Аллаһы јахындан танымағын сизә һансы фајдалары олаҹаг?

Өтән мәгаләләрдә Аллаһла јахындан таныш олмаг үчүн мүәјјән мөвзулары арашдырдыг. Өјрәндик ки, Мүгәддәс Китаба әсасән Аллаһын ады Јеһовадыр, Онун ән әсас хүсусијјәти мәһәббәтдир. Һәмчинин Онун инсанларын рифаһы үчүн әввәлләр нәләр етдијини вә ҝәләҹәкдә нәләр едәҹәјини нәзәрдән кечирдик. Амма бунунла һәр шеј битмир. Аллаһ һаггында өјрәнмәли чох шеј вар. Сиздә суал јарана биләр ки, Аллаһ һаггында өјрәнмәјин сизә һансы фајдасы вар.

Јеһова Аллаһ вәд едир ки, Ону ахтарсаг, тапаҹағыг (1 Салнамәләр 28:9). Бир тәсәввүр един: Аллаһы ахтарсаныз, Ону јахындан танысаныз, Онун достлуғуну газанаҹагсыныз. Бундан гијмәтли нә ола биләр? (Зәбур 25:14). Бәс бу достлугдан нә әлдә едәҹәксиниз?

Һәгиги хошбәхтлик. Мүгәддәс Китабда дејилир ки, Јеһова хошбәхт Аллаһдыр (1 Тимутијә 1:11). Аллаһа јахынлашмаг, Онун дедији кими јашамаг сизи сөзүн әсл мәнасында хошбәхт едәҹәк, сизә емосионал, әгли вә физики фајдалар ҝәтирәҹәк (Зәбур 33:12). Аллаһ инсана һәмчинин пис һәјат тәрзиндән узаг дурмаға, фајдалы вәрдишләрә јијәләнмәјә, инсанларла јахшы мүнасибәт гурмаға көмәк едир. Бу исә сөзсүз ки, хошбәхтлијә јол ачыр. Белә јашадыгҹа Зәбур китабында јазылмыш сөзләр сизин үрәјиниздән хәбәр верәҹәк: «Мәнимчүнсә Аллаһа јахынлашмаг хошдур» (Зәбур 73:28).

Аллаһын шәхсән сизә олан гајғысы. Јеһова Аллаһ хидмәтчиләринә вәд едиб: «Сәнә нәсиһәт верәҹәјәм, ҝөзүм үстүндә олаҹаг» (Зәбур 32:8). Бу о демәкдир ки, Јеһова Аллаһ Шәхсән Өзү хидмәтчиләринә гајғы ҝөстәрир вә һәр биринин еһтијаҹыны ајры-ајрылыгда тәмин едир (Зәбур 139:1, 2). Јеһова Аллаһла јахшы мүнасибәтиниз јаранандан сонра ҝөрәҹәксиниз ки, О, һәмишә сизинләдир.

Ҝөзәл ҝәләҹәк. Инди хошбәхтлијә наил олмагла јанашы, Јеһова Аллаһ сизин үчүн ҝөзәл ҝәләҹәјә дә јол ачыр (Әшија 48:17, 18). Мүгәддәс Китабда дејилир: «Әбәди һәјат одур ки, Сәни, тәк ҝерчәк Аллаһы вә ҝөндәрдијин Иса Мәсиһи танысынлар» (Јәһја 17:3). Бу чәтин зәманәдә Аллаһын вердији үмид ҝәми лөвбәри кими бизи «мөһкәм вә сарсылмаз» сахлаја биләр (Ибраниләрә 6:19).

Бәли, Аллаһы јахындан танымаг үчүн, Онунла јахын мүнасибәт гурмаг үчүн чохлу сәбәбләр вар. Садаланан сәбәбләр онлардан ҹәми бир нечәсидир. Сизи даһа әтрафлы мәлумат алмаг үчүн Јеһованын Шаһидләри илә сөһбәт етмәјә вә ја jw.org сајтына дахил олмаға дәвәт едирик.