ФӘСИЛ 14
Сиз кимин һакимијјәтини гәбул етмәлисиниз?
1, 2. Һакимијјәтин һәр нөвүмү зәрәрлидир? Изаһ един.
“ҺАКИМИЈЈӘТ” — бу, бир чохларынын хошламадығы сөздүр. Бунун сәбәби ајдындыр, чүнки иш јериндә, аиләдә вә һөкумәт даирәләриндә һакимијјәтдән чох вахт суи-истифадә едилир. Мүгәддәс Китабда ајдын шәкилдә дејилир: “Бир адамын диҝәр адам үзәриндә һакимијјәти онун зәрәринәдир” (Ваиз 8:9). Бәли, чохлары башгаларынын үзәриндә гәддарҹасына вә худбинликлә һөкмранлыг едир.
2 Лакин һакимијјәтин һәр нөвү зәрәрли дејил. Мисал үчүн, демәк олар ки, бизи өз организмимиз идарә едир. Организм бизә нәфәс алмағы, јемәји, ичмәји вә јатмағы “әмр едир”. Мәҝәр бу ҹансыхыҹыдырмы? Хејр. Бу тәләбләрә табе олмагла, биз өзүмүзә јалныз хејир ҝәтирмиш олуруг. Биз тәбии тәләбатларымыза дүшүнмәдән табе олсаг да, елә һакимијјәт нөвләри вар ки, биздән шүурлу тәрздә табечилик тәләб едир. Бә’зи нүмунәләри нәзәрдән кечирәк.
ӘН АЛИ ҺАКИМИЈЈӘТ
3. Нәјә ҝөрә Јеһова һаглы олараг “Һөкмдар Аллаһ” адланыр?
3 Мүгәддәс Китабда Јеһова дәфәләрлә “Һөкмдар Аллаһ” адланыр. Һөкмдар — али һакимијјәтә малик олан шәхсдир. Јеһоваја бу ҹүр мөвге тутмаг һүгугу верән нәдир? Вәһј 4:11 ајәсиндә бу суала белә ҹаваб верилир: “Ја Рәббимиз вә Аллаһымыз, иззәти, һөрмәти вә гүдрәти алмаға лајигсән. Чүнки һәр шеји Сән јаратдын вә һәр шеј Сәнин ирадәнлә мөвҹуд олду вә јаранды”.
4. Јеһова Өз һакимијјәтини неҹә һәјата кечирир?
4 Јараданымыз кими Јеһованын Өз һакимијјәтиндән истәдији кими истифадә етмәјә һаггы вар. Хүсусилә дә Аллаһын “гүдрәтинин бөјүклүјүнү” нәзәрә алсаг, бу бизи ләрзәјә ҝәтирә биләр. О, “Күлл-Ихтијар Аллаһ” адланыр. Бу ифадә ибрани мәтниндә һәр шејә галиб ҝәлән гүввә мә’насыны верир (Ишаја 40:26; Јарадылыш 17:1, МКШ). Анҹаг, Јеһова Өз гүввәсини ҝөстәрмәклә бәрабәр, ејни заманда хејирхаһ олараг галыр, чүнки Онун башлыҹа хүсусијјәти — мәһәббәтдир (1 Јәһја 4:16).
5. Јеһованын һакимијјәтинә табе олмаг нәјә ҝөрә чәтин дејил?
5 Јеһова төвбә етмәјән ҝүнаһкарлары ҹәзаландыраҹағына даир хәбәрдарлыг етмәсинә бахмајараг, Муса Јеһованы илк өнҹә ‘Ону севәнләр вә әмирләрини тутанлар үчүн инајәтини горујан, садиг Аллаһ’ кими таныјырды (Тәснијә 7:9, 10). Јалныз тәсәввүр един! Каинатда али һакимијјәтә саһиб олан Шәхс бизи Она хидмәт етмәјә мәҹбур етмир. Әксинә, бизи Она ҹәлб едән Онун мәһәббәтидир (Ромалылара 2:4; 5:8). Јеһованын һакимијјәтинә табе олмаг һәтта хошдур, чүнки Онун ганунлары бизә анҹаг хејир ҝәтирир (Мәзмур 19:7, 8).
6. Һакимијјәт мәсәләси Еден бағында неҹә галдырылды вә бу нәјә ҝәтириб чыхарды?
6 Улу валидејнләримиз Аллаһын һөкмранлығыны рәдд етдиләр. Онлар хејирлә шәрин нә олдуғуну өзләри гәрара алмаг истәдиләр (Јарадылыш 3:4-6, МКШ). Бунун нәтиҹәсиндә, онлар Ҹәннәт евләриндән говулдулар. Даһа сонра Јеһова инсанларын, гејри-камил олса да, мүтәшәккил бир ҹәмијјәтдә јашамаг имканы верән һакимијјәт структурлары јаратмаларына јол верди. Һакимијјәтин белә формаларындан бә’зиләри һансылардыр вә Аллаһы разы салмаг үчүн, биз онлара нә дәрәҹәдә табе олмалыјыг?
“АЛИ ҺАКИМИЈЈӘТЛӘР”
7. “Али һакимијјәтләр” кимләрдир вә Аллаһын һакимијјәтинә нисбәтдә онлар һансы јери тутурлар?
7 Һәвари Павел јазырды: “Һәр адам өз үзәриндә олан һакимләрә [“али һакимијјәтләрә”, ЈД] табе олсун; чүнки Аллаһ тәрәфиндән олмајан һаким [“һакимијјәтләр”, ЈД] јохдур”. “Али һакимијјәтләр” кимләрдир? Һәвари Павелин нөвбәти ајәләрдә дедији сөзләр “али һакимијјәтләрин” — дөвләт һакимијјәтләри олдуғуну ҝөстәрир (Ромалылара 13:1-7; Титуса 3:1). Инсан һакимијјәтләрини Јеһова јаратмајыб, анҹаг онларын мөвҹуд олмасына јол верир. Буна ҝөрә дә, Павел јазмышдыр: “Мөвҹуд олан һакимләр [“һакимијјәтләр”, ЈД] дә Аллаһ тәрәфиндән тә’јин олунмушдур”. Бу сөзләр јер үзүндә мөвҹуд олан һакимијјәтләр барәдә нә дејир? Онлар Аллаһын һакимијјәтиндән сонра икинҹи јердә, јә’ни даһа ашағы сәвијјәдә дурурлар (Јәһја 19:10, 11). Бу сәбәбдән, инсан ганунлары илә Аллаһын ганунлары арасында зиддијјәт јарананда, мәсиһчиләр Мүгәддәс Китаба әсасән тәрбијә едилмиш виҹданы рәһбәр тутмалыдырлар. “Инсанлардан артыг, Аллаһа итаәт етмәк ҝәрәкдир” (Һәвариләрин ишләри 5:29).
8. Али һакимијјәтләр бизә һансы фајданы ҝәтирир вә онлара өз табечилијимизи неҹә ҝөстәрә биләрик?
8 Лакин чох вахт дөвләт һакимијјәтләри ‘бизим јахшылығымыз үчүн Аллаһа хидмәт едирләр’ (Ромалылара 13:4). Һансы тәрздә? Али һакимијјәтләрин тәгдим етдији чохсајлы хидмәт нөвләрини нәзәрдән кечирәк, мәсәлән: почт әлагәси, полис хидмәти, јанғын мүһафизә органлары, санитарија системи, һәмчинин тәһсил алмаг имканлары. Павел јазырды: “Верҝини дә сиз буна ҝөрә өдәјирсиниз; чүнки һакимләр Аллаһа хидмәт едирләр вә даим мәһз бу ишлә мәшғулдурлар” (Ромалылара 13:6). Верҝиләрә, јахуд ганун тәрәфиндән тә’сис едилмиш диҝәр вәзифәләрә даир виҹданла давранмалыјыг (Ибраниләрә 13:18).
9, 10. а) Аллаһын гурулушунда али һакимијјәтләр һансы ролу ојнајырлар? б) Али һакимијјәтләрә мүгавимәт ҝөстәрмәк нәјә ҝөрә дүзҝүн олмазды?
9 Дүздүр, һәрдән али һакимијјәтләр өз сәлаһијјәтләриндән суи-истифадә едирләр. Бәс бу, бизи онлара табе олмаг мәс’улијјәтиндән азад едирми? Хејр. Јеһова онларын сәһв һәрәкәтләрини ҝөрүр (Сүлејманын мәсәлләри 15:3). Онун инсанларын рәһбәрлијинә сәбир етмәси, рүшвәтхорлуға ҝөз јумдуғуну ҝөстәрмир; О, буну биздән дә ҝөзләмир. Әслиндә Аллаһ бир аздан “падшаһлыгларын һамысыны парчалајаҹаг вә мәһв едәҹәк” вә онлары Өзүнүн әдаләтли һөкумәти илә әвәз едәҹәкдир (Даниел 2:44). Амма һәләлик али һакимијјәтләр мүәјјән гәдәр фајда ҝәтирирләр.
10 Павел изаһ едир: “Һакимә мүгавимәт ҝөстәрән Аллаһын гурдуғуна гаршы дурур” (Ромалылара 13:2). Али һакимијјәтләр — Аллаһын гурулушудур, бунун сајәсиндә һеч олмаса мүәјјән гәдәр дә олсун низам-интизама риајәт олунур, әкс тәгдирдә хаос вә анархија һөкм сүрәрди. Али һакимијјәтләрә мүгавимәт ҝөстәрмәк Мүгәддәс Китабын нөгтеји-нәзәринҹә нәинки дүзҝүн дејил, һәтта ағылсызлыгдыр. Мисал үчүн, тәсәввүр един ки, сизә ҹәрраһијјә әмәлијјаты едиб, јараныза тикиш вурублар. Тикиш саплары организм үчүн јад олса да, онлар бир гәдәр вахт мүәјјән мәгсәдә хидмәт едир. Әҝәр сиз һәмин тикиши вахтындан әввәл сөксәниз, өзүнүзә зијан етмиш оларсыныз. Бунун кими, дөвләт һакимијјәтләри дә Аллаһын илк нијјәтинә дахил дејилди. Лакин һәләлик Аллаһын Падшаһлығы јер үзүнү бүтүнлүклә идарә етмәдији үчүн, инсан һакимијјәтләри һал-һазырда Аллаһын онлара вердији ролу јеринә јетирәрәк, ҹәмијјәти дәстәкләјирләр. Буна ҝөрә дә, илк әввәл Аллаһын ганунларына вә һакимијјәтинә үстүнлүк версәк дә, али һакимијјәтләрә дә табе олмалыјыг.
АИЛӘДӘКИ ҺАКИМИЈЈӘТ
11. Башчылыг принсипини сиз неҹә изаһ едәрдиниз?
11 Аилә — инсан ҹәмијјәтинин тәмәлидир. Орада әр вә арвад мүкафатландырыҹы достлуг үнсијјәти әлдә едә биләр, ушаглар исә мүдафиә олунар вә јеткин һәјата һазырлаша биләрләр (Сүлејманын мәсәлләри 5:15-21; Ефеслиләрә 6:1-4). Бу ҹүр ҝөзәл гурулушу елә тәшкил етмәк лазымдыр ки, аиләнин үзвләри сүлһ вә разылыг ичиндә јашасынлар. Јеһова бу гурулушу 1 Коринфлиләрә 11:3 ајәсиндә јазылмыш башчылыг принсипинин көмәји илә тәшкил едир: “Һәр әрин башы Мәсиһ, арвадын башы әр, Мәсиһин башы исә Аллаһдыр”.
12, 13. Аиләнин башы кимдир вә Исанын башчылыг нүмунәсиндән нә өјрәнмәк олар?
12 Әр аиләнин башыдыр. Лакин онун да башы вар, бу, Иса Мәсиһдир. Павел јазырды: “Әрләр, арвадларынызы севин, неҹә ки, Мәсиһ дә иманлылар ҹәмијјәтини севди вә онун уғрунда Өзүнү фәда етди” (Ефеслиләрә 5:25). Әр арвады илә, Исанын һәмишә јығынҹагла даврандығы кими давранырса, Мәсиһә табе олдуғуну ҝөстәрир (1 Јәһја 2:6). Исаја бөјүк һакимијјәт верилиб, лакин о, өз һакимијјәтиндән сон дәрәҹә јумшаглыгла, мәһәббәтлә вә мүдрикликлә истифадә едир (Матта 20:25-28). Иса јер үзүндә оланда да өз мөвгејиндән һеч заман суи-истифадә етмирди. О, “һәлим вә гәлбдән тәвазөкар” иди вә өз давамчыларыны “гул” дејил, “достлар” адландырырды. Иса, “Мән сизә раһатлыг верәрәм” дејә сөз верди вә сөзүнүн үстүндә дурду (Матта 11:28, 29; Јәһја 15:15).
13 Исанын нүмунәси әрләри өјрәдир ки, Аллаһын онлара вердији мәсиһчи башчылығындан гәддарҹасына истифадә етмәјә онларын һаггы јохдур. Әксинә, бу, инсаны һөрмәт вә фәдакар мәһәббәт ҝөстәрмәјә тәшвиг едир. Бу, һәјат јолдашы илә рәфтарында һәм физики, һәм дә шифаһи кобудлуғу истисна едир (Ефеслиләрә 4:29, 31, 32; 5:28, 29; Колослулара 3:19). Әҝәр мәсиһчи әр өз һәјат јолдашы илә пис давранырса, етдији башга јахшы ишләрин фајдасы јохдур вә онун дуаларына манечилик јарана биләр (1 Коринфлиләрә 13:1-3; 1 Петер 3:7).
14, 15. Аллаһ һаггындакы билик әринә табе олмагда гадына неҹә көмәк едир?
14 Әр Мәсиһин нүмунәсини тәглид етдикдә, гадына да Ефеслиләрә 5:22, 23 ајәләриндә јазылмыш сөзләрә мүвафиг давранмаг асан олур: “Гадынлар! Рәббә табе олур кими, әрләринизә табе олун. Чүнки... Мәсиһ иманлылар ҹәмијјәтинин Башы олдуғу кими, әр дә арвадын башыдыр”. Әр Мәсиһә табе олдуғу кими, гадын да әринә табе олмалыдыр. Мүгәддәс Китаб һәм дә ајдын шәкилдә ҝөстәрир ки, хејирхаһ гадынлар Аллаһа мәгбул мүдрикликләри вә әмәксевәрликләри үчүн шәрәфә вә тә’рифә лајигдирләр (Сүлејманын мәсәлләри 31:10-31).
15 Мәсиһчи гадынын әринә табе олмасы нисбидир. Бу о демәкдир ки, әҝәр һансыса мәсәләдә әрә табечилик Аллаһын ганунуну позурса, онда инсандан чох Аллаһа табе олмаг ҝәрәкдир. Лакин белә бир вәзијјәтдә дә гадынын мөһкәм мөвгеји “һәлим вә сакит руһ”ла јумшалмалыдыр. Ајдын олмалыдыр ки, гадын Аллаһ һаггындакы билијин сајәсиндә бир һәјат јолдашы кими даһа да јахшылашыб (1 Петер 3:1-4). Ејни шеји, һәјат јолдашы иман етмәјән мәсиһчи әр һаггында да демәк олар. Мүгәддәс Китаб принсипләрини тәтбиг етмәси ону даһа јахшы әр етмәлидир.
16. Иса кичик јашларында икән, ушаглара һансы нүмунәни вермишдир?
16 Ефеслиләрә 6:1 ајәсиндә ушаглара хүсуси диггәт јетирилир: “Еј ушаглар, Рәбб јолунда валидејнләринизә итаәт един, чүнки бу әдаләтлидир”. Ҝәнҹ мәсиһчиләр, бөјүјәнә гәдәр валидејнләринә табе олан Исанын нүмунәсини тәглид едирләр. Бир итаәткар ушаг кими, Иса “һикмәтдә вә бој-бухунда, Аллаһ вә инсанлар гаршысында лүтфдә тәрәгги едирди” (Лука 2:51, 52).
17. Валидејнләрин өз һүгугларындан истифадә етмә үсуллары ушаглара һансы тә’сири бағышлаја биләр?
17 Валидејнләрин өз вәзифәләринә неҹә јанашмаларындан асылы олараг, ушаглар һакимијјәтә ја һөрмәт едәҹәк, ја да мүгавимәт ҝөстәрәҹәкләр (Сүлејманын мәсәлләри 22:6). Буна ҝөрә дә, валидејнләр өзләриндән соруша биләрләр: “Өз һүгугларымдан мәһәббәтлә, јохса сәртликлә истифадә едирәм? Һәддиндән артыгмы ҝүзәштә ҝедирәм?” Аллаһ горхусуна малик олан валидејнләрдән ҝөзләнилир ки, онлар севән, диггәтли, ејни заманда да сөһбәт Аллаһа мәгбул принсипләрдән ҝедәндә мөһкәм олсунлар. Павел дә елә бу һагда јазмышдыр: “Еј аталар, сиз дә ушагларынызы гәзәбләндирмәјин [һәрфи мә’нада десәк, “онлары гәзәбләнмәјә тәһрик етмәјин”], анҹаг онлары Рәббин тәрбијә вә нәсиһәти илә бөјүдүн” (Ефеслиләрә 6:4; Колослулара 3:21).
18. Валидејнләр ушагларыны неҹә тәрбијә етмәлидирләр?
18 Валидејнләр өвладларынын итаәткар олуб, онлары севиндирмәләрини истәјирләрсә, өз тәрбијә үсулларынын үзәриндә дүшүнмәлидирләр (Сүлејманын мәсәлләри 23:24, 25). Мүгәддәс Китабда тәрбијә һаггында сөз едиләркән, башлыҹа олараг, өјүд-нәсиһәт вермәк нәзәрдә тутулур (Сүлејманын мәсәлләри 4:1; 8:33). Бу, гәзәб вә кобудлугла дејил, мәһәббәт вә мүлајимликлә бағлыдыр. Буна ҝөрә дә, мәсиһчи валидејнләр өз ушагларыны тәнбеһ едәркән мүдрикликлә давранмалы вә өзләрини әлә алмағы баҹармалыдырлар (Сүлејманын мәсәлләри 1:7).
ЈЫҒЫНҸАГДАКЫ ҺАКИМИЈЈӘТ
19. Аллаһ мәсиһчи јығынҹағында јахшы низам-интизам олмасынын гејдинә неҹә галмышдыр?
19 Јеһова низам-интизам Аллаһы олдуғундан, Онун Өз халгынын е’тибарлы вә јахшы тәшкил едилмиш рәһбәрлијә малик олмасынын гејдинә галаҹағыны дүшүнмәк мәнтигә ујғундур. Бәли, Аллаһ, Исаны мәсиһчи јығынҹағынын Башы тә’јин етмишдир (1 Коринфлиләрә 14:33, 40; Ефеслиләрә 1:20-23). Аллаһ, Мәсиһин ҝөрүнмәз сурәтдә рәһбәрлик етдији бир гурулуш тә’сис етмишдир. Бу гурулушун сајәсиндә, һәр бир јығынҹагда тә’јин едилмиш ағсаггаллар сүрүнү көнүллү шәкилдә, сә’јлә вә мәһәббәтлә идарә едирләр (1 Петер 5:2, 3). Чох шејдә онлара јығынҹагда гијмәтли хидмәти јеринә јетирән хидмәти көмәкчиләр әл тутурлар (Филипилиләрә 1:1).
20. Нәјә ҝөрә биз тә’јин едилмиш мәсиһчи ағсаггалларына табе олмалыјыг вә нәјә ҝөрә бу бизим үчүн фајдалыдыр?
20 Мәсиһчи ағсаггаллары һаггында Павел јазырды: “Өз рәисләринизә итаәт един, онлара табе олун; чүнки һесабат верәҹәк оланлар кими, онлар һәр заман сизин ҹанларынызын гејдинә галырлар. Онлара табе олун ки, онлар буну ҹан чәкә-чәкә дејил, севинҹлә етсинләр. Чүнки әҝәр буну ҹан чәкә-чәкә етсәләр, сизә фајда олмаз” (Ибраниләрә 13:17). Аллаһ өзүнәмәхсус мүдрикликлә мәсиһчи нәзарәтчиләринә јығынҹағын руһани тәләбатларынын гејдинә галмағы һәвалә едиб. Бу ағсаггаллар руһаниләр синфини тәшкил етмирләр. Мүәллимимиз Иса Мәсиһин етдији кими, онлар да һәмиманлыларынын еһтијаҹларынын гајғысына галан хидмәтчиләр вә Аллаһын гулларыдырлар (Јәһја 10:14, 15). Биләндә ки, Мүгәддәс Китаб нөгтеји-нәзәриндән јарарлы олан бу кишиләри бизим наилијјәт вә руһани инкишафымыз марагландырыр, онларла әмәкдашлыг етмәјә вә онлара табе олмаға тәшвиг олунуруг (1 Коринфлиләрә 16:16).
21. Тә’јин едилмиш ағсаггаллар мәсиһчиләрә һансы руһани көмәји ҝөстәрмәјә ҹан атырлар?
21 Бә’зән гојунлар сүрүдән ајры дүшә биләр, јахуд да зәрәрли дүнјәви тә’сирләр онлар үчүн тәһлүкә јарада биләр. Баш Чобанын рәһбәрлији алтында ағсаггаллар онлара е’тибар олунан кәсләрин еһтијаҹларына диггәт јетирир вә бу гојунлара шәхси мараг ҝөстәрмәјә чалышырлар (1 Петер 5:4). Онлар јығынҹағын үзвләринә баш чәкир вә онлары руһландырырлар. Иблисин Аллаһын халгы арасында һөкм сүрән сүлһү позмаға ҹан атдығыны биләрәк, ағсаггаллар јухарыдан назил олан мүдрикликлә һәр ҹүр проблеми һәлл едирләр (Јагуб 3:17, 18). Онлар бүтүн гүввәләри илә бирлији вә иманда ејни рә’ји горујуб сахламаға чалышырлар, Иса да мәһз бу һагда дуа етмишдир (Јәһја 17:20-22; 1 Коринфлиләрә 1:10).
22. Ким исә ҝүнаһ ишләтдикдә, ағсаггаллар һансы көмәји тәгдим едирләр?
22 Бәс әҝәр мәсиһчи һансыса сәбәб үзүндән әзаб чәкир вә ја етдији ҝүнаһа ҝөрә руһдан дүшүбсә, онда неҹә? Мүгәддәс Китабын тәсәлли верән мәсләһәти вә ағсаггалларын үрәкдән етдикләри дуалар һәмин инсана руһани сағламлығыны бәрпа етмәјә көмәк едә биләр (Јагуб 5:13-15). Мүгәддәс руһла тә’јин едилән бу кишиләрин, ҝүнаһлы јолла ҝедән вә ја јығынҹағын руһани вә әхлаги тәмизлији үчүн тәһлүкә јарадан кәсләрә гаршы ислаһедиҹи тәдбирләр ҝөрмәјә вә ја кимисә мәзәммәт етмәјә дә сәлаһијјәтләри вар (Һәвариләрин ишләри 20:28; Титуса 1:9; 2:15). Јығынҹағын тәмизлијини горумаг үчүн, јәгин ки, ҹидди ҝүнаһ һаггында хәбәр вермәк лазым ҝәләҹәкдир (Левилиләр 5:1). Әҝәр ҹидди ҝүнаһ ишләтмиш мәсиһчи Мүгәддәс Китаба әсасланан ислаһедиҹи тәдбирләри вә мәзәммәти гәбул едиб, һәгигәтән дә төвбә едирсә, она көмәк ҝөстәриләҹәкдир. Инадкар олан вә Аллаһын ганунуна зидд ҝедиб төвбә етмәјән кәсләр исә һөкмән үнсијјәтдән мәһрум едиләҹәкләр (1 Коринфлиләрә 5:9-13).
23. Јығынҹағын рифаһы наминә мәсиһчи ағсаггаллары нә едирләр?
23 Мүгәддәс Китабда габагҹадан дејилмишдир ки, Падшаһ Иса Мәсиһин рәһбәрлији алтында Аллаһын халгына тәсәлли вермәк, ону мүдафиә етмәк вә мөһкәмләндирмәк үчүн руһән јеткин кишиләр тә’јин едиләҹәкдир (Ишаја 32:1, 2). Онлар тәблиғчиләр, чобанлар вә мүәллимләр кими рәһбәрлији өз үзәрләринә ҝөтүрмәли, һәмчинин руһани инкишафа көмәк етмәлидирләр (Ефеслиләрә 4:11, 12, 16). Бә’зән мәсиһчи нәзарәтчиләри һәмиманлыларыны мәзәммәт едә, онлара хәбәрдарлыг вә мәсләһәт верә биләрләр, бунунла белә ағсаггалларын Аллаһын Кәламына әсасланан сағлам тә’лими тәтбиг етмәләри һамыја һәјата апаран јолда галмаға көмәк едир (Сүлејманын мәсәлләри 3:11, 12; 6:23; Титуса 2:1).
ЈЕҺОВАНЫН ҺАКИМИЈЈӘТӘ ОЛАН НӨГТЕЈИ-НӘЗӘРИНИ ГӘБУЛ ЕДИН
24. Биз ҝүндәлик олараг һансы сынагла гаршылашырыг?
24 Илк киши вә гадын һакимијјәтә табе олмаг мәсәләсиндә сынаға мә’руз галдылар. Тәәҹҹүблү дејил ки, ејни сынагла биз дә һәр ҝүн гаршылашырыг. Шејтан Иблис инсанлар арасында үсјанкарлыг руһу јајыр (Ефеслиләрә 2:2). Азадлыг јолу, табечилик јолундан даһа ширникдириҹидир.
25. Бу дүнјанын үсјанкар руһуну рәдд етмәк вә Аллаһын истифадә етдији, јахуд мөвҹуд олмаларына јол вердији һакимијјәтләрә табе олмаг нәјә ҝөрә фајдалыдыр?
25 Лакин биз бу дүнјанын үсјанкар руһуну рәдд етмәлијик. Белә давранмагла биз ҝөрәҹәјик ки, Аллаһа мәгбул табечилик бөјүк мүкафат ҝәтирир. Мәсәлән, биз һакимијјәтә мүгавимәт ҝөстәрән инсанларын кечирдикләри нараһатчылыг вә үрәк ағрысындан узаг олаҹаг, бир чох аиләләр үчүн ади һал олан чәкишмәләри азалдаҹаг вә мәсиһчиләр арасында мәһәббәт долу, үрәкдән ҝәлән үнсијјәтдән ләззәт алаҹағыг. Ән башлыҹасы исә Аллаһа мәгбул табечилијимиз ән али һакимијјәт Саһиби олан Јеһова илә јахшы мүнасибәтләрә ҝәтириб чыхараҹаг.
БИЛИЈИНИЗИ ЈОХЛАЈЫН
• Јеһова Өз һакимијјәтиндән неҹә истифадә едир?
• “Али һакимијјәтләр” кимләрдир вә биз онлара неҹә табе олуруг?
• Башчылыг принсипи аиләнин һәр бир үзвүнү нәјә тәшвиг едир?
• Мәсиһчи јығынҹағында өз табечилијимизи неҹә ҝөстәрә биләрик?
[134-ҹү сәһифәдәки чәрчивә]
ТӘХРИБАТЧЫ ДЕЈИЛ, ИТАәТКАРДЫРЛАР
Ачыг тәблиғ фәалијјәти кечирмәклә Јеһованын Шаһидләри Аллаһын Падшаһлығынын әсл сүлһ вә тәһлүкәсизлик арзу едән инсанларын јеҝанә үмид јери олдуғуну ҝөстәрирләр. Лакин Аллаһын Падшаһлығынын бу сә’јли тәблиғчиләри һеч заман рәһбәрлији алтында јашадыглары һакимијјәти нүфуздан салмырлар. Әксинә, Шаһидләр — ән һөрмәтҹил вә гануна табе олан вәтәндашдырлар. Африка өлкәләриндән бириндә дөвләт мә’муру белә демишдир: “Әҝәр бүтүн дини груплар Јеһованын Шаһидләри кими олсајдылар, биздә гатиллик, ев јарма, азјашлы ҹинајәткарлар, дустаглар, һәмчинин атом бомбалары олмазды. Инсанлара даима гапыларыны бағламаг лазым ҝәлмәзди”.
Буну гијмәтләндирәрәк, һакимијјәт органлары бир чох өлкәләрдә Шаһидләрә манеәсиз олараг өз тәблиғ хидмәтләрини һәјата кечирмәјә иҹазә верирләр. Диҝәр өлкәләрдә исә һакимијјәт даирәләри Јеһованын Шаһидләринин инсанлара анҹаг јахшы олмаға көмәк етдикләрини баша дүшдүкдә гадаға вә мәһдудијјәтләр арадан галдырылмышдыр. Һәвари Павелин һакимијјәтә итаәткарлыг һагда јаздығы кими: “Јахшы иш ҝөр вә о, сәни тә’рифләјәр” (Ромалылара 13:1, 3).