Өвладыныза тәвазөкар олмағы өјрәдин

ТӘВАЗӨКАР ОЛМАГ НӘ ДЕМӘКДИР?

Тәвазөкар инсанлар һөрмәтҹил олурлар. Онлар тәкәббүрлә давранмырлар, башгаларындан да өзләринә гаршы хүсуси һөрмәт ҝөзләмирләр. Тәвазөкар инсан башгаларынын рифаһыны дүшүнүр вә билмәдијини башгаларындан өјрәнир.

Бәзән тәвазөкарлығы зәифлик кими гәбул едирләр. Әслиндә исә сәһвини бојнуна алмаг, мәһдудијјәтини баша дүшмәк үчүн инсана ҝүҹ лазымдыр.

ТӘВАЗӨКАР ОЛМАГ НӘ ҮЧҮН ВАҸИБДИР?

• Тәвазөкарлыг мүнасибәтләри мөһкәмләндирир. «Нарсизм епидемијасы» адлы бир китабда дејилир: «Тәвазөкар инсанлара башгалары илә достлашмаг асан олур». Бу китабда һәмчинин јазылыб ки, «белә инсанлар асанлыгла башгаларына гајнајыб-гарышыр, үнсијјәт гурур».

• Тәвазөкарлыг өвладыныза ҝәләҹәкдә көмәк едәҹәк. Тәвазөкар олмаг өвладыныза һәм инди, һәм дә ҝәләҹәкдә, мәсәлән, иш ахтаранда көмәк едәҹәк. Доктор Леонард Сакс јазыр: «Өз гүсурларындан бихәбәр олан өзүндәнразы ҝәнҹ чәтин ки, иш мүсаһибәсиндән јахшы кечсин. Лакин мүсаһибә ҝөтүрәнин шәртләри илә марагланан ҝәнҹ, чох ҝүман ки, ишә ҝөтүрүләҹәк»a.

ТӘВАЗӨКАР ОЛМАҒЫ НЕҸӘ ӨЈРӘТМӘЛИ?

Өвладыныза өзүнә таразлы јанашмағы өјрәдин.

МҮГӘДДӘС КИТАБ ПРИНСИПИ: «Өзү бир шеј олмаја-олмаја, өзү һаггында јүксәк фикирдә олан инсан өзүнү алдадыр» (Галатијалылара 6:3).

• Өвладынызы хәјаллар аләминдә бөјүтмәјин. «Бүтүн арзуларын чин олаҹаг», «Үрәјин истәјән вәзифәни тутаҹагсан» кими сөзләр руһландырыҹы сәсләнир. Амма һәјатда һәр шеј башга ҹүр олур. Өвладларыныз гаршыларына ағлабатан мәгсәдләр гојуб, онлара чатмаг үчүн чалышсалар, даһа чох уғур газанаҹаглар.

• Конкрет һәрәкәтләрә ҝөрә тәрифләјин. Ушағы јерсиз јерә тәрифләмәк онда тәвазөкарлыг хүсусијјәти јетишдирмәјәҹәк. Ону конкрет һансыса һәрәкәтинә ҝөрә тәрифләјин.

• Сосиал шәбәкәләрдән истифадәсини мәһдудлашдырын. Чох вахт сосиал шәбәкәләрдә инсанлар өз истедадларыны вә наилијјәтләрини реклам едирләр. Бу исә тәвазөкарлығын там әксидир.

• Өвладыныза үзр истәмәји өјрәдин. Она сәһвини баша салын вә сәһвини бојнуна алмағы өјрәдин.

Миннәтдарлыг ашылајын.

МҮГӘДДӘС КИТАБ ПРИНСИПИ: «Шүкүр едәнләрдән олун» (Колослулара 3:15).

• Јарадылыша ҝөрә миннәтдарлыг. Ушаглар тәбиәти гијмәтләндирмәли вә һәјатымызын тәбиәтдән асылы олдуғуну баша дүшмәлидирләр. Бизә нәфәс алмаға һава, ичмәјә су, јемәјә гида лазымдыр. Бу нүмунәләрлә өвладыныза тәбиәтдә олан мөҹүзәләрә ҝөрә миннәтдарлыг, еһтирам ашылајын.

• Инсанлара миннәтдарлыг. Өвладыныза хатырладын ки, һәр кәс бу вә ја диҝәр саһәдә ондан үстүндүр. Ушаг башгаларынын баҹарыг вә габилијјәтләринә пахыллыг етмәк әвәзинә, онлардан өјрәнә биләр.

• Миннәтдарлығы ифадә етмәк. Өвладыныза садәҹә «чох сағ ол» демәји јох, үрәкдән миннәтдарлыг билдирмәји өјрәдин. Миннәтдар олмаг тәвазөкар галмаг үчүн чох ваҹибдир.

Өвладларыныза јахшылыг етмәјин ваҹиблијини өјрәдин.

МҮГӘДДӘС КИТАБ ПРИНСИПИ: «Тәвазөкар олуб башгаларыны өзүнүздән үстүн сајын. Тәкҹә өзүнүзү фикирләшмәјин, башгаларыны да фикирләшин» (Филиппилиләрә 2:3, 4).

• Өвладыныза ев ишләри ҝөрдүрүн. Ушағы ев ишләриндән азад едәндә онда белә бир тәәссүрат јараныр ки, онун өз ишләри бу ишләрдән ваҹибдир. Биринҹи нөвбәдә ев ишләри ҝәлмәлидир, сонра ојнамаг. Ев ишләрини ҝөрмәјин аиләнин диҝәр үзвләринә фајдасыны баша салын вә бу ишләри ҝөрдүјүнә ҝөрә онларын ушаға һөрмәт етдијини, онун зәһмәтини дәјәрләндирдијини вурғулајын.

• Јахшылыг етмәјин шәрәф олдуғуну изаһ един. Јахшылыг етмәк ушағын јеткинләшмәси үчүн ваҹибдир. Буна ҝөрә дә өвладынызы тәшвиг един ки, кимин көмәјә еһтијаҹы олдуғуну ҝөрмәјә чалышсын. Ушаг башгасы үчүн нәсә едәндә ону тәрифләјин вә дәстәкләјин.