Фәсил 72

Иса 70 шаҝирди тәблиғә ҝөндәрир

ИНДИ ерамызын 32-ҹи илинин пајызыдыр. Исанын вәфтизиндән үч ил кечиб. Бир аз бундан әввәл о, Чардаглар бајрамында иштирак етмәк үчүн шаҝирдләри илә Јерусәлимә ҝәлиб. Ҝөрүнүр, онлар һәлә дә бу әтрафдадырлар. Ахырынҹы алты ајы Иса, әсас етибарилә, Јәһудејада вә Иордан чајынын әкс саһилиндә олан Перејада хидмәт едир. Бу әразиләрдә дә инсанлар һәгигәти ешитмәлидирләр.

Иса 30-ҹу илин Пасха бајрамындан сонра тәхминән сәккиз ај Јәһудејада тәблиғ етмишди. Лакин сонрадан, 31-ҹи илин Пасха бајрамында јәһудиләр ону өлдүрмәк истәдикләриндән о, нөвбәти бир ил јарым мүддәтдә ән чох Галилејада тәлим вермишди. Бу вахт әрзиндә Иса шаҝирдләрини өјрәтмиш вә онлардан бөјүк бир тәблиғчи дәстәси тәшкил етмишдир. Беләликлә, Иса сонунҹу мәгсәдјөнлү тәблиғ кампанијасыны Јәһудејада башлајыр.

Әввәлҹә Иса шаҝирдләриндән 70 нәфәри сечиб ики-ики ајырыр вә бу 35 ҹүт тәблиғчини Падшаһлыг һаггында тәблиғ етмәјә ҝөндәрир. Онлар сонрадан Исанын һәвариләри илә баш чәкәҹәји кәнд вә шәһәрләрә ҝедирләр.

Иса бу 70 шаҝирдә синагоглара ҝетмәк ҝөстәриши вермир, бунун әвәзинә онлара тапшырыр ки, бирбаша евләрә, инсанларын јанына ҝетсинләр. О дејир: «Һансы евә ҝирсәниз, әввәлҹә: “Бу евә салам олсун!” — дејин». Иса изаһ едир ки, әҝәр һәмин евдә сүлһсевәр адам варса, онларын саламыны алаҹаг. Бәс шаҝирдләр нә барәдә данышмалы идиләр? Иса тапшырыр: «“Аллаһын падшаһлығы јахындыр”, — дејин». Бу јетмиш нәфәрин фәалијјәтини ишыгландыран бир әсәрдә белә јазылыб: «Өз Ағалары кими, онлар да ҝетдикләри һәр јердә евдән-евә тәблиғ едирдиләр» («Matthew Henry’s Commentary»).

Иса тәхминән бир ил бундан әввәл Галилејаја тәблиғә ҝөндәрдији 12 шаҝирдинә вердији тапшырыглары бу 70 шаҝирдә дә верир. О, онлара ев саһибләри илә сөһбәтә неҹә башламағы өјрәдир, онлары әлејһдарларла үзләшәҹәкләриндән хәбәрдар едир, һәмчинин онлара хәстәләри сағалтмаг үчүн ҝүҹ верир. Бир аздан Иса өзү һәмин јерләрә ҝедәҹәкди. Инди шаҝирдләрин бу һејрәтли ишләрини ҝөрәнләр онларын Устадынын ҝәлишини һәсрәтлә ҝөзләјәҹәкдиләр.

Јетмиш нәфәрин вә онларын ардынҹа Исанын ҝөрдүкләри иш узун чәкмир. Бир аздан Падшаһлығын бу тәблиғчиләри Исанын јанына гајыдырлар. Онлар севинә-севинә дејирләр: «Аға! Ҹинләр дә сәнин адыны ешидәндә бизә бојун әјирләр!» Хидмәтләри барәдәки бу ҝөзәл һесабат, шүбһәсиз, Исанын гәлбини даға дөндәрир. О дејир: «Шејтанын ҝөјдән илдырым кими дүшдүјүнү ҝөрдүм. Мән сизә иланлары вә әгрәбләри тапдаламаг һөкмү... вермишәм».

Иса билир ки, ахыр ҝүнләрдә, Аллаһын Падшаһлығы доғуландан сонра Шејтан вә онун ҹинләри ҝөјдән јерә атылаҹаглар. Бу ади инсанларын ҝөзәҝөрүнмәз ҹинләри гова билмәси һәмин ишин мүтләг олаҹағына даһа бир зәманәт олду. Буна ҝөрә дә Иса Шејтанын ҝөјдән дүшдүјүнү гәтијјәтлә дејир. Исанын 70 шаҝирдә дедији «иланлары вә әгрәбләри тапдаламаг һөкмү» исә символик мәна дашыјыр. Бунунла јанашы, Иса дејир: «Руһларын сизә бојун әјдијинә ҝөрә јох, адынызын ҝөјләрдә јазылдығына ҝөрә севинин».

Иса севиндијиндән ҹуша ҝәлиб. О, сәмави Атасына бу тәвазөкар хидмәтчиләрини белә һејрәтли ишләрдә истифадә етдији үчүн һәмд едир. Сонра үзүнү шаҝирдләрә тутуб дејир: «Сизин ҝөрдүјүнүзү ҝөрән ҝөзләр неҹә дә хошбәхтдир. Инанын, бир чох пејғәмбәр вә падшаһ сизин ҝөрдүкләринизи ҝөрмәк арзусунда иди, амма ҝөрмәди; ешитдикләринизи ешитмәк арзусунда иди, амма ешитмәди». Лука 10:1—24; Матта 10:1—42; Вәһј 12:7—12.

▪ Иса хидмәтинин илк 3 илиндә һарада тәблиғ етмишди вә сон 6 ајында һарада тәблиғ едир?

▪ Хош хәбәри инсанлара чатдырмаг үчүн Иса 70 шаҝирдә һара ҝетмәји тапшырыр?

▪ Иса Шејтанын ҝөјдән дүшдүјүнү габагҹадан неҹә ҝөрүр?

▪ Һансы мәнада 70 шаҝирд иланлары вә әгрәбләри тапдалајырлар?