Фәсил 17
Иса Мәсиһ вә Никодим
ҺӘМИН ил Пасха бајрамы әрзиндә Иса Мәсиһ чохлу мөҹүзәләр ҝөстәрир. Бунун нәтиҹәсиндә хејли адам она инаныр. Никодим адлы бир јәһуди бу ишләрдән һејрәтә ҝәлиб вә даһа чох өјрәнмәк истәјир. О, Јәһудиләрин али мәһкәмәси олан Синедрионун үзвүдүр. Никодим ҝеҹә вахты, гаранлыг оланда Исанын јанына ҝәлир. Јәгин, о, јәһуди рәһбәрләри арасында ҝөздән дүшмәкдән горхур.
Никодим сөзә башлајыр: «Мүәллим, биз билирик ки, сән Аллаһын бизә јолладығы мүәллимсән, чүнки Аллаһ сәнинлә олмасајды, сән бу мөҹүзәләри ҝөстәрә билмәздин». Иса она ҹаваб вериб дејир ки, «инсан јенидән доғулмаса, Аллаһын падшаһлығыны ҝөрә билмәз».
Бәс адам јенидән неҹә доғула биләр? Никодим Исадан сорушур: «Мәҝәр о, анасынын бәтнинә ҝириб икинҹи дәфә доғула биләр?»
Хејр, јенидән доғулмаг тамам башга мәна дашыјыр. Иса изаһ едир: «Судан вә руһдан доғулмајан Аллаһын падшаһлығына ҝирә билмәз». Иса өзү дә вәфтиз едиләндә белә олмушду. Мүгәддәс руһ онун үзәринә енмиш вә о, «судан вә руһдан» доғулмушду. О заман Аллаһ ҝөјдән: «Бу, Мәним севимли Оғлумдур, Мән ондан чох разыјам», — демәклә сәмави Падшаһлыға ҝирәҹәк руһани оғлуну мејдана ҝәтирмишди. Сонралар, 33-ҹү илин «Әллинҹи ҝүн бајрамы»нда вәфтиз олунмуш диҝәр адамлар да мүгәддәс руһу алаҹаг вә Аллаһын јенидән доғулмуш руһани өвладлары олаҹагдылар.
Иса Мәсиһ Аллаһын мәсһ олунмуш оғуллары арасында хүсуси јер тутур вә онун ролу чох өнәмлидир. Иса Никодимә дејир: «Муса сәһрада иланы јухары галдырдығы кими, инсан Оғлу да јухары галдырылмалыдыр ки, она иман едән һәр адамын әбәди һәјаты олсун». Гәдимдә исраиллиләр сәһрадан кечәркән кими илан чалардыса, сағ галмаг үчүн мисдән дүзәлдилмиш илана бахмалы иди. Еләҹә дә, өлүмдән јаха гуртармаг үчүн инсанлар Аллаһын Оғлуна иман ҝәтирмәлидирләр.
Иса бу хилас ишиндә севән Аллаһын ролуну вурғулајараг Никодимә белә дејир: «Аллаһ дүнјаны о гәдәр севир ки, јеҝанә Оғлуну онун уғрунда гурбан верди; буну она ҝөрә етди ки, она иман едәнләрин һеч бири мәһв олмасын, һамысы әбәди јашасын». Беләликлә, Иса хидмәтә башламасындан ҹәми алты ај кечмиш, бурада, Јерусәлимдә ајдынҹа ҝөстәрир ки, Јеһова Аллаһ мәһз онун васитәсилә бәшәријјәти хилас едәҹәк.
Иса сөзүнә давам едир. О дејир ки, «Аллаһ Өз Оғлуну бәшәријјәтә һөкм етмәк үчүн», јәни дүнјаны мәһкум едиб бәшәр нәслини мәһв етмәк үчүн ҝөндәрмәјиб. Әксинә, Аллаһ ону бәшәријјәти «хилас етмәк үчүн дүнјаја ҝөндәрмишдир».
Никодим, ону ҝөрмәсинләр дејә, Исанын јанына ҝеҹә вахты ҝәлиб. Буна ҝөрә дә сөһбәтин сонунда Исанын дедији сөзләр лап јеринә дүшүр: «Һөкм үчүн әсас будур: нур [Исанын өзү вә тәлимләри тимсалында] дүнјаја ҝәлди, инсанлар исә нуру јох, гаранлығы севдиләр, чүнки әмәлләри пис иди. Пис иш ҝөрән нура нифрәт едир вә әмәлләри ифша олунмасын дејә нура доғру ҝетмир. Салеһ адам исә нура тәрәф ҝедир ки, әмәлләринин Аллаһын ирадәсинә мүвафиг олдуғу ҝөрүнсүн». Јәһја 2:23—3:21; Матта 3:16, 17; Һәвариләрин ишләри 2:1—4; Сајлар 21:9.
▪ Никодими Исанын јанына ҝәлмәјә нә тәшвиг едир вә нәјә ҝөрә о, ҝеҹә вахты ҝәлир?
▪ «Јенидән доғулмаг» нә демәкдир?
▪ Иса бәшәријјәтин хиласында өз ролуну һансы мисалла ҝөстәрир?
▪ Иса дүнјаја нә үчүн ҝәлиб?