Фәсил 81
Јенидән Исаны өлдүрмәк ҹәһди
ИНДИ гыш олдуғундан Иса «Сүлејман ејваны» адланан үстүөртүлү јердә ҝәзишир. Бу јер мәбәдин бөјрүндәдир. Бурада јәһудиләр Исаны дөврәјә алыб дејирләр: «Сән нә вахта гәдәр бизи интизарда гојаҹагсан? Әҝәр Мәсиһсәнсә, ачыг де».
«Мән сизә демишәм, сиз исә инанмырсыныз», — Иса ҹаваб верир. Иса гују башында самаријалы гадына дедији кими, онлара Мәсиһ олдуғуну бирбаша демәмишди. Лакин ҝөјләрдән ҝәлдијини вә Ибраһим пејғәмбәрдән габаг мөвҹуд олдуғуну сөјләјәндә кимлијини онлара мәлум етмишди.
Иса истәјир ки, адамлар Мүгәддәс Јазыларда Мәсиһин ҝөрәҹәји ишләр һаггында дејиләнләри онун ишләри илә мүгајисә едиб онун Мәсиһ олдуғуну өзләри баша дүшсүнләр. Мәһз буна ҝөрә Иса әввәлләр шаҝирдләринә онун Мәсиһ олдуғуну һеч кәсә демәмәји тапшырмышды. Инди дә буна ҝөрә она гаршы дүшмәнчилик едән јәһудиләрә о, белә ҹаваб верир: «Атамын ады илә ҝөрдүјүм ишләр мәним һаггымда шәһадәт едир. Сиз исә инанмырсыныз».
Ахы онлар нә үчүн инанмырлар? Бәлкә Исанын Мәсиһ олдуғуну сүбут едән дәлилләр аздыр? Хејр, сәбәб башгадыр. Иса дејир: «Мәним гојунларымдан дејилсиниз. Мәним гојунларым сәсимә гулаг асырлар, мән онлары таныјырам вә онлар мәним ардымҹа ҝәлирләр. Мән онлара әбәди һәјат верәҹәјәм. Онлар һеч вахт мәһв олмајаҹаглар вә һеч кәс онлары әлимдән дартыб ала билмәз. Атамын мәнә вердикләри һәр шејдән гијмәтлидир вә һеч ким онлары Атамын әлиндән ала билмәз».
Сонра Иса өзү илә Атасы арасындакы мүнасибәтдән данышыр: «Атамла мән вәһдәтдәјик». Бу ифадә онларын бир шәхсијјәт олдуғуну ҝөстәрмир, чүнки Иса јердәдир, Аллаһ исә ҝөјләрдә. Исанын бу сөзләриндән мәлум олур ки, онларын мәгсәди, амалы бирдир вә онларын арасында там һәмрәјлик вар.
Исанын сөзүндән гәзәбләнән јәһудиләр, бир нечә ај бундан габаг Чардаглар бајрамында олдуғу кими, инди дә даш ҝөтүрүб ону өлдүрмәк истәјирләр. Иса ону өлдүрмәјә һазыр олан бу адамларын гаршысында ҹәсарәтлә дајаныб сорушур: «Мән сизә Атамын бујурдуғу чохлу јахшы иш ҝөстәрдим. Бу ишләрин һансына ҝөрә мәни дашламаг истәјирсиниз?»
Онлар ҹаваб верирләр: «Биз сәни јахшы ишләрә ҝөрә јох, күфр данышдығын үчүн дашлајаҹағыг. Чүнки сән инсан олдуғун һалда, өзүнү аллаһ јеринә гојурсан». Ахы Иса һеч вахт демәјиб ки, о, Аллаһдыр, бәс нә үчүн јәһудиләр ону өлдүрмәк истәјирләр?
Бунун сәбәби ҝөз габағындадыр: онларын фикринҹә, јалныз Аллаһа мәхсус олан габилијјәтләри Иса өзүнә ҝөтүрүр. Мисал үчүн о, һәлим инсанлар һаггында индиҹә: «Мән онлара әбәди һәјат верәҹәјәм», — деди. Буну һеч бир инсан баҹармаз. Анҹаг јәһудиләр бир шеји нәзәрдән гачырырлар, ахы Иса етираф етмишди ки, бу габилијјәти она Аллаһ вериб.
Исанын өзүнү Аллаһдан ашағы сајдығы онун нөвбәти суалындан ҝөрүнүр: «Мәҝәр сизин Ганунда [Мәзмур 82:6]: “Демишәм: «Сиз аллаһларсыныз»”, — јазылмајыб? Әҝәр Аллаһ, мәһкум етдији адамлары Өз кәламында “аллаһ” адландырырса,.. нәјә ҝөрә сиз “Мән Аллаһын Оғлујам” дедијим үчүн мәнә, Атанын пак едиб дүнјаја ҝөндәрдији адама: “Сән күфр данышырсан”, — дејирсиниз?»
Мүгәддәс Јазыларда әдаләтсиз инсан һакимләринә дә «аллаһ» дејилирсә, јәһудиләр Исаны өзүнү «мән Аллаһын Оғлујам» адландырдығына ҝөрә неҹә иттиһам едә биләрләр? Иса әлавә едир: «Әҝәр мән Атамын бујурдуғу ишләри ҝөрмүрәмсә, мәнә инанмајын. Јох әҝәр бу ишләри ҝөрүрәмсә, мәнә инанмасаныз да, ҝөрдүјүм ишләрә инанын ки, Атанын мәнимлә, мәним дә Ата илә вәһдәтдә олдуғуму билиб анлајасыныз».
Бу сөзләрин үстүндә јәһудиләр Исаны јахаламаг истәјирләр. Амма Чардаглар бајрамында олдуғу кими, Иса бу дәфә дә онларын әлиндән гуртула билир. О, Јерусәлимдән чыхыб Иордан чајынын о тајына ҝедир. Тәхминән дөрд ил бундан әввәл Вәфтизчи Јәһја бурада вәфтиз етмәјә башламышды. Бу јер Јерусәлимдән ики ҝүнлүк мәсафәдә јерләшир вә ҝөрүнүр, Галилеја ҝөлүнүн ҹәнуб саһилинә јахындыр.
Бурада Исанын јанына чохлу адам ҝәлир. Онлар дејирләр: «Һәрчәнд Јәһја һеч бир мөҹүзә ҝөстәрмәди, лакин онун бу адам һаггында дедији һәр сөз доғру чыхды». Орада бир чохлары Исаја иман ҝәтирир. Јәһја 10:22—42; 4:26; 8:23, 58; Матта 16:20.
▪ Адамлар Исанын Мәсиһ олдуғуну нәдән баша дүшмәлидирләр?
▪ Һансы мәнада Иса вә Атасы вәһдәтдәдирләр?
▪ Јәһудиләр нә үчүн Исанын өзүнү Аллаһ сәвијјәсинә галдырдығыны дүшүнүрләр?
▪ Исанын мәзмурлардан (Зәбурдан) ҝәтирдији ситат онун Аллаһа шәрик олмадығыны неҹә сүбут едир?