Фәсил 59

Иса кимдир?

ИСА МӘСИҺ шаҝирдләри илә Бетсајдаја ҝәләндә онун јанына бир кор адам ҝәтирирләр. Исадан хаһиш едирләр ки, бу адама тохунуб ону сағалтсын. О, кор адамын әлиндән тутуб ону кәнддән чыхарыр, сонра ҝөзләринә түпүрүр вә сорушур: «Бир шеј ҝөрүрсән?»

Киши ҹаваб верир: «Адамлары ҝөрүрәм; онлар ағаҹа бәнзәјирләр, амма ҝәзирләр». Иса әлләрини бу адамын ҝөзләринин үстүнә гојур вә о, ајдын ҝөрмәјә башлајыр. Сонра Иса кишијә тапшырыр ки, евинә ҝетсин, амма кәндә ҝирмәсин.

Инди Иса шаҝирдләри илә бирҝә Фәләстинин лап шималында јерләшән Филиппи Гејсәријјәси кәндләринә јолланыр. Бу әрази дәниз сәвијјәсиндән һарадаса 350 метр һүндүрлүкдә, ҝөзәл бир јердә јерләшир. Бетсајдадан ораја ҝедән тәхминән 50 километрлик јол јохушдур. Ҝөрүнүр, онларын сәфәри бир нечә ҝүн чәкир.

Јолда Иса дуа етмәк үчүн шаҝирдләриндән ајрылыр. Онун өлүмүнә ҹәми доггуз-он ај галыр вә о, шаҝирдләриндән өтрү нараһатдыр. Бир чохлары онун ардынҹа ҝетмир. Башгалары мәјус олуб, чашгынлыг ичиндәдирләр, чүнки ҹамаат Исаны падшаһ етмәк истәјир, о исә буну рәдд едир; дүшмәнләри онун падшаһ олдуғуну тәсдиг едән әламәт истәјир, о исә ҝөстәрмир. Бәс ҝөрәсән, һәвариләр нә фикирләширләр, Иса кимдир? Онлар Исанын дуа етдији јерә ҝәләндә, о сорушур: «Ҹамаатын дедијинә ҝөрә мән кимәм?»

Шаҝирдләр ҹаваб верирләр: «Кимиси дејир ки, Вәфтизчи Јәһјадыр, кимиси Илјасдыр, кимиси дә Јеремја вә ја пејғәмбәрләрдән бири олдуғуну дејир». Бәли, инсанлар дүшүнүрләр ки, Иса дирилмиш пејғәмбәрдир.

— Бәс сиз нә дејирсиниз? Мән кимәм?

— Сән Мәсиһсән, вар олан Аллаһын Оғлусан, — дејә Петер әлүстү ҹаваб верир.

Иса Петери тәрифләјир вә әлавә едир: «Буну да сәнә дејирәм: сән Петерсән. Мән јығынҹағымы бу гајанын үзәриндә тикәҹәјәм вә Мәзар она галиб ҝәлә билмәјәҹәк». Иса бурада илк дәфә јығынҹаг тәшкил едәҹәјиндән сөз ачыр вә гејд едир ки, бу јығынҹағын үзвләри јердә һәјатларыны сәдагәтлә баша вурдугдан сонра, һәтта өлүм дә онлары көләликдә сахлаја билмәјәҹәк. Сонра о, Петерә дејир: «Мән сәнә сәмави падшаһлығын ачарларыны верәҹәјәм».

Беләликлә, Иса Петерә билдирир ки, о, хүсуси тапшырыглар алаҹаг. Амма бу о демәк дејил ки, Петер һәвариләрин арасында биринҹи јери тутаҹаг, ја да бу јығынҹағын тәмәли олаҹаг. Тәмәл дашы олан «гаја» Исанын өзүдүр вә јығынҹаг онун үзәриндә тикиләҹәк. Петер исә үч «ачар» алаҹаг вә бу ачарларла мүхтәлиф адамлар үчүн сәмави Падшаһлыға имкан ачаҹагды.

Биринҹи ачардан Петер 33-ҹү илин Әллинҹи ҝүн бајрамында истифадә едир. О, төвбә едән јәһудиләрә хилас үчүн нә етмәк лазым олдуғуну ҝөстәрир. Икинҹи ачар бундан бир аз сонра иман ҝәтирән самаријалылар үчүн истифадә едилир. Онлара Аллаһын Падшаһлығына ҝирмәк имканы верилир. Үчүнҹү ачары исә Петер 36-ҹы илдә сүннәт едилмәмиш бүтпәрәстләр үчүн ишләдәрәк онлара да сәмави Падшаһлыға ҝирмәк имканы ачыр. Бүтпәрәстләрдән илк нүмајәндә италијалы һәрбичи Корнили вә онун достлары олмушлар.

Иса һәвариләрлә сөһбәтинә давам едир. О дејир ки, Јерусәлимдә ону әзаб вә өлүм ҝөзләјир. Бу хәбәр онлары сарсыдыр. Петер Исанын дирилиб ҝөјә ҝедәҹәјини баша дүшмәдијиндән ону гыраға чәкиб дејир: «Аллаһ узаг еләсин, Аға! Бу иш һеч вахт сәнин башына ҝәлмәз!» Иса күрәјини Петерә чевириб: «Чәкил мәндән, Шејтан! Сән мәнә мане олурсан. Чүнки сәнин ағлындакы Аллаһын јох, инсанын фикирләридир», — ҹаваб верир.

Ҝөрүнүр, һәвариләрлә јанашы Иса илә башгалары да ҝедир. Иса онлары чағырыр вә ачыглајыр ки, онун давамчысы олмаг һеч дә асан иш дејил. О дејир: «Ким ардымҹа ҝәлмәк истәјирсә, гој өзүнү инкар етсин, ишҝәнҹә дирәјини ҝөтүрүб даима ардымҹа ҝәлсин. Чүнки һәјатыны хилас етмәк истәјән ону итирәҹәк, амма һәјатыны мәним уғрумда вә хош хәбәр уғрунда итирән ону хилас едәҹәк».

Бәли, Исанын лүтфүнү газанмаг истәјән адам ҹәсур вә фәдакар олмалыдыр. Иса белә дејир: «Ким бу зинакар, ҝүнаһкар нәсил гаршысында мәндән вә сөзләримдән утанарса, инсан Оғлу да мүгәддәс мәләкләрлә өз Атасынын әзәмәтиндә ҝәләндә о адама ҝөрә хәҹаләт чәкәҹәк». Марк 8:22—38; Матта 16:13—28; Лука 9:18—27.

▪ Нәјә ҝөрә Иса шаҝирдләрдән өтрү нараһатдыр?

▪ Адамлар Исанын шәхсијјәти һаггында нә дүшүнүрләр?

▪ Петер һансы ачарлары алаҹаг вә онлардан неҹә истифадә едәҹәк?

▪ Петер һансы төһмәти алыр вә нә үчүн?