Фәсил 30
Исанын әлејһдарлара ҹавабы
БЕЛӘЛИКЛӘ, јәһуди дин рәһбәрләри Иса Мәсиһи шәнбә һаггындакы гануну позмагда тәгсирләндирирләр. О, бу иттиһама белә ҹаваб верир: «Мәним Атам индијәдәк ишләјир, мән дә ишләјирәм».
Исанын ҝөрдүјү ишләр, фәрисејләрин иддиасынын әксинә олараг, Ганунда шәнбә ҝүнү ҝөрүлмәси гадаған едилмиш ишләрә аид дејил. Тәблиғ етмәк вә хәстәләрә шәфа вермәк иши Аллаһын тапшырығыдыр вә Иса Аллаһдан нүмунә ҝөтүрәрәк һәр ҝүн чалышыр. Амма Исанын бу ҹавабы јәһудиләри даһа да һирсләндирир вә онлар ону өлдүрмәк үчүн фүрсәт ахтарырлар. Нә үчүн? Бурада нә вар ки?!
Онларын фикринҹә, инди Иса нәинки шәнбә һаггындакы гануну позур, үстәлик, о, Аллаһын Оғлу олдуғуну иддиа етмәклә күфр данышыр. Лакин Иса онлардан горхмур вә өзү илә Аллаһ арасындакы мүнасибәт барәдә ҹәсарәтлә данышараг дејир: «Ата Оғулу севир вә етдији һәр шеји она ҝөстәрир».
«Ата өлүләри дирилдиб онлара һәјат вердији кими, Оғул да үрәји истәдији адамлара һәјат верир», — дејә Иса сөзүнә давам едир. Бәли, Оғул артыг руһани мәнада өлү оланлары дирилдир! О дејир: «Мәним сөзләрими ешидиб мәни ҝөндәрәнә иман едән ... өлүмдән һәјата кечир». Сонра әлавә едир: «Елә бир саат ҝәлир ки вә артыг ҝәлиб, өлүләр Аллаһын Оғлунун сәсини ешидәҹәк вә итаәт едәнләр јашајаҹаглар».
Дүздүр, Исанын һәмин вахта гәдәр кимисә дирилтдији һаггында мәлумат јохдур. Лакин о, өз иттиһамчыларына дејир ки, ҝәләҹәкдә дирилмә мүтләг олаҹаг: «Буна һејрәт етмәјин, чүнки елә бир саат ҝәлир ки, гәбирләрдә оланларын һамысы онун сәсини ешидәҹәк,.. дириләҹәкләр».
Иса Мәсиһ Аллаһын нијјәтиндә өз ролу барәдә илк дәфә олараг ҹамаатын габағында белә ачыг вә конкрет тәрздә данышыр. Һәм дә ки бу иттиһамчылара Иса һаггында башга адам да шәһадәт вериб. Иса онларын јадына салыр: «Сиз Јәһјанын јанына адам ҝөндәрмишдиниз, о, һәгигәт барәсиндә шәһадәт етди».
Ҹәми ики ил бундан әввәл Вәфтизчи Јәһја бу дин рәһбәрләринә өзүндән сонра ҝәлән адам һаггында данышмышды. Иса инди һәбсдә олан Јәһјаја әввәлләр бөјүк һөрмәтлә јанашдыгларыны онларын јадына салыр: «Сиз онун ишығында гыса мүддәт шадланмаг истәдиниз». Иса буну хатырлатмагла онлара гуртулуш јолуну ҝөстәрмәк истәјир. Әслиндә, Јәһјанын шәһадәти ән башлыҹа амил дејил.
Исанын даһа ҝүҹлү дәлилләри вар: «Ҝөрдүјүм ишләр [јениҹә ҝөстәрдији мөҹүзә дә дахил олмагла] мәним һаггымда шәһадәт едир; онлар мәним Ата тәрәфиндән ҝөндәрилдијими тәсдигләјир». Бундан савајы, Иса дејир: «Мәни ҝөндәрән Ата мәним һаггымда Өзү шаһидлик едиб». Иса вәфтиз оланда Аллаһ демишди: «Бу, Мәним севимли Оғлумдур, Мән ондан чох разыјам».
Бәли, иттиһамчылар Исаны там әсассыз олараг рәдд едирләр. Ахы онун һаггында, өзләринин дедијинә ҝөрә диггәтлә арашдырдыглары, Мүгәддәс Јазыларда шәһадәт верилир! Иса сөзүнү белә јекунлашдырыр: «Әҝәр сиз Мусаја иман етмиш олсајдыныз, Мәнә дә иман едәрдиниз; она ҝөрә ки, о, Мәним һаггымда јазмышдыр. Лакин әҝәр онун јаздыгларына иман етмирсинизсә, Мәним сөзләримә неҹә иман едәрсиниз?» Јәһја 5:17—47; 1:19—27; Матта 3:17.
▪ Исанын ҝөрдүјү ишләр нәјә ҝөрә шәнбә һаггындакы гануну позмур?
▪ Иса Аллаһын нијјәтиндә ојнадығы хүсуси ролуну неҹә ачыглајыр?
▪ Иса Мәсиһ Аллаһын Оғлу олдуғуну тәсдиг етмәк үчүн һансы дәлилләри ҝәтирир?