Фәсил 111

Ахыр ҝүнләрин әламәти

НИСАНЫН 11-и, ҝүнортадан сонра Иса Мәсиһ Зејтун дағынын үстүндә әјләшиб ашағыда јерләшән мәбәдә бахыр. Бу вахт Петер, Андреас, Јагуб вә Јәһја онун јанына ҝәлирләр. Бир аз әввәл Исанын мәбәдлә бағлы дедији «бурада даш даш үстә галмајаҹаг» сөзләри онларын башындан чыхмыр.

Ҝөрүнүр, онлары нараһат едән тәк бу дејил. Бир нечә һәфтә бундан әввәл Иса онлара өзүнүн «иштиракы»ндан сөз ачмышды; һәмин вахт «инсан Оғлунун зүһур»у олаҹаг. Даһа әввәл исә о, «дөврүн јекуну» барәдә онлара данышмышды. Һәвариләр бүтүн бунлар барәдә әтрафлы өјрәниб билмәк истәјирләр.

Онлар сорушурлар: «Бизә де, бунлар [Јерусәлимин вә мәбәдин дағыдылмасы илә бағлы һадисәләр] нә вахт баш верәҹәк? Сәнин иштиракынын вә дөврүн јекунунун әламәти нә олаҹаг?» Һәвариләрин бу суалы өзүнә үч шеји дахил едир: әввәла, онлар билмәк истәјирләр ки, Јерусәлим вә мәбәдин ахыры неҹә олаҹаг, икинҹиси, Исанын падшаһ кими иштиракы нә вахт олаҹаг вә үчүнҹүсү, дөврүн јекуну неҹә олаҹаг.

Иса онлара әтрафлы ҹаваб верир. О, јәһуди системинин сонуну билдирәҹәк әламәти тәсвир едир. Үстәлик, Иса ҝәләҹәкдәки шаҝирдләринә онун иштиракы вахтында јашадыгларыны вә дөврүн сонунун јахынлашдығыны билдирәҹәк әламәт барәдә дә данышыр.

Илләр өтдүкҹә һәвариләр Исанын сөјләдији бу пејғәмбәрлијин неҹә јеринә јетдијинин шаһиди олурлар. Бәли, бу сөзләр мәһз онларын сағлығында һәјата кечмәјә башлајыр. Бу сәбәбдән ерамызын 70-ҹи илиндә јәһуди системинин вә мәбәдин дағылмасы мәсиһчиләри гәфил јахаламады.

Лакин Мәсиһин падшаһ кими иштиракы 70-ҹи илдә јох, хејли сонралар олур. Бәс бунлар нә вахт олаҹаг? Исанын сөјләдији пејғәмбәрлији арашдырмагла бу суалын ҹавабыны тапа биләрик.

Иса пејғәмбәрлик едир: «Јахын вә узаг јерләрдә ҝедән мүһарибәләр барәсиндә ешидәҹәксиниз». Һәмчинин о дејир ки, милләт милләтә гаршы галхаҹаг, гытлыглар, зәлзәләләр вә епидемијалар олаҹаг; онун шаҝирдләринә нифрәт едәҹәк вә өлдүрәҹәкләр; сахта пејғәмбәрләр пејда олаҹаг вә чохларыны алдадаҹаглар; һәрҹ-мәрҹлик баш алыб ҝедәҹәк вә чохларында мәһәббәт сојујаҹаг. Бунларла бәрабәр Падшаһлыг һаггында хош хәбәр тәблиғ едиләҹәк вә бүтүн милләтләрә шәһадәт вериләҹәк.

Исанын бу пејғәмбәрлији Јерусәлимин 70-ҹи илдәки сүгутундан әввәл кичик мигјасда јеринә јетди, бөјүк мигјасда исә Исанын иштиракы вә дөврүн јекуну заманы иҹра олаҹагды. 1914-ҹү илдән бәри дүнјада баш верән һадисәләри диггәтлә арашдыранда ҝөрүрүк ки, Исанын бу мүһүм пејғәмбәрлији һәмин илдән башлајараг бөјүк мигјасда јеринә јетир.

Иса әламәтдән данышаркән «виранәлик ҝәтирән ијрәнҹ шеј»ин пејда олаҹағыны гејд едир. Ерамызын 66-ҹы илиндә Рома гошуну Јерусәлими мүһасирәјә алыб мәбәдин диварынын алтыны газыр. Беләҹә, «лајиг олмадығы јердә» дуран «ијрәнҹ шеј» Рома ордусу олур.

Әламәтин бөјүк мигјасда јеринә јетдији мүасир зәманәдә бу «ијрәнҹ шеј» Милләтләр Лигасы вә онун давамчысы олан Бирләшмиш Милләтләр Тәшкилатыдыр. Дүнјада сүлһү бәргәрар етмәк үчүн јарадылмыш бу тәшкилат Христиан дүнјасынын фикринҹә, Аллаһын Падшаһлығыны әвәз едир. Бу, әсил ијрәнҹликдир! Буна ҝөрә дә БМТ илә бағлы олан сијаси гүввәләр Христиан дүнјасына (Јерусәлимин мүасир образы) гаршы галхаҹаг вә ону мәһв едәҹәк.

Иса пејғәмбәрлик едир: «О вахт елә бир бөјүк мүсибәт олаҹаг ки, беләси дүнја јаранандан бәри олмамышдыр вә бир даһа олмајаҹаг». Мәлумата ҝөрә, 70-ҹи илдә Јерусәлим дармадағын едиләндә бир милјондан чох инсан һәлак олуб. Бу, доғрудан да, әсил мүсибәт иди! Исанын сөјләдији пејғәмбәрлијин бу һиссәсинин бөјүк мигјасда иҹрасы һәлә габагдадыр.

Ахыр ҝүнләрдә мәтин олмалы

Ҝүн баша чатмаг үзрәдир. Иса һәвариләри илә өзүнүн падшаһ кими иштиракынын вә дөврүн јекунунун әламәти барәдә сөһбәтини давам етдирир. О, онлара өзләрини сахта мәсиһләрдән горумағы төвсијә едир вә дејир ки, бу адамлар «мүмкүнсә, сечилмишләри дә јолдан чыхартмаға» чалышаҹаглар. Лакин сечилмишләр, итиҝөзлү гарталлар кими, һәгиги руһани гиданын үстүнә, јәни иштиракы ҝөзлә ҝөрүнмәјән тәрздә башламыш Мәсиһин јанына топлашаҹаглар. Онлары алдатмаг мүмкүн олмајаҹаг вә онлар сахта мәсиһләрин башына топлашмајаҹаглар.

Һәгиги Мәсиһ ҝөзлә ҝөрүнмәјән тәрздә иштирак етдији һалда, сахта мәсиһләри ҝөрмәк мүмкүн олаҹаг. Иса дејир ки, мүсибәт башлајандан сонра «ҝүнәш зүлмәтә гәрг олаҹаг, ај ишыг сачмајаҹаг». Бәли, бәшәр тарихиндә ән зүлмәтли дөвр башлајаҹаг. Һәмин дөврү ҝүнәшсиз ҝүнә вә ајсыз ҝеҹәјә охшатмаг олар.

Иса һәм дә дејир ки, «ҝөјләрин гүдрәти сарсылаҹаг». Бунунла о ҝөстәрир ки, сәма горхунҹ ҝөркәм алаҹаг. Бәшәр тарихиндә һәлә ҝөрүнмәмиш горху вә зоракылыг түғјан едәҹәк. «Јердә дәнизин нәрилтисиндән вә чалхаланмасындан чыхыш јолу тапмајан милләтләр әзаб чәкәҹәк. Инсанлар горхудан вә јерин үзәринә ҝәләҹәк һадисәләри ҝөзләмәкдән һушуну итирәҹәкләр». Бәли, бәшәр тарихинин бу мүдһиш дөврү баша чатдығы вахт «ҝөјдә инсан Оғлунун рәмзи пејда олаҹаг, јер үзүнүн бүтүн гәбиләләри ағлашыб башларына дөјәҹәк».

Амма инсан Оғлу бу пис дөврү мәһв етмәк үчүн «гүдрәтлә» ҝәләндә һамы «ағлашмајаҹаг». Мәсиһлә бирҝә Падшаһлыгда олаҹаг 144 000 «сечилмишләр» вә онларын «башга гојунлар» адланан јолдашлары кәдәрләнмәјәҹәкләр. Онлар тарихин ән ағыр дөврүндә јашасалар да, Исанын бу чағырышы онлары руһландырыр: «Бунлар јеринә јетмәјә башлајанда гамәтинизи дүзәлдиб башынызы дикәлдин, чүнки гуртулушунуз јахындыр».

Ахыр ҝүнләрдә јашајаҹаг шаҝирдләрин сонун јахын олдуғуну мүәјјән едә билмәләри үчүн Иса әјани нүмунә ҝәтирир: «Әнҹир ағаҹына вә башга ағаҹлара фикир верин. Онларын тумурҹугландығыны ҝөрәндә билирсиниз ки, тезликлә јај ҝәләҹәк. Еләҹә дә бүтүн бунларын баш вердијини ҝөрәндә билин ки, Аллаһын падшаһлығы јахындадыр. Јадынызда сахлајын ки, бүтүн бунлар бу нәсил јох олмамыш баш верәҹәк».

Беләликлә, әламәтин тәркиб һиссәләриндән бир чоху иҹра олунмаға башлајанда шаҝирдләр баша дүшмәлидирләр ки, дөврүн сону јахынлашыр вә тезликлә Аллаһын Падшаһлығы бүтүн пислији јох едәҹәк. Иса бу әламәтдар дөврдә јашајаҹаг шаҝирдләрә төвсијә едир:

«Өзүнүзә фикир верин, үрәјинизи гарынгулулуг, сәрхошлуг вә һәјатын гајғылары илә јүкләмәјин ки, о ҝүн үстүнүзә тор кими гәфләтән, бир ан ичиндә ҝәлмәсин. Чүнки о ҝүн јер үзүндә јашајан һәр кәс үчүн ҝәләҹәк. Буна ҝөрә дә ојаг дурун вә һәр вахт Аллаһа јалварын ки, мүтләг баш верәҹәк һадисәләрдән гуртуласыныз вә инсан Оғлунун гаршысында дура биләсиниз».

Ағыллы вә ағылсыз гызлар мәсәли

Иса падшаһ кими иштиракына даир шаҝирдләринә даһа үч мәсәл данышыр. Бу мәсәлләр әламәтин башга јөнләрини ишыгландырыр.

Онун иштиракы заманы јашајанлар бу мәсәлләрин һәјата кечмәсинин шаһиди олаҹаглар. Иса биринҹи мәсәли белә башлајыр: «Сәмави падшаһлыг чырагларыны ҝөтүрүб бәји гаршыламаға чыхан он гыза бәнзәјир. Онлардан беши ағылсыз, беши исә ағыллы иди».

Иса Аллаһын Падшаһлығы «он гыза бәнзәјир» демәклә сәмави мүкафаты аланларын јарысынын ағыллы, диҝәр јарысынын исә ағылсыз олаҹагларыны нәзәрдә тутмур. О демәк истәјир ки, Падшаһлыгла бағлы һадисәләр бу мәсәлдә тәсвир олунан вәзијјәтә охшар олаҹаг.

Он гыз Падшаһлыға лајиг ҝөрүләнләри вә ја лајиг ҝөрүлдүјүнү иддиа едәнләри тәмсил едир. Бәј, јәни дирилмиш вә шөһрәтләнмиш Мәсиһ ерамызын 33-ҹү илинин Әллинҹи ҝүн бајрамында мәсиһчи јығынҹағы илә мәҹази мәнада нишанланыр. «Тој» исә ҝәләҹәкдә ҝөјдә олаҹаг.

Мәсәлдә он гыз бәји гаршыламаг вә тој шәнлијинә гошулмаг үчүн чөлә чыхыр. Бу гызлар әлләриндә чыраг ҝәлинини евинә ҝәтирмәјә һазырлашан бәјин вә ону мүшајиәт едәнләрин јолуну ишыгландыраҹаг. Иса данышыр: «Ағылсыз гызлар чырагларыны ҝөтүрмүшдүләр, амма јағ ҝөтүрмәмишдиләр. Ағыллы гызлар исә чырагларла бирҝә јағ габларыны да долдуруб өзләри илә ҝөтүрмүшдүләр. Бәј јубандығы үчүн гызлар мүрҝүләјиб јухуја ҝетдиләр».

Бәјин јубанмасы о демәкдир ки, Мәсиһин падшаһ кими иштиракы һәлә узагдадыр. Нәһајәт, 1914-ҹү илдә Мәсиһ тахта чыхыр. Бу һадисәдән габагкы узун ҝеҹә әрзиндә гызларын һамысы јухуја далырлар. Анҹаг буна ҝөрә онлара сөз ҝәлмир. Ағылсыз гызлар јағ ҝөтүрмәдикләри үчүн мүһакимә олунурлар. Иса бәјин ҝәлиши габағы гызларын неҹә ојандығыны нәгл едир: «Бирдән ҝеҹә јарысы кимсә гышгырды: “Бәј ҝәлир! Бәјин габағына чыхын”. Онда гызларын һамысы дуруб чырагларыны гајдаја салдылар. Ағылсыз гызлар ағыллылара дедиләр: “Јағыныздан бир аз бизә дә верин, чүнки чырагларымыз сөнмәк үзрәдир”. Ағыллы гызлар белә ҹаваб вердиләр: “Јағ һәм сизә, һәм бизә чатмаја биләр. Јахшысы будур ҝедин, јағ сатанлардан алын”».

Јағ һәгиги мәсиһчиләрин чыраг кими ишыг сачмасына гүввә верән бир васитәдир. Бу васитә Мәсиһин давамчыларынын әлдә мөһкәм тутдуглары Аллаһын Кәламы вә ону баша дүшмәјә көмәк едән мүгәддәс руһдур. Руһани јағ сајәсиндә ағыллы гызлар бәјин тој шәнлијинә ҝәлдији јолу ишыгландыра билирләр. Ағылсыз гызлар синфини тәмсил едәнләрдә исә руһани јағ јохдур. Иса сонра нә олдуғуну данышыр:

«Онлар [ағылсыз гызлар] јағ алмаға ҝетдикләри вахт бәј ҝәлиб чыхды. О гызлар ки һазыр иди, бәјлә тој мәҹлисинә ҝирдиләр вә гапы бағланды. Бир гәдәр сонра о бири гызлар да ҝәлиб: “Аға, аға, бизик, гапыны ач!” — дејә чағырдылар. Бәј онлара деди: “Мән сизи танымырам”».

Мәсиһ Аллаһын Падшаһлығына ҝәлдикдән сонра мәсһ олунмуш һәгиги мәсиһчиләрдән ибарәт ағыллы гызлар синфи ојаныр. Онлар ҝери гајыдан Бәјин шәрәфинә бу зүлмәт дүнјада ишыг сачмаға лајиг ҝөрүлүрләр. Ағылсыз гызларла тәмсил олунанлар исә буна һазыр дејилләр. Буна ҝөрә дә вахт јетишәндә Мәсиһ ҝөјдәки тој мәҹлисинин гапысыны онлара ачмајаҹаг. О, онлары бу дүнјанын зүлмәтли ҝеҹәсинин гаты гаранлығында чөлдә сахлајыр ки, диҝәр ганунсузлуг едәнләрлә бәрабәр мәһв олсунлар. Иса бу мәсәли белә јекунлашдырыр: «Буна ҝөрә дә ојаг галын, чүнки о ҝүнү вә о сааты билмирсиниз».

Талантлар һаггында мәсәл

Иса Зејтун дағында һәвариләри илә сөһбәтини давам етдирәрәк нөвбәти мәсәли данышыр. О, бир нечә ҝүн бундан әввәл Јерихода оларкән Падшаһлығын узагда олдуғуну ҝөстәрмәк үчүн «он мина» мәсәлини сөјләмишди. Инди чәкдији мәсәл бир чох ҹәһәтдән һәмин мәсәлә охшаса да, бурада Мәсиһин падшаһ кими иштиракы заманы олаҹаг һадисәләр тәсвир едилир. Бу мәсәл ҝөстәрир ки, Исанын шаҝирдләри јердә олдуглары вахт әрзиндә онун «әмлакыны» чохалтмаға чалышмалыдырлар.

Иса нәгл едир: «Падшаһлыг һәмчинин башга өлкәјә ҝетмәјә һазырлашан бир адама бәнзәјир. О адам нөкәрләрини јанына чағырыб әмлакынын идарәсини онлара һәвалә етди». «Башга өлкәјә ҝетмәјә һазырлашан адам» Исадыр. О, ҝөјә ҝетмәздән әввәл «нөкәрләринә», јәни сәмави Падшаһлыға лајиг ҝөрүлмүш шаҝирдләринә өз «әмлакыны» һәвалә едир. «Әмлак» нәсә мадди бир шеј дејил; о, даһа чох шаҝирд јетишдирмәк үчүн Исанын «шумладығы» мүнбит тарланы тәмсил едир.

Иса ҝөјә галхмаздан бир аз әввәл әмлакыны шаҝирдләринә һәвалә едир. Неҹә? О, онлара шумлајыб һазырладығы саһәдә чалышмағы, јәни Аллаһын Падшаһлығы һаггында хош хәбәри јер күрәсинин уҹгарларынадәк тәблиғ етмәји тапшырыр. Иса белә дејир: «О, нөкәрләрин баҹарығыны нәзәрә алараг, биринә беш, о бирисинә ики, диҝәринә исә бир талант вериб јола чыхды».

Демәли, Исанын әмлакы олан бу сәккиз талант нөкәрләрә руһани ҹәһәтдән баҹарыглары нәзәрә алынараг верилмишди. «Нөкәрләр» шаҝирдләрин мүхтәлиф групларыны тәмсил едир. Биринҹи әсрдә беш талант алмыш нөкәр групуна, шүбһәсиз, һәвариләр дахил идиләр. Иса дејир ки, беш вә ики талант алмыш нөкәрләр Падшаһлыг һаггында тәблиғ етмәклә вә шаҝирд һазырламагла пајларыны икигат чохалдырлар. Бир талант алмыш нөкәр исә ону торпагда ҝизләдир.

Иса данышыр: «Хејли вахт кечәндән сонра аға ҝери гајытды вә нөкәрләрдән һесабат тәләб етди». Мәсиһ дүз 19 әср сонра, 20-ҹи јүзилликдә гајытды вә шаҝирдләриндән һесабат вермәләрини тәләб етди. Сонра Иса дејир:

«Беш талант алмыш нөкәр газандығы беш таланты да өзү илә ҝәтириб деди: “Аға, сән мәнә беш талант әманәт етмишдин. Бах, мән беш талант да газанмышам”. Ағасы она деди: “Афәрин, мәним гочаг, вәфалы нөкәрим! Сән хырда ишдә сәдагәтини ҝөстәрдин, буна ҝөрә сәнә чох шеј һәвалә едәҹәјәм. Ҝәл, ағанын севинҹинә шәрик ол”». Ики талант алмыш нөкәр дә она верилмиш талантлары икигат артырыр вә ағасы ону да тәрифләјиб мүкафатландырыр.

Бәс бу вәфалы нөкәрләр ағаларынын севинҹинә неҹә шәрик олурлар? Ағалары Иса Мәсиһин севинҹи гәриб өлкәдә, јәни Аллаһын јанында мирас алдығы Падшаһлыгдыр. Бизим ҝүнләрдәки садиг нөкәрләрә ҝәлдикдә исә Падшаһлыгла әлагәдар онларын үзәринә даһа бөјүк мәсулијјәт гојулур вә онлар бундан һәдсиз севинҹ дујурлар. Онларын севинҹи јердәки һәјаты баша вурдугдан сонра дирилиб Падшаһлыға дахил оланда бирә-беш артаҹаг. Бәс үчүнҹү нөкәр кимдир?

«Аға, — дејә бу нөкәр шикајәтә башлајыр, — мән билирдим ки, сән тәләбкар адамсан. Әкмәдијини бичирсән, сәпмәдијини јығырсан. Буна ҝөрә дә сәндән горхдум вә ҝедиб вердијин таланты торпагда ҝизләтдим. Ал, бу да сәнин пулун». Бу нөкәр саһәдә ишләмәкдән — тәблиғ етмәк вә шаҝирд һазырламаг ишиндән гәсдән бојун гачырыб. Ағасы буна ҝөрә ону «јарамаз вә тәнбәл» адландырыр вә ҹәзаландырыр: «Пулу бундан алын... Бу јарамаз нөкәри исә бајыра, зүлмәтә атын. О, орада һөнкүр-һөнкүр ағлајыб дишләрини гыҹајаҹаг». «Јарамаз нөкәр» синфинә дахил оланлар чөлә атылыб руһани севинҹдән мәһрум едилирләр.

Бу, өзүнү Мәсиһин давамчысы сајан һәр бир кәс үчүн мүһүм ибрәт дәрсидир. Ким тәриф вә мүкафата лајиг ҝөрүлмәк вә чөлә атылыб ахырда мәһв олунмагдан гачынмаг истәјирсә, тәблиғ ишиндә вар-ҝүҹү илә иштирак едиб Ағанын әмлакыны артырмаға чалышмалыдыр. Сиз бу тапшырығы јеринә јетирмәјә ҹан јандырырсыныз?

Гојунлар вә кечиләр мәсәли

Иса шаҝирдләрлә сөһбәтинә давам едир. Инди о, үчүнҹү мәсәли данышыр: «Инсан Оғлу бүтүн мәләкләрлә бирҝә өз ҹалалында ҝәлиб шанлы тахтына әјләшәҹәк».

Инсан Оғлу дөврүн сону баша чатмаг үзрә оланда ҝәлир. Бу ҝәлишин мәгсәди нәдир? Иса ајдынлашдырыр: «Бүтүн милләтләр онун өнүндә јығышаҹаг вә о, чобан гојунлары кечиләрдән ајырдығы кими, инсанлары саф-чүрүк едәҹәк. О, гојунлары сағ тәрәфинә, кечиләри исә сол тәрәфинә гојаҹаг».

Иса рәғбәт газананлары нә ҝөзләдијини тәсвир едир: «Онда падшаһ сағындакылара дејәҹәк: “Еј Атамын хејир-дуасыны алмыш бәндәләр! Ҝәлин, әзәлдән бәри сизин үчүн һазырланмыш падшаһлығы мирас алын”». Бу мәсәлдә сөзү ҝедән «гојунлар» Мәсиһлә һакимијјәт сүрмәјәҹәкләр, онлар сәмави Падшаһлығын јер үзүндәки тәбәәләри олаҹаглар. Онлар бу мәнада Падшаһлығы мирас алаҹаглар. «Әзәлдән бәри» демәклә Иса Аллаһын фидјә тәдбириндән бәһрәләнә биләҹәк бәшәријјәтин тәмәлинин гојулмасыны, јәни Адәмлә Һәвванын дүнјаја ушаг ҝәтирмәсини нәзәрдә тутур.

Бәс нә үчүн падшаһ гојунлара рәғбәт ҝөстәриб онлары сағ тәрәфинә кечирир? Падшаһ дејир: «Аҹмышдым, мәнә јемәк вердиниз; сусамышдым, мәнә су вердиниз; гәриб идим, мәнә гонагпәрвәрлик ҝөстәрдиниз; чылпаг идим, мәни ҝејиндирдиниз; нахошламышдым, мәнә бахдыныз; дустаг идим, јаныма ҝәлдиниз».

Гојунлар јердә олдугларындан тәәҹҹүбләнирләр ки, ҝөрәсән, ҝөјдәки падшаһларына неҹә јахшылыг едә билибләр. Онлар сорушурлар: «Аға, биз сәни нә вахт аҹ ҝөрүб једиздирмишик вә ја сусуз ҝөрүб су вермишик? Һачан гәриб олдуғуну ҝөрүб сәнә гонагпәрвәрлик ҝөстәрмишик, ја да сәни чылпаг ҝөрүб ҝејиндирмишик? Сәни нә вахт хәстә вә ја дустаг ҝөрүб јанына ҝәлмишик?»

Падшаһ ҹаваб верир: «Буну гардашларымдан ән кичији үчүн етдијинизә ҝөрә, елә һесаб едирәм ки, мәним үчүн етмисиниз». Мәсиһин гардашлары онунла бирҝә сәмави Падшаһлыгда һакимијјәт сүрәҹәк 144 000 мәсһ олунмушун јер үзүндәки галығыдыр. Исанын сөзүнә ҝөрә, онлара јахшылыг едән, санки, онун өзүнә етмиш олур.

Сонра падшаһ үзүнү кечиләрә тутуб дејир: «Итилин ҝөзүмдән, ләнәтә ҝәлмишләр! Иблис вә онун мәләкләри үчүн һазырланмыш әбәди алова ҝедин! Чүнки аҹмышдым, мәнә јемәк вермәдиниз; сусамышдым, мәнә су вермәдиниз; гәриб идим, мәнә гонагпәрвәрлик ҝөстәрмәдиниз; чылпаг идим, мәни ҝејиндирмәдиниз; нахошламышдым вә дустаг идим, амма мәнә бахмадыныз».

Кечиләр етираз едирләр: «Аға, биз сәни нә вахт аҹ, сусуз, гәриб, чылпаг, хәстә вә ја дустаг ҝөрүб сәнә гуллуг етмәдик?» Кечиләр дә, гојунлар да ејни тәрәзидә өлчүлүр. Падшаһ дејир: «Мадам ки, буну бу кичикләрдән [гардашларымдан] биринә етмәдиниз, демәли, мәнә дә етмәмисиниз».

Беләликлә, Мәсиһин падшаһ кими иштиракы өзүнә бир һөкмү дахил едәҹәк. Бу һөкм, бу пис дүнјанын мәһвиндән азаҹыг әввәл, бөјүк мүсибәт заманы олаҹаг. Кечиләр «әбәдилик мәһв едиләҹәкләр, салеһләр [гојунлар] исә әбәди һәјата говушаҹаглар». Матта 24:2—25:46; 13:40, 49; Марк 13:3—37; Лука 21:7—36; 19:43, 44; 17:20—30; 2 Тимотејә 3:1—5; Јәһја 10:16; Вәһј 14:1—3.

▪ Һәвариләрдә нәјә ҝөрә суал јараныр? Онлар даһа нә барәдә дүшүнүрләр?

▪ Исанын пејғәмбәрлијинин һансы һиссәси ерамызын 70-ҹи илиндә јеринә јетди вә нәләр ҝәләҹәкдә олаҹагды?

▪ Исанын пејғәмбәрлији илк дәфә нә вахт јеринә јетди вә бөјүк мигјасда нә вахт јеринә јетәҹәк?

▪ «Ијрәнҹ шеј» пејғәмбәрлијин биринҹи вә сонунҹу иҹрасында нәләри тәмсил едир?

▪ Бөјүк мүсибәт нә үчүн Јерусәлимин дармадағын едилмәси илә гуртармады?

▪ Мәсиһин иштиракы заманы дүнјада нәләр баш верир?

▪ Нә вахт «јер үзүнүн бүтүн гәбиләләри ағлашыб башларына дөјәҹәк» вә Мәсиһин давамчылары һәмин вахт нә едәҹәкләр?

▪ Ҝәләҹәкдәки шаҝирдләринин сонун јахында олдуғуну мүәјјән едә билмәләри үчүн Иса һансы әјани мисалы чәкир?

▪ Сон ҝүнләр әрзиндә јашајаҹаг шаҝирдләринә Иса нәји төвсијә едир?

▪ «Он гыз» кимләри тәмсил едир?

▪ «Бәј» мәсиһчи јығынҹағы илә нә вахт нишанланды вә бәј ҝәлинини тој шәнлијинә апармаг үчүн нә вахт ҝәлир?

▪ «Јағ» нәји тәмсил едир вә ағыллы гызлар онун сајәсиндә нә едирләр?

▪ Тој шәнлији һарада кечир?

▪ Ағылсыз гызлар һансы мисилсиз мүкафатдан мәһрум олурлар вә онлары нә ҝөзләјир?

▪ Талантлар барәдәки мәсәлдән нә өјрәнирик?

▪ «Нөкәрләр» кимләрдир вә онлара һансы «әмлак» һәвалә едилир?

▪ Аға нә вахт ҝәлиб нөкәрләриндән һесабат тәләб едир вә о, нә ҝөрүр?

▪ Вәфалы шаҝирдләрин гошулдуғу шәнлик нәдир вә јарамаз нөкәрин башына нә ҝәлир?

▪ Мәсиһ падшаһ кими иштиракында һансы һөкмү иҹра едәҹәк?

▪ «Гојунлар» һансы мәнада Падшаһлығы мирас алаҹаглар?

▪ Иса «әзәлдән бәри» дејәркән һансы вахты нәзәрдә тутур?

▪ Инсанлар нәјин әсасында «гојунлара» вә «кечиләрә» ајрылаҹаглар?