Фәсил 44
Иса мүдһиш фыртынаны рам едир
ИСА МӘСИҺ һәмин ҝүнү бәрк јорулмушду. О, әввәлҹә ҝөлүн саһилиндә халга тәлим вермиш, сонра исә данышдығы мәсәлләрин мәнасыны ајрыҹа шаҝирдләринә изаһ етмишди. Ахшам дүшәндә о, шаҝирдләринә дејир: «Ҝәлин о бири саһилә үзәк».
Галилеја ҝөлүнүн шәрг саһилиндә Декапол бөлҝәси јерләшир. «Декапол» сөзү јунанҹа дека — «он» вә полис — «шәһәр» сөзләриндән әмәлә ҝәлиб. Бу бөлҝәнин шәһәрләри јунан мәдәнијјәтинин мәркәзидир, һәмчинин орада хејли јәһуди дә јашајыр. Исанын бу әразидә фәалијјәти гысамүддәтли олуб. Инди ҝөрәҹәјик ки, бу дәфә дә онун орада чох галмағына мане олурлар.
Бәли, шаҝирдләр Исаны гајыға алыб јола дүшүрләр. Амма бу, башгаларынын диггәтиндән јајынмыр вә бир аздан диҝәр гајыглар да онларын ардынҹа үзүр. Гаршы тәрәфдәки саһил бир елә дә узаг дејил, чүнки Галилеја ҝөлүнүн узунлуғу тәхминән 21 километр, ән ҝениш јери исә 12 километрдир.
Иса чох јорғундур. Онлар саһилдән бир гәдәр араландыгдан сонра о, гајығын арха һиссәсиндә узаныр вә башыны јастыға гојуб јатыр. Һәвариләрдән бир нечәси Галилеја ҝөлүндә узун мүддәт балыгчылыг етмиш тәҹрүбәли дәнизчиләрдир. Гајығы мәһз онлар идарә едирләр.
Лакин бу дәфә јол асан олмур. Галилеја ҝөлү дәниз сәвијјәсиндән 210 метр ашағы олдуғу үчүн ҝөлүн сәтһи үзәриндәки һаванын температуру ҝөлү әһатә едән дағлардакы температурдан истидир. Бу сәбәбдән орада арабир ҝүҹлү күләк әсир вә ҝөлдә гәфил фыртына галхыр. Инди дә һәмин шеј баш верир. Ҝүҹлү далғалар гајыға чырпыныб ичәри төкүлүр вә гајыг аз галыр ки батсын. Амма Иса ширин јухуја далыб.
Бу тәҹрүбәли дәнизчиләр вар ҝүҹләри илә гајығы идарә етмәјә чалышырлар. Әлбәттә, бу онларын растлашдығы илк фыртына дејил, амма бу сәфәр онлар тамам әлдән дүшүрләр. Онлар батмагдан горхараг Исаны дурғузурлар. «Мүәллим, мәҝәр сәни нараһат етмир ки, биз батырыг? — онлар гышгырырлар: — Аға, батырыг, бизи хилас ет!»
Иса галхыб күләјә вә суја әмр едир: «Дајан! Сакит ол!» Ҝүҹлү күләк јатыр, ҝөл сакитләшир. Иса шаҝирдләринә суал верир: «Нијә горхдунуз? Һәлә дә иманыныз јохдур?»
Шаҝирдләрин ҹаныны ваһимә бүрүјүр: «Бу кимдир ки, һәтта күләјә вә суја әмр едир, онлар да итаәт едирләр?!» — дејә бир-бириндән сорушурлар.
Ҝөрүн, Иса неҹә бөјүк гүдрәт саһибидир! Падшаһымызын тәбиәт гүввәләри үзәриндә һөкмү олдуғуну билмәк бизә һәгиги тәсәлли верир. Бу о демәкдир ки, сәмави Падшаһлыг Јер планетини идарә едәркән һеч бир тәбии фәлакәт инсанлара хәтәр јетирмәјәҹәк!
Беләҹә, фыртына јатыр вә бир аздан Иса шаҝирдләри илә сағ-саламат ҝөлүн шәрг саһилинә чатыр. Ола билсин, диҝәр гајыгларын үздүјү јердә фыртына бир о гәдәр ҝүҹлү олмајыб вә онлар евләринә саламат гајыдыблар. Марк 4:35—5:1; Матта 8:18, 23—27; Лука 8:22—26.
▪ Декапол нәдир вә о, һарада јерләшир?
▪ Галилеја ҝөлүндә ҝүҹлү фыртыналарын сәбәби нәдәдир?
▪ Шаҝирдләр фыртына илә баҹармадыгларыны ҝөрәндә нә едирләр?