Фәсил 89
Мәрһәмәтдән ирәли ҝәләрәк Иса Јәһудејаја ҝедир
ЈӘҺУДИЛӘР бир нечә һәфтә бундан габаг, Һәср етмә бајрамы заманы Јерусәлимдә Исаны өлдүрмәк истәмишдиләр. Бу сәбәбдән о, шимала, еһтимал ки, Галилеја ҝөлүнә јахын бир бөлҝәјә ҝедиб.
Инди исә о, јенидән Јерусәлимә гајыдыр. Иса ҝедә-ҝедә Иордан чајынын шәрг саһилиндә јерләшән Переја бөлҝәсинин кәндләриндә тәблиғ едир. Варлы адам вә Лазар барәсиндәки мәсәлдән сонра о, шаҝирдләринә әввәлләр Галилејада өјрәтдији шејләри тәкрар едир.
Мәсәлән, Иса дејир ки, инсан үчүн Аллаһа мәхсус олан «бу кичикләрдән бирини бүдрәтмәкдәнсә,.. даһа јахшы оларды ки, бојнуна дәјирман дашы асыб ону дәнизә атсынлар». Јахуд бағышламағын ваҹиблијини вурғулајараг дејир: «Һәтта бир ҝүндә [гардашын] сәнә гаршы једди дәфә ҝүнаһ ишләсә вә һәр дәфә јанына ҝәлиб: “Төвбә едирәм”, — десә, ону бағышламалысан».
Шаҝирдләр Исадан: «Иманымызы артыр», — дејә хаһиш едәндә о дејир: «Әҝәр сиздә бир хардал тохуму бојда иман олсајды, бу тут ағаҹына: “Көкүндән гоп вә дәниздә бит”, — дејәрдиниз вә ағаҹ сизә итаәт едәрди». Бәли, һәтта кичиҹик иман бөјүк ишләр ҝөрмәјә гадирдир.
Бунун ардынҹа Иса Гадир Аллаһа хидмәт едән һәр кәсдән һансы әһвал-руһијјә ҝөзләнилдијини ҝөстәрмәк үчүн ади һәјатдан бир мәсәл чәкир: «Туталым нөкәриниз вар. О, јер шумламагдан вә ја сүрүнү отармагдан гајыданда һансыныз она: “Тез сүфрәјә кеч, әјләш”, — дејәр? Мәҝәр: “Шам јемәјими һазырла, өнлүјүнү тах вә мән јејиб гуртаранадәк мәнә гуллуг ет, сонра өзүн дә јејәрсән”, — демәз? Тапшырығыны јеринә јетирдијинә ҝөрә мәҝәр ағасы нөкәрә миннәтдар олаҹаг? Сизә тапшырылмыш ишләри ҝөрүб гуртаранда дејин: “Биз һеч нәјә јарамајан нөкәрләрик. Биз садәҹә ишимизи ҝөрдүк”». Беләликлә, Аллаһын хидмәтчиләри хидмәтләринә ҝөрә әсла Аллаһа миннәт гојмамалыдырлар. Әксинә, һәмишә јадда сахламалыдырлар ки, Аллаһ онлары ев әһли һесаб едир вә Она бу бахымдан ибадәт етмәк бөјүк шәрәфдир.
Ҝөрүнүр, Иса бу мәсәли тәзәҹә данышыб гуртармышды ки, онун јанына бир адам ҝәлир. Ону Јәһудејанын Бетанија кәндиндә јашајан Лазарын баҹылары Марта илә Мәрјәм ҝөндәриб. О хәбәр верир: «Аға, әзиз достун хәстәдир».
Иса дејир: «Бу хәстәлик өлүмә апармыр. О, Аллаһа шөһрәт ҝәтирәҹәк, Аллаһын Оғлу да бу хәстәлик васитәсилә шөһрәтләнәҹәк». Иса ики ҝүн дә бурада галыр вә сонра шаҝирдләринә дејир: «Ҝәлин јенә Јәһудејаја ҝедәк». Анҹаг шаҝирдләри она хатырладырлар: «Мүәллим, јәһудејалылар тәзәликҹә сәни дашламаг истәјирдиләр, сән исә јенә ора ҝедирсән?»
«Мәҝәр ҝүнүн узунлуғу он ики саат дејил? — дејә Иса сорушур. — Ҝүндүз ҝәзәнин ајағы һеч нәјә илишмир, чүнки о, бу дүнјанын ишығыны ҝөрүр. Лакин ҝеҹә ҝәзәнин ајағы мүтләг нәјәсә илишәҹәк, чүнки о, зүлмәтдәдир».
Ҝөрүнүр, Иса бунунла демәк истәјир ки, «ҝүнүн» саатлары, јәни Аллаһын она јер үзүндә хидмәт етмәк үчүн ајырдығы вахт битмәјинҹә һеч кәс она хәтәр јетирә билмәз. Иса «ҝүндүздән» онун пајына галмыш гыса вахты мүтләг истифадә етмәлидир, сонра дүшмәнләри ону өлдүрәндә «ҝеҹә» ҝәләҹәк.
Сонра Иса дејир: «Достумуз Лазар јухуја ҝедиб, мән исә ону ојатмаға ҝедирәм».
Шаҝирдләр елә билирләр ки, Лазар јатыб вә тезликлә сағалыб ајаға дураҹаг. Онлар дејирләр: «Аға, јатырса, демәли, сағалаҹаг».
Онда Иса ачыг дејир: «Лазар өлүб вә мән чох шадам ки, орада олмамышам, чүнки инди сизин иманыныз даһа да мөһкәмләнәҹәк. Дурун, онун јанына ҝедәк».
Томас баша дүшүр ки, Јәһудејада Исаны өлдүрә биләрләр вә о бири шаҝирдләрә дејир: «Ҝедәк, биз дә онунла өләк». Беләҹә, Иса мәрһәмәтдән ирәли ҝәләрәк јенидән Јәһудејаја јолланыр вә шаҝирдләри дә һәјатларыны тәһлүкәјә атараг онунла ҝедирләр. Лука 13:22; 17:1—10; Јәһја 10:22, 31, 40—42; 11:1—16.
▪ Иса сон вахтлары һарада тәблиғ едир?
▪ Иса һансы тәлимләри тәкрарлајыр? О, ади һәјатдан ҝөтүрүлмүш һансы мәсәли данышыр вә бу мәсәл нәји ачыглајыр?
▪ Исаја нә хәбәр верирләр вә о, «ҝүндүз», «ҝеҹә» дејәркән нәји нәзәрдә тутур?
▪ «Ҝедәк, биз дә онунла өләк» сөзләри илә Томас нә демәк истәјир?