ФӘСИЛ 3
Һәгиги Аллаһ кимдир?
1. Нәјә ҝөрә бир чох инсанлар Мүгәддәс Китабын илк сөзләри илә разыдырлар?
АЈДЫН ҝеҹәдә сәмаја бахаркән сајсыз-һесабсыз улдузлар сизи валеһ етмирми? Онларын мөвҹудлуғуну неҹә изаһ едәрдиниз? Бәс јер үзүндә мөвҹуд олан рәнҝарәнҝ ҝүлләр, ҝөзәл нәғмәли гушлар, океанларда үзән нәһәнҝ балиналар һаггында нә дүшүнүрсүнүз? Бу садаланманы сонсуза гәдәр давам етмәк олар. Бүтүн бунлар тәсадүф нәтиҹәсиндә јарана билмәзди. Тәәҹҹүблү дејил ки, бир чохлары Мүгәддәс Китабын илк сөзләри илә разыдырлар: “Башланғыҹда Аллаһ ҝөјләри вә јери јаратды” (Тәквин 1:1).
2. Мүгәддәс Китаб Аллаһ һаггында нә дејир вә бизи нәјә тәшвиг едир?
2 Бу ҝүн инсанлар Аллаһ һаггындакы фикирләриндә бир-бириндән әһәмијјәтли дәрәҹәдә фәргләнирләр. Бә’зиләри Аллаһын шәхсијјәт дејил, садәҹә бир гүввә олдуғуну дүшүнүрләр. Милјонларла инсанлар Аллаһын әлчатмаз олдуғуну һесаб едәрәк өлмүш әҹдадларына ибадәт едирләр. Лакин Мүгәддәс Китаб һәгиги Аллаһын реал шәхсијјәт олдуғуну вә Онун һәр биримизлә марагландығыны ашкар едир. Буна ҝөрә дә, Мүгәддәс Китаб Аллаһын “һеч биримиздән узаг” олмадығыны ҝөстәрир вә бизи Ону ахтармаға тәшвиг едир (Һәвариләрин ишләри 17:27).
3. Нәјә ҝөрә Аллаһы тәсвир етмәк гејри-мүмкүндүр?
3 Аллаһын симасы неҹәдир? Аллаһын јалныз бир нечә хидмәтчиси рө’јаларында Онун мөһтәшәм зүһуруну ҝөрмүшләр. Бу рө’јаларда Аллаһ Өзүнү тахтда отуран вә еһтирам һиссләри ојадан, парлаг шәфәг сачан шәкилдә ҝөстәрмишди. Анҹаг белә рө’јалары ҝөрәнләр һеч вахт Аллаһын сифәт ҹизҝиләрини тәсвир етмәмишләр (Даниел 7:9, 10; Вәһј 4:2, 3). Бунун сәбәби одур ки, “Аллаһ руһдур”, Онун физики бәдәни јохдур (Јәһја 4:24). Јараданымызы физики бәдәндә тәсәввүр етмәк гејри-мүмкүндүр, чүнки “Аллаһы һеч бир заман кимсә ҝөрмәмишдир” (Јәһја 1:18; Чыхыш 33:20). Буна бахмајараг, Мүгәддәс Китаб бизә Аллаһ һаггында чох шеји өјрәдир.
ҺӘГИГИ АЛЛАҺЫН АДЫ ВАР
4. Мүгәддәс Китабда Аллаһын һансы чохмә’налы титуллары вардыр?
4 Мүгәддәс Китабда һәгиги Аллаһ — “Гадир Аллаһ”, “Уҹа Олан”, “Јарадан”, “Даһи Тә’лиматчы”, “Һөкмдар Аллаһ”, “Әсрләрин Һөкмдары” кими ифадәләрлә тәсвир олунур (Тәквин 17:1; Мәзмур 50:14; Ваиз 12:1; Ишаја 30:20, (ЈД); Һәвариләрин ишләри 4:24, (И–93); 1 Тимотејә 1:17). Аллаһын бу титуллары үзәриндә дүшүнсәк, Онун һаггында чох шеј өјрәнә биләрик.
5. Аллаһын ады нәдир вә Онун ады Ибраниҹә Мүгәддәс Јазыларда нечә дәфә хатырланыр?
5 Лакин Аллаһын шәхси ады вар вә бу ад тәкҹә Ибраниҹә Мүгәддәс Јазыларда тәхминән 7 000 дәфә, Онун һәр һансы башга титулларындан даһа чох хатырланыр. Тәхминән 1 900 ил бундан әввәл јәһудиләр мөвһумата инандыгларына ҝөрә Аллаһын адыны тәләффүз етмәјә сон гојмушдулар. Мүгәддәс Китабын јазылдығы ибрани дилиндә саит һәрфләр мөвҹуд дејилди. Буна ҝөрә дә Мусанын, Давудун вә гәдимдә јашајан диҝәр адамларын Аллаһын адыны тәшкил едән дөрд самит сәси (יהוה) неҹә тәләффүз етдикләрини дәгиг мүәјјән етмәк чәтиндир. Бә’зи алимләр Аллаһын адынын әввәлләр “Јәһва” кими тәләффүз олундуғуну ҝүман едирләр, лакин онлар буна әмин дејилләр. “Јеһова” тәләффүзү узун мүддәт истифадә олунуб вә онун еквивалентләри бир чох дилләрдә ҝениш гәбул едилмишдир. (Чыхыш 6:3 вә Ишаја 26:4 ајәсинә бахын.)
АЛЛАҺЫН АДЫНЫ ИСТИФАДӘ ЕТМӘК НӘЈӘ ҜӨРӘ ЛАЗЫМДЫР?
6. Ишаја 42:8 ајәсиндә Јеһова һаггында нә дејилир вә Онун адыны нәјә ҝөрә истифадә етмәлијик?
6 Јеһова өзлүјүндә јеҝанә аддыр ки, Аллаһы бүтүн башга илаһиләрдән фәргләндирир. Буна ҝөрә дә бу ада Мүгәддәс Китабда, хүсусилә дә Ибраниҹә Мүгәддәс Јазыларда бу гәдәр чох раст олунур. Бир чох тәрҹүмәчиләр Аллаһын адыны истифадә етмәкдән гачынырлар, анҹаг Ишаја 42:8 ајәсиндә ајдын шәкилдә дејилир: “Мән Јеһовајам, исмим одур”. Буна ҝөрә дә Аллаһдан сөз едәркән Онун шәхси адыны истифадә етмәк мүнасибдир.
7. Јеһова адынын мә’насы Аллаһ һаггында бизә нә өјрәдир?
7 Јеһова ады “олмаг” мә’насыны дашыјан ибрани фе’линдән әмәлә ҝәлир. Буна ҝөрә дә Аллаһын ады “олмасына сәбәб Олан” демәкдир. Бунунла Јеһова бөјүк нијјәтләр Аллаһы олдуғуну ҝөстәрир. О, һәмишә Өз нијјәтләрини һәјата кечирир. Инсанлар өз нијјәтләринин мүвәффәгијјәтли олаҹағына һеч заман там әмин ола билмәдикләри үчүн, јалныз һәгиги Аллаһ бу ады дашымаг һүгугуна маликдир (Јагуб 4:13, 14). Тәкҹә Јеһова дејә биләр: “Ағзымдан чыхан сөзүм дә елә олаҹагдыр... етсин дејә ону ҝөндәрдијим иши баҹараҹаг” (Ишаја 55:11).
8. Јеһова Мусанын васитәсилә һансы нијјәтини е’лан етди?
8 Ибрани халгынын тајфа башчылары Ибраһим, Исһаг вә Јагуб “Рәббин [“Јеһованын”, ЈД] исмини” чағырсалар да онун мә’насыны там баша дүшмүрдүләр (Тәквин 21:33; 26:25; 32:9; Чыхыш 6:3). Јеһова онларын нәсилләрини, јә’ни исраиллиләри Мисир көләлијиндән азад етмәји е’лан едиб, “сүд вә бал ахан дијары” мирас олараг онлара верәҹәјини вә’д едән заман, бу гејри-мүмкүн ҝөрүнүрдү (Чыхыш 3:17). Буна бахмајараг, Аллаһ Өз адынын мә’насынын кечиб ҝетмәјән олдуғуна ишарә едәрәк, Муса пејғәмбәрә бујурду: “Исраил оғулларына белә дејәҹәксән: Аталарынызын Аллаһы, Ибраһимин Аллаһы, Исһагын Аллаһы, Јагубун Аллаһы Јеһова мәни сизә ҝөндәрди; әбәдијјән исмим бу вә дөврдән дөврә анылмам будур” (Чыхыш 3:15).
9. Фир’он Јеһоваја неҹә мүнасибәт бәсләјирди?
9 Муса Мисир падшаһы фир’ондан хаһиш етди ки, Јеһоваја ибадәт етмәк үчүн исраиллиләри сәһраја бурахсын. Лакин өзү аллаһ һесаб олунан вә Мисирин диҝәр аллаһларына сәҹдә гылан фир’он белә ҹаваб верди: “Јеһова кимдир ки, Исраили бурахмаг үчүн онун сөзүнү динләјим? Јеһованы танымырам вә Исраили дә бурахмырам” (Чыхыш 5:1, 2).
10. Јеһова исраиллиләрә аид нијјәтини јеринә јетирмәк үчүн гәдим Мисирдә һансы ишләри ҝөрдү?
10 Јеһова, адынын мә’насына мүвафиг давранараг, нијјәтини аддым-аддым јеринә јетирмәјә башлады. О, гәдим мисирлиләрин үзәринә он бәла ҝөндәрди. Сонунҹу бәла мисирлиләрин илк өвладларынын, о ҹүмләдән мәғрур фир’онун оғлунун өлүмүнә сәбәб олду. О заман мисирлиләр исраиллиләрә јалвардылар ки, онларын торпагларыны тәрк етсинләр. Лакин Јеһованын гүдрәти бә’зи мисирлиләрә о гәдәр дәрин тәәссүрат бағышлады ки, исраиллиләрә гошулуб, онларла бирликдә Мисири тәрк етдиләр (Чыхыш 12:35-38).
11. Јеһова Гырмызы дәнизин јахынлығында һансы мө’ҹүзәни ҝөстәрди вә Онун дүшмәнләри нәји дәрк етмәли олдулар?
11 Инадкар фир’он јүзләрлә дөјүш арабасындан ибарәт олан ордусу илә бирликдә гулларыны ҝери гајтармаг үмидилә онларын далынҹа дүшдү. Мисирлиләрин онлара чатмасына аз галмыш Аллаһ мө’ҹүзә илә Гырмызы дәнизин суларыны јарды вә исраиллиләр онун диби илә кечә билдиләр. Тә’гибчиләр дә һәмин јолдан кечмәк истәдикдә, Јеһова онларын “арабаларынын тәкәрләрини чыхартды вә онлары ҝүҹлә сүрдүләр”. О ан Мисир әсҝәрләри гышгырдылар: “Исраилин өнүндән гачаг; чүнки Рәбб онлар үчүн Мисирлиләрә гаршы ҹәнҝ едир”. Лакин артыг ҝеҹ иди: нәһәнҝ су диварлары дағылды вә “ҹәнҝ арабаларыны вә атлылары... бүтүн Фир’он ордусуну өртдү” (Чыхыш 14:22-25, 28). Беләликлә, Јеһова Өз адыны иззәтләндирди. Бу һадисә индијәдәк унудулмајыб (Јешу 2:9-11).
12, 13. а) Аллаһын ады бу ҝүн бизим үчүн нә мә’на кәсб едир? б) Инсанлара нәји өјрәнмәк олдугҹа ваҹибдир вә нәјә ҝөрә?
12 Аллаһын иззәтли ады бу ҝүн бизим үчүн бөјүк әһәмијјәт кәсб едир. Онун Јеһова ады бүтүн нијјәтләрини һәјата кечирәҹәјинә зәманәт верир. Бу һәмчинин Онун илк нијјәтинә, јә’ни јер үзүнүн Ҹәннәт олмасы нијјәтинә дә аиддир (Тәквин 1:28; 2:8). Бунун үчүн Јеһова Өз һакимијјәтинин бүтүн мүасир дүшмәнләрини мәһв едәҹәкдир, чүнки О Өзү демишдир: “Биләҹәкләр ки, мән Рәббәм [“Јеһовајам”, ЈД]” (Һезекиел 38:23). Беләликлә, Аллаһ Өз нијјәтини һәјата кечирәҹәк вә хидмәтчиләринә јени әдаләтли дүнја бәхш едәҹәкдир (2 Петер 3:13).
13 Аллаһын лүтфүнү газанмаг истәјән һәр бир кәс Онун адыны иманла чағырмағы өјрәнмәлидир. Мүгәддәс Китаб вә’д едир: “Рәббин [“Јеһованын”, ЈД] исмини һәр ким чағырса, хилас олаҹагдыр” (Ромалылара 10:13, И–93). Бәли, Јеһованын адынын дәрин мә’насы вар. Јеһованы Аллаһыныз вә Хиласкарыныз кими чағырмагла сиз сонсуз хошбәхтлијә наил олаҹагсыныз.
ҺӘГИГИ АЛЛАҺЫН ХҮСУСИЈЈӘТЛӘРИ
14. Мүгәддәс Китаб Аллаһын һансы әсас хүсусијјәтләринә диггәт јетирир?
14 Исраил халгынын Мисирдән азад олунмасы һаггында мә’луматы нәзәрдән кечирдикдә, Аллаһын бир-бири илә һәмаһәнҝ олан дөрд әсас хүсусијјәт тәзаһүр етдирдијини ҝөрүрүк. Фир’онла рәфтары, Онун еһтирам һисси ојадан гүввәјә малик олдуғуну ҝөстәрир (Чыхыш 9:16). Бу мүрәккәб вәзијјәтин мәһарәтлә һәлл олунмасы Онун мисилсиз мүдриклијинә шәһадәт едир (Ромалылара 11:33). О, халгынын инадкар дүшмәнләрини вә зүлмкарларыны ҹәзаландырмагла әдаләтли олдуғуну ҝөстәрди (Тәснијә 32:4). Аллаһын ән башлыҹа хүсусијјәти исә мәһәббәтдир. Јеһова Ибраһимин нәслинә аид нијјәтини һәјата кечирмәклә сонсуз мәһәббәт ҝөстәрди (Тәснијә 7:8). Бундан әлавә, Аллаһ бә’зи мисирлиләрин јалан илаһиләрини рәдд едиб, өз рифаһлары үчүн јеҝанә һәгиги Аллаһа дөнмәләринә изн вермәклә дә мәһәббәт ҝөстәрмиш олду.
15, 16. Аллаһ мәһәббәти неҹә тәзаһүр етдирир?
15 Мүгәддәс Китабы охудугҹа ҝөрәҹәксиниз ки, мәһәббәт Аллаһын мүхтәлиф јолларла тәзаһүр етдирдији башлыҹа хүсусијјәтидир. Мәсәлән, О, мәһз мәһәббәтдән ирәли ҝәләрәк Јарадан олду вә һәјат севинҹини илк дәфә руһани варлыгларла бөлүшдү. Јүз милјонларла мәләкләр Аллаһы севир вә Ону иззәтләндирирләр (Ејуб 38:4, 7; Даниел 7:10). Һәмчинин Аллаһ Јери јаратмагла вә ону инсанларын хошбәхт һәјаты үчүн һазырламагла да мәһәббәт тәзаһүр етдирди (Тәквин 1:1, 26-28; Мәзмур 115:16).
16 Аллаһын бизә мәһәббәтдән ирәли ҝәләрәк бәхш етдији не’мәтләри садаламагла гуртармаг олмаз. Әввәла, Аллаһ бизи елә мәһәббәтлә вә о гәдәр ҝөзәл јарадыб ки, биз һәјатдан зөвг ала билирик (Мәзмур 139:14). О, “ҝөјдән бизә јағмурлар вә сәмәрәли мөвсүмләр верәрәк, үрәкләримизи гида вә севинҹлә” долдурмагла мәһәббәт ҝөстәрир (Һәвариләрин ишләри 14:17). Аллаһ, һәтта “Өз ҝүнәшинә әмр едир ки, пис вә јахшы адамларын үзәринә доғсун; вә салеһ оланлар илә олмајанларын үзәринә јағышлар ҝөндәрир” (Матта 5:45). Јарадан мәһәббәтдән ирәли ҝәләрәк бизә билик бәхш едир вә Она севинҹлә ибадәт етмәјимизә көмәк едир. Һәгигәтән дә “Аллаһ мәһәббәтдир” (1 Јәһја 4:8). Лакин Онун шәхсијјәтинин бир чох башга ҹәһәтләри дә мөвҹуддур.
“ЧОХ АҸЫЈАН ВӘ ЛҮТФ ЕДӘН”
17. Чыхыш 34:6, 7 ајәләриндән Аллаһ һаггында нә өјрәнирик?
17 Исраиллиләр Гырмызы дәнизи кечдикдән сонра да Аллаһы даһа јахшы танымаға әввәлки кими еһтијаҹ дујурдулар. Муса буну анладығы үчүн дуа едирди: “Нијаз едирәм, әҝәр ҝөзүндә лүтф тапдымса, мәнә јолларыны инди билдир, та ки, ҝөзүндә лүтф тапым дејә сәни таныјым” (Чыхыш 33:13). Муса Аллаһын сөзләрини динләдикдән сонра Ону даһа јахшы таныды: “Јеһова, Јеһова, чох аҹыјан вә лүтф едән, ҝеҹ гәзәбләнән вә инајәти вә һәгигәти чох олан, минләрә инајәтини сахлајан, һагсызлығы вә ҝүнаһы вә сучу бағышлајан вә сучлуну әсла сучсуз чыхармајан” (Чыхыш 34:6, 7). Аллаһын мәһәббәти әдаләтлә таразлашыр. О, гәсдән ҝүнаһ ишләдән кәсләри етдикләри һәрәкәтләрин пис нәтиҹәләриндән горумур.
18. Јеһованын мәрһәмәти нәдә әкс олунур?
18 Мусанын өјрәндији кими, Јеһова мәрһәмәт ҝөстәрир. Мәрһәмәтли инсан әзаб чәкәнин дәрдинә аҹыјыр, онун јүкүнү јүнҝүлләшдирмәјә чалышыр. Бунун кими, Аллаһ да әзаб-әзијјәтин, хәстәлијин вә өлүмүн һәмишәлик арадан галдырылмасы үчүн гајғы ҝөстәрмәклә бәшәријјәтә шәфгәт ҝөстәрмиш олду (Вәһј 21:3-5). Аллаһын хидмәтчиләри дүнјада һөкм сүрән вәзијјәтдән, јахуд дүшүнмәдән һәрәкәт едиб бәлаја дүшдүкләринә ҝөрә әзаб чәкә биләрләр. Анҹаг онлар тәвазөкарлыгла Јеһовадан көмәк диләјәрләрсә, О, онлара тәсәлли вериб, јардым едәҹәк. Нәјә ҝөрә? Чүнки О, мәрһәмәтлә Өз хидмәтчиләринин гејдинә галыр (Мәзмур 86:15; 1 Петер 5:6, 7).
19. Нәјә ҝөрә дејә биләрик ки, Јеһова лүтфкар Аллаһдыр?
19 Сәлаһијјәтә малик олан бир чох инсанлар башгалары илә сәрт давранырлар. Бунун әксинә олараг, Јеһова Өз тәвазөкар хидмәтчиләринә сонсуз лүтф ҝөстәрир! Каинатда ән бөјүк һакимијјәтә саһиб олмасына бахмајараг, О, инсанларла мүнасибәтиндә дәрин шәфгәт әкс етдирир (Мәзмур 8:3, 4; Лука 6:35). Јеһова Онун лүтфүнү диләјән ајры-ајры инсанларын дуаларына ҹаваб вермәклә дә шәфгәт ҝөстәрмиш олур (Чыхыш 22:26, 27; Лука 18:13, 14). Әлбәттә ки, Аллаһ лүтф вә ја мәрһәмәт ҝөстәрмәјә борҹлу дејил (Чыхыш 33:19). Буна ҝөрә дә, биз Аллаһын мәрһәмәт вә лүтфүнү дәрин гијмәтләндирмәлијик (Мәзмур 145:1, 8).
ЧОХ СӘБИРЛИ, ҮЗҜӨРӘНЛИК ЕТМӘЈӘН ВӘ ӘДАЛӘТЛИДИР
20. Нәдән ҝөрүнүр ки, Јеһова чох сәбирлидир вә үзҝөрәнлик етмир?
20 Јеһова чох сәбирлидир. Лакин инадкар фир’онун вә онун ордусунун Гырмызы дәниздә мәһв олунмасындан ҝөрүндүјү кими, фәалијјәтсизлик дә ҝөстәрмир. Јеһова һәм дә үзҝөрәнлик етмир. Бу сәбәбдән, Аллаһын халгы олан Исраил даим етдији ҝүнаһлар уҹбатындан ахырда Онун лүтфүндән мәһрум олду. Инди исә Аллаһ Өз хидмәтчиләрини һәр халгдан вә һагг иш ҝөрән инсанларын сырасындан топлајыр (Һәвариләрин ишләри 10:34, 35).
21. а) Вәһј 15:2-4 ајәләриндә Аллаһ һаггында нә дејилир? б) Аллаһын нормаларына мүвафиг јашамағымыза нә көмәк едәр?
21 Мүгәддәс Јазыларын “Вәһј” китабында Аллаһын “адил ишләри” һаггында өјрәнмәјин ваҹиблији вурғуланыр. Бурада сәмави варлыгларын белә тәрәннүм етдикләриндән хәбәр верилир: “Еј Күлл-Ихтијар Рәбб Аллаһ! Сәнин әмәлләрин бөјүк вә харигул’адәдир. Еј милләтләрин Һөкмдары! Сәнин јолларын доғру вә һәгигидир. Ја Рәбб! Ким Сәндән горхмајаҹаг вә Сәнин адыны иззәтләндирмәјәҹәкдир? Чүнки јалныз Сән мүгәддәссән. Бүтүн халглар ҝәләҹәк вә Сәнин өнүндә сәҹдә едәҹәкләр; чүнки Сәнин адил ишләрин изһар олунду” (Вәһј 15:2-4). Јеһованын нормаларына мүвафиг јашамағымызла Она мәгбул горху вә еһтирам һисси тәзаһүр етдирмиш олуруг. Әҝәр Аллаһын мүдриклијини вә мәһәббәтини унутмасаг, буну етмәк чәтин олмајаҹаг. Онун бүтүн әмрләри бизим хејримизә хидмәт едир (Ишаја 48:17, 18).
“АЛЛАҺЫМЫЗ РӘББ БИР ОЛАН РӘБДИР”
22. Нәјә ҝөрә Мүгәддәс Китабы гәбул едән инсанлар Үч үгнума ибадәт етмирләр?
22 Гәдим мисирлиләр чохлу аллаһлара ибадәт едирдиләр, анҹаг Јеһова “һәдсиз сәдагәт тәләб едән” (ЈД) Аллаһдыр (Чыхыш 20:5, 6). Муса исраиллиләрә “Аллаһымыз Рәбб бир олан Рәбдир” дејә хатырлатды (Тәснијә 6:4). Иса Мәсиһ дә бу сөзләри тәкрар етди (Марк 12:28, 29). Буна ҝөрә дә, Мүгәддәс Китабы Аллаһын Кәламы һесаб едән инсанлар Үч үгнума, јә’ни үч шәхсдә ваһид олан аллаһа ибадәт етмирләр. Әслиндә Мүгәддәс Китабда бир дәфә дә олса “Үч үгнум” сөзү хатырланмыр. Һәгиги Аллаһ Иса Мәсиһдән фәргләнән ајрыҹа шәхсијјәтдир (Јәһја 14:28; 1 Коринфлиләрә 15:28). Аллаһын мүгәддәс руһу шәхсијјәт дејил. Мүгәддәс руһ Јеһованын фәал гүввәсидир. Гадир Аллаһ Өз нијјәтләрини һәјата кечирмәк үчүн ондан истифадә едир (Тәквин 1:2; Һәвариләрин ишләри 2:1-4, 32, 33; 2 Петер 1:20, 21).
23. а) Аллаһа олан мәһәббәтиниз нәјин сајәсиндә арта биләр? б) Иса Аллаһа олан мәһәббәтә даир нә деди вә Мәсиһ һаггында нәји билмәк лазымдыр?
23 Јеһованын нә гәдәр ҝөзәл Аллаһ олдуғуну нәзәрдән кечирдикдән сонра, Онун ибадәтә лајиг олдуғу илә разысынызмы? Онун Кәламыны өјрәнәрәк, Онунла даһа јахындан таныш олаҹаг вә әбәди рифаһыныза вә хошбәхтлијинизә хидмәт едән тәләбләрини өјрәнәҹәксиниз (Матта 5:3, 6). Бундан әлавә, Аллаһа олан мәһәббәтиниз артаҹагдыр. Иса демишдир: “Аллаһын олан Рәбби бүтүн үрәјинлә, бүтүн ҹанынла, бүтүн дүшүнҹәнлә вә бүтүн гүввәтинлә сев” (Марк 12:30). Исанын Аллаһа бу ҹүр мәһәббәт бәсләдијинә шүбһә јохдур. Бәс Мүгәддәс Китабда Иса Мәсиһ һаггында нә дејилир? Јеһованын нијјәтиндә онун ролу нәдән ибарәтдир?
БИЛИЈИНИЗИ ЈОХЛАЈЫН
• Аллаһын ады нәдир вә Онун адына Ибраниҹә Мүгәддәс Јазыларда нечә дәфә раст ҝәлинир?
• Аллаһын адыны истифадә етмәк нәјә ҝөрә лазымдыр?
• Јеһова Аллаһын һансы хүсусијјәтләри сизин даһа чох хошунуза ҝәлир?
[29-ҹү сәһифәдәки шәкил]
Һәр шеји Јараданы нә дәрәҹәдә јахшы таныјырсыныз?