Фәсил 73

Хејирхаһ самаријалы

ИСА МӘСИҺ, ҝөрүнүр, Јерусәлимдән 3 километр аралыда јерләшән Бетанија кәнди јахынлығындадыр. Бурада онун јанына бир адам ҝәлир. Мусанын Ганунуна јахшы бәләд олан бу адам ондан сорушур: «Мүәллим, әбәди һәјаты алмаг үчүн нә етмәлијәм?»

Иса һисс едир ки, гануншүнас бу суалы елә-белә вермир, о, Исаны сынамаг истәјир. Бәлкә дә онун мәгсәди одур ки, Иса јәһудиләрин хатиринә дәјәҹәк бир сөз десин. Буна ҝөрә дә Иса бу мәсәлә илә бағлы гануншүнасын өз фикрини билдирмәси үчүн сорушур: «Ганунда нә јазылыб? Неҹә баша дүшүрсән?»

Гануншүнасын ҹавабындан бәлли олур ки, о, гануну чох ҝөзәл билир. О, Төвратдан — Ганунун тәкрары 6:5 вә Левилиләр 19:18 ајәләрини ситат ҝәтирир: «“Аллаһын Јеһованы бүтүн үрәјинлә, бүтүн ҹанынла, бүтүн ағлынла вә вар ҝүҹүнлә сев” вә: “Јахыныны өзүнү севдијин кими сев”».

Иса она дејир: «Дүз дедин: “Һәмишә белә ет вә јашајаҹагсан”».

Лакин бу киши гане олмур, чүнки Исанын ҹавабы кифајәт гәдәр ачыг дејил. Гануншүнас истәјир ки, Иса онун бахышларынын доғру олдуғуну вә башга адамлара гаршы дүзҝүн даврандығыны тәсдиг етсин. Буна ҝөрә дә о сорушур: «Бәс мәним јахыным кимдир?»

Јәһудиләр белә дүшүнүрләр ки, јалныз сојдашлары онларын јахыныдыр. Онлара елә ҝәлир ки, Левилиләр 19:18 ајәсинин контексти буна ишарә едир. Сонралар һәтта һәвари Петер белә демишди: «Сиз јахшы билирсиниз ки, јәһудинин башга милләтдән олан адамла үнсијјәт гурмасына вә ја онун јанына ҝетмәсинә Ганун јол вермир». Беләликлә, бу гануншүнасын, ола билсин, Исанын шаҝирдләринин дә фикринҹә, салеһ олмаг үчүн тәкҹә јәһудиләрә хејирхаһлыг ҝөстәрмәк бәс едәр, гејри-јәһудиләр исә онларын «јахыны» дејил.

Ҝөрәсән, Иса динләјиҹиләринин хатиринә дәјмәдән онларын бахышларыны неҹә дүзәлдәҹәк? Иса бир мәсәл данышыр вә ола билсин, бу һадисә һәгигәтән дә олуб. О нәгл едир: «Бир адам [јәһуди] Јерусәлимдән Јерихоја дүшүрдү вә јолда гулдурларын әлинә кечди. Гулдурлар ону сојундуруб дөјдүләр вә өлүмҹүл һалда гојуб ҝетдиләр».

«Бу вахт орадан бир каһин кечирди, — дејә Иса давам едир, — лакин ону ҝөрдүкдә јолун о бири тајына кечиб ҝетди. Һабелә бир Левили дә һәмин јерә чатыб ону ҝөрәндә јолун о бири тәрәфинә кечиб ҝетди. Анҹаг о јол илә ҝедән бир самаријалы һәмин јерә чатыб бу адамы ҝөрәндә јазығы ҝәлди».

Мәбәддә хидмәт едән каһинләрин вә левилиләрин бир чоху Јерихо шәһәриндә, Јерусәлимдәки мәбәддән 23 километр аралыда јашајырлар. Мәбәд Јериходан 900 метр һүндүрлүкдә јерләшдијиндән бу јол енишли вә тәһлүкәлидир. Ҝөзләнилирди ки, бу каһин вә левили бәлаја дүшмүш јәһудијә көмәк едәҹәкләр, амма белә олмур. Онларын јеринә бу кишијә бир самаријалы јардым ҝөстәрир. Јәһудиләр самаријалылара елә дәрин нифрәт бәсләјирләр ки, бир гәдәр бундан әввәл Исаны алчалтмаг үчүн она «самаријалы» демишдиләр.

Бәс һәмин самаријалы киши јәһудијә неҹә көмәк едир? Иса данышыр: «Она јахынлашды, јараларына јағ вә шәраб төкүб сарыды. Сонра ону өз ешшәјинә миндириб бир карвансараја ҝәтирди вә орада онун гајғысына галды. Ертәси ҝүн самаријалы ики динар [муздлу фәһләнин ики ҝүнлүк әмәк һаггы] чыхарыб карвансара саһибинә верди вә деди: “Бу адама јахшы бах, әҝәр артыг хәрҹин чыхарса, гајыданда өдәјәрәм”».

Иса һадисәни данышыб гуртарандан сонра гануншүнасдан сорушур: «Сәнҹә, бу үч нәфәрдән ким гулдурларын әлинә дүшмүш адамын јахыны кими давранды?»

Гануншүнас самаријалынын алиҹәнаб олдуғуну дилинә ҝәтирә билмир, садәҹә дејир: «Онунла шәфгәтлә давранан».

Иса она: «Ҝет, сән дә белә ет», — дејәрәк сөзүнә јекун вурур.

Әҝәр Иса гануншүнаса бирбаша десәјди ки, гејри-јәһудиләр дә онун «јахыны»дырлар, һәмин адам буну гәбул етмәјәҹәкди вә Исаны динләјәнләрдән чоху да онун тәрәфиндә олаҹагды. Һәјатдан ҝөтүрүлмүш бу һекајәт тәсдиг едир ки, јахынымыз анҹаг милләтимиздән вә ја иргимиздән олан адамлар дејил. Бәли, Иса бөјүк мәһарәтлә тәлим верир. Лука 10:25—37; Һәвариләрин ишләри 10:28; Јәһја 4:9; 8:48.

▪ Гануншүнас Исадан нә һагда сорушур вә онун мәгсәди нәдир?

▪ Јәһудиләр кимләри «јахын» сајырлар вә һәтта шаҝирдләрин дә бу ҹүр дүшүндүјүнү нәдән тәхмин етмәк олар?

▪ Иса гануншүнасын дүзҝүн нәтиҹәјә ҝәлмәсинә неҹә наил олур?