Фәсил 4
Һәлә әрдә олмајан гыз һамиләдир
МӘРЈӘМ үч ај олар ки, һамиләдир. Билдијимиз кими, о, тәзәҹә һамилә оланда Елизабетин јанына ҝетмишди. Инди исә Назаретә, евинә гајыдыб. Доғма шәһәриндә тезликлә һамы онун һамиләлији һаггында хәбәр тутаҹаг. О чох мүшкүл бир вәзијјәтдәдир!
Үстәлик, Мәрјәмин дүлҝәр Јусифә нишанлы олмағы онун вәзијјәтини лап чәтинләшдирир. О, јахшы билир ки, нишанлы гыз башга киши илә јахынлыг едәрсә, Аллаһын Исраилә вердији гануна әсасән, дашгалаг едилмәлидир. Бәс Мәрјәм һамилә олдуғуну Јусифә неҹә изаһ едәҹәк?
Мәрјәм үч ај бурада олмадығындан, шүбһәсиз ки, Јусиф ону һәсрәтлә ҝөзләјир. Онлар ҝөрүшәндә Мәрјәм нә баш вердијини она данышыр. Әлбәттә, о, Аллаһын мүгәддәс руһу васитәсилә һамилә олдуғуну изаһ етмәјә чалышыр. Лакин буна инанмаг Јусиф үчүн һеч дә асан дејил.
Јусиф билир ки, Мәрјәм исмәтли гыздыр вә сөзсүз ки, бу гызы үрәкдән севир. Анҹаг Мәрјәмин бүтүн изаһатына бахмајараг, Јусифә јенә дә елә ҝәлир ки, нишанлысы башга кишидән һамиләдир. Бунунла белә, Јусиф Мәрјәмин дашланыб өлдүрүлмәсини, јахуд ел ичиндә рүсвај олмасыны истәмир. Буна ҝөрә дә ҝизлиҹә ону бошамаг истәјир. О вахтлар нишанлы олмаг евлилик кими сајылырды вә нишаны гајтармаг үчүн бошанмаг лазым ҝәлирди.
Јусиф бу барәдә ҝөтүр-гој едә-едә јухуја далыр. Јухуда Јеһованын мәләји она ҝөрүнүб дејир: «Арвадын Мәрјәми евинә ҝәтирмәјә горхма, чүнки о, бәтниндәки ушаға мүгәддәс руһ васитәсилә һамилә галыб. Мәрјәм бир оғлан ушағы доғаҹаг, ушағын адыны Иса гојарсан, чүнки о, халгыны ҝүнаһлардан хилас едәҹәк».
Тәсәввүр едирсиниз, Јусиф јухудан ојананда Аллаһа нә гәдәр миннәтдардыр! О, ләнҝимәдән мәләјин дедикләрини иҹра едир вә Мәрјәми өз евинә ҝәтирир. Ачыг-ашкар атылан бу аддым рәсми никаһын гурулдуғуну билдирир. Беләликлә, Јусифлә Мәрјәм артыг әр-арваддырлар. Амма Мәрјәм Исаны доғана гәдәр Јусиф онунла јахынлыг етмир.
Артыг Мәрјәмин һамиләлији лап ағырлашыб, лакин онлар јола чыхмаға һазырлашырлар. Будур, Јусиф ону ешшәјә миндирир. Ҝөрәсән, онлар һара ҝедирләр? Нә үчүн онлар мәһз Мәрјәмин һамиләлијинин бу сон мәрһәләсиндә јола чыхырлар? Лука 1:39—41, 56; Матта 1:18—25; Ганунун тәкрары 22:23, 24.
▪ Јусиф Мәрјәмин һамилә олдуғуну биләндә һансы һиссләри кечирир вә нә үчүн?
▪ Јусиф Мәрјәмлә никаһда олмадығы һалда ону неҹә бошаја биләрди?
▪ Һансы аддым Јусифлә Мәрјәмин никаһ гурдуғуну билдирир?