Фәсил 132

Аллаһын сағында

ӘЛЛИНҸИ ҜҮН бајрамында шаҝирдләрин үзәринә мүгәддәс руһун төкүлмәси Исанын ҝөјләрә гајытдығыны ҝөстәрир. Һәмчинин бир мүддәт сонра Исанын шаҝирди Стефана верилән ҝөрүнтү дә буну сүбут едир. Бу садиг шаһид дашланмаздан әввәл бәјан едир: «Будур, мән ҝөјүн ачылдығыны вә инсан Оғлунун Аллаһын сағында дурдуғуну ҝөрүрәм».

Иса Аллаһын сағында олдуғу мүддәтдә Онун: «Дүшмәнләрини ајагларынын алтына саланадәк сағымда отур», — әмрини ҝөзләјир. Ҝөрәсән, Иса бу әмри аланадәк нә илә мәшғул олур? О, мәсһ олунмуш давамчылары үзәриндә рәһбәрлик едир: тәблиғ ишиндә онлара истигамәт верир вә онлары Аллаһын Падшаһлығында онунла бирҝә падшаһлыг етмәјә һазырлајыр. Онлар дирилдикдән сонра һакимијјәт сүрмәјә башлајаҹаглар.

Мәсәлән, Иса Мәсиһ башга милләтләрдән олан инсанлара тәблиғ етмәк ишинә башламаг үчүн әслән јәһуди олан Шаулу (Рома ады Павел) сечир. Шаул Аллаһын Ганунуна ҹидди јанашырды, амма дин рәһбәрләри она јанлыш истигамәт вермишдиләр. Бунун нәтиҹәсиндә Шаул Стефанын гәтлини дәстәкләјир. Үстәлик, о, баш каһин Кајафадан алдығы сәлаһијјәтлә Дәмәшгә ҝедир ки, орада Исанын давамчыларындан әлинә кечән һәр кәси, гадына, кишијә фәрг гојмадан, тутуб Јерусәлимә ҝәтирсин. О, јол илә ҝедәркән гәфләтән парлаг бир ишыг онун әтрафына нур сачыр вә о, јерә јыхылыр.

Гејбдән бир сәс дејир: «Шаул, Шаул, мәни нијә тәгиб едирсән?» Шаул сорушур: «Аға, сән кимсән?»

О дејир: «Мән сәнин тәгиб етдијин Исајам».

Иса мөҹүзәви ишыгдан кор олмуш Шаула әмр едир ки, Дәмәшгә ҝетсин вә ондан ҝөстәриш аланаҹан орада ҝөзләсин. Сонра Иса Һананја адлы бир шаҝирдинә хәјалда ҝөрүнүр вә Шаулла әлагәдар белә дејир: «Бу адам адымы милләтләрә, о ҹүмләдән һөкмдарлара вә Исраил оғулларына билдирмәк үчүн сечдијим аләтдир. Адым уғрунда нәләр чәкәҹәјини она ҝөстәрәҹәјәм».

Исанын көмәји илә Шаул, јәни Павел вә хош хәбәрин диҝәр тәблиғчиләри тәблиғ вә тәлим ишиндә уғур газанырлар. Исанын Дәмәшгә ҝедән јолда Павелә ҝөрүнмәсиндән тәхминән 25 ил сонра Павел јазыр ки, «хош хәбәр сәма алтында јашајан бүтүн инсанлара тәблиғ едилиб».

Бунун үстүндән илләр кечдикдән сонра Иса артыг гоҹалмыш севимли һәвариси Јәһјаја силсилә ҝөрүнтүләр верир. Јәһја Мүгәддәс Јазыларын «Вәһј» китабында тәсвир етдији бу ҝөрүнтүләр васитәсилә, демәк олар ки, сағ икән Исанын падшаһлыг ҹалалында гајытдығыны ҝөрүр. Јәһја дејир: «Мән мүгәддәс руһун тәсири илә Ағанын ҝүнүнә апарылдым». Бурада сөһбәт һансы «ҝүндән» ҝедир?

Мүгәддәс Китаб пејғәмбәрликләрини, о ҹүмләдән Исанын сон ҝүнләрә даир дедији пејғәмбәрлији диггәтлә арашдыранда мәлум олур ки, «Ағанын ҝүнү» 1914-ҹү илдә башламышдыр. Мәһз һәмин ил Иса ҝөрүнмәз шәкилдә, ҹар чәкмәдән гајытды. Онун гајыдышыны јалныз садиг давамчылары билди. Јеһова Аллаһ һәмин ил Исаја дүшмәнләри арасында һөкмранлыг етмәји әмр етди.

Иса Атасынын әмринә табе олараг Шејтаны ҹинләри илә бирҝә јерә атыр вә беләҹә, ҝөјләри тәмизләјир. Јәһја бу һадисәни ҝөрүнтүдә ҝөрәндән сонра ҝөјдән бир сәсин: «Инди Аллаһымызын тәјин етдији хилас вахты, гүдрәти, падшаһлығы вә Мәсиһинин һакимијјәти јетишди», — дедијини ешидир. Бәли, Мәсиһ 1914-ҹү илдән артыг падшаһлыг тахтына әјләшиб!

Бу, Јеһованын ҝөјдәки хидмәтчиләри үчүн чох ҝөзәл хәбәрдир! Онлар нида едирләр: «Еј ҝөјләр вә ҝөјләрин сакинләри, севинин!» Бәс јер? «Јерә вә дәнизә исә вај олсун! Чүнки Иблис, вахтынын аз олдуғуну биләрәк, бөјүк гәзәблә јаныныза енди».

Бу дөврүн сонуна чох аз галыб. Инсанлар бу ҝүн ја Аллаһын Падшаһлығына ҝирмәјә, ја да мәһв едилмәјә лајиг олдугларыны ҝөстәрирләр. Һәгигәт будур ки, сизин ҝәләҹәјиниз инди Мәсиһин рәһбәрлији алтында дүнја мигјасында һәјата кечирилән Аллаһын Падшаһлығы һаггында хош хәбәрә неҹә һај вермәјиниздән асылыдыр.

Сонра Иса Мәсиһ Аллаһын нүмајәндәси кими Шејтанын бу пис дүнјасы вә онун тәрәфдарларыны мәһв едәҹәк. Мүгәддәс Китабда ады Һар-Маҝедон кими чәкилән мүһарибәдә Иса бүтүн пислији јер үзүндән јох едәҹәк. Каинатда Јеһова Аллаһдан сонра икинҹи шәхс олан Иса Мәсиһ бунун ардынҹа Шејтаны вә онун ҹинләрини тутуб «дибсиз үммана» атаҹаг, башга сөзлә, мин ил әрзиндә өлүмә бәнзәр бир фәалијјәтсизлик вәзијјәтиндә һәбсдә сахлајаҹаг. Һәвариләрин ишләри 7:55—60; 8:1—3; 9:1—19; 16:6—10; Мәзмур 110:1, 2; Ибраниләрә 10:12, 13; 1 Петер 3:22; Лука 22:28—30; Колослулара 1:13, 23; Вәһј 1:1, 10; 12:7—12; 16:14—16; 20:1—3; Матта 24:14.

▪ Иса ҝөјә галхандан сонра һансы мөвгеји тутур вә нә илә мәшғул олур?

▪ Иса ҝөјдән кимләр үзәриндә рәһбәрлик едир вә бу рәһбәрлик өзүнү нәдә ҝөстәрир?

▪ «Ағанын ҝүнү» нә вахт башлады вә бу ҝүнүн башланғыҹында нә олду?

▪ Бу ҝүн һәјата кечирилән тәблиғ ишинин һәр биримизә һансы аидијјәти вар?

▪ Тәблиғ иши баша чатанда нә олаҹаг?