ФӘСИЛ 12
Пис руһани гүввәләрә мүгавимәт ҝөстәрин
1. Иса пис руһларла гаршылашан заман нә едирди?
ИСА МӘСИҺ вәфтиз олундугдан бир гәдәр сонра дуа етмәк вә дүшүнмәк үчүн Јәһудејанын сәһралығына ҝетди. Орада Шејтан Иблис ону Аллаһын ганунуну позмаға тәһрик етмәјә чалышырды. Лакин Иса Иблисин сынағыны рәдд етди вә онун тәләсинә дүшмәди. Иса јер үзүндә хидмәт едән мүддәтдә башга пис руһларла да гаршылашмышды. Анҹаг онлары тәкрар-тәкрар дәф етмиш вә онлара гаршы дурмушду (Лука 4:1-13; 8:26-34; 9:37-43).
2. Биз һансы суаллары мүзакирә едәҹәјик?
2 Мүгәддәс Китабда тәсвир олунан һадисәләр бизи пис руһани гүввәләрин һәгигәтән дә мөвҹуд олдуғуна әмин едир. Онлар инсанлары аздырмаға чалышырлар. Лакин биз онлара мүгавимәт ҝөстәрә биләрик. Бәс бу пис руһани гүввәләр неҹә јараныб? Онлар инсанлары нәјә ҝөрә алдатмаға чалышырлар? Вә онлар истәдикләринә наил олмаг үчүн нәләрә әл атырлар? Бу суалларын ҹавабы пис руһани гүввәләрә мүгавимәт ҝөстәрмәкдә сизә көмәк едәҹәкдир.
ПИС РУҺЛАРЫН МӘНШӘ ВӘ МӘГСӘДЛӘРИ
3. Шејтан Иблис һарадан пејда олду?
3 Јеһова Аллаһ инсанлары јаратмаздан чох әввәл күлли мигдарда руһани варлыглар јаратмышды (Ејуб 38:4, 7). Бу китабын 6-ҹы фәслиндә изаһ едилдији кими, һәмин мәләкләрдән бири инсанларын Јеһоваја дејил, она ибадәт етмәләрини истәди. Буна ҹан атараг, һәмин пис мәләк Јарадана гаршы чыхды вә Она бөһтан атды, һәтта илк гадына Аллаһын јаланчы олдуғуну сөјләди. Тамамилә әдаләтли олараг, бу гијамчы руһани варлыг Шејтан, јә’ни дүшмән вә Иблис, јә’ни бөһтанчы кими танынды (Тәквин 3:1-5; Ејуб 1:6).
4. Нуһун ҝүнләриндә бә’зи мәләкләр неҹә ҝүнаһ етдиләр?
4 Сонрадан Шејтан Иблисин тәрәфинә башга мәләкләр дә кечди. Салеһ инсан олан Нуһун ҝүнләриндә онлардан бә’зиләри өз еһтирасларыны тә’мин етмәк вә гадынларла ҹинси әлагәјә ҝирмәк үчүн ҝөјдәки хидмәтләрини тәрк едиб, инсан ҹилдинә ҝирәрәк јер үзүнә ҝәлдиләр. Сөзсүз ки, мәләкләри бу ҹүр итаәтсизлијә тәһрик едән Шејтан олмушдур. Нәтиҹәдә онлардан Нефилим адланан јарыадам, јарымәләк шәклиндә нәһәнҝ нәсил төрәнди. Онлар әсл гулдурлугла мәшғул идиләр. Үмумдүнја Туфаны заманы Јеһова әхлагсыз инсанлары вә итаәтсиз мәләкләрин гејри-тәбии нәслини мәһв етди. Үсјанкар мәләкләр бу мәһвдән ҹанларыны гуртарараг өз физики бәдәнләрини тәрк едиб, јенидән руһани мүһитә гајытдылар. Лакин Аллаһ бу ҹинләри руһани гаранлыға говду (Тәквин 6:1-7, 17; Јәһуда 6). Буна бахмајараг, “ҹинләрин рәиси” олан Шејтан вә онун пис мәләкләри өз үсјанларыны давам етдирдиләр (Лука 11:15). Онлар нәјә ҹан атырлар?
5. Шејтан вә онун ҹинләри һансы мәгсәди ҝүдүрләр вә онлар инсанлары өз тәләләринә салмаг үчүн нәјә әл атырлар?
5 Шејтанын вә онун ҹинләринин пис нијјәти — инсанлары Јеһова Аллаһа гаршы галдырмагдыр. Буна ҝөрә дә, онлар бүтүн бәшәр тарихи әрзиндә инсанлары алдатмыш, горхутмуш вә онлара һүҹум етмишләр (Вәһј 12:9). Буҝүнкү нүмунәләр ҝөстәрир ки, ҹинләрин һүҹуму һәмишәкиндән даһа да амансыздыр. Ҹинләр инсанлары өз тәләләринә салмаг үчүн чох вахт спиритизмин мүхтәлиф нөвләринә әл атырлар. Ҹинләр бу тәләдән неҹә истифадә едирләр вә сиз өзүнүзү неҹә мүдафиә едә биләрсиниз?
ПИС РУҺЛАР СИЗИ НЕҸӘ АЛДАТМАҒА ЧАЛЫШЫРЛАР?
6. Спиритизм нәдир вә онун нөвләриндән бә’зиләри һансылардыр?
6 Спиритизм нәдир? Бу, истәр бирбаша, истәрсә дә медиум васитәсилә ҹинләрлә, јә’ни пис руһларла әлагәдир. Тәлә јеми овчунун мәгсәдинә неҹә гуллуг едирсә, спиритизм дә ҹинләрин мәгсәдинә о ҹүр гуллуг едир: гурбаны өзүнә ҹәлб едир. Овчу һејванлары өз тәләсинә салмаг үчүн мүхтәлиф һијләләрдән истифадә етдији кими, пис руһлар да инсанлары әлә кечирмәк үчүн спиритизмин мүхтәлиф нөвләриндән истифадә едирләр. (Мәзмур 119:110 илә мүгајисә един.) Спиритизмин бә’зи нөвләри — фала бахмаг, ҹадуҝәрлик, бахыҹылыг, овсунчулуг, тилсимләр, медиумлара мүраҹиәт вә өлүләрлә данышмагдыр.
7. Спиритизм нә гәдәр ҝениш јајылмышдыр вә нәјә ҝөрә һәтта христиан өлкәләриндә белә чичәкләнмәкдәдир?
7 Бу тәләнин тә’сири бөјүкдүр, чүнки спиритизм дүнјанын һәр јериндә инсанлары өзүнә ҹәлб едир. Кәндләрдә јашајанлар ара һәкимләринә, шәһәрдә јашајанлар исә астрологлара мүраҹиәт едирләр. Спиритизм, һәтта христиан өлкәләриндә белә чичәкләнир. Апарылан тәдгигатлар ҝөстәрир ки, тәкҹә Бирләшмиш Штатларда, үмуми тиражы 10 000 000-дан чох олан 30-а јахын журнал спиритизмин мүхтәлиф нөвләринә һәср едилиб. Бразилијалылар спиритизмдә истифадә едилән мүхтәлиф әшјалара һәр ил 500 милјондан чох доллар сәрф едирләр. Лакин бу өлкәдә спиритик ибадәт мәркәзләриндә иштирак едән инсанларын 80 фаизини, ејни заманда килсә хидмәтләринә дә ҝедән вәфтиз олунмуш католикләр тәшкил едир. Бә’зи каһинләрин спиритизмлә мәшғул олдуғуну ҝөрән бир чох диндарлар бу ишин Аллаһа мәгбул олдуғуну дүшүнүрләр. Бәс бу доғрудан да беләдирми?
МҮГӘДДӘС КИТАБ СПИРИТИЗМЛӘ МӘШҒУЛ ОЛМАҒЫ НӘЈӘ ҜӨРӘ МҮҺАКИМӘ ЕДИР?
8. Мүгәддәс Китабда спиритизм һаггында нә дејилир?
8 Әҝәр сизә спиритизмин бә’зи нөвләринин хејирхаһ руһларла үнсијјәт етмәјә имкан јарадан васитә олдуғуну өјрәдибләрсә, онда сиз јәгин ки, Мүгәддәс Китабда спиритизм һаггында дејиләнләри өјрәндикдә тәәҹҹүбләнәҹәксиниз. Јеһованын халгына хәбәрдарлыг едилмишди: “Ҹинләрлә данышанлара вә бахыҹылара мүраҹиәт етмәјин, мурдар олмаг үчүн онлары арамајын” (Левилиләр 19:31; 20:6, 27). Мүгәддәс Јазыларын “Вәһј” китабында хәбәрдарлыг едилир ки, “сеһрбазларын [“спиритизмлә мәшғул оланларын”, ЈД]... агибәти од вә күкүрдлә јанан ҝөлдәдир; бу, икинҹи [әбәди] өлүмдүр” (Вәһј 21:8; 22:15). Јеһова Аллаһ спиритизмин һәр бир нөвүнү мүһакимә едир (Тәснијә 18:10-12). Нәјә ҝөрә?
9. Нәјә ҝөрә бизим ҝүнләрдә руһани аләмдән ҝәлән “хәбәрләрин” Јеһовадан олмадығы гәнаәтинә ҝәлә биләрик?
9 Мүгәддәс Китаб јазылыб баша чатмаздан әввәл Јеһова бә’зи инсанларла үнсијјәт етмәк үчүн хејирхаһ руһлары, јә’ни салеһ мәләкләри ҝөндәрирди. Мүгәддәс Китаб јазылыб гуртардыгдан сонра, Аллаһын Кәламы васитәсилә инсанлара лазыми рәһбәрлик верилир ки, Јеһоваја мәгбул тәрздә хидмәт етсинләр (2 Тимотејә 3:16, 17; Ибраниләрә 1:1, 2). Аллаһ медиумлар васитәсилә мә’лумат вермәклә Өз мүгәддәс Кәламына е’тинасызлыг етмир. Бизим ҝүнләрдә руһани аләмдән ҝәлән бүтүн хәбәрләр пис руһлардан ҝәлир. Спиритизмлә мәшғул олмаг ҹинләрин инсаны нараһат етмәсинә вә ја ҹинләрин тә’сири алтына дүшмәсинә ҝәтириб чыхара биләр. Буна ҝөрә дә, Аллаһ мәһәббәтдән ирәли ҝәләрәк бизә хәбәрдарлыг едир ки, спиритизмин һеч бир нөвү илә мәшғул олмајаг (Тәснијә 18:14; Галатијалылара 5:19-21). Бундан әлавә, әҝәр Јеһованын нөгтеји-нәзәрини билдикдән сонра да спиритизмлә мәшғул олмаға давам едириксә, онда биз үсјанкар пис руһларын тәрәфини тутур вә Аллаһын дүшмәни олуруг (1 Самуел 15:23; 1 Тарихләр 10:13, 14; Мәзмур 5:4).
10. Фалчылыг нәдир вә нәјә ҝөрә биз ондан гачынмалыјыг?
10 Спиритизмин ән ҝениш јајылмыш нөвләриндән бири — фалчылыгдыр. Бу, ҝәләҹәји билмәк вә ја мә’лум олмајан бир шеји руһларын көмәји илә өјрәнмәк ҹәһдидир. Фалчылығын бә’зи нөвләри — астролоҝија, кристал күрә фалы, јуху јозмалары, әл фалы вә картла фала бахмагдыр. Чохлары фала бахманы зәрәрсиз әјләнҹә һесаб едирләр, лакин Мүгәддәс Китаб ҝөстәрир ки, ҝәләҹәкдән хәбәр верәнләрлә пис руһлар әлбирдир. Мәсәлән, Һәвариләрин ишләри 16:16-19 ајәләриндә бир гыза ‘гејбдән хәбәр вермәк’ баҹарығы верән “фалчылыг руһу” һагда хатырланыр. Лакин һәмин гыздан ҹин говулдугдан сонра, онун ҝәләҹәкдән хәбәр вермәк баҹарығы итир. Ајдындыр ки, фалчылыг — ҹинләрин инсанлары өз торларына салдыглары тәләдир.
11. Өлүләрлә данышмаг ҹәһди нәјә ҝөрә тәләјә доғру апарыр?
11 Әҝәр сиз доғма адамынызын вә ја јахын достунузун өлүмүнә ҝөрә кәдәрлисизсә, асанлыгла башга бир тәләјә дүшә биләрсиниз. Спиритик медиум сизә хүсуси мә’луматлар верә вә ја сизинлә өлән адамын сәсилә даныша биләр. Еһтијатлы олун! Өлүләрлә үнсијјәт етмәк ҹәһди тәләјә доғру апарыр. Нәјә ҝөрә? Она ҝөрә ки, өлүләр даныша билмирләр. Әҝәр јадыныздадырса, Аллаһын Кәламында ајдын шәкилдә дејилир ки, өлүмдән сонра инсан “торпаға дөнәр; һәмән о ҝүндә дүшүнҹәләри јох олар”. Бәли, өлүләр “бир шеј билмәзләр” (Мәзмур 146:4; Ваиз 9:5, 10). Бундан әлавә, мә’лумдур ки, өлүләрин сәсини тәглид едән вә спиритик медиума өлүләр һаггында мә’лумат верәнләр мәһз ҹинләрдир (1 Самуел 28:3-19). Буна ҝөрә дә, “өлүләрлә данышан” һәр бир кәс пис руһларын торуна дүшүр вә Јеһова Аллаһын ирадәсинә зидд давраныр (Тәснијә 18:11, 12; Ишаја 8:19).
ТӘЛӘДӘН ҺҮҸУМА ДОҒРУ
12, 13. Ҹинләрин инсанлары бу ҝүн дә сынаға чәкдикләринә вә онлары нараһат етдикләринә даир һансы сүбутлар мөвҹуддур?
12 Сиз спиритизмә даир Аллаһын Кәламындакы мәсләһәтләри гәбул етмәклә ҹинләрин тәләсини рәдд етмиш олурсунуз. (Мәзмур 141:9, 10; Ромалылара 12:9 илә мүгајисә един.) Бу о демәкдирми ки, пис руһлар бир даһа сизи өз тә’сири алтына салмаға чалышмајаҹаглар? Әлбәттә ки, јох! Шејтан Исаны үч дәфә сынаға чәкдикдән сонра “бир мүддәтә Ондан ајрылды” (Лука 4:13). Буна бәнзәр шәкилдә, инадҹыл руһлар инсанлары нәинки тәләјә салыр, һәм дә онлара һүҹум едирләр.
13 Әҝәр хатырлајырсынызса, Шејтанын Аллаһын хидмәтчиси олан Ејуба һүҹум етдији мәгамы мүзакирә етмишдик. Иблис Ејубун мал-гарасынын вә гулларынын чохуну итирмәсинә наил олду. Шејтан, һәтта Ејубун ушагларыны белә өлдүрдү. Даһа сонра о, Ејубун өзүнү изтираблы хәстәлијә дүчар етди. Лакин Ејуб Аллаһын гаршысында нөгсансызлығыны горуду вә бол-бол хејир-дуалар алды (Ејуб 1:7-19; 2:7, 8; 42:12). О вахтдан бәри ҹинләр бә’зи инсанлары ҝөрмәк вә ја данышмаг габилијјәтиндән мәһрум едир вә инсанларын чәкдији изтираблардан һәзз алмаға давам едирләр (Матта 9:32, 33; 12:22; Марк 5:2-5). Буҝүнкү мә’луматлар ҝөстәрир ки, ҹинләр бә’зи инсанлары ҹинси әлагә ҹәһәтдән нараһат едир, башгаларыны исә дәли олмаг дәрәҹәсинә чатдырырлар. Бундан әлавә, онлар инсанлары башгаларыны өлдүрмәјә вә интиһар етмәјә тәһрик едирләр ки, бу да Аллаһа гаршы ҝүнаһдыр (Тәснијә 5:17; 1 Јәһја 3:15). Бунунла белә, вахтилә пис руһларын тәләсинә дүшән минләрлә инсанлар онлардан ҹанларыны гуртара билмишләр. Онлар буна неҹә наил олмушлар? Ваҹиб аддымлар атмагла.
ПИС РУҺЛАРА МҮГАВИМӘТ ҜӨСТӘРМӘЈИН ҮСУЛЛАРЫ
14. Биринҹи әсрдә јашамыш ефесли мәсиһчиләрин нүмунәсини тәглид едәрәк пис руһлара неҹә мүгавимәт ҝөстәрә биләрсиниз?
14 Пис руһлара мүгавимәт ҝөстәрмәјин, өзүнү вә аиләни онларын тәләсиндән горумағын үсулларындан бири һансыдыр? Иман етмәздән әввәл спиритизимлә мәшғул олан биринҹи әсрин ефесли мәсиһчиләри ваҹиб аддымлар атдылар. Биз охујуруг ки, “сеһрбазлыг едәнләрдән бир чоху өз китабларыны топлајыб, һамынын ҝөзү гаршысында јандырдылар” (Һәвариләрин ишләри 19:19). Спиритизмлә мәшғул олмасаныз да, спиритизмдә истифадә едилән, јахуд онунла һәр һансы бағлылығы олан һәр бир шејдән јаха гуртарын. Бу, өзүнә спиритик мәгсәдләрдә истифадә едилән китаблары, журналлары, видеофилмләри, шүарлары, мусиги јазыларыны вә әшјалары дахил едир. Онлара, һәмчинин бүтләр, ҝөз мунҹуглары вә спиритизмлә мәшғул олан инсанлардан алынан һәдијјәләр дахилдир (Тәснијә 7:25, 26; 1 Коринфлиләрә 10:21). Мәсәлән, Таиландда бир әрлә арвады ҹинләр узун мүддәт иди ки, нараһат едирди. Онда онлар спиритизмлә бағлы олан әшјалардан јаха гуртардылар. Бунун нәтиҹәси нә олду? Онлар ҹинләрин һүҹумларындан азад олдулар вә бундан сонра әсл руһани мүвәффәгијјәтләр әлдә етдиләр.
15. Пис руһани гүввәләрә мүгавимәт ҝөстәрмәк үчүн һансы аддымы атмаг ваҹибдир?
15 Пис руһлара гаршы дурмаг үчүн даһа бир аддым атмаг — һәвари Павелин мәсләһәтини гәбул етмәк вә Аллаһ тәрәфиндән тәгдим едилән руһани зиреһләри ҝејинмәк лазымдыр (Ефеслиләрә 6:11-17). Мәсиһчиләр пис руһлардан мүдафиә үсулларыны мөһкәмләндирмәлидирләр. Бу өзүнә нәји дахил едир? Павел демишдир: “Бүтүн бунлардан савајы, иман галханыны әлә алын; бунунла шејтанын бүтүн гызмар охларыны сөндүрмәјә гадир олаҹагсыныз”. Бәли, иманыныз нә гәдәр ҝүҹлү олса, пис руһани гүввәләрә гаршы бир о гәдәр мөһкәм мүгавимәт ҝөстәрә биләҹәксиниз (Матта 17:14-20).
16. Сиз иманынызы неҹә мөһкәмләндирә биләрсиниз?
16 Иманынызы неҹә мөһкәмләндирә биләрсиниз? Мүгәддәс Китабы өјрәнмәјә давам един вә онун мәсләһәтләрини һәјата кечирмәјә чалышын. Иманын ҝүҹү башлыҹа олараг онун әсасынын мөһкәмлијиндән — Аллаһ һаггында биликдән асылыдыр. Мәҝәр сиз разы дејилсинизми ки, Мүгәддәс Китабы өјрәнәрәк әлдә етдијиниз вә үрәјинизә тә’сир етмәсинә јол вердијиниз дәгиг биликләр сајәсиндә иманыныз мөһкәмләнмишдир? (Ромалылара 10:10, 17). Буна ҝөрә дә, һеч бир шүбһә јохдур ки, әҝәр сиз бу өјрәнмәни давам етдирсәниз вә Јеһованын Шаһидләринин ҝөрүшләринә ҝетмәји адәт етсәниз, иманыныз даһа да мөһкәмләнәҹәкдир (Ромалылара 1:11, 12; Колослулара 2:6, 7). Бу, ҹинләрин һүҹумларына гаршы ҝүҹлү мүдафиә олаҹагдыр (1 Јәһја 5:5).
17. Пис руһани гүввәләрә мүгавимәт ҝөстәрә билмәјимиз үчүн башга һансы аддымлар тәләб олуна биләр?
17 Пис руһани гүввәләрә гаршы дурмаг гәрарына ҝәлән инсан башга һансы аддымлары ата биләр? Ефесдәки мәсиһчиләрә мүдафиә ҝәрәк иди, чүнки онлар ҹиндарлыгла долу олан бир шәһәрдә јашајырдылар. Буна ҝөрә дә Павел онлара демишдир: “Һәр вахт Руһун идарәси илә дуа един” (Ефеслиләрә 6:18). Биз, һәрфи мә’нада десәк, ҹинләрә гәрг олмуш дүнјада јашадығымыз үчүн, пис руһлара гаршы дура биләк дејә, Аллаһа сә’јлә дуа етмәлијик (Матта 6:13). Бу саһәдә мәсиһчи јығынҹағында тә’јин едилмиш ағсаггалларын руһани көмәји вә дуалары фајдалыдыр (Јагуб 5:13-15).
ПИС РУҺЛАРА ГАРШЫ МҮБАРИЗӘ АПАРЫН
18, 19. Әҝәр ҹинләр инсаны нараһат етмәјә давам едирләрсә, нә етмәк олар?
18 Лакин бә’зи инсанларын бу әсас аддымлары атмаларына бахмајараг, пис руһлар онлары јенә дә нараһат едир. Мәсәлән, Кот-д’Ивуарда Јеһованын Шаһидләри илә бирликдә Мүгәддәс Китабы өјрәнән бир киши бүтүн тилсимләрини мәһв етмишдир. Бундан сонра о, јахшы ирәлиләјишләр етмиш, һәјатыны Јеһоваја һәср етмиш вә вәфтиз олунмушдур. Лакин вәфтиздән бир һәфтә сонра ҹинләр ону јенидән нараһат етмәјә башладылар: сәсләр она јени иманыны тәрк етмәји бујурурду. Әҝәр белә бир һадисә сизинлә дә баш верәрсә, бу, Јеһованын мүдафиәсини итирдијинизими ҝөстәрәҹәк? Әлбәттә ки, јох.
19 Камил инсан олан Иса Мәсиһ Аллаһын мүдафиәси алтында олса да, пис руһани варлығын — Шејтан Иблисин сәсини ешидирди. Иса белә бир һалда нә етмәјин лазым олдуғуну ҝөстәрди. О, Иблисә деди: “Рәдд ол, шејтан!” (Матта 4:3-10). Бу нүмунәјә риајәт едәрәк, сиз руһани дүнјадан ҝәлән сәсләрә гулаг асмагдан имтина етмәлисиниз. Јеһованы көмәјә чағырмагла, пис руһлара гаршы дурун. Бәли, Аллаһын адыны чәкәрәк уҹадан дуа един. Сүлејманын мәсәлләри 18:10 (МКШ) ајәсиндә дејилир: “Рәббин [Јеһованын] ады гүввәтли бир галадыр, салеһ гачыб она пәнаһ апарыр”. Кот-д’Ивуарда јашајан һәмин мәсиһчи белә дә етди, буна ҝөрә дә пис руһлар ону нараһат етмәјә сон гојдулар (Мәзмур 124:8; 145:18).
20. Әслиндә пис руһлара сиз неҹә мүгавимәт ҝөстәрә биләрсиниз?
20 Јеһова пис руһларын мөвҹуд олмаларына јол вериб, анҹаг О гүввәсини, хүсусилә дә Өз халгынын рифаһына тәзаһүр етдирир вә Онун ады бүтүн јер үзүндә бәјан едилир (Чыхыш 9:16). Әҝәр Јеһовадан бәрк јапышсаныз, сизә пис руһлардан горхмаг лазым ҝәлмәјәҹәк (Сајлар 23:21, 23; Јагуб 4:7, 8; 2 Петер 2:9). Онларын гүввәси мәһдуддур. Онлар Нуһун ҝүнләриндә ҹәзаландырылмыш, бу јахынларда ҝөјдән говулмушлар, инди исә сон мәһкәмәни ҝөзләјирләр (Јәһуда 6; Вәһј 12:9; 20:1-3, 7-10, 14). Әслиндә онлар јахынлашмагда олан мәһв гаршысында әсирләр (Јагуб 2:19). Буна ҝөрә дә, пис руһлар һәр һансы тәлә јеми васитәсилә сизи ҹәлб етмәк вә ја һәр һансы үсулла сизә һүҹум етмәјә ҹәһд етсәләр дә, онлара мүгавимәт ҝөстәрә биләрсиниз (2 Коринфлиләрә 2:11). Спиритизмин һәр бир нөвүнү рәдд един, Аллаһын Кәламындакы мәсләһәтләри тәтбиг един вә Јеһованын илтифатыны ахтарын. Буну јубатмадан един, чүнки һәјатыныз пис руһани гүввәләрә неҹә мүгавимәт ҝөстәрмәјиниздән асылыдыр!
БИЛИЈИНИЗИ ЈОХЛАЈЫН
• Пис руһлар инсанлары неҹә аздырмаға чалышырлар?
• Мүгәддәс Китабда спиритизм нәјә ҝөрә мүһакимә едилир?
• Инсан пис руһани гүввәләрдән неҹә азад ола биләр?
• Нәјә ҝөрә пис руһлара мүгавимәт ҝөстәрмәјә давам етмәлијик?
[110-ҹу сәһифәдәки шәкил]
Сиз спиритизмин мүхтәлиф формаларына неҹә јанашырсыныз?