Фәсил 46
Хәстә гадын Исанын әбасына тохунур
ҸАМААТ Иса Мәсиһин Декапол бөлҝәсиндән Капернаһума гајытдығыны ешидән кими ону гаршыламаг үчүн ҝөлә тәрәф ахышыр. Әлбәттә, Исанын фыртынаны рам етмәси вә ҹинә тутулмуш адамлары сағалтмасы хәбәри ҝәлиб онлара чатыб. Интизар ичиндә олан бу адамлар Иса саһилә чыхан кими ону әһатәјә алырлар.
Исаны сәбирсизликлә ҝөрмәк истәјән адамлардан бири дә синагог рәиси Јаирдир. О, Исанын ајағына дүшүб јалвар-јахар едир: «Гызымын вәзијјәти ағырдыр. Хаһиш едирәм, ҝәл, әлләрини онун үстүнә гој, баламы сағалт, гојма гызым өлсүн». Бу гыз атасынын ҝөзүнүн ағы-гарасы јеҝанә өвладыдыр, онун ҹәми 12 јашы вар.
Иса Јаирин хаһишинә һај верир вә онун евинә ҝедир, хејли адам да онун далынҹа ҝәлир. Јени бир мөҹүзә ҝөрмәк арзусунда олан бу адамлар бәрк һәјәҹанлыдырлар. Амма онларын арасында бир гадыны јалныз өз дәрди дүшүндүрүр.
Бу гадын дүз он ики илдир ки, ганахмадан әзијјәт чәкир. О, чох һәкимләрә мүраҹиәт едиб, бүтүн пулуну мүалиҹәјә хәрҹләмишдир. Лакин дәрдинә дәрман тапа билмәмиш, әксинә, хәстәлији даһа да шиддәтләнмишдир.
Бу гадынын хәстәликдән әзијјәт чәкмәси бир јана, о, ел арасында да утаныб хәҹаләт чәкир. Бу елә бир хәстәликдир ки, һәр кәсә данышыласы дејил. Үстәлик, Муса пејғәмбәр васитәсилә верилмиш Гануна әсасән, гадын ганахма дөврүндә натәмиз сајылырды. Бу вахты она вә ја онун гана булашмыш палтарына тохунан адам мүтләг јујунмалы иди вә һәмин адам ахшамадәк натәмиз галырды.
Хәстә гадын Исанын мөҹүзәләри һаггында ешидиб вә инди ону ахтарыб тапыб. О, натәмиз олдуғундан ҝизлиҹә ҹамаатын арасы илә Исаја јахынлашыр. Гадын үрәјиндә дејир: «Тәкҹә әбасына тохунсам, сағалаҹағам». О, Исаја тохунан андаҹа һисс едир ки, ганахмасы кәсилди.
«Мәнә ким тохунду?» Јәгин ки, Исанын бу сөзләри гадынын ҹанына горху салыр. Иса буну неҹә билди? «Устад, ҹамаат сәни дөврәјә алыб сыхышдырыр, — Петер етираз едир, — сәнсә: — “Мәнә ким тохунду?” — дејирсән».
Иса она тохунан гадыны ҝөзү илә ахтарараг дејир: «Мәнә кимсә тохунду, чүнки дахилимдән гүввә чыхдығыны һисс етдим». Гадынын Исаја тохунмасында диггәтәлајиг ҹәһәт о иди ки, гадын сағалды вә Иса өзүндән гүввә чыхдығыны һисс етди.
Һәрәкәтинин ҝизлин галмадығыны баша дүшән гадын титрәјә-титрәјә ҝәлиб Исанын ајагларына јыхылыр. О, өз хәстәлији вә елә индиҹә сағалмасы барәдә бу ҹамаатын гаршысында ачыб данышыр.
Гадынын үрәкдән ҝәлән етирафыны ешитдикдә Иса шәфгәтлә: «Баҹым, иманын сәни сағалтды. Саламат ҝет. Гој бу хәстәлик сәни бир дә нараһат етмәсин», — дејә она тәсәлли верир. Аллаһын јер үзүнү идарә етмәк үчүн сечдији шәхсин бу гәдәр мәрһәмәтли, үрәјијанан олдуғуну билмәк неҹә дә хошдур! О, инсанлары чох севир вә онлара көмәк етмәјә гадирдир. Матта 9:18—22; Марк 5:21—34; Лука 8:40—48; Левилиләр 15:25—27.
▪ Јаир кимдир вә о, Исанын јанына нә үчүн ҝәлиб?
▪ Бир гадынын һансы проблеми вар вә нәјә ҝөрә Исаја јахынлашмаг онун үчүн асан дејил?
▪ Гадын неҹә сағалыр вә Иса она һансы сөзләрлә тәсәлли верир?