Фәсил 37
Дул ананын кәдәри севинҹә чеврилир
ИСА МӘСИҺ ромалы забитин нөкәрини сағалтдыгдан бир гәдәр сонра Наин шәһәринә ҝедир. Наин Капернаһумдан 30 километр аралыда, ҹәнуб-гәрб истигамәтдә јерләшир. Шаҝирдләри илә јанашы Исаны хејли адам мүшајиәт едир. Онлар Наин шәһәринә, јәгин ки, ахшам дүшәндә јахынлашырлар. Бу вахт шәһәр дарвазасындан ҹәназә апаран бир дәстә адам чыхыр. Һәмин дәстә ҹаван бир оғланы дәфн етмәјә апарыр.
Мәрһумун анасы јас ичиндәдир; о дул галмышды, инди дә ҝөзүнүн ағы-гарасы јеҝанә өвладыны итириб. Әри өләндән сонра о, бу оғлу илә нәфәс алырды, бүтүн арзулары вә үмиди бу ушагла бағлы иди. Инди исә она дајаг олаҹаг бир кимсә јохдур. Будур, дәрддән гәдди бүкүлмүш ана оғлуну дәфн етмәјә апарыр вә шәһәрин хејли сакини дә онунла ҝедир.
Иса бу гадыны ҝөрдүкдә үрәји сызылдајыр. О, шәфгәтли, ејни заманда хатирҹәмлик јарадан бир сәслә анаја дејир: «Ағлама». Онун белә рәфтары адамларын диггәтини ҹәлб едир. Иса јахынлашыб мафәјә тохунур вә мафәни апаранлар ајаг сахлајырлар. Ҹамаат интизар ичиндәдир: ҝөрәсән, о нә едәҹәк?
Иса илә ҝәләнләр онун мүхтәлиф ҹүр хәстәликләри мөҹүзә илә сағалтдығынын дәфәләрлә шаһиди олублар. Амма бу вахтаҹан кимисә дирилтдијини, дејәсән, һеч ҝөрмәјибләр. Ҝөрәсән, о, буну едә биләҹәк? Иса мәрһума амиранә сәслә дејир: «Еј ҹаван, сәнинләјәм, ајаға галх!» Өлән оғлан галхыб отурур вә данышмаға башлајыр. Иса ону анасына верир.
Ҹамаат оғланын дирилдијини ҝөрәндә дејир: «Арамызда бөјүк бир пејғәмбәр зүһур едиб». Диҝәрләри исә: «Аллаһын өз халгына рәһми ҝәлиб», — дејир. Бу мөҹүзәнин сорағы сүрәтлә бүтүн Јәһудејаја вә әтраф бөлҝәләрә јајылыр.
Вәфтизчи Јәһја һәлә дә һәбсдәдир вә Исанын даһа нәләр едә биләҹәји илә марагланыр. Јәһјанын шаҝирдләри она бу мөҹүзәләри данышырлар. Бәс Јәһја ешитдикләринә неҹә мүнасибәт ҝөстәрир? Лука 7:11—18.
▪ Иса Наин шәһәринә јахынлашанда орада нә баш вермишди?
▪ Бу һадисә Исаја неҹә тәсир ҝөстәрир вә о нә едир?
▪ Ҹамаат Исанын мөҹүзәсини неҹә гаршылајыр?