ФӘСИЛл 1
Сиз хошбәхт бир ҝәләҹәјә саһиб ола биләрсиниз!
1, 2. Јарадан сизин үчүн нә арзу едир?
СЕВДИЈИНИЗ адамын сизи бағрына басмасы. Сүфрә архасында әзиз достларла бирликдә оларкән үрәкдән ҝәлән ҝүлүш сәсләри. Ушагларынызын севинҹлә ојнамаларына тамаша етмәкдән алдығыныз мәмнунлуг һиссләри. Бу кими анлар адама бөјүк севинҹ бәхш едир. Лакин һәјат чохлары үчүн бир-биринин ардынҹа ҝәлән ҹидди проблемләр јарадыр. Әҝәр бу сизин дә пајыныза дүшүбсә, үмидинизи үзмәјин.
2 Аллаһ сизин хошбәхт олмағынызы вә ҝөзәл мүһитдә, ән јахшы шәраитдә јашамағынызы истәјир. Бу јалныз арзу дејил, чүнки Аллаһ сизә хошбәхт ҝәләҹәк үчүн ачар тәклиф едир. Бу ачар биликдир.
3. Хошбәхтлијин ачары һансы биликдир вә нәјә ҝөрә әмин ола биләрик ки, бу билији Аллаһ верә биләр?
3 Сөһбәт инсан мүдриклијиндән гат-гат үстүн олан хүсуси биликдән ҝедир. Бу, “Аллаһ билији”дир (Сүлејманын мәсәлләри 2:5). Тәхминән 2000 ил бундан әввәл Мүгәддәс Китаб јазычыларындан бири демишдир: “Һәр бир евин бәннасы вардыр, һәр шејин бәннасы исә Аллаһдыр” (Ибраниләрә 3:4). Һәр шеји Јараданын саһиб олдуғу билик һаггында дүшүнүн! Мүгәддәс Китабда дејилир ки, Аллаһ улдузлары сајыр вә онлара ад верир. Тәкҹә бизим галактикада јүз милјардларла улдузун мөвҹуд олдуғуну тәсәввүр един! Бу, һәгигәтән дә һејранедиҹи һалдыр, астрономларын дедијинә ҝөрә исә јүз милјарда јахын галактика мөвҹуддур! (Мәзмур 147:4). Һәмчинин Аллаһ бизим һаггымызда да һәр шеји билир, буна ҝөрә дә һәјати ваҹиб суалларымыза Ондан башга ким там ҹаваб верә биләр? (Матта 10:30).
4. Һәјатымыз үчүн рәһбәрлији нәјә ҝөрә Аллаһдан ҝөзләмәлијик вә бу рәһбәрлији һансы китаб тәгдим едир?
4 Автомобилләрини тә’мир едән ики нәфәр кишини тәсәввүр един. Онлардан бири сынмыш јери тә’мир етмәкдән әлини үзүб, аләтләри јерә атыр. О бири исә сәбирлә сынан јери дүзәлдир, ачары чевирир вә будур, мүһәррик ишә дүшүб јахшы ишләјир. Онлардан һансында истеһсаледиҹи заводун тәгдим етдији истисмар үзрә рәһбәрлик китабчасынын олдуғуну баша дүшмәк һеч дә чәтин дејил. Аллаһын да һәјат үчүн бизә рәһбәрлик тәгдим етмәси мәнтигәујғун дејилми? Јәгин билирсиниз ки, Мүгәддәс Китаб өзү һаггында Јараданын рәһбәрлијини, һәмчинин Аллаһ һаггында билији тәгдим едән бир китаб кими данышыр (2 Тимотејә 3:16).
5. Мүгәддәс Китабдакы билик нә дәрәҹәдә гијмәтлидир?
5 Әҝәр Мүгәддәс Китабын дедији доғрудурса, онда орадакы билијин нә гәдәр дәјәрли олдуғуну дүшүнүн! Сүлејманын мәсәлләри 2:1-5 ајәләриндә Мүгәддәс Китаб бизи ҝизләдилмиш хәзинәни ахтарыр кими мүдриклији дә инсан тәфәккүрүндә дејил, Аллаһ Кәламында ахтармаға тәшвиг едир. Әҝәр “Аллаһ билијини” Мүгәддәс Китабда ахтарсаг, ону һөкмән тапаҹағыг. Аллаһ бизим мәһдуд имканларымыздан, о ҹүмләдән тәләбатларымыздан аҝаһ олдуғуна ҝөрә динҹ вә хошбәхт һәјат јашамағымыза көмәк етмәк үчүн рәһбәрлик тәгдим едир (Мәзмур 103:14; Ишаја 48:17). Бундан башга, Аллаһ һаггындакы билик бизә һәјәҹанландырыҹы хош хәбәри тәгдим едир.
ӘБӘДИ ҺӘЈАТ!
6. Аллаһ һаггындакы билијә даир Иса Мәсиһ инсанлары нәјә әмин етди?
6 Тарихи шәхсијјәт кими јахшы танынан Иса Мәсиһ Аллаһ һаггындакы билијин бу саһәсини ајдын тәсвир етмишдир. О демишдир: “Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар” (Јәһја 17:3). Тәсәввүр един, бу билик әбәди һәјата апарыр!
7. Аллаһын бизим өлмәјимизи истәмәмәсинә һансы сүбутлар вар?
7 Әбәди һәјаты јеринә јетмәз бир арзу кими инкар етмәјә тәләсмәјин. Бунун әвәзинә, мәсәлән, инсан организминин неҹә јарадылдығына нәзәр салын. О чох ҝөзәл дүшүнүлүб, белә ки, биз ешитмә, ҝөрмә, дадбилмә, ијбилмә вә тохунма кими дујғулара маликик. Јер үзүндә о гәдәр шејләр вар ки, биз онлардан дујғу органларымызын сајәсиндә севинҹ алырыг: дадлы гида, гушларын авазла охумасы, хош әтирли чичәкләр, ҝөзәл мәнзәрәләр, хош достлуг мүнасибәтләри! Бүтүн бунлардан исә истәнилән суперкомпүтердән үстүн олан валеһедиҹи бејнимизин сајәсиндә һәзз алмаг мүмкүндүр. Һәгигәтәнми елә дүшүнүрсүнүз ки, Јарадан бизим өлмәјимизи вә бүтүн бунлары итирмәјимизи истәјир? Онун бизим хошбәхт вә әбәди јашамағымызы истәмәси гәнаәтинә ҝәлмәк мәнтигәујғун дејилми? Инди Аллаһ һаггында билијин сизин үчүн нә мә’на кәсб етдијини ҝөрүрсүнүзмү?
ҸӘННӘТДӘКИ ҺӘЈАТ
8. Мүгәддәс Китаб бәшәријјәтин ҝәләҹәји һаггында нә дејир?
8 Мүгәддәс Китабын Јерин вә бәшәријјәтин ҝәләҹәји һаггында дедијини бир кәлмә илә ифадә етмәк олар — Ҹәннәт! Иса Мәсиһ өлмәк үзрә олан адама: “Мәнимлә бәрабәр ҹәннәтдә олаҹагсан” дедикдә елә буну нәзәрдә тутурду (Лука 23:43). Ҹәннәт һаггында верилән вә’д һәмин инсана, шүбһәсиз ки, улу валидејнләримиз Адәмлә Һәвванын јашадыглары хошбәхт јери хатырлатды. Аллаһ онлары камил јаратмышды вә онлар Јараданын гурдуғу паркабәнзәр бағда јашајырдылар. Һәмин јер мүнасиб олараг ләззәт бағы мә’насыны дашыјан Еден бағы адланырды.
9. Ҹәннәтдәки һәјат неҹә иди?
9 Бу бағ олдугҹа ҝөзәл иди! Јә’ни әсл Ҹәннәт иди. Орада ҝөзәл јашыллыг ичиндә дадлы мејвә ағаҹлары варды. Адәм вә Һәвва маликанәләрини өјрәнир, дадлы, бүллур кими тәмиз судан ичир вә ағаҹларын бәһрәсиндән јығырдылар, онларын нараһат олмаға вә горхмаға һеч бир сәбәбләри јох иди. Һәтта һејванлар белә онлара хәтәр јетирмирди. Аллаһ Адәмлә Һәвваја онларын үзәриндә мәһәббәтлә һөкм сүрмәји бујурмушду. Үстәлик илк инсан ҹүтү там сағлам иди. Нә гәдәр ки, Аллаһа итаәт едирдиләр, онларын гаршысында әбәдијјән хошбәхт јашамаг имканы вар иди. Онлара олдугҹа мараглы иш тапшырылмышды, јә’ни ҝөзәл Ҹәннәт евләринин гајғысына галмалы идиләр. Аллаһ Адәм илә Һәвваја бујурду: “Јер үзүнү долдурун вә она саһиб олун”. Онлар нәсилләри илә бирликдә, бүтүн јер үзү ҝөзәл вә валеһедиҹи мәкан олунҹаја гәдәр Ҹәннәтин саһәсини ҝенишләндирмәли идиләр (Тәквин 1:28).
10. Иса Ҹәннәтдән данышаркән нәји нәзәрдә тутурду?
10 Анҹаг Иса Ҹәннәтдән данышаркән өлмәк үзрә олан адама олуб кечәнләри хатырлатмаг нијјәтиндә дејилди. Иса ҝәләҹәкдән сөз едирди! О билирди ки, бизим үмуми јер евимиз бир заман Ҹәннәт олаҹагдыр. Бунунла да, Аллаһ јер үзүнә вә бәшәријјәтә даир илк нијјәтини һәјата кечирәҹәкдир (Ишаја 55:10, 11). Бәли, Ҹәннәт бәрпа олунаҹаг! Бәс Ҹәннәтдәки һәјат неҹә олаҹаг? Ҝәлин, бу суала Аллаһын Кәламы олан Мүгәддәс Китабын ҹаваб вермәсинә јол верәк.
БӘРПА ЕДИЛМИШ ҸӘННӘТДӘКИ ҺӘЈАТ
11. Бәрпа едилмиш Ҹәннәтдә хәстәлик, гоҹалыг вә өлүмлә нә баш верәҹәк?
11 Артыг хәстәлик, гоҹалыг вә өлүм олмајаҹаг. “О заман корларын ҝөзләри ачылаҹаг, карларын да гулаглары ачылаҹаг. О заман топал адам марал кими сычрајаҹаг вә дилсизин дили тәрәннүм едәҹәк” (Ишаја 35:5, 6). “Аллаһын Өзү онларла [бәшәријјәтлә] олаҹагдыр. Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди” (Вәһј 21:3, 4).
12. Нәјә ҝөрә әмин ола биләрик ки, ҝәләҹәк Ҹәннәтдә ҹинајәт, зоракылыг вә пислик олмајаҹагдыр?
12 Ҹинајәтә, зоракылыға вә пислијә әбәдијјән сон гојулаҹаг. “Шәрирләр кәсилиб атылаҹаг... Бир аз ҝөзлә вә пис јох олаҹагдыр; онун јерини арашдыраҹагсан вә јох олаҹагдыр. Фәгәт һәлимләр дүнјаны мирас алаҹаглар” (Мәзмур 37:9-11). “Пис адамлар мәмләкәтдән атылаҹаглар вә хаинләр ондан јох едиләҹәкләр” (Сүлејманын мәсәлләри 2:22).
13. Аллаһ сүлһү неҹә бәргәрар едәҹәкдир?
13 Бүтүн дүнјада сүлһ һөкм сүрәҹәкдир. Аллаһ “јерин уҹуна гәдәр ҹәнҝләри дурдурар; јајы гырар вә мизрағы парчалар” (Мәзмур 46:9). “Салеһ чичәкләнсин вә ај јох олунҹаја гәдәр, сүлһ боллуғу олсун” (Мәзмур 72:7).
14, 15. Мүгәддәс Китабда бәрпа едилмиш Ҹәннәтдәки ев, иш вә гида һаггында нә дејилир?
14 Ҝөзәл евләр вә мәмнунлуг ҝәтирән иш олаҹагдыр. “Евләр тикәҹәкләр вә јашајаҹаглар... Онлар тикиб башгасы јашамајаҹаг; онлар әкиб башгасы јемәјәҹәк; чүнки халгымын ҝүнләри ағаҹын ҝүнләри кими олаҹаг вә сечдикләрим өз әлләринин ишиндән истифадә едәҹәкләр. Бош јерә әмәк вермәјәҹәкләр вә фәлакәт үчүн доғмајаҹаглар” (Ишаја 65:21-23).
15 Сағлам гида боллуғу олаҹагдыр. “Јердә, дағлар башында, буғда боллуғу олсун” (Мәзмур 72:16). “Јер үзү мәһсулуну верди; Аллаһ, бизим Аллаһымыз, бизи мүбарәк гылаҹагдыр” (Мәзмур 67:6).
16. Нәјә ҝөрә Ҹәннәтдәки һәјат ләззәт верәҹәкдир?
16 Ҹәннәт дүнјасындакы әбәди һәјат ләззәт верәҹәкдир. “Салеһләр јери мирас алар вә онда әбәдијјән јашајарлар” (Мәзмур 37:29). “Чөл вә гураг јер мәсрур олаҹаг вә бозгыр севинәҹәк вә нәрҝиз кими чичәкләнәҹәк” (Ишаја 35:1).
БИЛИК ВӘ СИЗИН ҜӘЛӘҸӘЈИНИЗ
17. а) Ҹәннәтдә јашамаг истәјирсинизсә, нә етмәлисиниз? б) Һарадан билирик ки, Аллаһ јер үзүндә көклү дәјишикликләр едәҹәкдир?
17 Әҝәр Ҹәннәтдә јашамаг истәјирсинизсә, һеч бир шејин Аллаһ һаггында билик әлдә етмәјинизә мане олмасына јол вермәјин. Аллаһ инсанлары севир вә јер үзүнү Ҹәннәтә чевирмәк үчүн лазыми дәјишикликләр едәҹәкдир. Әҝәр сизин бүтүн дүнјадакы әзаб-әзијјәтләрә сон гојмаға вә һагсызлығы арадан галдырмаға ҝүҹүнүз чатсајды, мәҝәр буну етмәздинизми? Белә исә буну Аллаһдан ҝөзләмәли дејиликми? Мүгәддәс Китабда, Аллаһын ихтилафларла парчаланан индики системи арадан галдырыб, ону там әдаләтли һакимијјәтлә әвәз едәҹәји заман һаггында ачыгҹа дејилир (Даниел 2:44). Анҹаг Мүгәддәс Китаб јалныз бундан бәһс етмир. О, бизә Аллаһын вә’д едилмиш јени дүнјасында јашамаг үчүн неҹә хилас ола биләҹәјимизи ҝөстәрир (2 Петер 3:13; 1 Јәһја 2:17).
18. Аллаһ һаггындакы билик артыг индидән һәјатыныза неҹә тә’сир ҝөстәрә биләр?
18 Аллаһ һаггындакы билик артыг индидән сизә фајда ҝәтирә биләр. Мүгәддәс Китабда һәјатын ән дәрин вә нараһатедиҹи суалларына ҹаваб вар. Әҝәр сиз орада верилән рәһбәрлији гәбул етсәниз, Аллаһла достлуг мүнасибәтләрини инкишаф етдирә биләрсиниз. Бу исә бөјүк үстүнлүкдүр! Сизин үрәјиниздә анҹаг Аллаһын верә биләҹәји сүлһ һөкм сүрәҹәкдир (Ромалылара 15:13, 33). Бүтүн бунлары өјрәнмәк гәрарына ҝәлмәклә сиз һәјатынызда ән ваҹиб вә ән дәјәрли ишә ҝиришмиш олурсунуз. Әбәди һәјата апаран Аллаһ һаггындакы билији әлдә етмәк истәдијинизә ҝөрә һеч заман тәәссүфләнмәјәҹәксиниз.
19. Нөвбәти фәсилдә һансы суал мүзакирә олунаҹагдыр?
19 Биз Мүгәддәс Китаба, Аллаһ һаггындакы билијин мәһз онда олдуғуна ҝөрә мүраҹиәт едирик. Бәс бу китабын садәҹә инсан мүдриклији олмадығыны һарадан билирик? Бу суалы нөвбәти фәсилдә мүзакирә едәҹәјик.
БИЛИЈИНИЗИ ЈОХЛАЈЫН
• Аллаһ һаггындакы билик нәјә ҝөрә әбәди хошбәхтлијә апара биләр?
• Ҝәләҹәкдә јер үзүндәки Ҹәннәтдә һәјат неҹә олаҹагдыр?
• Аллаһ һаггындакы билик артыг индидән һансы фајданы ҝәтирир?