Фәсил 24
Иса Мәсиһ јер үзүнә нә үчүн ҝәлмишдир?
О ҜҮНҮ Капернаһумда Исаҝилин иши башдан ашырды. Үстәлик, ахшамүстү ҹамаат хәстәләри Исанын јанына ҝәтирмәјә башлады. Онларын тәкликдә галыб динҹәлмәјә вахтлары олмамышды.
Инди исә сәһәрдир. Иса алагаранлыгдан дуруб чөлә чыхыр. О, Јарадана, сәмави Атасына дуа етмәк үчүн кимсәсиз бир јерә ҝедир. Бир аздан Петер вә башгалары ҝөрәндә ки, Иса јохдур, дуруб ону ахтармаға башлајырлар.
Онлар Исаны тапанда Петер дејир: «Һамы сәни ахтарыр». Капернаһум әһли Исанын мөҹүзә илә ҝөрдүјү хејирхаһ ишләрә ҝөрә чох миннәтдардыр вә истәјир ки, о, бурада галсын. Ҝөрәсән, Иса нә дејәҹәк? Ахы о, јер үзүнә тәкҹә мөҹүзә ҝөстәрмәк, адамлары сағалтмаг үчүн ҝәлмәјиб.
Инҹилдән мәлум олур ки, Иса шаҝирдләринә белә дејир: «Ҝәлин башга јерә, бу јахын кәндләрә ҝедәк ки, мән хош хәбәри ораларда да тәблиғ едим, ахы мән бунун үчүн ҝәлмишәм». Ҹамаат јалвар-јахар едиб ону сахламаг истәјир, амма Иса онлара дејир: «Мән Аллаһын падшаһлығы һаггында хош хәбәри башга шәһәрләрә дә бәјан етмәлијәм, ахы Аллаһ мәни бу иш үчүн ҝөндәриб».
Бәли, Иса Мәсиһ илк нөвбәдә јерә Аллаһын Падшаһлығы барәдә тәблиғ етмәк үчүн ҝәлиб. Бу Падшаһлыг онун сәмави Атасынын адыны уҹалдаҹаг вә бәшәријјәтә гуртулуш ҝәтирәҹәк. Мөҹүзә илә вердији шәфалар исә онун Аллаһ тәрәфиндән ҝөндәрилдијини тәсдиг едир. Бундан бир нечә әср әввәл јашамыш Муса пејғәмбәр дә Аллаһын гулу олдуғуну мөҹүзәләрлә сүбут етмишди.
Иса Капернаһумдан чыхыб тәблиғ етмәк үчүн башга шәһәрләрә ҝедир. Дөрд шаҝирд — Петерлә гардашы Андреас, Јәһја вә гардашы Јагуб ону мүшајиәт едирләр. Јадыныздадырса, бир һәфтә бундан габаг Иса онлары өзү илә тәблиғ ишинә чағырмышды вә бу шаҝирдләр онун илк әмәкдашлары олдулар.
Иса бу дөрд шаҝирди илә Галилејаны ҝәзә-ҝәзә тәблиғ едир вә бу тәблиғ чох уғурлу алыныр. Исанын ҝөрдүјү ишләрин сорағы һәтта ҝедиб Суријаја чатыр. Галилејадан, Јәһудејадан вә Иордан чајынын о бири тајындан чохлу адам Исаҝилин ардынҹа ҝедир. Марк 1:35—39; Лука 4:42, 43; Матта 4:23—25; Чыхыш 4:1—9, 30, 31.
▪ Капернаһумдакы һадисәләрлә долу ҝүндән сонракы ҝүн неҹә башлајыр?
▪ Иса Мәсиһ јер үзүнә нә үчүн ҝөндәрилиб вә онун мөҹүзәләри нәји тәсдиг едир?
▪ Галилеја әразисиндәки тәблиғ заманы Исаны кимләр мүшајиәт едир вә онун ҝөрдүјү ишләрә неҹә һај верилир?