Фәсил 92
Иса вә он ҹүзамлы
СИНЕДРИОНУН Иса Мәсиһи өлдүрмәк ҹәһди баш тутмур, чүнки Иса Јерусәлимдән чыхыб Ефраим шәһәринә ҝедир. Бу шәһәр Јерусәлимдән шимал-шәрг истигамәтиндә, тәхминән 25 километр мәсафәдә јерләшир. Иса шаҝирдләри илә бирҝә бурада, дүшмәнләриндән кәнарда галыр.
Ерамызын 33-ҹү илинин Пасха бајрамы јахынлашыр. Бир аздан Иса јенә јола чыхыр, о, Самаријадан кечиб Галилејаја ҝедир. Бу, Исанын Галилејаја өлүмүндән габаг сонунҹу сәфәридир. Јәгин, бурада Иса вә шаҝирдләри Јерусәлимә, Пасха бајрамына ҝедәнләрә гошулурлар. Онларын јолу Иорданын шәрг саһилиндә јерләшән Переја бөлҝәсиндән кечир.
Һарадаса јолун башланғыҹында Иса Самаријада вә ја Галилејада бир кәндә ҝирәркән он ҹүзамлы киши онун гаршысына чыхыр. Ҹүзам горхунҹ хәстәликдир. О, тәдриҹән инсан бәдәнинин мүхтәлиф үзвләрини — әл вә ајаг бармагларыны, гулағыны, бурнуну вә додагларыны чүрүдүб төкүр. Башгаларынын бу хәстәлијә јолухмамасы үчүн Аллаһын Ганунунда ҹүзамлылар барәдә дејилир: «О адам ағзыны өртүб: “Мурдарам! Мурдарам!” — дејә чығырсын. Дәрисиндә әламәт олдуғу бүтүн мүддәт о мурдар сајылсын... Тәк јашасын».
Бу он ҹүзамлы Ганунун тәләбинә риајәт едәрәк Исаја јахынлашмыр, узагда дуруб гышгырырлар: «Иса, Устад, бизә рәһм ет!»
Иса онлары ҝөрәндә: «Ҝедин өзүнүзү каһинләрә ҝөстәрин», — дејир. Иса бу ҝөстәриши она ҝөрә верир ки, Гануна әсасән, ҹүзамлынын сағалдығыны мәһз каһинләр халга елан етмәли идиләр. Јалныз бу тәгдирдә онлар јенидән сағлам адамларын арасында јашаја биләрдиләр.
Бу он ҹүзамлы, Исанын харигүладә ҝүҹүнә инандыгларындан һәлә сағалмамыш, каһинләрин јанына ҝедирләр. Јолда икән онлар һисс едирләр ки, сағалырлар. Беләҹә, онлар Исаја иман ҝәтирмәјин бәһрәсини ҝөрүрләр.
Ҹүзамдан тәмизләнәндән сонра бу он нәфәрдән доггузу өз ишинин далынҹа ҝедир, бири исә Исаны тапмаг үчүн ҝери гајыдыр. О, сағалдығы үчүн чох миннәтдардыр. Бу киши Аллаһа уҹадан шүкүр едир вә Исаны тапанда онун ајагларына јыхылыб тәшәккүр едир. Һәмин адам самаријалы иди.
Иса сорушур: «Мәҝәр он нәфәр тәмизләнмәди? Бәс галан доггуз нәфәр һаны? Аллаһа һәмд етмәк үчүн бу јаделлидән савајы һеч ким гајыдыб ҝәлмәди?»
Сонра Иса самаријалы кишијә дејир: «Дур ҝет, иманын сәни сағалтды».
Исанын он ҹүзамлыны сағалтмасы һекајәтини охујаркән онун: «Бәс галан доггуз нәфәр һаны?» — суалы үзәриндә ҹидди дүшүнүб, өзүмүзә дәрс ҝөтүрмәлијик. Доггуз нәфәр нанкор, Самаријалы исә миннәтдар иди. Мәҝәр биз дә Аллаһдан алдығымыз һәр шејә, о ҹүмләдән әдаләтли јени дүнјада әбәди јашамаг үмидинә ҝөрә Она миннәтдар олмалы дејилик? Јәһја 11:54, 55; Лука 17:11—19; Левилиләр 13:16, 17, 45, 46; Вәһј 21:3, 4.
▪ Исаны өлдүрмәк ҹәһди нәјә ҝөрә боша чыхыр?
▪ Сонра Иса һара јола дүшүр вә онун сәфәринин мәгсәди нәдир?
▪ Ҹүзамлылар нә үчүн узагда дурублар вә Иса онлары нәјә ҝөрә каһинләрин јанына ҝөндәрир?
▪ Бу һадисәдән һансы дәрс ҝөтүрмәлијик?