Фәсил 11

Јәһја јол һазырлајыр

ОН ИКИ јашлы Исанын мәбәддә мүәллимләрлә сөһбәт етдији вахтдан артыг 17 ил кечиб. Инди ерамызын 29-ҹу илидир. Јенә дә баһардыр. Исанын гоһуму олан Јәһја Иорданбоју әразиләрдә тәблиғ едир вә онун ады дилләр әзбәри олуб.

Јәһја һеч дә ади адам дејил. О, дәвә јунундан һазырланмыш палтар ҝејиб, белинә дәри гуршаг бағламышдыр; о, чәјирткә вә чөл балы илә гидаланыр. Јәһја бәјан едир: «Төвбә един, чүнки сәмави падшаһлыг јахынлашыр».

Бу сөзләри ешидәнләрин үрәји риггәтә ҝәлир. Чохлары анлајыр ки, төвбә етмәк, јәни дүшүнҹә тәрзини дәјишиб әввәлки һәјат јолундан әл чәкмәк лазымдыр. Бүтүн Иорданбоју әразиләрдән, һәтта Јерусәлимдән ҹамаат ахышыб Јәһјанын јанына ҝәлир. Јәһја онлары Иордан чајында суја батырыб чыхармагла вәфтиз едир. Бу нәдән өтрүдүр?

Адамлар Аллаһын вердији Ганунун әһдинә гаршы ҝүнаһ ишләдикләрини дәрк едир вә пешман олуб үрәкдән төвбә етдикләрини ҝөстәрмәк үчүн Јәһјанын јанына ҝәлиб вәфтиз олунурлар. Јәһуди дин хадимләри олан фәрисеј вә садукејләрдән дә бәзиләри вәфтиз олмаг үчүн Иордан чајына ҝәләндә Јәһја онлары мүһакимә едир: «Еј әфи илан балалары... Төвбәјә јарашан бәһрәләр ҝәтирин вә “Атамыз Ибраһимдир”, — дејиб, өзүнүзү архајынлашдырмајын. Буну билин ки, Аллаһ истәсә, Ибраһимә бу дашлардан да өвлад јарада биләр. Артыг балта ағаҹларын дибинә гојулуб; јарарсыз мејвә ҝәтирән ағаҹ кәсилиб ода атылаҹаг».

Јәһјанын диггәт мәркәзиндә олдуғуну ҝөрән јәһудиләр каһин вә левилиләри, јәни мәбәддә хидмәт едән кишиләри онун јанына ҝөндәрирләр. Онлар ҝәлиб сорушурлар:

— Сән кимсән?

— Мән Мәсиһ дејиләм, — дејә Јәһја етираф едир.

— Бәс онда кимсән? Олмаја Илјассан?

— Хејр.

— Бәлкә ҝөзләдијимиз Пејғәмбәрсән?

— Јох.

— Ахы сән кимсән? Өзүн һаггында бир шеј де ки, бизи ҝөндәрәнләрә ҹаваб верә биләк.

— Мән Јешаја пејғәмбәрин дедији кими сәһрада: «Јеһованын јолуну һамарлајын!» — гышгыран ҹарчыјам.

— Әҝәр сән нә Мәсиһ, нә Илјас, нә дә ҝөзләдијимиз Пејғәмбәр дејилсәнсә, бәс онда нәјә ҝөрә вәфтиз едирсән?

— Мән суда вәфтиз едирәм. Лакин аранызда бир нәфәр вар, сиз ону танымырсыныз. О, мәндән сонра ҝәлир.

Јәһја јол һазырлајыр. О, Мәсиһи, ҝәләҹәк Падшаһы гәбул етмәләри үчүн инсанлары дүзҝүн јола чағырыр. Јәһја ҝәләҹәк Мәсиһ һаггында белә дејир: «Мәндән сонра ҝәлән мәндән гат-гат ҝүҹлүдүр. Мән онун ајағындан сәндәлини чыхартмаға белә лајиг дејиләм» вә «мәндән сонра ҝәлән мәндән габаға кечди, чүнки о, мәндән әввәл вар иди».

Беләликлә, Јәһја: «Сәмави падшаһлыг јахынлашыр», — дејәрәк Јеһованын тәјин етдији Падшаһын, Иса Мәсиһин тезликлә хидмәтә башлајаҹағыны бәјан едир. Јәһја 1:6—8, 15—28; Матта 3:1—12; Лука 3:1—18; Һәвариләрин ишләри 19:4.

▪ Јәһја неҹә адамдыр?

▪ Јәһја инсанлары нә үчүн вәфтиз едир?

▪ Падшаһлығын јахынлашдығыны демәклә Јәһја нәдән хәбәр верир?