Фәсил 25
Иса ҹүзамлыја шәфгәт ҝөстәрир
ИСА МӘСИҺ дөрд шаҝирди илә Галилејанын шәһәрләрини ҝәзәркән ҝөрдүјү хејирхаһ ишләрин сәси бүтүн бөлҝәјә јајылыр. Бир шәһәрдә ҹүзамлы бир адам олур. О да Иса һаггында ешидир. Һәким Лука јаздығы «Хош хәбәр»дә о адамын «башдан-ајағадәк ҹүзам ичиндә» олдуғуну ҝөстәрир. Бу горхунҹ хәстәлик инсанын бүтүн бәдәнинә јајылыб ону ејбәҹәр һала салыр. Бунун уҹбатындан ҹүзама тутулмуш бу киши лап јазыг һалдадыр.
Иса һәмин шәһәрә ҝәләндә ҹүзамлы она јахынлашыр. Әслиндә, Аллаһын Ганунуна ҝөрә ҹүзама тутулмуш адам уҹадан: «Мурдарам! Мурдарам!» — дејә гышгырыб хәбәрдар етмәлидир ки, адамлар она јахын ҝәлиб хәстәлијә јолухмасынлар. Киши Исанын гаршысында үзүгојлу јыхылыб јалварыр: «Аға, әҝәр истәсән, мәни тәмизләјә биләрсән».
Ҝөрүн бу адамын гәлбиндә Иса Мәсиһә неҹә бөјүк инам вар! Амма хәстәлик ону јаман аҹынаҹаглы һала салыб. Ҝөрәсән, Иса нә едәҹәк? Бәс сиз нә едәрдиниз? Иса бу кишинин һалына аҹыјыр. Шәфгәтлә әлини узадыр вә она тохунуб дејир: «Истәјирәм. Тәмизлән». Һәмин анда онун ҹүзамы јох олур.
Истәјәрдиниз, сизин белә мәрһәмәтли рәһбәриниз олсун? Иса Мәсиһин бу адамла шәфгәтлә давранмасы бизи әмин едир ки, о, мәһз белә рәһбәр олаҹаг. Аллаһ ону сәмави Падшаһлыгда падшаһ тәјин едиб. Бу Падшаһлыг јери идарә едәҹәк. Исанын һакимијјәти дөврүндә «Зәбур» китабындакы: «Јохсула, фәгирә рәһм едир, фәгирләрин ҹанларыны азад едир», пејғәмбәрлији јеринә јетәҹәк. Бәли, Иса Мәсиһ бүтүн әзаб чәкәнләрә бөјүк һәвәслә көмәк едәҹәк.
Исанын ишләри һәлә бу мөҹүзәдән әввәл дә һәр јерә сәс салмышды. Буна ҝөрә дә о, сағалтдығы адама бәрк-бәрк тапшырыр: «Мәбада буну кимәсә данышасан» (бунунла Јешаја пејғәмбәрин сөзләри јеринә јетир). Сонра Иса әлавә едир: «Ҝет өзүнү каһинә ҝөстәр вә онлара шәһадәт олсун дејә, тәмизләндијин үчүн Мусанын әмр етдији шејләри тәгдим ет».
Лакин киши севиндијиндән суса билмир, о ҝедир вә бу мөҹүзәни һамыја данышыр. Беләҹә, ҹамаатда о гәдәр мараг ојаныр ки, Иса артыг һеч бир шәһәрә ачыг-ашкар ҝирә билмир вә кимсәсиз јерләрдә галыр. Һәр тәрәфдән адамлар ону динләмәк вә шәфа тапмаг үчүн ахышыб онун јанына ҝәлирләр. Лука 5:12—16; Марк 1:40—45; Матта 8:2—4; Левилиләр 13:45; 14:10—13; Мәзмур 72:13; Јешаја 42:1, 2.
▪ Ҹүзам хәстәлији инсаны һансы һала салыр вә ҹүзама тутулмуш адам гышгырыб нә демәли иди?
▪ Ҹүзама тутулмуш адам Исаја нә дејир вә Исанын рәфтарындан биз нә өјрәнә биләрик?
▪ Сағалмыш адам Исанын ҝөстәришинә әкс олараг нә едир вә бунун нәтиҹәси неҹә олур?