Фәсил 131
Сонунҹу ҝөрүшләр вә Әллинҹи ҝүн бајрамы
ҜҮНЛӘРИН бириндә Иса 11 һәвариси илә Галилејада бир дағда ҝөрүшүр. Ҝөрүнүр, диҝәр шаҝирдләрә дә бу һагда хәбәр верилир вә дағда 500 нәфәрдән чох адам топлашыр. Бу чох руһландырыҹы ҝөрүшдүр — Иса пејда олур вә шаҝирдләрә тәлим верир.
Иса бурада топлашмыш шаҝирдләринә һәмчинин бәјан едир ки, Аллаһ һәм ҝөјдә, һәм јердә бүтүн һакимијјәти она вериб. О, шаҝирдләринә белә бир тапшырыг верир: «Буна ҝөрә дә ҝедин вә бүтүн милләтләрин ичиндә шаҝирд һазырлајын, онлары Ата, Оғул вә мүгәддәс руһ наминә вәфтиз един, сизә әмр етдијим һәр шејә риајәт етмәји онлара өјрәдин».
Тәсәввүр един: кишиләр, гадынлар, ушаглар, бир сөзлә, һәр кәс шаҝирд һазырламаг ишиндә иштирак едә биләр. Дүздүр, әлејһдарлар тәблиғ вә тәлим ишинә мане олмаға чалышаҹаглар, бунунла белә, Иса шаҝирдләрә тохтаглыг верир: «Мән бу дөврүн јекунуна кими һәмишә сизинләјәм». Иса мүгәддәс руһ васитәсилә давамчылары илә олаҹагды вә онлара тәблиғ ишиндә көмәк едәҹәкди.
Иса дириләндән сонра 40 ҝүн әрзиндә шаҝирдләринә ҝөрүнүр. Ҝөрүндүјү вахтларда о, онлара Аллаһын Падшаһлығы һаггында өјрәдир вә онун шаҝирди олмагла үзәрләринә дүшән мәсулијјәтләр барәдә данышыр. Бир дәфә дә Иса әввәлләр она иман ҝәтирмәјән анабир гардашы Јагуба ҝөрүнүр вә ону өзүнүн Мәсиһ олдуғуна инандырыр.
Һәвариләр һәлә Галилејададырлар. Ола билсин, Иса онлара Јерусәлимә гајытмағы тапшырыр вә орада онларла ҝөрүшәндә дејир: «Јерусәлимдән узаглашмајын, Атамын вердији вә мәндән ешитдијиниз вәдин һәјата кечмәсини ҝөзләјин. Чүнки Јәһја су илә вәфтиз едиб, сиз исә бир нечә ҝүндән сонра мүгәддәс руһла вәфтиз едиләҹәксиниз».
Даһа сонра Иса һәвариләри илә ҝөрүшүб онлары Зејтун дағынын шәргиндә јерләшән Бетанија кәндинә ҝәтирир. Гәрибәдир ки, Иса һәвариләринә дәфәләрлә ҝөјә ҝедәҹәји барәдә данышса да, онлар һәлә дә Падшаһлығын јердә гурулаҹағыны дүшүнүрләр. Буна ҝөрә дә онлар сорушурлар: «Аға, Исраилдә падшаһлығы инди бәрпа едәҹәксән?»
Јенә дә онларын јанлыш тәсәввүрләрини дүзәлтмәк әвәзинә, Иса садәҹә дејир: «Заман вә ја мүддәтләри билмәк сизин ишиниз дејил, бу ихтијар Атама мәхсусдур». Сонра о, јенидән онлара һансы ишлә мәшғул олаҹагларыны вурғулајыр: «Мүгәддәс руһ үзәринизә ҝәләндә сиз гүввәт алаҹагсыныз вә Јерусәлимдә, бүтүн Јәһудеја вә Самаријада, һәтта јерин уҹгарларынадәк мәним шаһидим олаҹагсыныз».
Бунлары дејәндән сонра Иса һәвариләрин ҝөзү гаршысында ҝөјә галхмаға башлајыр вә булуд ону өртүб ҝизләдир. Иса ҹисмани бәдәнини тәрк едиб руһани варлыг кими ҝөјә галхыр. Һәвариләр һәлә дә ҝөзләрини ҝөјә дикиб бахаркән јанларында ҹисмани бәдән алмыш ики ағ либаслы мәләк пејда олур. Онлар дејирләр: «Еј галилејалылар! Нијә дуруб ҝөјә бахырсыныз? Сиздән ҝөјә ҝөтүрүлән бу Иса, ҝөјә ҝетдијини ҝөрдүјүнүз кими, ејни тәрздә ҝери ҝәләҹәк».
Иса јер күрәсини тәмтәраглы сурәтдә јох, сакитҹә, јалныз садиг давамчыларынын мүшајиәти илә тәрк едир. Ејнилә, онун ҝәлиши дә тәмтәраглы шәкилдә олмајаҹагды. Онун ҝери гајытдығыны вә Падшаһ кими иштиракыны јалныз садиг давамчылары дәрк едәҹәкди.
Инди һәвариләр Зејтун дағындан енир, Кидрон вадисини кечиб Јерусәлимә гајыдырлар. Исанын тапшырдығы кими, орада галырлар. Он ҝүн сонра, ерамызын 33-ҹү илинин Әллинҹи ҝүн бајрамыны гејд етмәк үчүн 120 шаҝирд бир евин үст мәртәбәсиндә топлашыр. Гәфләтән ҝүҹлү бир күләк әсирмиш кими, ҝөјдән бир сәс ҝәлир вә отурдуглары евин һәр тәрәфинә јајылыр. Аловун дилләринә бәнзәјән бир шеј онлара ҝөрүнүб, парчаланараг һәр биринин үзәринә гонур вә шаҝирдләр башга-башга дилләрдә данышмаға башлајырлар. Бәли, Иса вәд етдији кими мүгәддәс руһу онларын үзәринә төкүр. Матта 28:16—20; Лука 24:49—52; 1 Коринфлиләрә 15:5—7; Һәвариләрин ишләри 1:3—15; 2:1—4.
▪ Иса Галилејада јерләшән бир дағда сон ҝөстәришләрини кимләрә верир?
▪ Иса шаҝирдләринә неҹә тохтаглыг верир? Иса һансы мәнада онларла олаҹагды?
▪ Иса дирилдикдән сонра шаҝирдләринә нечә ҝүн әрзиндә ҝөрүнүр вә онлара нә өјрәдир?
▪ Иса әввәлләр шаҝирди олмајан кимә ҝөрүнүр?
▪ Иса һәвариләри илә һансы сон ики ҝөрүшү кечирир вә бу ҝөрүшләрдә нәләр олур?
▪ Һансы мәнада Иса ҝетдији кими ҝери гајыдаҹагды?
▪ Ерамызын 33-ҹү илинин Әллинҹи ҝүн бајрамында нә баш верир?