Фәсил 20
Кана шәһәриндә икинҹи мөҹүзә
ЈӘҺУДЕЈАДАКЫ ҝениш тәблиғ ишиндән сонра Иса Мәсиһ доғма јерләрә гајыдыр. Лакин о, бура динҹәлмәк үчүн ҝәлмәјиб. Иса бурада, Галилејада даһа бөјүк тәблиғ ишинә башлајыр. Шаҝирдләри исә ондан ајрылыб өз евләринә гајыдыр вә әввәлки пешәләри илә мәшғул олурлар.
Иса һансы мөвзуда тәблиғ едир? О дејир: «Вахт јетишди, Аллаһын падшаһлығы јахындыр. Төвбә един вә хош хәбәрә инанын». Бәс бу хәбәр бурада неҹә гаршыланыр? Галилејалылар Исаны гәбул едир, она һөрмәт-иззәт ҝөстәрирләр, амма буну хош хәбәрә ҝөрә етмирләр. Онлардан чоху бир нечә ај бундан әввәл Јерусәлимдә, Пасха бајрамында оларкән Исанын мөҹүзәләрини ҝөрмүшдүләр, она ҝөрә дә ону белә јахшы гаршылајырлар.
Ҝөрүнүр, Иса Мәсиһ Галилејадакы ҝенишмигјаслы тәблиғ ишинә Кана шәһәриндән башлајыр. Јадыныздадырса, бир мүддәт бундан әввәл Иса Јәһудејадан гајыдан баш бурада, тој зијафәтиндә сују шәраба чевирмишди. Бу сәфәрки ҝәлиш заманы башга һадисә олур. Падшаһ Һирод Антипанын бир наибинин оғлу бәрк хәстәләнир. Исанын Јәһудејадан Кана шәһәринә ҝәлдијини ешидән наиб Исаны тапмаг үчүн бирбаша Капернаһумдан бура ҝәлир. Дәрд-гәм ичиндә олан бу ата Исаја јалварыр: «Аға, нә олар, ҝәл ҝедәк, гојма оғлум өлсүн».
Иса она дејир: «Ҝет, оғлун сағалды». Наиб Исанын сөзүнә инаныр вә ҝеријә, Капернаһума гајыдыр. Һәлә јолда икән нөкәрләри севинә-севинә ҝәлиб ушағын сағалдығыны она чатдырырлар! Наиб онлардан ушағын нә вахт сағалдығыны сорушур.
Онлар дејирләр: «Дүнән ҝүнорта саат бир оларды».
Наиб баша дүшүр ки, ушаг Исанын: «Оғлун сағалды», — дедији вахтда сағалыб. Бундан сонра наибин өзү вә бүтүн ев әһли Иса Мәсиһин давамчысы олур.
Иса Јәһудејадан Канаја гајыданда ики дәфә мөҹүзә ҝөстәрмәклә бу шәһәри шәрәфләндирир. Әлбәттә, бунлар Исанын бу вахта гәдәр ҝөстәрдији мөҹүзәләрин һамысы дејилдир. Садәҹә бу мөҹүзәләр Иса Мәсиһин Галилејаја гајытмасы илә бағлы олдуғу үчүн вурғуланыр.
Иса инди Назаретә, евинә ҝедир. Ону орада нә ҝөзләјир? Јәһја 4:43—54; Марк 1:14, 15; Лука 4:14, 15.
▪ Иса Галилејаја гајыданда шаҝирдләр һара ҝедирләр вә нә илә мәшғул олурлар? Галилејалылар Исаны неҹә гәбул едирләр?
▪ Иса һансы мөҹүзәни ҝөстәрир вә бунун нәтиҹәсиндә нә олур?
▪ Кана һансы шәрәфә лајиг ҝөрүлүр?