Фәсил 47
Ҝөз јашлары севинҹә чеврилир
ГАДЫНЫН сағалдығыны ҝөрән Јаир, шүбһәсиз, Исанын харигүладә ҝүҹүнә даһа да чох инаныр. Јаир бир аз бундан габаг Исадан хаһиш етмишди ки, өлүм ајағында олан баласына јардым етсин. Лакин бу ан Јаирин ән чох горхдуғу шеј баш верир. Иса һәлә гадынла данышмагда икән бир нечә нәфәр киши ҝәлиб јаваш сәслә Јаирә дејирләр: «Гызын өлдү. Даһа мүәллимә әзијјәт вермә».
Бу јаман бәд хәбәрдир! Ҹәмијјәтдә һөрмәт-иззәт саһиби олан бу киши гызынын өлүм хәбәрини ешитдикдә тамам бичарә галыр. Сөһбәти ешидән Иса дөнүб Јаирә тохтаглыг верир: «Горхма, сән бирҹә инан».
Иса кәдәрдән гәдди бүкүлмүш бу ата илә бирҝә онун евинә ҝедир. Евә чатанда ҝөрүрләр ки, һамы дәјиб бир-биринә: ким ағлајыр, ким шивән гопарыр, ким дәрддән синәсини дөјүр. Иса ичәри ҝириб сорушур: «Бу нә һај-күјдүр? Нијә ағлашма гурмусунуз? Ушаг өлмәјиб, јатыр».
Орада оланлар Исанын бу сөзләринә ришхәндлә ҝүлүрләр, чүнки ушағын доғрудан өлдүјүнү билирләр. Анҹаг Иса дејир ки, гыз садәҹә јатыр. О, Аллаһын она вердији ҝүҹ васитәсилә ҝөстәрәҹәк ки, өлмүш инсаны дирилтмәк, јухудан ајылтмаг кими асан бир ишдир.
Иса иши белә ҝөрәндә гызын ата-анасы, Петер, Јагуб вә Јәһјадан савајы һамыны бајыра чыхарыр. Сонра онларла бирҝә ушағын јатдығы отаға ҝирир. О, гызын әлиндән тутуб: «Талита куми», — дејир. Бу сөзүн мәнасы «гызҹығаз, сәнинләјәм, галх!» демәкдир. Гыз о андаҹа дуруб ҝәзмәјә башлајыр. Валидејнләрин исә севинҹи јерә-ҝөјә сығмыр!
Иса әввәлҹә ушаға јемәјә бир шеј вермәји тапшырыр, сонра Јаирә вә арвадына ҹидди ҝөстәриш верир ки, мәбада бу һадисәни кимәсә данышсынлар. Буна бахмајараг, хәбәр бүтүн бөлҝәјә јајылыр. Бу, Иса Мәсиһин ҝерчәкләшдирдији икинҹи дирилмә иди. Матта 9:18—26;Марк 5:35—43; Лука 8:41—56.
▪ Јаирә һансы хәбәри чатдырырлар вә Иса она неҹә тохтаглыг верир?
▪ Онлар ҝәләндә Јаирин евиндә вәзијјәт неҹә иди?
▪ Иса нә үчүн өлмүш гызын садәҹә јатдығыны дејир?
▪ Исанын јанында галыб дирилмәнин шаһиди олан беш адам кимләрдир?