Рәһбәрлик шурасынын мәктубу

Биз јени системин астанасында дурдуғумуз үчүн ојаг дурмалы вә Јеһованы ҝөзләмәлијик (Сеф. 3:8). Даниел пејғәмбәр Јеһованы «ҝәләҹәкдә нә олаҹағыны» билдирән, «сирләри ачан бир Аллаһ» адландырмышды (Дан. 2:28). Габагҹадан хәбәр верилмиш дөврүн сонунда јашамаг вә Јеһованын инди ачыгладығы «сирләри» баша дүшмәк неҹә дә бөјүк шәрәфдир!

Јеһова бу нараһат «ахыр ҝүнләрдә» бүтүн милләтләрдән Она садиг олан ‘бөјүк издиһамы’ топламаг нијјәтини «садиг вә ағыллы гул»ун васитәсилә тәдриҹән ачыглады (Мат. 24:45; Вәһј 7:9; 2 Тим. 3:1). Јешаја 2:2, 3 ајәләриндә бу үмумдүнја фәалијјәтинин «сон ҝүнләрдә» баш верәҹәји дејилмишдир. Дүнјада зоракылыг вә гарышыглыг һөкм сүрүр, лакин буна бахмајараг бичин иши давам едир.

2004-ҹү хидмәт илиндә Исанын «Ојаг дурун... Һазыр олун» сөзләринә табе олмағын ваҹиблији дәфәләрлә хатырланмышдыр (Мат. 24:42, 44). Дүнјада баш верән һадисәләр «дөврүн әламәтләрини» анлајан вә буна ујғун һәрәкәт едән мәсиһчиләр үчүн бөјүк әһәмијјәт кәсб едир (Мат. 16:1-3). Өз Сөзүнә садиг олан Јеһова, теократик ҹәһәтдән тәшкил олунмуш халгынын үзләшдији чәтинликләрдән асылы олмајараг, она көмәк етмәјә давам едәҹәк.

Падшаһлыг һаггында тәблиғ ишини дајандырмаг вә ја манечилик төрәтмәк истәјән бә’зи инсанларын сә’јләринә бахмајараг, бизим баҹы-гардашларымыз һәгигәти бәјан етмәјә вә бир јерә јығылмаға давам едирләр (Һәв. иш. 5:19, 20; Ибр. 10:24, 25). Русијанын Москва шәһәринин кассасија мәһкәмәси 2004-ҹү илин ијун ајында бу шәһәрдә Јеһованын Шаһидләринин фәалијјәтинин гадаған едилмәси вә онларын һүгуги органынын ләғв едилмәси барәдә ашағы мәһкәмә тәрәфиндән гәбул едилән гәрары тәсдигләмишдир. Лакин бу гәрар гардашлары горхутмады: онлар Јеһованын онлардан нә тәләб етдијини билир вә инсанлардан артыг, Аллаһа итаәт едирләр (Һәв. иш. 5:29). Биз әминик ки, мәһкәмәнин бизим әлејһимизә гәрар гәбул етмәсинә бахмајараг, Јеһова Өз хидмәтчиләринә рәһбәрлик ҝөстәрмәјә давам едәҹәк.

Сон бир нечә ил әрзиндә Ҝүрҹүстан Республикасында баҹы-гардашларымыз әмлакларындан мәһрум олмуш, гәзәбли издиһамын һүҹумларына мә’руз галмыш вә һәмчинин әдәбијјатлары јандырылмышдыр. Амма онлара гаршы ишләнән һеч бир силаһ мүвәффәгијјәтли олмамышдыр (Јешаја 54:17). 2004-ҹү хидмәт илиндә Јеһованын Шаһидләри Ҝүрҹүстанда јенидән рәсми гејдијјатдан кечмишләр. Конгресләр манеәсиз кечирилир, әдәбијјат исә өлкәјә сәрбәст сурәтдә дахил олур. Тәблиғчиләрин вә Хатирә Ҝеҹәсинә ҝәләнләрин јени јүксәк сајы гејдә алынмышдыр.

Еритрејада, Ермәнистанда, Кореја Республикасында, Руандада вә Түркмәнистанда гардашлары иманларына ҝөрә һәбс едирләр. Онларла пис рәфтар едилдијинә бахмајараг, бу сынагларын онларла нә үчүн баш вермәсинин Мүгәддәс Китаба әсасланан сәбәбини билирләр. Бу, онлара Јеһоваја садиг галмаға вә Јеһованын онлара гуртулуш верәҹәји вахты ҝөзләмәјә көмәк едир (1 Пет. 1:6; 2 Пет. 2:9).

«Ҝөзәтчи Гүлләси»нин 1 феврал сајында чап едилмиш 2004-ҹү илин хидмәт һесабатыны нәзәрдән кечирәрәк, Јеһованын ҝөстәрдији хејирхаһлыға севинәҹәксиниз (Мәз. 31:19; 65:11). Үмид едирик ки, бу һесабат сизи Аллаһын бәјәндији јолла ҝетмәкдә давам етмәјә тәшвиг едәҹәк (1 Салон. 4:1).

Һәгигәтин бүтүн инсанлара чатмасы үчүн бир чох ишләр ҝөрүлмәкдәдир. Мәсәлән, кар вә кор инсанларын руһани ҹәһәтдән инкишаф етмәләри үчүн жест дилиндә видеофилмләр вә ДВД-дә видеофилмләр бурахылыр вә Брајл шрифтилә мүхтәлиф әдәбијјатлар чап едилир. Бир чох тәблиғчиләр онларын јығынҹағынын саһәсиндә јашајан мүһаҹирләрин данышдығы дилләри өјрәнмишләр.

Бундан башга, узаг әразиләрдә јүзләрлә груплар тәшкил едилиб. Филиаллардан биринин нәздиндә 7 000-дән чох тәблиғчиси олан 300-дән артыг белә груп вар. Һәлә нә гәдәр јығынҹаг тәшкил едилә биләр! Бундан савајы, өтән ил Хатирә Ҝеҹәсинә ҝәлән 16 760 607 нәфәрин 10 милјондан чоху Јеһованын Шаһиди олмајан кәсләрдир. Ҝөрдүјүмүз кими һәлә даһа чох мәһсул јығымы ҝөзләнилир!

Јеһованын бизә вердији бол хејир-дуалара вә мәһәббәтлә ҝүндән-ҝүнә гајғымыза галмаг үчүн етдији һәр шејә ҝөрә Она тәшәккүр едирик (Сүл. мәс. 10:22; Мал. 3:10; 1 Пет. 5:7). Бу «ахыр ҝүнләрдә» Јеһоваја там е’тибар едәрәк биз бирҝә ирәлијә доғру ҝедирик. Һансы чәтинликләрлә гаршылашмағымыздан асылы олмајараг, ҝәлин 2005-ҹи ил үчүн олан: «Јардымым... Јеһовадандыр» иллик ајәсини бүтүн үрәкдән гәбул едәк (Мәз. 121:2, ЈД). Әмин олун ки, биз сизи севир вә сизин үчүн дуа едирик.

Сизин гардашларыныз,

Јеһованын Шаһидләринин Рәһбәрлик шурасы