Фәсил 120

Петер Исаны даныр

ҺӘВАРИЛӘРИН һамысы горхудан Исаны Ҝетсемани бағында гојуб гачыр. Бирдән Петерлә Јәһја дајанырлар. Онлар, ҝөрүнүр, гајыдыб Исаны Һаннанын евинә апаран издиһама чатырлар. Һанна Исаны баш каһин Кајафанын јанына ҝөндәрәндә онлар аралыдан онун далынҹа ҝедирләр. Онлар һәм өз ҹанлары үчүн горхурлар, һәм дә Ағаларына ҝөрә чох нараһатдырлар.

Кајафанын имарәтинә чатанда Јәһја онун танышы олдуғундан ичәри ҝирә билир. Петер исә бајырда галыр. Амма Јәһја бир аздан ҝери дөнүр вә гапычы гызла данышыр, о да Петери ичәри бурахыр.

Һава сојуг олдуғундан баш каһинин нөкәрләри вә мүһафизәчиләри тонгал галајыблар. Петер Исанын мәһкәмәсинин сонуну ҝөзләјир вә исинмәк үчүн тонгала јахынлашыр. Ону ичәри бурахан гапычы гыз тонгалын ишығында онун үзүнә диггәтлә бахыб уҹадан дејир: «Сән дә бу галилејалы Иса илә бир јердә идин!»

Петер танындығыны ҝөрүб тәлаша дүшүр вә һамынын ҝөзү гаршысында Исаны даныр: «Мән бу адамы танымырам, сәнин дә нә дедијини баша дүшмүрәм».

Сонра о, дарвазаја тәрәф ҝедир. Орада башга бир гыз да ону таныјыр вә јанындакылара дејир: «Бу адам да назаретли Иса илә бирликдә иди». Петер анд ичәрәк: «Мән о адамы танымырам!» — дејә нөвбәти дәфә Исаны инкар едир.

Петер һәјәтдә галыр, амма чалышыр ки, мүмкүн гәдәр ҝөзә чарпмасын. Сәһәрин алагаранлығында бирдән хоруз банлајыр вә ола билсин, о, бу сәсдән сәксәнир. Бу арада Исанын мәһкәмәси ҝедир. Ҝөрүнүр, мәһкәмә имарәтин һәјәтә бахан јухары отағында кечирилир. Шүбһәсиз, Петерлә ашағыда дуран башга адамлар шаһидләрин бир-бир ҝириб-чыхдығыны ҝөрүрләр.

Петерин Исанын досту кими танынмасындан һарадаса бир саат кечир. Инди һәјәтдә дуранлардан бир нечәси она јахынлашыб дејирләр: «Бәс неҹә, сән дә онун адамларындансан. Бу, ләһҹәндән дә билинир». Онлардан бири Петерин гулағыны кәсдији Малхын гоһумудур. О дејир: «Мән сәни бағда ҝөрмүшдүм. Сән дә о адамын јанындајдын, јохса елә дејил?»

Петер гәти етираз едир: «Мән о адамы танымырам!» Онлары јалан данышмадығына инандырмаг үчүн өзүнә ләнәт јағдырараг анд-аман едир.

Петер үчүнҹү дәфә Исаны данар-данмаз хоруз икинҹи дәфә банлајыр. Ҝөрүнүр, бу ан ејванда олан Иса она бахыр. Бир нечә саат әввәл Пасханы гејд етдикләри евдә Исанын: «Хоруз ики дәфә банламамыш сән мәни үч дәфә данаҹагсан», — дедији сөзләр Петерин јадына дүшүр. О, ҝүҹлү виҹдан әзабы чәкдијиндән чөлә чыхыб һөнкүр-һөнкүр ағлајыр.

Ҝөрәсән, Петер нәјә ҝөрә Исаны данды? Ахы о, руһани ҹәһәтдән ҝүҹлү олдуғуна әмин иди, бәс неҹә олду ки, гыса вахт әрзиндә Ағасыны дүз үч дәфә инкар етди? Шүбһәсиз, дүшдүјү вәзијјәт ону гәфил јахалады. Һәгигәт тәһриф едилмиш, Иса ади ҹинајәткар кими иттиһам олунмушду. Доғру јалан кими, ҝүнаһсыз да ҝүнаһкар кими гәләмә верилмишди. Петер бунларын тәсири алтында мүвазинәтини горуја билмәмишди. Она хас олан сәдагәт һисси ани јох олмуш, инсан горхусу исә ону ифлиҹ етмишди. Үмидварыг ки, белә шеј бизимлә һеч бир заман баш вермәјәҹәк! Матта 26:57, 58, 69—75; Марк 14:30, 53, 54, 66—72; Лука 22:54—62; Јәһја 18:15—18, 25—27.

▪ Петерлә Јәһја баш каһинин һәјәтинә неҹә дахил олурлар?

▪ Онлар һәјәтдә оларкән евдә нә баш верир?

▪ Петер Исаны нечә дәфә даныр вә хоруз нечә дәфә банлајыр?

▪ Нәјә ҝөрә Петер өзүнә ләнәт јағдырараг анд-аман едир?

▪ Петер нәләрин тәсири алтында Исаны даныр?