Фәсил 9

Исанын ушаглығы

ИСА Назаретдә — балаҹа бир шәһәрдә бөјүјүр. Бу шәһәр Галилеја адланан дағлыг бөлҝәдә, фүсункар Изреел вадисинин јахынлығында јерләшир.

Јусифлә Мәрјәм Мисирдән гајыданда Исанын тәхминән ики јашы вар иди вә ҝөрүнүр, һәмин вахт о, Мәрјәмин јеҝанә ушағы иди. Лакин бир аздан Јусифлә Мәрјәмин Јагуб, Јусиф, Шимон вә Јәһуда адлы оғланлары доғулур. Онларын һәмчинин гызлары да олур. Беләликлә, Исанын јашҹа ондан кичик, ән азындан алты баҹы-гардашы вар.

Исанын башга гоһумлары да вар. Биз артыг билирик ки, узаг Јәһудејада Исанын ондан бир аз бөјүк олан гоһуму Јәһја јашајыр. Бундан әлавә, ҝөрүнүр, Мәрјәмин доғма баҹысы да вар. Онун ады Саломедир вә о, әри Зебедеј, оғуллары Јагуб вә Јәһја илә бирҝә бурада, Галилејада јашајыр. Бу ушаглар Исаја халаоғлу ҝәлир. Онларын ушаглыгда бир-бириләринә нә гәдәр јахын олдугларыны биз билмирик, амма сонралар јахын дост олурлар.

Јусиф ҝет-ҝедә бөјүјән аиләсини доландырмаг үчүн чох ишләјир. О, дүлҝәрдир. Јусиф Исаны доғма оғлу кими бөјүдүр, буна ҝөрә дә Исаја «дүлҝәр оғлу» дејирләр. Јусиф Исаја дүлҝәрлик пешәсини өјрәдир. Иса бу сәнәтә јахшы јијәләнир, белә ки, сонралар адамлар онун һаггында: «Бу дүлҝәрдир», — дејирләр.

Јеһова Аллаһа ибадәт Јусифин аиләсиндә башлыҹа јер тутур. Јусиф вә Мәрјәм Аллаһын Ганунуна мүвафиг олараг ушагларына «отуранда, јол ҝедәндә, јатанда, дуранда» руһани тәрбијә верирләр. Назарет шәһәриндә синагог вар вә шүбһәсиз, Јусиф аиләси илә бирликдә мүнтәзәм шәкилдә ора ибадәтә ҝедир. Лакин әминликлә демәк олар ки, һәр ил Јеһованын Јерусәлимдәки мәбәдинә зијарәт онлара мисилсиз севинҹ ҝәтирир. Матта 13:55, 56; 27:56; Марк 15:40; 6:3; Ганунун тәкрары 6:6—9.

▪ Исанын ән азы нечә баҹы-гардашы вар вә онун гардашларынын ады нәдир?

▪ Исанын үч мәшһур оғлан гоһуму кимләрдир?

▪ Иса һансы сәнәтә јијәләнир вә нәјә ҝөрә?

▪ Јусиф аиләсинин руһани тәләбатларынын гајғысына неҹә галыр?