәк демишди: «Гој һәр кәс көнүлсүз вә ја мәҹбури дејил, үрәјиндә гәт етдији кими версин, ахы Аллаһ севинҹлә верәни севир». Јығынҹаглары бу ҹүр сәхавәт ҝөстәрмәјә нә тәшвиг едирди? Онлар «мүгәддәсләрин еһтијаҹларыны там өдәмәклә јанашы, Аллаһа едилән шүкүрләрлә долуб-дашыр»дылар (2 Кор. 8:4; 9:7, 12). Биз дә ејни нијјәтдән ирәли ҝәләрәк әлиачыглыг ҝөстәрмәлијик. Јеһова Аллаһ бу ҹүр ҝөзәл вә тәмәннасыз әһвал-руһијјәни мүтләг хејир-дуаландыраҹаг. Онун хејир-дуасы инсана әсил сәрвәт ҝәтирир (Сүл. мәс. 10:22).
[9–ҹу сәһифәдәки чәрчивә]
БӘЗИЛӘРИ НЕҸӘ ИАНӘ ЕДИРЛӘР?
ҮМУНДҮНЈА ИШИ ҮЧҮН ПУЛ ИАНЛӘРИ
Чохлары өз бүдҹәләриндән мүәјјән мигдарда пул ајырыр вә үзәриндә «Үмумдүнја иши үчүн ианәләр (Матта 24:14)» јазылан гутуја атырлар.
Јығынҹаглар бу көнүллү ианәләри һәр ај јерли филиала ҝөндәрир. Көнүллү едилән пул ианәләрини өлкәнизә бахан филиала ҝөндәрмәк олар. Зәһмәт олмаса, ианә илә бирликдә онун һәдијјә олдуғуну билдирән гыса мәктуб да ҝөндәрин.
ИАНӘНИН ДИҜӘР НӨВЛӘРИ
Бәзи өлкәләрдә үмумдүнја тәблиғ ишини дәстәкләмәк үчүн пул ианә етмәкдән савајы, башга үсуллар да вар. Онлардан бәзиләри бунлардыр:
Дашынмаз әмлак. Сатыша јарарлы олан дашынмаз әмлакы һәдијјә кими ја бирбаша филиала ианә етмәк олар, ја да һәдијјә едәнин өләнәдәк орада јашајыб әмлакына саһиблик һүгугуна малик олмаг шәртилә ианә етмәк олар. Өз әмлакынызы һәдијјә олараг филиала вермәк үчүн сәнәдләри һазырламаздан өнҹә, зәһмәт олмаса, филиалла әлагә сахлајын.
Вәсијјәтнамә. Әмлакы вә ја пулу ганунла мүәјјән олунмуш формада тәртиб едилән вәсијјәтнамә әсасында филиала вермәк олар. Белә олан һалда, зәһмәт олмаса, вәсијјәтнамәнин сурәтини филиала ҝөндәрин.