Фәсил 83

Фәрисејин евиндә

ИСА МӘСИҺ һәлә дә бу мәшһур фәрисејин евиндәдир. О, бәдәнинә су јығылан адамы тәзәҹә сағалдыб. Инди исә бахыб ҝөрүр ки, гонаглар сүфрәдә ән јахшы јерләри сечирләр. Буна ҝөрә дә онлара тәвазөкарлыг дәрси верир:

«Кимсә сәни тој мәҹлисинә дәвәт едәндә јухары баша кечмә. Ола билсин, мәҹлисә сәндән даһа адлы-санлы бир адам чағырылыб. Белә олдугда тој јијәси ҝәлиб сәнә дејәҹәк: “Јерини бу адама вер”. Онда сән хәҹаләтлә ашағы баша кечмәли олаҹагсан».

Иса мәсләһәт ҝөрүр: «Сәни бир јерә чағыранда, ашағы башда отур. Мәҹлис јијәси ҝәлиб сәнә дејәҹәк: “Гардаш, кеч јухары баша”. Онда бүтүн гонагларын гаршысында һөрмәтин бирә-беш артаҹаг». Иса сөзүнү белә тамамлајыр: «Чүнки өзүнү јүксәлдән алчалдылаҹаг, өзүнү алчалдан исә јүксәлдиләҹәк».

Сонра Иса ону дәвәт етмиш фәрисејә һансы гонаглығын Аллаһа хош олдуғуну данышыр: «Гонаглыг верәндә евинә достларыны, гоһум-гардашыны вә ја варлы-һаллы гоншуларыны чағырма. Ҝүн ҝәләр, онлар да сәни өз евләринә дәвәт едәрләр, онда әвәз-әвәз оларсыныз. Гонаглыг верәндә евинә касыблары, шикәстләри, чолаглары, корлары чағыр. Бах, онда үрәјин шад олаҹаг, чүнки бу адамларын сәнә вермәјә һеч нәләри јохдур».

Фағырлары чағырмагла ев саһиби хошбәхт олаҹаг, чүнки Исанын сөзүнә ҝөрә, о, «салеһләр дириләндә әвәзини алаҹаг». Исанын тәрифәлајиг наһар һаггында дедикләри гонаглардан биринә башга нөв јемәји хатырладыр. Һәмин адам дејир: «Аллаһын падшаһлығында чөрәк јејән нә хошбәхтдир!» Һејф ки, һамы бу ҝөзәл үмиди лајигинҹә гијмәтләндирмир вә бу, Исанын данышдығы мәсәлдән јахшы ҝөрүнүр:

«Бир адам бөјүк бир зијафәт дүзәлдирди вә евинә чохлу гонаг дәвәт етмишди. Зијафәт вахты ҝәләндә бу адам нөкәрини ҝөндәрди ки, онлара десин: “Һәр шеј һазырдыр, ҝәлин”. Амма онларын һамысы бир нәфәр кими бәһанә ҝәтирмәјә башлады. Бири белә деди: “Мән бир тарла алмышам, ҝәрәк ҝедиб она бахым. Хаһиш едирәм, мәни үзүрлү һесаб ет”. Башгасы белә деди: “Беш ҹүт кәл алмышам, онлары јохламаға ҝедирәм. Аллаһ хатиринә, мәни үзүрлү сај”. Башга бириси деди: “Тәзәҹә евләнмишәм, буна ҝөрә дә ҝәлә билмәрәм”».

Әслиндә, бүтүн бунлар бош бәһанәдир! Тарланы, јахуд кәли аланда јохлајырлар, сонрадан ҝедиб бахмаг бир о гәдәр дә зәрури дејил. Евлилик дә кимсәни белә ваҹиб дәвәти гәбул етмәкдән чәкиндирмәмәлидир. Буна ҝөрә дә ев јијәси гәзәбләниб нөкәринә дејир:

«“Дурма, тез шәһәрин баш күчәләринә вә даланларына чых, касыблары, шикәстләри, корлары вә ахсаглары јығ бура ҝәтир”. Бир аздан нөкәр ҝәлиб деди: “Аға, әмрини јеринә јетирдим, амма һәлә бир аз да јер галыб”. Аға нөкәрә деди: “Јолларда, ҹығырларда кими тапсан һамыны мәҹбур едиб бура ҝәтир ки, евим долсун. Буну билин ки, әввәлдән дәвәт етдијим гонаглардан һеч бири мәним ахшам јемәјимин дадына бахмајаҹаг”».

Бу мәсәл нәји ачыглајыр? Зијафәти верән «Аға» Јеһова Аллаһы тәмсил едир; гонаглары ҝедиб чағыран «нөкәр» Иса Мәсиһдир; «бөјүк зијафәт» исә сәмави Падшаһлыға ҝирмәк имканыдыр.

Падшаһлыгда олмаг дәвәтини илк өнҹә аланлар Исанын дөврүндәки јәһуди дин хадимләри иди. Лакин онлар дәвәти рәдд етдиләр. Буна ҝөрә дә ерамызын 33-ҹү илинин Әллинҹи ҝүн бајрамындан башлајараг икинҹи дәвәт сәсләнди. Бу дәвәт фағыр, нифрәт һәдәфи олан јәһудиләрә верилди. Амма Аллаһын Падшаһлығындакы 144 000 јери тутмаг үчүн бу адамлар азлыг едир. Бу сәбәбдән үч ил јарым сонра, ерамызын 36-ҹы илиндә сүннәтсиз гејри-јәһудиләрә дә дәвәт верилди. Бу адамларын топланмасы бизим дөврүмүзә гәдәр давам едир. Лука 14:1—24.

▪ Иса тәвазөкарлыгла бағлы һансы дәрси верир?

▪ Аллаһа хош олан гонаглыг нәдир вә ону верән нә үчүн хошбәхт олаҹаг?

▪ Дәвәт олунанларын бәһанәләри нәјә ҝөрә әсассыз иди?

▪ Исанын «бөјүк зијафәт» мәсәли нәји ачыглајыр?