Фәсил 116
Ајрылмаг әрәфәсиндә
ШАМ ЈЕМӘЈИ баша чатмаг үзрәдир. Иса һәвариләри илә јухары отагдадыр. О, тезликлә онлардан ајрылаҹаг. Анҹаг һәлә дејиләси чох сөзү вар. Иса онлара дејир: «Гој үрәјиниз нараһат олмасын. Аллаһа да иман един, мәнә дә».
«Атамын евиндә галмаға јер чохдур, — дејә Иса ачыглајыр. — Мән сизин үчүн јер һазырламаға ҝедирәм... Сиз мәним јанымда олаҹагсыныз. Сиз ҝетдијим јерин јолуну билирсиниз». Амма һәвариләр Исанын ҝөјә ҝедәҹәјиндән бәһс етдијини анламырлар. Буна ҝөрә дә Томас сорушур: «Аға, биз сәнин һара ҝетдијини билмирик, бәс јолу һарадан биләк?»
Иса ҹаваб верир: «Јол, һәгигәт вә һәјат мәнәм. Мәнсиз һеч кәс Атанын јанына ҝәлә билмәз». Бәли, јалныз Исанын Аллаһын нијјәтиндәки ролуну гәбул едән вә нүмунәсини изләјән инсан онун Атасынын евинә ҝирә биләр.
Филип ондан хаһиш едир: «Аға, бизә Атаны ҝөстәрсән, бәсимиздир». Гәдимдә Аллаһ Мусаја, Илјаса вә Јешајаја ҝөрүнтүләрдә ҝөрүнмүшдү. Јәгин, Филип дә истәјир ки, Иса онлара Аллаһы бу ҹүр ҝөстәрсин. Лакин һәвариләр даһа чох шеј ҝөрүбләр. Иса дејир: «Мән нечә вахтдыр ки, сизинләјәм, сән исә, Филип, бу вахта гәдәр мәни танымамысан? Мәни ҝөрән Атаны да ҝөрүб».
Иса Атасынын шәхсијјәтини о дәрәҹәдә мүкәммәл әкс етдирир ки, онунла олмаг вә ону мүшаһидә етмәк Аллаһы ҝөрмәјә бәрабәрдир. Анҹаг Ата Оғулдан гат-гат үстүндүр. Иса өзү дә буну етираф едир: «Сизә дедијим сөзләри өзүмдән демирәм». Бәли, о вердији тәлимләрин мәнбәјинин сәмави Атасы олдуғуну тәсдиг едир.
Исанын нөвбәти сөзләри, шүбһәсиз, һәвариләрә гол-ганад верир: «Мәнә иман едән адам мәним етдијим ишләри едәҹәк вә бунлардан да бөјүк ишләр едәҹәк». Бу о демәк дејил ки, һәвариләр Исанын мөҹүзәләриндән дә бөјүк мөҹүзәләр ҝөстәрәҹәкләр. Хејр, Иса демәк истәјир ки, онлар ондан да чох мүддәт әрзиндә, даһа чох әразидә вә даһа чох инсана тәблиғ едәҹәкләр.
Иса ҝедәндән сонра һәвариләрини башлы-башына бурахмајаҹагды. О вәд едир: «Мәним адым наминә нә истәсәниз, диләјинизи јеринә јетирәҹәјәм». Бундан әлавә, Иса дејир: «Мән Атамдан хаһиш едәҹәјәм вә О, сизә башга бир көмәкчи верәҹәк; о, әбәдијјән сизинлә олаҹаг. Бу көмәкчи һәгигәт руһудур». Ҝөјә галхандан сонра Иса һәмин көмәкчини, јәни мүгәддәс руһу һәвариләринин үзәринә төкүр.
Артыг вахт јахынлашыр, бир аздан Иса һәвариләрдән ајрылаҹаг. О дејир: «Бир аздан дүнја артыг мәни ҝөрмәјәҹәк». Иса һеч кимин ҝөрә билмәјәҹәји руһани шәхсијјәт олаҹаг. Бунунла белә, о, јенидән садиг һәвариләринә сөз верир: «Сиз исә ҝөрәҹәксиниз, мән јашадығым үчүн сиз дә јашајаҹагсыныз». Бәли, Иса дирилдикдән сонра онлара ҹисмани бәдәндә ҝөрүнәҹәк вә вахты ҝәләндә онлары ҝөјдә руһани варлыглар кими јашамалары үчүн дирилдәҹәк.
Инди исә Иса садә бир дүстур верир: «Мәни севән адам мәним әмрләрими гәбул едиб онлара әмәл едир. Мәни севән адамы Атам да севәҹәк, мән дә ону севәҹәјәм вә өзүмү она ачыг-ашкар ҝөстәрәҹәјәм».
Бу заман Тадај ләгәбли Јәһуда сөһбәтә гошулур: «Аға, сән өзүнү нә үчүн дүнјаја јох, мәһз бизә ачыг-ашкар ҝөстәрмәк истәјирсән?»
Иса ҹаваб верир: «Мәни севән мәним сөзүмә әмәл едәҹәк вә Атам ону севәҹәк... Мәни севмәјән исә сөзүмә әмәл етмир». Мәсиһин итаәткар давамчыларындан фәргли олараг, дүнја онун тәлимләрини гәбул етмир. Буна ҝөрә дә Иса өзүнү дүнјаја ҝөстәрмир.
Јер үзүндәки хидмәти әрзиндә Иса һәвариләринә чох шеј өјрәдиб. Бәс онлар бүтүн бу шејләри неҹә јада салаҹаглар? Ахы онлар һәлә чох шеји баша дүшмүрләр. Иса вәд едир: «Көмәкчи, јәни Атанын мәним адым наминә ҝөндәрәҹәји мүгәддәс руһ һәр шеји сизә өјрәдәҹәк вә сизә дедијим бүтүн сөзләри јадыныза салаҹаг».
«Сизә гәлб раһатлығы верирәм, өз гәлбимдәки раһатлығы сизә бағышлајырам, — дејә јенә дә онлары руһландырыр, — гој үрәјиниз нараһат олмасын, горхмајын... Мәни севсәјдиниз, Атамын јанына ҝетдијимә севинәрдиниз, ахы Ата мәндән бөјүкдүр».
Исанын вахтына чох аз галыб. О дејир: «Артыг сизинлә чох данышмајаҹағам, чүнки бу дүнјанын һөкмдары ҝәлир. Онун мәним үзәримдә һакимијјәти јохдур». Бу дүнјанын һөкмдары Јәһуда Искариотун үрәјинә ҝириб ону әлә кечирән Шејтан Иблисдир. Исаны исә о, Аллаһдан дөндәрә билмәз, чүнки Исада ҝүнаһа зәррә гәдәр дә олсун, мејил јохдур.
Ата-оғул мүнасибәти
Шам јемәјиндән сонра Иса һәвариләри илә достјана сөһбәтини давам етдирәрәк онлары руһландырыр. Еһтимал ки, ҝеҹәјарысыдыр. Буна ҝөрә дә Иса һәвариләрә: «Дурун ҝедәк»,— дејир. Лакин ҝетмәздән әввәл онлара мараглы бир нүмунә чәкир:
«Мән һәгиги үзүм мејнәсијәм, Атам исә бағбандыр». Даһи «бағбан» Јеһова Аллаһ бу символик мејнәни ерамызын 29-ҹу илиндә Исаны мүгәддәс руһла вәфтиз едәркән әкмишди. Анҹаг мејнә тәкҹә Исаны тәмсил етмир. Иса дејир: «О, мәндәки бар ҝәтирмәјән будаглары кәсиб атыр, бар верән будаглары исә будајыр ки, онлар даһа чох бар ҝәтирсин... Неҹә ки, будаг мејнәнин үстүндә олмаса, өз-өзүндән мејвә верә билмәз, сиз дә мәнимлә вәһдәтдә олмасаныз, бар ҝәтирә билмәјәҹәксиниз. Мән мејнәјәм, сиз исә бу мејнәнин будагларысыныз».
Әллинҹи ҝүн бајрамында, дүз 51 ҝүн сонра, мүгәддәс руһ һәвариләрин вә башга шаҝирдләрин үзәринә төкүлүр вә онлар «мејнәнин будаглары» олурлар. Нәһајәтдә 144 000 инсан символик үзүм мејнәсинин будаглары олаҹагдылар. Бу будаглар үзүм ҝөвдәсини символизә едән Иса Мәсиһлә бирләшәрәк Аллаһын Падшаһлығынын мејвәсини ҝәтирән мејнәни тәшкил едирләр.
Иса һәвариләринә нәјин сајәсиндә бар ҝәтирә биләҹәкләрини ҝөстәрир: «Ким мәнимлә вәһдәтдәдир, мән дә онунла вәһдәтдәјәм вә о адам чохлу бар ҝәтирир. Сиз мәндән ајры һеч нә едә билмәзсиниз». Бар ҝәтирмәјән адам исә «будаг кими кәсилиб атылыр вә гурујур. Белә будаглары јығыб ода атыр вә јандырырлар». Иса вәд едир: «Сиз мәнимлә вәһдәтдә галырсынызса вә сөзләрим гәлбиниздә галырса, нә истәјирсиниз диләјин, сизә вериләҹәк».
Бунун ардынҹа Иса һәвариләринә дејир: «Сиз чохлу бар верәндә вә мәним шаҝирдим олдуғунузу сүбут едәндә Атам шөһрәтләнир». Аллаһы шөһрәтләндирән бар нәдир? Илк нөвбәдә, шаҝирдләр Мәсиһин хүсусијјәтләрини, әләлхүсус да мәһәббәтини тәзаһүр етдирмәлидирләр. Бундан әлавә, шаҝирдләр Мәсиһ кими Аллаһын Падшаһлығыны тәблиғ етмәли вә шаҝирд һазырламалыдырлар.
Сонра Иса онлары тәшвиг едир: «Мәним мәһәббәтимдә галын». Бәс һәвариләр онун мәһәббәтиндә неҹә гала биләрләр? «Әмрләрими јеринә јетирсәниз, мәним мәһәббәтимдә галаҹагсыныз». Иса дејир: «Сизә әмрим будур: бир-биринизи мән сизи севдијим кими севин. Достлары уғрунда ҹаныны фәда едән инсанын мәһәббәтиндән бөјүк мәһәббәт јохдур».
Бир нечә саатдан сонра Иса өз һәјатыны һәвариләри вә она иман ҝәтирәҹәк һәр бир инсан уғрунда гурбан вермәклә мисилсиз мәһәббәтини тәзаһүр етдирәҹәк. Онун давамчылары бу мәһәббәт нүмунәсини изләјәрәк бир-бириләрини фәдакарҹасына севмәлидирләр. Бу мәһәббәт сајәсиндә кимләрин Исанын һәгиги давамчысы олдуғу бәлли олаҹаг. Ахы Иса демишдир: «Аранызда мәһәббәт олса, һамы биләҹәк ки, сиз мәним шаҝирдимсиниз».
Инди Иса өз достларыны таныдыр: «Әмрләримә әмәл едирсинизсә, мәним достларымсыныз. Мән артыг сизә гул демирәм, чүнки гул ағасынын ишләриндән бихәбәрдир. Лакин мән сизә дост дејирәм, чүнки Атамдан ешитдијим һәр шеји сизә билдирдим».
Исанын јахын досту олмаг, һәгигәтән дә, бөјүк шәрәфдир! Лакин бу достлуғу горујуб сахламаг үчүн онун давамчылары «даима бар ҝәтирмәлидирләр». Бәс бунун мүкафаты нә олаҹаг? Иса дејир: «Атам мәним адым наминә диләдијиниз һәр шеји сизә [верәҹәк]». Бәли, Аллаһын Падшаһлығынын бәһрәсини ҝәтирәнләр үчүн бу бөјүк мүкафатдыр! Иса јенә дә һәвариләрини бир-бириләрини севмәјә тәшвиг едир вә дејир ки, дүнја онлара нифрәт едәҹәк. Сонра онлара үрәк-дирәк верир: «Әҝәр дүнја сизә нифрәт едирсә, билин ки, сиздән габаг мәнә нифрәт едиб». Иса дүнјанын онлара гаршы нифрәтинин сәбәбини ачыглајыр: «Сиз бу дүнјаја мәхсус олсајдыныз, дүнја сизи севәрди. Мән сизи сечдијим үчүн сиз дүнјаја мәхсус дејилсиниз. Буна ҝөрә дә дүнја сизә нифрәт едир».
Иса бунун даһа бир сәбәбини ҝөстәрир: «Бүтүн бунлары мәним адыма ҝөрә башыныза ҝәтирәҹәкләр, чүнки онлар мәни ҝөндәрәни [Јеһова Аллаһы] танымырлар». Иса белә адамлар һагда дејир: «Онларын арасында мисли ҝөрүлмәмиш ишләри ҝөрмәсәјдим, ҝүнаһсыз олардылар. Анҹаг мәним ишләрими ҝөзләри илә ҝөрә-ҝөрә мәнә дә, Атама да нифрәт етдиләр». Башга сөзлә, Исанын ҝөстәрдији мөҹүзәләр она нифрәт едәнләри мүһакимә едир. Беләҹә, Исанын дедији кими, бу пејғәмбәрлик јеринә јетир: «Мәнә наһагдан нифрәт етдиләр».
Иса јенидән һәвариләри руһландырыр, онлара көмәкчи, јәни Аллаһын фәал гүввәси олан мүгәддәс руһу ҝөндәрәҹәјини вәд едир: «Атадан чыхан һәгигәт руһу ҝәләндә мәним һаггымда шәһадәт верәҹәк. Сиз дә мәним һаггымда шәһадәт вермәлисиниз».
Һәвариләри габагда нә ҝөзләјир?
Исаҝил һәлә дә бајрамы гејд етдикләри отагдадырлар. Иса сөзүнә давам едәрәк дејир: «Бунлары сизә она ҝөрә сөјләдим ки, иманыныз зәифләмәсин». Сонра онлара ҹидди бир хәбәрдарлыг сөјләјир: «Сизи синагоглардан говаҹаглар. Елә бир вахт ҝәлир ки, сизи өлдүрән һәр кәс бу јолла Аллаһа хидмәт етдијини дүшүнәҹәк».
Шүбһәсиз, бу сөзләр һәвариләри сарсыдыр. Һәрчәнд Иса әввәлләр дә демишди ки, дүнја онлара нифрәт едәҹәк, амма өлдүрүләҹәкләрини илк дәфә белә ачыг сөјләјир. О дејир: «Бунлары сизә әввәлҹәдән демәмишдим, чүнки сизинлә идим». Исанын ајрылмаздан әввәл һәвариләринә вердији бу хәбәрдарлыг лап јеринә дүшүр.
Иса давам едир: «Инди мәни ҝөндәрәнин јанына ҝедирәм, амма бириниз дә сорушмурсунуз ки, һара ҝедирсән?» Онлар бу ахшам артыг бу суалы вермишдиләр. Амма Исанын индики сөзләри онлары о гәдәр сарсыдыб ки, даһа бу һагда соруша билмирләр. Иса буну баша дүшүр вә дејир: «Бунлары дедијимә ҝөрә гәм дәрјасына батмысыныз». Һәвариләри тәкҹә шиддәтли тәгибләрә мәруз галараг өләҹәкләри јох, һәм дә Ағаларынын онлардан ајрылмасы кәдәрләндирир.
Буна ҝөрә дә Иса дејир: «Ҝетмәјим сизин хејринизәдир. Чүнки мән чыхыб ҝетмәсәм, көмәкчи јаныныза ҝәлмәјәҹәк. Анҹаг ҝетсәм, ону јаныныза ҝөндәрәҹәјәм». Иса јер үзүндә јашајаркән јалныз мүәјјән бир јердә ола билир, амма ҝөјә галхдыгдан сонра давамчылары һарада олурса-олсунлар онлара көмәкчини, Аллаһын мүгәддәс руһуну ҝөндәрә биләҹәк. Буна ҝөрә дә Иса дејир ки, ҝетмәји онларын хејринәдир.
Иса һәм дә дејир ки, мүгәддәс руһ дүнјаја «ҝүнаһ, салеһлик вә һөкм һаггында инандырыҹы дәлилләр ҝәтирәҹәк». Аллаһын Оғлуна иман ҝәтирмәмәклә дүнјанын төрәтдији ҝүнаһ ашкара чыхаҹаг; Исанын өз Атасынын јанына гајытмасы онун салеһ олдуғуну тәсдиг едәҹәк; Шејтанын вә онун әлиндә олан пис дүнјанын Исаны сындыра билмәмәси бу дүнјанын һөкмдарына һөкм кәсилдијинә тәкзибедилмәз дәлилләрдир!
Иса сонра дејир: «Сизә һәлә дејиләси чох сөзүм вар, анҹаг инди онлары баша дүшмәзсиниз». Буна ҝөрә дә Иса вәд едир ки, онлара Аллаһын фәал гүввәси олан мүгәддәс руһу верәндә һәр бир һәвари бу шејләри баҹардығы гәдәр дәрк едә биләҹәк.
Һәвариләр һәлә дә Исанын өләҹәјини вә дирилдикдән сонра онлара ҝөрүнәҹәјини анламырлар. Буна ҝөрә дә бир-бириндән сорушурлар: «Ҝөрәсән, о: “Бир аздан мәни ҝөрмәјәҹәксиниз, амма бир гәдәр сонра ҝөрәҹәксиниз, чүнки Атамын јанына ҝедирәм”, — сөзләри илә нә демәк истәјир?»
Иса һәвариләрин башында суал доландығыны ҝөрүб онлара дејир: «Буну билин, сиз ағлајыб фәрјад едәҹәксиниз, дүнја исә шадјаналыг едәҹәк; кәдәрләнәҹәксиниз, анҹаг кәдәриниз севинҹә дөнәҹәк». Һәмин ҝүн ҝүнортадан сонра Иса едам едилдикдә дин рәһбәрләри севинирләр, шаҝирдләр исә кәдәрә гәрг олурлар. Иса дириләндә исә онларын кәдәри севинҹә чеврилир. Әллинҹи ҝүн бајрамында шаҝирдләр бир даһа севинирләр. Чүнки Иса Аллаһын мүгәддәс руһуну шаҝирдләрин үзәринә төкмәклә онлара онун шаһидләри олмаг һүгугу верир.
Иса һәвариләрин вәзијјәтини доғуш санҹылары башламыш һамилә гадынла мүгајисә едир: «Гадын доғуш заманы әзијјәт чәкир, чүнки вахты јетишиб». Лакин Иса ону да гејд едир ки, ушаг доғуландан сонра гадын бу ағрылары унудур. О, һәвариләринә тохтаглыг верир: «Сиз дә инди кәдәрләнирсиниз, анҹаг сизинлә јенидән ҝөрүшәндә [мән дириләндә] үрәјиниз севинәҹәк вә һеч кәс севинҹинизи әлиниздән алмајаҹаг».
Мараглыдыр ки, һәвариләр о ҝүнәдәк Исанын ады наминә Аллаһдан һеч нә диләмәјибләр. Инди исә о онлара дејир: «Атадан мәним адым наминә нә истәсәниз, сизә верәҹәк... Атанын Өзү сизи севир, чүнки сиз мәни севмисиниз вә мәни Атанын ҝөндәрдијинә вә Онун нүмајәндәси олдуғума инанмысыныз. Мән Атанын јанындан чыхыб дүнјаја ҝәлдим. Инди исә дүнјаны тәрк едиб Атамын јанына ҝедирәм».
Бәли, Исанын бу сөзләри һәвариләри чох мөһкәмләндирир. Онлар дејирләр: «Буна ҝөрә дә биз инанырыг ки, сәни Аллаһ ҝөндәриб». Иса сорушур: «Һәлә инди инандыныз? Елә бир вахт ҝәлир ки, артыг ҝәлиб дә, һамыныз мәни тәк гојуб евинизә дағылышаҹагсыныз». Бу сөзләр нә гәдәр инанылмаз ҝөрүнсә дә, һәмин ҝеҹә јеринә јетир.
«Буну сизә она ҝөрә дедим ки, мәним сајәмдә гәлб раһатлығы тапасыныз». Иса сөһбәтини белә гуртарыр: «Дүнјада чох әзијјәтлә үзләшәҹәксиниз, анҹаг ҹәсарәтли олун! Мән дүнјаја галиб ҝәлдим». Шејтан вә онун дүнјасы Исаны салеһлик јолундан дөндәрмәјә нә гәдәр чалышса да, Иса Аллаһа садиг галмагла дүнјаја галиб ҝәлди!
Ајрылмаздан әввәл сон дуа
Иса бир аздан һәвариләриндән ајрылаҹаг. О, онлары дәрин мәһәббәтлә севир вә бу сон саатларда онлара зәрури төвсијәләр верир вә онлары руһландырыр. Инди исә Иса ҝөзләрини ҝөјә галдырыб Атасына дуа едир: «Оғлуну шөһрәтләндир ки, оғлун да Сәни шөһрәтләндирсин. Ахы Сән она бүтүн бәшәријјәт үзәриндә һакимијјәт вердин ки, о, Сәнин она вердијин адамларын һамысыны әбәди һәјата говушдурсун».
Әбәди һәјат! Иса чох өнәмли бир мөвзуја тохунур. «Бүтүн бәшәријјәт үзәриндә һакимијјәт» алан Иса өлүмә мәһкум бәшәријјәтин фидјә гурбанлығындан бәһрәләнмәсинә имкан јарадыр. Әбәди һәјаты исә јалныз Аллаһын мүнасиб билдији адамлара бәхш едир. Бәс әбәди һәјата лајиг ҝөрүлмәк үчүн нә тәләб олунур? Иса дуасында дејир:
«Әбәди һәјата говушмаг үчүн Сән — јеҝанә һәгиги Аллаһ вә Сәнин ҝөндәрдијин Иса Мәсиһ һаггында даима өјрәнмәк лазымдыр». Бәли, әбәди һәјата говушмаг үчүн Аллаһ вә Онун Оғлу барәдә дәгиг билијә јијәләнмәлијик. Амма тәкҹә билик кифајәт дејил.
Аллаһы вә Иса Мәсиһи јахындан танымаг вә онларла достлашмаг ҝәрәкдир. Онларын бахышларыны мәнимсәмәли вә һәр шејә онлар кими бахмалыјыг. Үстәлик, башгалары илә мүнасибәтдә онларын мисилсиз хүсусијјәтләрини тәглид етмәјә чалышмалыјыг.
Иса давам едир: «Мән Сәни јердә шөһрәтләндирдим вә мәнә тапшырдығын иши баша чатдырдым». Һәмин дәгигәјәдәк Иса она верилән бүтүн тапшырыглары јеринә јетирмишди вә ахырадәк јеринә јетирәҹәјинә әминдир. Буна ҝөрә дә хаһиш едир: «Инди исә Ата, дүнја јаранмаздан әввәл Сәнин јанында оларкән саһиб олдуғум шөһрәтлә мәни шөһрәтләндир». Иса хаһиш едир ки, дириләндән сонра Аллаһ әввәлки шөһрәтини она гајтарсын.
Иса јердәки ишинин мәғзини јекунлашдырараг дејир: «Дүнјадан мәнә вердијин адамлара Сәнин адыны ачдым. Онлар Сәнинки идиләр, Сән онлары мәнә вердин вә онлар Сәнин сөзүнә әмәл едирләр». Иса хидмәтдә Аллаһын адыны, Јеһова адыны ишләдирди вә бу адын дүзҝүн тәләффүзүнү ҝөстәрирди. Һәвариләринә исә бу ады билдирмәклә јанашы, Јеһова Аллаһын шәхсијјәти вә нијјәти барәдә биликләрини артырырды.
Јеһова Аллаһ Исанын Али Һөкмраныдыр вә Иса Она үрәкдән табе олур. О, тәвазөкарлыгла дејир: «Мәнә вердијин сөзләри онлара чатдырдым. Онлар бу сөзләри гәбул етдиләр вә мәним Сәнин јанындан ҝәлдијими ајдын дәрк етдиләр, инандылар ки, мәни Сән ҝөндәрмисән».
Иса давамчыларыны диҝәр инсанлардан ајырыр. О дејир: «Сәндән хаһиш едирәм, дүнја үчүн јох, мәнә вердијин адамлар үчүн Сәнә јалварырам... Мән онларла оланда, мәнә вердијин адынын хатиринә ҝөзүм онларын үстүндә иди... Мән онлары горудум, һеч бири итмәди. Јалныз һәлака мәһкум едилмиш адам [Јәһуда Искариот] мәһв олду». Иса бу сөзләри дејән заман Јәһуда Искариот Исаны сатмаг үчүн өз мәнфур нијјәтини һәјата кечирирди. Беләҹә, һеч өзү дә билмәдән Јәһуда Мүгәддәс Јазылардакы пејғәмбәрлији јеринә јетирир.
«Дүнја онлара нифрәт едир, — дејә Иса давам едир: — Мән онлары дүнјадан ҝөтүрмәји хаһиш етмирәм. Хаһиш едирәм ки, онлары Шәрирдән горујасан. Онлар да мәним кими дүнјаја мәхсус дејилләр». Исанын давамчылары дүнјада, Шејтанын гурдуғу вә идарә етдији ҹәмијјәтдә јашајырлар вә һәмишә бу дүнјанын пис ишләриндән кәнарда галмалыдырлар.
Иса дејир: «Онлары һәгигәт васитәсилә мүгәддәс ет; Сәнин сөзүн һәгигәтдир». О, «һәгигәт» дејәркән дәфәләрлә истинад етдији Ибрани Мүгәддәс Јазыларыны нәзәрдә тутур. Һәмчинин шаҝирдләринә өјрәтдији шејләр вә сонралар онларын илһам алараг јаздыглары Јунан Мүгәддәс Јазылары да «һәгигәт»дир. Бу һәгигәт инсаны пак етмәјә, онун һәјатыны бүсбүтүн дәјишәрәк бу пис дүнјадан ајырмаға гадирдир.
Сонра Иса: «Мән јалныз онлар үчүн јох, онлары ешидиб мәнә иман едәҹәк адамлар үчүн дә јалварырам», — дејир. Бурада Иса ҝәләҹәкдә мәсһ олунаҹаг давамчыларыны вә онларла «бир сүрүдә» бирләшәҹәк диҝәр шаҝирдләрини нәзәрдә тутур. Бәс онлар үчүн нә диләјир?
«Араларында бирлик олсун. Ата, Сән мәнимлә, мән дә Сәнинлә вәһдәтдә олдуғум кими,.. онлар да бир олсунлар». Бәли, Иса илә онун Атасы арасында там јекдиллик һөкм сүрүр. Инди Иса дуасында: «Гој дүнја билсин ки, мәни Сән ҝөндәрмисән вә мәни севдијин кими, онлары да севирсән», — дејәрәк давамчылары арасында да бу ҹүр бирлијин олмасыны истәјир.
Сонра Иса сәмави Атасындан мәсһ олунаҹаг давамчыларындан өтрү хаһиш едир: «Мәнә вердијин адамлар мәним јанымда олсунлар вә мәнә вердијин шөһрәти ҝөрсүнләр, чүнки Сән мәни бәшәр нәсли дүнјаја ҝәлмәздән әввәл севмисән». «Бәшәр нәсли дүнјаја ҝәлмәздән әввәл» ифадәси Адәмлә Һәвванын дүнјаја өвлад ҝәтирмәсиндән өнҹәки вахта аиддир. Бәли, Аллаһ ваһид Оғлуну әзәлдән севмишдир вә бу Оғул сонралар јердә Иса Мәсиһ олду.
Дуасынын сонунда Иса јенидән вурғулајыр: «Мән Сәнин адыны онлара ачдым вә јенә ачаҹағам ки, мәнә дујдуғун мәһәббәт онларда да олсун вә мән онларла вәһдәтдә олум». Һәвариләр үчүн Аллаһын адыны билмәк Аллаһын мәһәббәтини дәрк етмәк демәкдир! Јәһја 14:1—17:26; 13:27, 35, 36; 10:16; Лука 22:3, 4; Чыхыш 24:10; 1 Падшаһлар 19:9—13; Јешаја 6:1—5; Галатијалылара 6:16; Мәзмур 35:19; 69:4; Сүлејманын мәсәлләри 8:22, 30.
▪ Иса һара ҝедир вә Томасын суалына неҹә ҹаваб верир?
▪ Филипин суалынын мәғзи нәдир?
▪ Исаны ҝөрән һансы мәнада Аллаһы ҝөрүб?
▪ Исанын давамчылары һансы мәнада ондан да бөјүк ишләр ҝөрәҹәкләр?
▪ Шејтанын һансы мәнада Исанын үзәриндә һакимијјәти јохдур?
▪ Јеһова Аллаһ символик мејнәни нә вахт әкиб вә башгалары нә вахт вә неҹә бу мејнәнин будаглары олурлар?
▪ Символик мејнәнин нәһајәтдә нечә будағы олаҹаг?
▪ Аллаһ будаглардан һансы мејвәни ҝөзләјир?
▪ Сиз Исанын досту неҹә ола биләрсиниз?
▪ Дүнја нәјә ҝөрә Исанын давамчыларына нифрәт едир?
▪ Һансы хәбәрдарлыг һәвариләри сарсыдыр?
▪ Нәјә ҝөрә һәвариләр Исадан һара ҝетдијини сорушмурлар?
▪ Һәвариләр һәлә дә нәји анламырлар?
▪ Иса һәвариләрин кәдәринин севинҹә чевриләҹәјини һансы нүмунә әсасында изаһ едир?
▪ Исанын дедијинә ҝөрә, һәвариләр һәмин ҝеҹә нә едәҹәкләр?
▪ Иса дүнјаја неҹә галиб ҝәлир?
▪ Исаја һансы мәнада «бәшәријјәт үзәриндә һакимијјәт» верилиб?
▪ Аллаһ вә Онун Оғлу барәдә билик алмаг нә демәкдир?
▪ Иса Аллаһын адыны неҹә ачыр?
▪ «Һәгигәт» нәдир вә мәсиһчиләри неҹә «мүгәддәс» едир?
▪ Аллаһ, Иса Мәсиһ вә бүтүн һәгиги мәсиһчиләр һансы мәнада вәһдәтдәдирләр?
▪ Бәшәр нәсли дүнјаја нә вахт ҝәлди?