Фәсил 79
Халгын әксәр һиссәси итмишдир
ФӘРИСЕЈИН евинин габағында топлашанларла сөһбәтдән бир гәдәр сонра адамлар галилејалыларын башына ҝәлмиш мүсибәти Исаја данышырлар. Ромалы һаким Понти Пилат онларын ганыны ҝәтирдикләри гурбанларын ганына гатыбмыш. Пилат Јерусәлими су илә тәҹһиз едәҹәк су кәмәрини чәкмәк үчүн мәбәдин хәзинәсиндәки пуллардан истифадә етмәк истәјирди вә минләрлә јәһуди буна етиразыны билдирмишди. Еһтимал ки, һәмин галилејалылар етираз вахты өлдүрүлмүшдү. Әһвалаты Исаја данышанлар, јәгин, демәк истәјирләр ки, галилејалыларын башына ҝәлмиш бу фәлакәт онларын пис әмәлләри уҹбатындан олуб.
Лакин Иса онларын јанылдыгларыны ҝөстәрәрәк сорушур: «Елә билирсиниз ки, бу галилејалылар диҝәр галилејалылардан даһа ҝүнаһлы олдуглары үчүн онларын башына белә мүсибәт ҝәлиб?» Өзү өз суалына ҹаваб верир: «Хејр!» Сонра Иса бу һадисәјә истинад едәрәк јәһудиләри хәбәрдар едир: «Әҝәр төвбә етмәсәниз, һамыныз онлар кими мәһв олаҹагсыныз».
Иса сөзүнә давам едәрәк һәмин әразидә баш вермиш башга бир фаҹиәни онлара хатырладыр. Ола билсин, бу бәдбәхт һадисә дә су кәмәринин чәкилиши илә әлагәдардыр. О сорушур: «Јахуд Силоам гүлләсинин алтында галыб өлмүш он сәккиз нәфәр Јерусәлимин бүтүн диҝәр сакинләриндән даһа ҝүнаһлы иди?» Хејр, Иса дејир ки, бу адамлар пис олдугларына ҝөрә өлмәмишди. Адәтән, заман вә тәсадүф уҹбатындан белә бәдбәхтликләр баш верир. Бунунла белә, Иса јенә дә хәбәрдарлыг едир: «Әҝәр төвбә етмәсәниз, һамыныз беләҹә мәһв олаҹагсыныз».
Сонра Иса бу хәбәрдарлыға ујғун бир мәсәл данышыр: «Бир адамын үзүмлүјүндә әнҹир ағаҹы вар иди. Бир ҝүн о, ағаҹдан әнҹир дәрмәјә ҝәлди, амма һеч нә тапмады. Онда бағбана деди: “Дүз үч илдир ҝәлирәм, лакин бу ағаҹда бир дәнә дә олсун әнҹир тапмамышам. Кәс ону ҝетсин! Нә үчүн торпағы бош јерә тутсун?” Бағбан ҹаваб верди: “Аға, гој бир ил дә галсын. Онун дибини белләјәрәм, пејинләјәрәм. Ҝәлән ил бар верәр, лап јахшы; вермәзсә, онда кәсәрсән”».
Үч илдән дә чохдур ки, Иса јәһуди халгында иман јетишдирмәјә чалышыр. Амма ҹәми бир нечә јүз нәфәр шаҝирди онун зәһмәтинин бәһрәси кими һесаба алмаг оларды. Инди хидмәтинин дөрдүнҹү илиндә Иса даһа ҹидд-ҹәһдлә чалышыр. О, Јәһудејада вә Перејада јорулмадан тәблиғ едиб өјрәдәрәк, мәҹази диллә десәк, Јәһуди әнҹир ағаҹынын дибини белләјир вә пејинләјир. Һејф ки, зәһмәти һәдәр ҝедир! Халг төвбә етмәк истәмир вә өзүнү мәһвә мәһкум едир. Јалныз халгын кичик бир һиссәси һај верир.
Бунун үстүндән гыса мүддәт кечдикдән сонра бир шәнбә ҝүнү Иса синагогда тәлим верир. О, орада бели там бүкүлмүш бир гадын ҝөрүр. Дүз он сәккиз илдир ки, ҹин бу гадына олмазын әзаб верир. Иса шәфгәт долу бир сәслә она мүраҹиәт едир: «Баҹым, хәстәлијиндән гуртулдун». Иса әлләрини онун үзәринә гојур. Гадын һәмин андаҹа дикәлир вә Аллаһа шүкүр етмәјә башлајыр.
Синагог рәиси исә буна гәзәбләнәрәк етиразыны билдирир: «Ишләмәк үчүн алты ҝүн вар, һәмин ҝүнләрдә ҝәлиб сағалын, даһа шәнбә ҝүнү јох». Бәли, о, Исанын шәфа вермәјә гадир олдуғуну бојнуна алыр, лакин адамлары шәнбә ҝүнү сағалмаға ҝәлдикләри үчүн тәнбеһ едир.
Иса ҹаваб верир: «Икиүзлүләр! Мәҝәр шәнбә ҝүнү сиз өз өкүзүнүзү вә ја ешшәјинизи ахурдан ачыб сувармаға апармырсыныз? Бәс дүз он сәккиз илдир ки, Шејтанын бағлы сахладығы бу гадыны, Ибраһимин гызыны шәнбә ҝүнү азад етмәк лазым дејилди?»
Исанын әлејһдарлары бу сөзләри ешидәндә утанырлар. Ҹамаат исә Исанын әзәмәтли ишләринә севинир. Бунун мүгабилиндә Иса тәхминән бир ил әввәл (Галилеја ҝөлүндә) Аллаһын Падшаһлығы һаггында сөјләдији пејғәмбәрлик дашыјан ики мәсәли тәкрар данышыр. Лука 13:1—21; Ваиз 9:11; Матта 13:31—33.
▪ Бу фәсилдә һансы бәдбәхт һадисәләрдән бәһс едилир вә Иса онларын васитәсилә нә өјрәдир?
▪ Бәһрәсиз әнҹир ағаҹыны вә онун мејвә вермәси үчүн ҝөрүлән тәдбирләри нәјә аид етмәк олар?
▪ Синагог рәиси Исанын шәфа вермә ҝүҹүнү гәбул етдијини неҹә ҝөстәрир вә Иса бу адамын икиүзлүлүјүнү неҹә ифша едир?