Ҝәлин, јахшылыг етмәјә сә’ј ҝөстәрәк!

¹ 2003-ҹү илин Хатирә Ҝеҹәси јахынлашыр вә бизим “јахшылыг етмәјә сә’ј” ҝөстәрмәјимиз үчүн чох сәбәбләримиз вар (1 Пет. 3:13). Бу сәбәбләрдән ән ваҹиби Иса Мәсиһин фидијә гурбанлығыдыр (Мат. 20:28; Јәһ. 3:16). Бу барәдә һәвари Петер јазырды: “Бош јашајыш тәрзиндән ҝүмүш јахуд гызыл кими фани шејләрлә дејил, гүсурсуз вә ләкәсиз гузуја бәнзәјән Мәсиһин гијмәтли ганы фидијәси илә хилас олдунуз” (1 Пет. 1:18, 19). Мәһәббәтин бу ҹүр әвәзсиз тәзаһүрүнә ҝөрә олан миннәтдарлыг һисси бизи јахшы ишләр ҝөрмәјә тәшвиг едир. Бу заман дәрк едирик ки, “Иса Өзүнү бизим үчүн фәда етди ки, бизи һәр ҹүр һагсызлыгдан хилас етсин вә тәмизләјиб, Өзүнә хүсуси вә јахшы ишләрә сә’јли бир халг төрәтсин” (Тит. 2:14; 2 Кор. 5:14, 15).

² Биз Аллаһа мәгбул олан ишләри ҝөрәндә, Онунла јахшы мүнасибәтә наил олур вә Онун мәһәббәтли һимајәси алтында јашајырыг. Петер давам едир: “Һәјаты севиб, јахшы ҝүнләр ҝөрмәк истәјән... шәрдән узаг олсун вә јахшылыг етсин, сүлһ ахтарсын вә онун ардынҹа гачсын. Чүнки Рәббин ҝөзләри салеһләрә, гулаглары онларын дуаларына тәрәф јөнәлмишдир” (1 Пет. 3:10-12). Бу ҹүр тәһлүкәли вахтларда Јеһованын бизим башымыза ҝәләнләри ҝөрдүјүнү, көмәјимизә ҝәлмәјә вә бизи “ҝөзүнүн бәбәји кими” горумаға һазыр олдуғуну билмәк неҹә дә бөјүк хејир-дуадыр! (Тәс. 32:10; 2 Тарих. 16:9).

³ Петерин мәктуб јаздығы илк мәсиһчиләр сә’ј ҝөстәрмәк руһу илә алышыб јаныр вә мүхтәлиф сынаглара бахмајараг, мүмкүн олан һәр јердә хош хәбәри бәјан едирдиләр (1 Пет. 1:6; 4:12). Ејни иши бу ҝүн Аллаһын халгы да јеринә јетирир. “Чәтин анлар”да јашасаг да, Јеһованын мәрһәмәтинә ҝөрә олан миннәтдарлығымыз бизи, Онун ирадәсини сә’јлә јеринә јетирмәјә тәшвиг едир (2 Тим. 3:1; Мәз. 145:7). Ҝәлин ҝөрәк Хатирә Ҝеҹәси дөврүндә һансы јахшы ишләри јеринә јетирә биләрик.

⁴ Башгаларыны Хатирә Ҝеҹәсинә дә’вәт ет. Бизим, фидијә ән’амына ҝөрә миннәтдарлығымызы билдирмәк, јә’ни бу ил апрелин 16-да, чәршәнбә ҝүнү ҝүнәшин батмасындан сонра Иса Мәсиһин өлүмүнүн бүтүн дүнјада гејд олунан Хатирә Ҝеҹәсиндә иштирак етмәк имканымыз вар (Лука 22:19, 20). Өтән ил бу мәрасимдә, бүтүн дүнја үзрә 94 600 јығынҹагда 15 597 746 нәфәр иштирак етмишдир! Бу сај, бир ил әввәл һәмин мәрасимдә иштирак едәнләрин сајындан 220 000 мин артыгдыр.

⁵ Хатирә Ҝеҹәсинә бу ил нә гәдәр адам ҝәләҹәк? Бу, бизим нә гәдәр адам дә’вәт едәҹәјимиздән асылыдыр. Нөвбәти аддымдан башла: дә’вәт етмәк истәдијин адамларын сијаһысыны тут. Әввәлҹә аилә үзвләринин адыны јаз. Әҝәр әрин вә ја арвадын сәнин иманына шәрик дејилсә, һәјат јолдашына Хатирә Ҝеҹәсинә онунла бирликдә ҝетмәк истәдијини сөјлә. Бир баҹымызын иманына шәрик олмајан әри деди ки, Хатирә Ҝеҹәсиндә иштирак етмәсинин арвады үчүн бөјүк мә’на дашыдығына ҝөрә кечән ил бу мәрасимә ҝәлмишдир. Сонра һәмин сијаһыја гоһумларыны, гоншуларыны, иш вә ја мәктәб јолдашларыны сала биләрсән. Мүгәддәс Китабы өјрәтдијин адамлары да мүтләг дә’вәт ет.

⁶ Сијаһыны тутдугдан сонра, һәмин адамлары дә’вәт етмәк үчүн вахт ајыр. Бу заман Хатирә Ҝеҹәсинин чап олунмуш дә’вәтнамәләриндән истифадә ет. Дә’вәт олунанлар бајрамын нә заман вә һарада кечириләҹәјини унутмасынлар дејә, мә’луматы дә’вәтнамәнин ашағы тәрәфиндә ја јазы машынында чап ет, ја да чап һәрфләри илә јаз. Апрел ајынын 16-на јахын дә’вәт етдијин адамлара баш чәк, ја да телефон васитәсилә Ҝеҹәнин кечириләҹәји јер вә вахт һаггында јаддашлыг ет. Ҝәлин, бу ваҹиб һадисәдә иштирак етмәкдә баҹардыгҹа даһа чох адамлара көмәк едәк!

⁷ Хатирә Ҝеҹәсинә ҝәләнләрә көмәк ет. Хатирә Ҝеҹәси һәмишә һәјәҹанландырыҹы һадисәдир. Адәтән ҝөрүшләримиздә иштирак етмәјән адамлары бу ҝөрүшә дә’вәт етмәк имканымыз вар. Шәраитдән асылы олараг, вахтындан әввәл ҝәлмәји вә ҝөрүш гуртарандан сонра бир гәдәр ҝеҹ ҝетмәји планлашдыр. Јени ҝәләнләрә өзүн јахынлаш вә онларла таныш ол. Сәмими вә гонагпәрвәр олмаға чалыш (Ром. 12:13).

⁸ Ҝеҹәдә иштирак едәнләрин Мүгәддәс Китаб өјрәнмәси васитәсилә сонракы руһани инкишафына көмәк етмәк олармы? Һал-һазырда һеч кимин баш чәкмәдији адамларын адыны вә үнваныны јаз, о заман онларын гајғысына гала биләрсән. Әҝәр онлара гајғы илә лазыми јардымы ҝөстәрсәк, онлардан бә’зиләри ҝәлән Хатирә Ҝеҹәсинә гәдәр вәфтиз олунмамыш тәблиғчи ола биләрләр. Хатирә Ҝеҹәсиндә оланлара баш чәкәрәк, онлары апрел ајынын 27-дә сөјләнәҹәк хүсуси мә’рузәни динләмәјә дә’вәт ет.

⁹ Бу јаз көмәкчи пионер кими хидмәт едә биләрсәнми? Јеһова үчүн олан сә’јимиз бизи һәр ил бу ајлар әрзиндә хүсуси фәалијјәтдә вар гүввәмизлә хидмәт етмәјә тәшвиг едир. Мәсәлән, өтән ил март вә апрел ајларында Азәрбајҹанда орта һесабла 24 тәблиғчи көмәкчи пионер кими хидмәт етмишдир. Хатирә Ҝеҹәси кечирилән дөврдә бүтүн јығынҹағын хош хәбәри мүштәрәк тәрздә сә’јлә тәблиғ етмәк ҹәһди ҝөзәл нәтиҹәләр һасил едә биләр.

¹⁰ 107 тәблиғчиси вә 9 пионери олан бир јығынҹаг үчүн өтән илин апрел ајы “гејри-ади ај” олмушдур. Һәмин вахт, ағсаггаллар вә хидмәти көмәкчиләрин һамысы дахил олмагла 53 тәблиғчи, көмәкчи пионер кими хидмәт етмишдир. Һәмин ај ағсаггаллар тәблиғчиләрдә көмәкчи пионер хидмәтинә бу ҹүр ҝүҹлү сә’ји неҹә алышдыра билмишләр? Онлар буна әввәлҹәдән, мүмкүн олан һәр бир кәси әризә јазмаға тәшвиг едәрәк наил олмушлар. Тәблиғ хидмәти үчүн ҝөрүшләр ҝүн әрзиндә мүхтәлиф вахтларда кечирилирди ки, јығынҹағын бүтүн үзвләри үчүн раһат олсун. Хүсусилә телефон васитәсилә чох шаһидлик едирдиләр, буну әләлхүсус да јашлы вә хәстә тәблиғчиләр едирди.

¹¹ Сәһһәти илә әлагәдар јеријә билмәјән 86 јашлы бир баҹы көмәкчи пионер хидмәти үчүн әризә јазмышды. Сәһәр вахты мәтбәх столу архасында отуруб телефонла ики саата јахын тәблиғ едир, сонра бир нечә саат динҹәлир вә јенидән мәтбәхә гајыдыб, даһа бир мүддәт тәблиғ едирди. Бир гадына зәнҝ едәркән, баҹы өјрәнди ки, һәмин гадын сон ики ил әрзиндә әрини вә ики јенијетмә оғлуну итириб. Гадын, Аллаһын бу ҹүр һадисәләрә нә үчүн јол вердијини анлаја билмирди. Баҹы она јахшы шаһидлик верди вә онунла Мүгәддәс Китаб өјрәнмәси башлады. Ахшам вахтлары телефонла шаһидлик етмәк, евдән-едә хидмәт етмәк мүмкүн олмајан әразиләрдә вә ја биналарда јашајан инсанларла әлагә јаратмаг үчүн ҝөзәл үсулдур. Бу үсул һәм дә ҝүнорта вахты, демәк олар ки, евдә олмајан инсанлары тапмаға имкан верир.

¹² Һәмин јығынҹағын ағсаггаллары белә јазмышлар: “Бу ајлар бизим үчүн чох ҝөзәл кечди. Биз Јеһоваја, гаршымызда ачдығы ҝениш имканлар, һәмчинин бизә вердији бол хејир-дуалар үчүн миннәтдарыг”. Мүнасиб планлашдырма сајәсиндә сизин јығынҹағыныз да бу ҹүр хејир-дуалардан һәзз ала биләр.

¹³ Хидмәтдә 100 фаиз иштирак етмәк мәгсәди. Аллаһа вә јахынларымыза олан мәһәббәтимиз, хош хәбәри башгалары илә бөлүшмәк үчүн бизи һәр ај вахты сатын алмаға тәшвиг едир (Мат. 22:37-39). Јығынҹағын китабөјрәнмә нәзарәтчиләри вә онларын көмәкчиләри групларында олан тәблиғчиләрә хидмәтдә һәр ај иштирак етмәјә көмәк етмәлидирләр. Буну етмәјин ҝөзәл үсулу, групун ајры-ајры тәблиғчиләри үчүн бирҝә хидмәт тәшкил етмәкдир. Буну ајын ахырында дејил, әввәлиндә етмәк јахшы оларды. О заман онлара гајғы илә јардым етмәјә чохлу имкан јаранаҹагдыр.

¹⁴ Сизин китабөјрәнмәдә, хидмәтдә иштирак ­етмәјә чәтинлик чәкән јашлы вә ја хәстә тәблиғчиләр вармы? Әҝәр онлардан һансыса гоҹалар евиндә јашајыр вә ја евиндән чыхмырса, ајдындыр ки, онларын шаһидлик етмәк имканлары мәһдуд олаҹаг. Лакин буна бахмајараг, нурларынын парламасына имкан верәрләрсә, еһтимал ки, онларын јахшы ишләрини ҝөрәнләр һәгигәтә сәмими мараг ҝөстәрәҹәкләр (Мат. 5:16). Китабөјрәнмә нәзарәтчиләри әмин олмалыдырлар ки, бу ҹүр тәблиғчиләр, 15 дәгигәдән аз олмамаг шәртилә тәблиғ хидмәти һаггында һесабат вермәк имканларынын олмасындан хәбәрдардырлар. Хидмәт барәдә мүнтәзәм олараг һесабат вермәклә бу садиг хидмәтчиләр севинҹ вә мәмнунлуг дујаҹаглар. Бу онлары руһландыраҹаг, һәмчинин Аллаһын халгынын фәалијјәти барәсиндәки һесабатын дәгиг олмасына көмәк едәҹәк.

¹⁵ Јахшы ишләрә сә’ј ҝөстәрән ҝәнҹләр. Өз гүввәләрини вә енержиләрини Јеһоваја хидмәтә һәср едән мәсиһчи ҝәнҹләрини ҝөрмәк неҹә дә тәравәтләндириҹидир! (Сүл. мәс. 20:29). Әҝәр сән ҝәнҹсәнсә, бу хүсуси ајларда Јеһоваја хидмәтә олан сә’јини неҹә ҝөстәрә биләрсән?

¹⁶ Әҝәр һәлә тәблиғчи дејилсәнсә, буна наил ола биләр­сәнми? Өзүнә бу ҹүр суаллар вер: Мүгәддәс Китаб һәгигәтинин әсас биликләрини мәнимсәмишәмми? Мәсиһчи хидмәтиндә иштирак етмәк истәјирәмми? Давранышым барәдә нә демәк олар? Башгаларына хош хәбәри данышмагла иманымы тәзаһүр етдирмәји баҹарыраммы? Буну етмәјә мәни үрәјимми тәшвиг едир? Әҝәр бу суаллара мүсбәт ҹаваб верә билирсәнсә, онда тәблиғчи олмаг арзуну валидејнләринә билдир. Валидејнләрин исә хидмәти комитәнин ағсаггалларындан биринә мүраҹиәт едә биләрләр.

¹⁷ Әҝәр сән артыг хош хәбәрин тәблиғчисисәнсә, тә’тил заманы хидмәтини ҝенишләндирә биләрсәнми? Вәфтиз олунмуш бир чох ҝәнҹләр јахшы график гурмагла, валидејнләринин вә башга тәблиғчиләрин көмәји илә көмәкчи пионер кими хидмәт етмишләр. Әҝәр бу мүмкүн дејилсә, онда хидмәтдә даһа чох иштирак етмәјә гәти гәрарлы ол. Гаршына конкрет мәгсәд гој. Мәгсәд јалныз мүәјјән саат тәблиғ етмәкдән дејил, һәмчинин хидмәтинин кејфијјәтини јахшылашдырмагдан ибарәт ола биләр. Мисал үчүн, бу ҹүр мәгсәдләрә ҹан атмаг олар: һәр гапынын ағзында Мүгәддәс Китаб ајәси охумаг, тәкрар башчәкмәләри јахшылашдырмаг, Мүгәддәс Китаб өјрәнмәси башламаг, һәмчинин телефон васитәсилә, ја да хидмәтин башга нөвләриндә иштирак етмәк. Бу ил Хатирә Ҝеҹәсинә гоншуну, мәктәб јолдашыны вә ја гоһумуну дә’вәт етмәк мәгсәди барәдә нә демәк олар? Теократик фәалијјәтдә даһа фәал иштиракымыз мүкафатландырыҹы олаҹаг вә шүбһәсиз ки, јығынҹагда башгаларыны да руһландыраҹаг (1 Салон. 5:11).

¹⁸ Јени ҝәләнләрә руһән бөјүмәкдә көмәк ет. Өтән хидмәт или әрзиндә Азәрбајҹанда һәр ај орта һесабла 383 Мүгәддәс Китаб өјрәнмәси кечирилмишдир. Вахт өтдүкҹә Мүгәддәс Китабы өјрәнәнләрдән әксәријјәти һәср олунмаға вә вәфтиз едилмәјә һазыр олаҹаглар. Лакин онлар бу мәгсәдә наил олана гәдәр биз онлара хош хәбәрин тәблиғчиләри олмагда көмәк етмәлијик. Бу, Иса Мәсиһин јени шаҝирдләрини һазырламагда ваҹиб аддымдыр (Мат. 9:9; Лука 6:40). Сәнин мәшғул олдуғун кәсләр бу аддымы атмаға һазырдырлармы?

¹⁹ Мүгәддәс Китабы өјрәтдијин адамын наилијјәтләр едиб-етмәдијинә әмин дејилсәнсә, көмәк үчүн китабөјрәнмәнин нәзарәтчисинә вә ја хидмәти нәзарәтчијә мүраҹиәт ет. Онлардан бирини һәмин өјрәнмәјә дә’вәт ет. Бу гардашлар, Мүгәддәс Китабы өјрәнән адамын руһани наилијјәтләрини гијмәтләндирмәкдә бөјүк тәҹрүбәјә маликдирләр. Еһтимал ки, онлар һәмин адамын руһән инкишаф етмәси үчүн лазыми мәсләһәт верәҹәкләр.

²⁰ Мүгәддәс Китабы өјрәнән адам вәфтиз олунмамыш тәблиғчи олмаг истәјирсә вә сән онун буна һазыр олдуғуну дүшүнүрсәнсә, бу барәдә сәдрлик едән нәзарәтчи илә даныш. Һәмин гардаш гајғы ҝөстәрәҹәкдир ки, сизинлә ики ағсаггал ҝөрүшсүн вә “Хидмәтимиз” китабынын (рус.) 98, 99-ҹу сәһифәләриндәки мә’лумата әсасән, тәблиғчи олмаг истәјән кәсин лазыми тәләбләрә мүвафиг олуб-олмадығыны мүәјјән етсинләр. (“Ҝөзәтчи Гүлләси”нин 1989-ҹу ил 15 сентјабр сајынын (рус.) 13, 14-ҹү сәһифәләринә бах.) Ағсаггаллар өјрәнән адамы тәблиғчи олмаға лајиг ҝөрсәләр, сән дәрһал ону өјрәтмәјә башламалысан. Һәмин адам тәблиғ һаггында һесабат верәндә, онун вәфтиз олунмамыш тәблиғчи олмасы барәдә јығынҹагда е’лан едиләҹәк. Үмидварыг ки, бу хүсуси фәалијјәт ајларында минләрлә јени — һәм ҝәнҹ, һәм дә јашлы тәблиғчиләри саламлаја биләҹәјик.

²¹ Ән јахшы ишләри јеринә јетирмәк үчүн план гурмаг лазымдыр. Хатирә Ҝеҹәси дөврүндәки теократик фәалијјәтимизин мүвәффәгијјәтли олмасы, габагҹадан план гурмағымыздан асылыдыр (Сүл. мәс. 21:5). Ағсаггаллар бөјүк һазырлыг иши ҝөрмәлидирләр.

²² Тәблиғчиләр хидмәтдә даһа чох иштирак едә билсинләр дејә ағсаггаллар һәфтәнин бүтүн ҝүнләри, һәтта шәнбә вә базар ҝүнләри әрзиндә тәблиғ хидмәти үчүн ҝөрүшләр тәшкил етмәлидирләр. Бу саһәдә хидмәти нәзарәтчи гајғы ҝөстәрмәлидир. Сәһәр еркән, наһардан сонра вә ахшамүстү әлавә ҝөрүшләр тәшкил етмәк олмазмы? Бу ҝөрүшләр барәдә јығынҹагда мүвафиг е’ланлар олунмалыдыр. Тәблиғ хидмәти үчүн ҝөрүшләрин сијаһысыны е’ланлар лөвһәсинә дә асмаг лазымдыр.

²³ Ағсаггаллар апрелин 16-а гәдәр Хатирә Ҝеҹәси үчүн мүвафиг һазырлыг ҝөрмәлидирләр. Мисал үчүн, әҝәр һәмин Падшаһлыг Залында бир нечә јығынҹаг ҝөрүш кечирирсә, онларла ҝөрүшләрин ардыҹыллығы барәдә данышмаг, Залын јығышдырылмасыны тәшкил етмәк, хидмәтчиләри, символлары һазырлајанлары, һәмчинин бајрам заманы онлары тәгдим едән гардашлары тә’јин етмәк лазымдыр. Ҝеҹәнин кечириләҹәји вахт вә јер барәдә, һәмчинин һәмин һәфтә ҝөрүшләрин ҹәдвәлиндә баш верән мүхтәлиф дәјишикликләр барәдә јығынҹаға хәбәр вермәк лазымдыр. Бүтүн бунлар јеринә јетириләрсә, бајрам “әдәблә вә низамла” кечәҹәк (1 Кор. 14:40).

²⁴ Аилә башчылары, јәгин ки, аиләви өјрәнмәнин бир һиссәсини Хатирә Ҝеҹәси дөврүндә хидмәтләрини неҹә ҝенишләндирә биләҹәкләрини мүзакирә етмәјә ајыраҹаглар. Аиләнин бүтүн үзвләри көмәкчи пионер кими хидмәт едә биләрми? Мүмкүн дејилсә, аиләнин диҝәр үзвләри, көмәкчи пионер кими хидмәт едән бир, јахуд бир нечә үзвүнү дәстәкләјә биләрми? Әҝәр бу да мүмкүн дејилсә, аиләнин гаршысына хидмәтдә даһа чох иштирак етмәк мәгсәди гоја биләрсән. Аиләнизин јенијетмә үзвләриндән ким исә руһландырыларса вә онлара көмәк едиләрсә вәфтиз олунмамыш тәблиғчи ола биләрми? Сизин аилә Хатирә Ҝеҹәсинә бу ил нә гәдәр адам дә’вәт едә биләр? Јахшы план гурмаг, сизин аиләјә чохлу хејир-дуа вә севинҹ ҝәтирәҹәк.

²⁵ Галан вахтдан мүдрикликлә истифадә ет. Һәвари Петер өзүнүн биринҹи мәктубунда биринҹи әсрин мәсиһчиләринә хатырладырды ки, Јәһуди системи сонуна јахынлашдығы үчүн вахтдан лазыми тәрздә истифадә етсинләр (1 Пет. 4:7). Бу ҝүн баш верән һәр шеј ҝөстәрир ки, мөвҹуд олан системин ахырына лап аз галыб. Һәјат тәрзимиз ҝөстәрмәлидир ки, бу һәгигәтән дә беләдир. Јеһованын сә’ј ҝөстәрән хидмәтчиләри кими диггәтимизи хош хәбәрин тәблиғ едилмәси ишинә јөнәлтмәлијик (Тит. 2:13, 14).

²⁶ Һал-һазырда сә’ј ҝөстәрмәк вә фәал олмаг вахтыдыр! Јеһованын сәнин, аилә үзвләрин вә јығынҹаг үчүн етдикләри үзәриндә дүшүн. Бизә вердији хејир-дуаларын әвәзини һеч заман гајтара билмәсәк дә, Она хидмәтимизи үрәкдән јеринә јетирә биләрик (Мәз. 116:12-14). Бизим сә’јимизә јухарыдан хејир-дуа вериләҹәк (Сүл. мәс. 10:22). Ҝәлин, фәал хидмәтин хүсуси дөврү әрзиндә јахшы ишә сә’ј ҝөстәрәк ки, “Аллаһ, һәр шејдә Иса Мәсиһ васитәсилә иззәт газансын” (1 Пет. 3:13; 4:11).

[3 сәһифәдәки чәрчивә]

Бүтүн дүнја үзрә Ҝеҹәјә ҝәләнләрин сајы

1999 14 088 751

2000 14 872 086

2001 15 374 986

2002 15 597 746

[4 сәһифәдәки чәрчивә]

Хатирә Ҝеҹәсинә кимләри дә’вәт едәҹәксән?

□ Аилә үзвләрини вә гоһумларыны

□ Гоншулары вә танышлары

□ Иш вә мәктәб јолдашларыны

□ Тәкрар баш чәкдијин вә Мүгәддәс Китабы өјрәтдијин адамлары

[5 сәһифәдәки чәрчивә]

Хатирә Ҝеҹәсинә ҝәләнләрә көмәк ет

□ Сәмими гәлбдән гаршыла

□ Ҝеҹәдән сонра онлара баш чәк

□ Онлара Мүгәддәс Китабы өјрәнмәји тәклиф ет

□ Онлары хүсуси мә’рузәјә дә’вәт ет

[5 сәһифәдәки чәрчивә]

Хатирә Ҝеҹәси дөврүндә һансы мәгсәдләрин вар?

□ Хатирә Ҝеҹәсинә кими исә дә’вәт етмәк

□ Хош хәбәрин тәблиғчиси олмаг

□ Хидмәтә мүәјјән вахт һәср етмәк

□ Хидмәтин мүәјјән нөвләриндә тәкмилләшмәк

□ Көмәкчи пионер кими хидмәт етмәк