Фәсил 12

Иса вәфтиз олур

АЛТЫ ај олар ки, Јәһја тәблиғ ишинә башлајыб. Инди 30 јашында олан Иса Иордан чајына, Јәһјанын јанына ҝәлир. Ҝөрәсән, бу ҝәлишин сәбәби нәдир? Бәлкә о гонаг ҝәлиб? Јохса Јәһјанын ишләри илә марагланмаг истәјир? Хејр, Иса вәфтиз олунмаг үчүн ҝәлиб.

Јәһја Исаја дејир: «Мәни сән вәфтиз етмәлисән, сән исә мәним јаныма ҝәлирсән?» Јәһја билир ки, онун гоһуму олан Иса Аллаһын оғуллары арасында мәхсуси јер тутур. Хатырлајаг ки, Мәрјәм Исаја һамилә оларкән онлара ҝәләндә ана бәтниндә олан Јәһја севинҹиндән тәрпәнмишди. Шүбһәсиз, анасы Елизабет сонралар буну оғлуна сөјләмишди. Јәгин, Елизабет бунлары да данышмышды ки, бир мәләк Исанын доғулаҹағы һаггында хәбәр ҝәтирмиш вә Иса доғулан ҝеҹә мәләкләр чобанлара ҝөрүнмүшдү.

Бәли, Јәһја Исанын ким олдуғуну билир. Јәһја буну да билир ки, онун етдији вәфтиз Исаја аид дејил. Бу вәфтиз ҝүнаһларындан төвбә едәнләр үчүндүр, Иса исә ҝүнаһсыздыр. Бунунла белә, Иса тәкид едир: «Мәни сахлама, чүнки беләҹә биз бүтүн салеһ ишләри јеринә јетирмәлијик».

Бәс Иса нә үчүн вәфтиз олунмалыдыр? Она ҝүнаһлардан төвбә етмәк лазым дејил, о вәфтиз олунмагла өзүнү Јеһова Аллаһын нијјәтини һәјата кечирмәк үчүн тәгдим едир. Бу вахта гәдәр Иса дүлҝәрлик едирди, инди исә хидмәтә башламаг вахтыдыр. Јеһова Аллаһ ону јер үзүнә мәһз бундан өтрү ҝөндәриб. Инди, Иса вәфтиз олунанда Јәһја гејри-ади бир шеј ҝөзләјир. Ҝөрәсән, нә баш верәҹәк?

Јәһја сонрадан данышырды: «Мәни суда вәфтиз етмәјә ҝөндәрән Аллаһ деди: “Мүгәддәс руһун кимин үзәринә ениб галдығыны ҝөрсән, бил ки, мүгәддәс руһла вәфтиз едән одур”». Јәһја билирди ки, Аллаһын мүгәддәс руһу вәфтиз олунанлардан биринин башына гонмалыдыр. Иса судан чыхан заман белә дә олур, Јәһјанын ҝөзләри гаршысында «мүгәддәс руһ ҝөјәрчин кими» Исанын үзәринә енир.

Исанын вәфтизи заманы диҝәр һејрәтамиз шејләр дә баш верир. Һәмин вахт ҝөјләр она ачылыр. Нә үчүн? Ола билсин, Иса вәфтиз олунанда әввәлләр ҝөјдә руһани варлыг кими јашадығы вахты вә һәмин вахтлар Јеһова Аллаһын она өјрәтдији бүтүн шејләри јадына салыр.

Бундан әлавә, Иса вәфтиз оланда ҝөјдән бир сәс бәјан едир: «Бу, Мәним севимли Оғлумдур, Мән ондан чох разыјам». Бу сәс киминдир? Јарадан Аллаһын. Бәли, Аллаһ Өзү шәһадәт верир ки, Иса Онун Оғлудур. Ашағыда ҝөрәҹәјик ки, бу бәјанатын хүсуси мәнасы вар.

Иса ҝөјдә оларкән Аллаһын мәләк оғлу иди. Јердә Иса Аллаһын инсан оғлудур, неҹә ки, Адәм Аллаһын оғлу иди. Исанын вәфтизини тәсвир едән мүждәчи Лука буну шәрһ едир: «Иса хидмәтә башлајанда тәгрибән отуз јашында иди. Белә һесаб едирдиләр ки, о, Јусифин оғлу иди. Јусиф Һелинин оғлу,.. Давудун,.. Ибраһимин,.. Нуһун,.. Адәмин [оғлу иди]. Адәм Аллаһын оғлу иди». Ахы Адәми билаваситә Аллаһ јаратмышды.

Бәли, Иса да Адәм кими «Аллаһын оғлу», јәни инсан оғлу иди. Исанын һәјаты илә таныш олдугҹа онун гејри-ади бир инсан олдуғуну ҝөрәҹәјик! Бунунла бәрабәр, Иса вәфтиз олдугда онунла Аллаһ арасындакы мүнасибәт јени ахар алды, јәни о, Аллаһын руһани оғлу олду. Бу андан етибарән Аллаһ Исаны јени бир һәјат јолуна јөнәлтди вә бу һәјатын сонунда о, өз ҹаныны мәһкумијјәт алтында олан бәшәријјәт үчүн гурбан верәҹәкди. Беләҹә, демәк олар ки, Аллаһ она ҝөјләр дәвәти верди. Матта 3:13—17; Лука 3:21—38; 1:34—36, 44; 2:10—14; Јәһја 1:32—34; Ибраниләрә 10:5—9.

▪ Јәһја Иса һаггында һарадан билирди?

▪ Иса һеч бир ҝүнаһ ишләмәдији һалда нә үчүн вәфтиз олур?

▪ Јәһја Исанын вәфтизи илә әлагәдар нә ҝөзләјирди?