Фәсил 87

Ҝәләҹәјин барәдә дүшүн

ИСА МӘСИҺ елә индиҹә итмиш оғул һагда мәсәлини данышыб гуртарды. Ону динләјәнләр арасында шаҝирдләри, надүрүст верҝијығанлар, диҝәр ҝүнаһлы сајылан адамлар, мирзәләр вә фәрисејләр вар иди. Инди о, шаҝирдләринә бир варлы адам һаггында мәсәл сөјләјир. Бу варлы адамын гулағына нөкәрбашысы һаггында хошаҝәлмәјән хәбәр чатыб.

Иса данышыр ки, варлы адам нөкәрбашыны јанына чағырыр вә она ишдән говулаҹағыны билдирир. Нөкәрбашы өз-өзүнә дејир: «Ағам вәзифәми әлимдән алыр, бәс мән нә едәҹәјәм? Торпаг газмаға гүввәм јох, диләнмәјә дә утанырам. Аһа! Билирәм нә етмәк лазымдыр ки, ишдән говуландан сонра адамлар мәни өз евләриндә гәбул етсинләр».

Ҝөрәсән, нөкәрбашы нә едир? О, ағасына борҹу оланлары бир-бир јанына чағырыр. Биринҹисиндән сорушур: «Ағама нә гәдәр борҹлусан?»

О дејир: «Јүз бат [2200 литр] зејтун јағы».

Нөкәрбашы дејир: «Гәбзини ал вә отур, ҹәлд әлли бат јаз».

Сонра башгасындан сорушур: «Бәс сәнин борҹун нә гәдәрдир?»

О дејир: «Јүз кор [22 000 литр] буғда».

Нөкәрбашы дејир: «Гәбзини ҝөтүр вә сәксән кор јаз».

Нөкәрбашынын гәбзләрдә дәјишиклик етмәјә ихтијары чатыр, чүнки ағасынын малијјә ишләринә һәлә дә о бахыр. О, борҹлары азалтмагла өзүнә достлар газаныр ки, ишини итирдији тәгдирдә онлара ағыз ача билсин.

Нөкәрбашынын бу һәрәкәти ағанын хошуна ҝәлир. Иса дејир: «Надүрүст нөкәрбашынын ағылла тәрпәндијини ҝөрән ағасы ону тәрифләди. Доғрудан да, бу зәманәнин оғуллары нурун оғулларына нисбәтән өз дөврүнүн адамлары илә даһа ағылла давранырлар».

Сонра Иса шаҝирдләринә бу мәсәлин маһијјәтини ҝөстәрир: «Өзүнүзә дүнја малы илә дост газанын ки, бу мал гуртаранда онлар сизи әбәди мәскәнләрә гәбул етсинләр».

Иса бу нөкәрбашыны надүрүстлүјүнә ҝөрә јох, фәрасәтинә, јәни ағыллы тәрпәндијинә ҝөрә тәрифләјир. Чох вахт «бу зәманәнин оғуллары» вар-дөвләтләриндән вә ја мөвгеләриндән истифадә едәрәк онлара јахшылыгла әвәзини верә биләҹәк инсанларла достлуг едирләр. «Нурун оғуллары» олан Аллаһын хидмәтчиләри дә «дүнја малы»ндан, јәни вар-дөвләтләриндән хејирләри үчүн ағылла истифадә етмәлидирләр.

Ән әсасы исә онлар, Исанын дедији кими, «дүнја малы»ндан онлары «әбәди мәскәнләрә» гәбул едәҹәк шәхсләрлә дост олмаг үчүн истифадә етмәлидирләр. «Кичик сүрү»нүн үзвләри үчүн бу мәскән ҝөјдәдир, «башга гојунлар» үчүн исә јердә, Ҹәннәтдә олаҹаг. Бу мәскәнләрә бизи јалныз Јеһова Аллаһ вә Иса Мәсиһ гәбул едә биләр. Буна ҝөрә дә биз «дүнја малы»ны Падшаһлыг ишинин ирәлиләмәси үчүн сәрф едәрәк онларла достлуғумузу мөһкәмләндирмәјә чалышмалыјыг. Вар-дөвләт түкәнәндә вә ја дәјәрини итирәндә әбәди һәјата тәминатымыз әлимиздән чыхмајаҹаг.

Сонра Иса дејир ки, мадди, јәни хырда ишләрдә садиг оланлар мүһүм ишләрдә дә садиг олаҹаглар. О давам едир: «Беләликлә, әҝәр сиз дүнја малы илә рәфтарда садиг олмасаныз, ким сизә һәгиги сәрвәти [јәни руһани, јахуд Падшаһлыг ишини] етибар едәр? Өзҝәсинин малына [Аллаһын Өз хидмәтчиләринә етибар етдији Падшаһлыгла бағлы ишләринә] гаршы садиг олмасаныз, ким сизә сизин үчүн һазырланмыш мүкафаты [әбәди мәскәнләрдә олан һәјат мүкафатыны] верәр?»

Биз ејни заманда һәм Аллаһын һәгиги хидмәтчиси, һәм дә «дүнја малынын», јәни вар-дөвләтин гулу ола билмәрик. Бу барәдә Иса белә дејир: «Һеч бир нөкәр ики ағаја гуллуг едә билмәз, чүнки ја биринә нифрәт едиб, о бирини севәҹәк, ја да биринә садиг галыб диҝәрини сајмајаҹаг. Сиз һәм Аллаһын, һәм дә вар-дөвләтин нөкәри ола билмәзсиниз». Лука 15:1, 2; 16:1—13; Јәһја 10:16.

▪ Исанын сөјләдији мәсәлдә нөкәрбашы сонрадан она көмәк едә биләҹәк адамларла неҹә дост олур?

▪ «Дүнја малы» нәдир вә онун васитәсилә достлар газанмаг неҹә мүмкүндүр?

▪ «Әбәди мәскәнләр» нәдир вә бизи ора кимләр гәбул едир?