Фәсил 26

Јенидән Капернаһумда

БӘЛИ, Иса Мәсиһ артыг мәшһурлашыб, һәр јандан адамлар ахышыб онун галдығы уҹгар јерләрә ҝәлирләр. Бир мүддәтдән сонра Иса Галилеја ҝөлү саһилиндә олан Капернаһум шәһәринә ҝедир. Шәһәр әһли дәрһал онун ҝәлишиндән хәбәр тутур вә онун галдығы евә јығышыр. Һәтта узаг Јерусәлимдән нүфузлу дин хадимләри олан фәрисејләр вә ганун мүәллимләри дә онун јанына ҝәлибләр.

Бура о гәдәр адам топлашыб ки, һәтта гапынын ағзында да јер галмајыб, ичәри ҝирмәк һеч ҹүр мүмкүн дејил. Инди бурада гејри-ади бир һадисә баш верәҹәк. Бу әламәтдар бир һадисә олаҹаг вә сүбут едәҹәк ки, Иса Мәсиһ инсанларын әзаб-әзијјәтләринин көкүнү јох етмәјә вә истәдији адамлары сағлам етмәјә гадирдир!

Иса тәлим верир. Бу вахт дөрд киши бир ифлиҹ адамы сағалтмаг үчүн јатағын үстүндә Исанын јанына ҝәтирир. Лакин басабас олдуғундан онлар ичәри ҝирә билмирләр. Бәс инди неҹә олсун? Кишиләр руһдан дүшмүрләр. Онлар вәзијјәти белә ҝөрәндә евин јасты дамына чыхыб, орада бөјүк дешик ачырлар. Хәстәни јатағын ичиндәҹә ашағы салладыб Исанын габағына гојурлар.

Бәс Иса буна неҹә бахыр? Ахы бу кишиләр она мане олублар. Иса һеч дә һирсләнмир! Әксинә, онларын бөјүк иманыны ҝөрүб ифлиҹ адама дејир: «Сәнин ҝүнаһларын бағышланды». Бәс Иса ҝүнаһлары бағышлаја биләр? Орадакы дин хадимләри белә дүшүнмүрләр вә үрәкләриндә: «Бу адам нә дејир? О, күфр данышыр. Мәҝәр Аллаһдан савајы кимсә ҝүнаһлары бағышлаја биләр?» — дејирләр.

Онларын нә дүшүндүкләрини билән Иса сорушур: «Нијә үрәјиниздә белә фикирләширсиниз? Бу ифлиҹ олмуш адама: “Ҝүнаһларын бағышланды”, — демәк асандыр, јохса: “Галх, јатағыны да ҝөтүр, ҝет?”»

Сонра Иса бүтүн орадакылара, әлејһдарлары да дахил олмагла, сүбут едир ки, јер үзүндә ҝүнаһлары бағышламаға ихтијары вар. Иса ифлиҹ адама дејир: «Дур, јатағыны да ҝөтүр, евинә ҝет». Киши һамынын ҝөзү габағында ајаға галхыр вә јатағыны ҝөтүрүб чөлә чыхыр. Ҹамаат һејрәт ичиндәдир. Онлар Аллаһы мәдһ едәрәк дејирләр: «Биз һәлә белә шеј ҝөрмәмишик».

Фикир вердинизсә, Иса ҝүнаһ вә хәстәликләр арасында бағлылыг олдуғуну ҝөстәрди вә инсанын там сағлам олмасы үчүн ҝүнаһларын бағышланмасынын лазым олдуғуну вурғулады. Мүгәддәс Китабда изаһ олунур ки, улу әҹдадымыз олан Адәм ҝүнаһ ишләјиб вә ҝүнаһ һамымыза сирајәт едиб. Ҝүнаһын нәтиҹәси олан хәстәлик вә өлүм бизә мирас галыб. Лакин Иса Мәсиһ Аллаһы севән вә Она хидмәт едәнләрин ҝүнаһларыны бағышлајаҹаг вә бүтүн хәстәликләри јох едәҹәк. Бу ҝөзәл дөвран Аллаһын Падшаһлығынын һакимијјәти алтында олаҹаг. Марк 2:1—12; Лука 5:17—26; Матта 9:1—8; Ромалылара 5:12, 17—19.

▪ Исанын Капернаһума ҝәлдијини ешидән ҹамаат нә едир?

▪ Ифлиҹ адамы Исанын јанына неҹә ҝәтириб чыхарырлар?

▪ Нә үчүн биз һамымыз ҝүнаһлыјыг? Иса ҝүнаһларын бағышланмасынын вә камил сағламлығын мүмкүн олаҹағыны неҹә ҝөстәрди?