Фәсил 127

Иса дәфн олунур

НИСАНЫН 14-ү баша чатмаг үзрәдир. Ҝүнүн батмасы илә нисанын 15-и, шәнбә ҝирир. Исанын ҹәсәди дирәкдән асылы галыб. Бөјрүндәки ики ҹинајәткар исә һәлә сағдыр. Шәнбә әрәфәси Һазырлыг ҝүнү адланыр. Ҹамаат һәмин ҝүн биш-дүш едир вә шәнбә ҝүнүнүн сонуна гәдәр тәхирә салынмасы мүмкүн олмајан ишләри ҝөрүрләр.

Јәһудиләрдә һәфтәнин једдинҹи ҝүнү шәнбә ҝүнү иди. Индики шәнбә ҝүнү исә хүсуси ҝүндүр. Чүнки һәм һәфтәнин сонудур, һәм дә Мајасыз чөрәк бајрамынын илк ҝүнүдүр. Једди ҝүн давам едән бу бајрамын илк ҝүнү (нисанын 15-и) һәфтәнин һансы ҝүнүнә дүшүрсә-дүшсүн, һәмишә Шәнбә сајылыр. Буна ҝөрә дә бу Шәнбә икигат, јахуд Бөјүк Шәнбә адланыр.

Аллаһын Ганунуна әсасән, ҹәсәд ҝеҹә дирәкдә галмамалы иди. Буна ҝөрә дә јәһудиләр Пилатдан хаһиш едирләр ки, едам едилмиш бу адамларын өлүмүнү тезләшдирмәк үчүн ајагларыны сындырсынлар. Әсҝәрләр ҝедиб едам олунмушларын ајагларыны сындырырлар. Исаја чатанда исә онун өлдүјүнү ҝөрүб ајагларыны сындырмырлар. Бунунла да «онун бир сүмүјү белә сынмајаҹаг» пејғәмбәрлији јеринә јетир.

Амма јенә дә Исанын өлдүјүнә там әмин олмаг үчүн әсҝәрләрдән бири низә илә онун бөјрүнү дешир. Низә үрәк наһијәсиндән кечир, орадан һәмин ан су вә ган чыхыр. Бу һадисәнин шаһиди олмуш һәвари Јәһја даһа бир пејғәмбәрлијин — «онлар бәдәнини дешдикләри адама бахаҹаглар» пејғәмбәрлијинин јеринә јетдијини гејд едир.

Синедрионун нүфузлу үзвләриндән бири, әслән Ариматеја шәһәриндән олан Јусиф дә едам просесини изләјир. О, али мәһкәмәнин Исаја гаршы чыхардығы һагсыз һөкмә сәс вермәмишди. О, Исанын шаҝирди олса да, бу вахта гәдәр буну ҝизләдирди. Амма инди үрәкләниб Пилатын јанына ҝедир вә ондан Исанын ҹәсәдини истәјир. Пилат бу едам ишинә ҹавабдеһ олан јүзбашыны чағырыб Исанын өлдүјүнү дәгигләшдирир. Бундан сонра әмр едир ки, онун ҹәсәдини Јусифә версин.

Јусиф ҹәсәди алыб тәмиз зәриф кәтана бүкәрәк дәфнә һазырлајыр. Синедрионун диҝәр үзвү Никодим бу ишдә она көмәк едир. Никодим дә вәзифәсини итирмәкдән горхараг Исаја иман ҝәтирдијини ҝизләтмишди. Амма инди о, бир бағламада 33 килограм мүрр вә баһалы әзвај ҝәтирир. Онлар Исанын ҹәсәдини ҝөтүрүб јәһудиләрин дәфн адәти үзрә әтирли отларла кәфәнләјирләр.

Сонра ҹәсәди Јусифин гајада ојулмуш тәзә сәрдабәсинә гојурлар. Бу сәрдабә јахынлыгдакы бағда јерләшир. Сәрдабәнин ағзына јекә бир даш дијирләјирләр. Дәфни Шәнбә башламамыш гуртармаг үчүн ҹәназәни тәҹили һазырламышдылар. Еһтимал ки, бу ишдә Мәҹдәлли Мәрјәм вә кичик Јагубун анасы Мәрјәм дә иштирак едир. Инди онлар даһа чох әтирли от вә јағ тәдарүкү ҝөрмәк үчүн евә тәләсирләр. Исанын ҹәсәдини тез чүрүмәдән горумаг үчүн бу гадынлар истәјирләр ки, Шәнбәдән сонра ҝәлиб ҹәсәдә тәзәдән әлавә от вә јағ вурсунлар.

Шәнбә ҝүнү бөјүк каһинләр вә фәрисејләр Пилатын јанына ҝедиб дејирләр: «Аға, јадымыза бир шеј дүшүб. Бу фырылдагчы һәлә сағ икән белә бир сөз дејирди: “Мән үч ҝүндән сонра дириләҹәјәм”. Буна ҝөрә әмр ет ки, сәрдабәни үч ҝүн јахшы-јахшы горусунлар, јохса шаҝирдләри ҝәлиб ону оғурлајаҹаг вә сонра һамыја дејәҹәкләр ки, о дирилиб. Бу јалан әввәлкиндән дә бетәр олаҹаг».

Пилат исә: «Алын, бу да сизә кешикчиләр! Ҝедин, ораны билдијиниз кими горујун», — дејир. Онлар ҝедиб сәрдабәнин ағзындакы дашы мөһүрләјир вә ромалы әсҝәрләри ора кешикчи гојурлар.

Шәнбәдән сонра, һәфтәнин илк ҝүнү дан јери сөкүләндә Мәҹдәлли Мәрјәм, кичик Јагубун анасы Мәрјәм, Саломе, Јоһанна вә башга гадынлар әтирли отлары ҝөтүрүб сәрдабәјә ҝәлирләр. Јолда онлар бир-бириндән сорушурлар: «Сәрдабәнин ағзындакы дашы бизим үчүн гыраға ким чәкәҹәк?» Амма ора чатанда ҝөрүрләр ки, зәлзәлә баш вериб вә Јеһованын мәләји дашы кәнара јуварлајыб. Кешикчиләр чыхыб ҝедиб, сәрдабә исә бомбошдур. Матта 27:57—28:2; Марк 15:42—16:4; Лука 23:50—24:3, 10; Јәһја 19:14, 19:31—20:1; 12:42; Левилиләр 23:5—7; Ганунун тәкрары 21:22, 23; Мәзмур 34:20; Зәкәријјә 12:10.

▪ Шәнбә әрәфәси нә үчүн Һазырлыг ҝүнү адланыр? Бөјүк Шәнбә нәдир?

▪ Исанын ҹәсәди илә бағлы һансы пејғәмбәрликләр јеринә јетир?

▪ Јусиф вә Никодим Исанын дәфни илә әлагәдар һансы ишләри ҝөрүрләр вә нәјә ҝөрә онлар тәшәббүс ҝөстәрирләр?

▪ Каһинләр Пилатдан нә истәјирләр вә Пилат онлара нә дејир?

▪ Шәнбәдән сонра, һәфтәнин илк ҝүнү нә баш верир?