Фәсил 130

Галилеја ҝөлүндә

ҺӘВАРИЛӘР, Исанын тапшырдығы кими, Галилејаја гајыдырлар. Амма онлар нә едәҹәкләрини билмирләр. Бир гәдәр сонра Петер Томаса, Натанаелә, Јагуб вә Јәһја гардашларына вә даһа ики һәваријә дејир:

— Ҝедирәм балыг тутмаға.

— Биз дә сәнинлә ҝедирик, — дејәрәк онлар да она гошулурлар.

Онлар бүтүн ҝеҹәни әлләширләр, амма һеч нә тута билмирләр. Дан јери сөкүләндә Иса саһилдә пејда олур, һәвариләр исә ону танымырлар. О, онлары чағырыр:

— Балалар, јемәјә бир шејиниз вар?

— Јохдур, — дејә онлар гајығын ичиндән ҹаваб верирләр.

— Тору гајығын сағ тәрәфиндән атын, тутаҹагсыныз. Онлар да Исанын дедији кими едирләр вә тора о гәдәр балыг дүшүр ки, дартыб чыхара билмирләр.

— Бу Ағадыр! — Јәһја севинҹәк гышгырыр.

Петер буну ешидәндә јарычылпаг олдуғундан әбасыны әјнинә кечириб суја тулланыр. О, саһилә сары тәхминән 90 метр үзүр. О бири һәвариләр исә тору чәкә-чәкә балаҹа гајыгда ҝәлирләр.

Онлар саһилә чатанда ҝөрүрләр ки, тонгал галаныб, үзәриндә балыг вә јанында чөрәк вар. Иса дејир: «Тутдуғунуз балыгдан бир нечәсини ҝәтирин». Петер гајыға ҝирир вә тору дартыб саһилә чыхарыр. Тора 153 балыг дүшүб.

Иса: «Ҝәлин сәһәр јемәјинизи јејин», — дејә онлары дәвәт едир.

Һәвариләрдән һеч бири: «Сән кимсән?» — сорушмаға ҹүрәт етмир, чүнки һамысы онун Иса олдуғуну билир. Бу, Исанын дириләндән сонра инсанлара ҝөрүндүјү 7-ҹи һалдыр. О, 4 дәфә ајры-ајры адамлара, 3 дәфә исә бир груп шәклиндә һәвариләрә ҝөрүнмүшдүр. Иса һәвариләрини балыг вә чөрәјә гонаг едир.

Онлар јејиб гуртарандан сонра Иса, еһтимал ки, балыглара ишарә едәрәк Петердән сорушур: «Јәһја оғлу Шимон, мәни чох истәјирсән, бунлары?» Шүбһәсиз, о билмәк истәјир ки, Петер балыгчылыға чох бағлыдыр, јохса ону һазырладығы ишә.

— Аға, јахшы билирсән ки, сәни чох истәјирәм, — Петер ҹаваб верир.

— Гузуларымы бәслә.

О, икинҹи дәфә сорушур: «Јәһја оғлу Шимон, мәни чох истәјирсән?»

— Бәли, Аға, сән билирсән ки, сәни чох истәјирәм, — дејә Петер үрәкдән ҹаваб верир.

— Гузуларымы отар, — Иса тапшырыр.

Иса үчүнҹү дәфә сорушур: «Јәһја оғлу Шимон, мәни чох истәјирсән?»

Петер мәјус олур. Ола билсин, о фикирләшир ки, Иса артыг она там етибар етмир. Ахы бир нечә ҝүн бундан әввәл, Исаја өлүм һөкмү чыхарылан заман Петер ону таныдығыны 3 дәфә данмышды. О дејир: «Аға, сән һәр шеји билирсән. Сән јахшы билирсән ки, сәни неҹә чох истәјирәм».

Иса үчүнҹү дәфә она тапшырыр: «Гузуларымы бәслә».

Иса бир аздан ҝөјә галхаҹагды. О, Петерә вердији тапшырығы тәкрар етмәклә башгаларына да бу ишин ваҹиблијини вурғулајыр. О истәјир ки, һәвариләр Аллаһын ағылына ҝәтириләҹәк «гузулара», јәни һәлим инсанлара хидмәт ишинә рәһбәрлик етсинләр.

Иса Аллаһын она тапшырдығы иши јеринә јетирдији үчүн һәбс олунуб едам едилмишди. Инди о, Петери дә белә бир сынаг ҝөзләдијини ачыглајыр: «Ҹаванлығында өзүн гуршаныб истәдијин јерә ҝедирдин, амма гоҹаланда әлләрини узадаҹагсан, башгасы сәни гуршајыб истәмәдијин јерә апараҹаг». Петери ҝәләҹәкдә ишҝәнҹәли өлүм ҝөзләмәсинә бахмајараг, Иса она дејир: «Бундан сонра да ардымҹа ҝәл».

Петер архаја дөнүб Јәһјаны ҝөрүр вә Исадан сорушур: — Аға, бәс бу неҹә олаҹаг?

— Әҝәр мән ҝәләнәҹән онун галмасыны истәјирәмсә, бундан сәнә нә? Сән ардымҹа ҝәл, — Иса ҹаваб верир. Бу сөзләри сәһв баша дүшән шаҝирдләрин чоху елә дүшүнүрдү ки, һәвари Јәһја һеч вахт өлмәјәҹәк. Лакин сонралар һәвари Јәһја өзү јазмышды ки, Иса буну нәзәрдә тутмурду. О, садәҹә: «Әҝәр мән ҝәләнәҹән онун галмасыны истәјирәмсә, бундан сәнә нә?» — демишди.

Сонда һәвари Јәһја чох ваҹиб бир шеји гејд едир: «Сөзсүз, Иса чох иш ҝөрүб, лакин онларын һамысы бир-бир јазылсајды, елә дүшүнүрәм ки, јазылан тумарлар дүнјаја белә сығмазды». Јәһја 21:1—25; Матта 26:32; 28:7, 10.

▪ Һәвариләрин Галилејада нә едәҹәкләрини билмәдикләри нәдән ҝөрүнүр?

▪ Һәвариләр Исаны Галилеја ҝөлүндә неҹә таныјырлар?

▪ Дириләндән сонра Иса инсанлар гаршысында нечә дәфә пејда олур?

▪ Иса һәвариләриндән нә ҝөзләдијини неҹә вурғулајыр?

▪ Исанын дедијинә ҝөрә, Петер һансы өлүмлә өләҹәк?

▪ Һәвари Јәһја һаггында Исанын дедији һансы сөзләри шаҝирдләр сәһв баша дүшүрләр?