ФӘСИЛ 17
Аллаһын халгы арасында сығынаҹаг тапын
1, 2. Нәјә ҝөрә бәшәријјәтин вәзијјәти гасырғаја мә’руз галан инсанларын вәзијјәтинә бәнзәјир?
ТӘСӘВВҮР един ки, јашадығыныз әразидә ҝүҹлү гасырға баш вериб. Евиниздән вә мүлкүнүздән мәһрум олмусунуз. Гида гытлығындан әзијјәт чәкирсиниз. Вәзијјәт чыхылмаз кими ҝөрүнүр. Бирдән һараданса јардым ҝәлир. Бол-бол әрзаг вә палтар пајланыр. Сизин үчүн јени ев тикирләр. Шүбһәсиз ки, сиз бу ҹүр көмәк ҝөстәрәнләрә сонсуз дәрәҹәдә миннәтдар олаҹагсыныз.
2 Бу ҝүн дә вәзијјәт буна бәнзәрдир. Адәмлә Һәвванын үсјаны һәмин гасырға кими бүтүн бәшәријјәтә дәрин зәрәр вурду. Бәшәријјәтин ҹәннәт еви итирилди. О замандан бәри инсан һакимијјәтләри инсанлары мүһарибә, ҹинајәт вә әдаләтсизликдән горумаг игтидарында дејил. Јалан дин милјонларла инсанлары сағлам руһани гидадан мәһрум едәрәк онлары аҹ галмаға вадар едир. Лакин Јеһова бизи гида, ҝејим вә сығынаҹагла тә’мин едир. О, буну неҹә едир?
«САДИГ ВӘ АҒЫЛЛЫ ГУЛ»
3. Јеһова инсанлара руһани гиданы неҹә тәгдим едир вә буну һансы нүмунәләрдән ҝөрмәк олар?
3 Тәбии фәлакәтдән зәрәр чәкәнләр үчүн көмәк адәтән һансыса тәшкилат васитәсилә мүтәшәккил шәкилдә чатдырылыр, Јеһова да Өз халгына руһани гиданы мүтәшәккил сурәтдә верир. Мәсәлән, исраиллиләр, демәк олар ки, мин беш јүз ил әрзиндә «Рәббин јығынҹағы» олмушлар. Јеһова онларын арасындан халга Гануну өјрәдән инсанлар сечди (1 Тарихләр 28:8; 2 Тарихләр 17:7-9). Јеһова б. е. Ы әсриндә мәсиһчи тәшкилатыны тә’сис етди. Һәвариләрдән вә ағсаггаллардан ибарәт олан рәһбәрлик шурасынын рәһбәрлији алтында јығынҹаглар тәшкил олунду (Һәвариләрин ишләри 15:22-31). Јеһова бизим ҝүнләрдә дә Өз халгына мүтәшәккил гурулуш васитәсилә рәһбәрлик едир. Биз буну һарадан билирик?
4. Бизим ҝүнләрдә «садиг вә ағыллы гул» кимдир вә биз Аллаһдан руһани гиданы неҹә алырыг?
4 Иса демишдир ки, о, Падшаһлыг һакимијјәтиндә иштирак едән заман, ‘вахтлы-вахтында јемәк’ верәҹәк «садиг вә ағыллы гул» мөвҹуд олаҹагдыр (Матта 24:45-47). Иса 1914-ҹү илдә сәмави тахтда Падшаһ кими отуранда бу «гул» ким иди? Сөзсүз ки, бу, Христиан дүнјасынын руһаниләр синфи дејилди. Онлар әсасән килсә үзвләрини Биринҹи Дүнја мүһарибәси заманы бу вә ја диҝәр өлкәләрин һакимијјәтләрини дәстәкләмәјә јөнәлдилән тәблиғата сәсләјирдиләр. Фајдалы вә вахтлы-вахтында олан руһани гиданы исә Аллаһын мүгәддәс руһу илә мәсһ едилмиш вә Исанын «кичик сүрү» адландырдығы кәсләрә мәнсуб олан мәсиһчиләр групу пајлајырды (Лука 12:32). Бу мәсһ едилмиш мәсиһчиләр инсан һакимијјәтини дејил, Аллаһын Падшаһлығыны тәблиғ едирдиләр. Бунун нәтиҹәсиндә, илләр өтдүкдән сонра дүзҝүн әһвал-руһијјәјә малик олан милјонларла «башга гојунлар» һәгиги ибадәтдә мәсһ едилмиш «гула» гошулдулар (Јәһја 10:16). «Садиг гул»дан вә «гулун» Рәһбәрлик шурасындан истифадә едәрәк, Аллаһ Өз мүтәшәккил халгына, арзу едәнләрин һамысына руһани гиданы, ҝејими вә сығынаҹағы неҹә тәгдим етмәји ҝөстәрир.
‘ВАХТЛЫ-ВАХТЫНДА ВЕРИЛӘН ГИДА’
5. Бу ҝүн дүнјанын руһани вәзијјәти неҹәдир вә Јеһова нә тәдбир ҝөрүр?
5 Иса демишдир: «Инсан јалныз чөрәклә јашамаз, лакин Аллаһын ағзындан чыхан һәр бир сөзлә јашар» (Матта 4:4). Тәәссүфләр олсун ки, әксәр инсанлар Аллаһын дедијинә е’тинасыз јанашырлар. Јеһованын пејғәмбәри Амосун габагҹадан дедији кими, «чөрәк аҹлығы дејил вә суја сусама дејил, анҹаг Рәббин сөзләрини ешитмәјә сусама» вахты ҝәлиб чатыб (Амос 8:11). Руһани аҹлыг, һәтта ән диндар инсанларын арасында белә һөкм сүрүр. Лакин Јеһова истәјир ки, «бүтүн инсанлар хилас олуб, һәгигәти дәрк етсинләр» (1 Тимотејә 2:3, 4). Буна ҝөрә дә О, бизә руһани гиданы бол-бол верир. Бәс бу гиданы биз һарадан әлдә едә биләрик?
6. Јеһова кечмишдә Өз халгыны руһани гида илә неҹә тә’мин едирди?
6 Тарих боју Јеһова ајры-ајры инсанлары дејил, бүтүн халгыны руһани гида илә тә’мин етмишдир (Ишаја 65:13). Исраил каһинләри Аллаһын ганунуну халга өјрәтмәк үчүн бөјүкдән тутмуш кичијә гәдәр һамыны — кишиләри, гадынлары вә ушаглары бир јерә топлајырдылар (Тәснијә 31:9, 12). Биринҹи әсрин мәсиһчиләри һәр кәсин тә’лим алмасы вә руһланмасы үчүн, һәмин дөврүн рәһбәрлик шурасы башда олмагла, јығынҹаглар јарадыр вә бирҝә ҝөрүшләр кечирирдиләр (Ромалылара 16:5; Филимона 1, 2). Јеһованын Шаһидләри онларын нүмунәсини тәглид едирләр. Онлар сизи дә јығынҹаглара ҝәлмәјә үрәкдән дә’вәт едирләр.
7. Мәсиһчи ҝөрүшләриндә мүнтәзәм олараг иштирак етмәк билик вә иманла неҹә бағлыдыр?
7 Сөзсүз ки, Мүгәддәс Китабы шәхсән өјрәнмәјин сајәсиндә артыг чох шеј билирсиниз. Еһтимал ки, бу ишдә сизә ким исә көмәк ҝөстәрмишдир (Һәвариләрин ишләри 8:30-35). Лакин сизин иманынызы — лазыми гуллуг олмадыгда солан вә нәтиҹәдә мәһв ола билән битки илә мүгајисә етмәк олар. Бу сәбәбдән, сизә сағлам руһани гида илә бәсләнмәк лазымдыр (1 Тимотејә 4:6). Мәсиһчи ҝөрүшләриндә фасиләсиз тә’лим програмы тәгдим едилир ки, бу програм сизә руһән гидаланмаға вә Аллаһ һаггында билијинизи артырмагла, иманынызы инкишаф етдирмәјә көмәк етсин (Колослулара 1:9, 10).
8. Биз нәјә ҝөрә Јеһованын Шаһидләринин јығынҹаг ҝөрүшләриндә иштирак етмәјә тәшвиг олунуруг?
8 Јығынҹаг ҝөрүшләри даһа бир ваҹиб мәгсәдә хидмәт едир. Павел јазмышдыр: «Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг... өз јығынҹагларымызы тәрк етмәјәк» (Ибраниләрә 10:24, 25). «Тәшвиг етмәк» кими тәрҹүмә едилән јунан сөзү «итиләмәк» мә’насыны да верә биләр. Мүгәддәс Китабын бир мәсәли белә сәсләнир: «Дәмир дәмири итиләр, инсан инсанын ағлыны ити едәр» (Сүлејманын мәсәлләри 27:17, МКШ). Һәр биримизә даима «итиләнмәк» лазымдыр. Дүнјанын зәифләмәдән ҝөстәрдији тәзјиг иманымызы «күтләшдирә» биләр. Мәсиһчи ҝөрүшләриндә исә биз руһ јүксәклији әлдә едирик (Ромалылара 1:11, 12). Јығынҹағын үзвләри һәвари Павелин «бир-биринизә тәскинлик верин вә бир-биринизи инкишаф етдирин» чағырышына риајәт едирләр, чүнки бу, иманымызы «итиләјир» (1 Салониклиләрә 5:11). Мәсиһчи ҝөрүшләриндә мүнтәзәм олараг иштирак етмәјимиз, һәмчинин Аллаһы севдијимизи ҝөстәрир вә гаршымызда Ону иззәтләндирмәјә имканлар ачыр (Мәзмур 35:18).
‘МӘҺӘББӘТИ ҜЕЈИНИН’
9. Јеһова мәһәббәтә даир һансы нүмунәни вермишдир?
9 Павел јазырды: «Камил бирлијин бағы олан мәһәббәти ҝејин» (Колослулара 3:14). Јеһова белә бир ҝејими бизә мәрһәмәтлә верир. О, буну неҹә едир? Мәсиһчиләр мәһәббәт тәзаһүр етдирирләр, чүнки мәһәббәт — Јеһованын мүгәддәс руһунун бәхш етдији сәмәрәләрдән биридир (Галатијалылара 5:22, 23). Бизим әбәди һәјата малик ола билмәјимиз үчүн јеҝанә Оғлуну ҝөндәрмәклә Јеһова Өзү бөјүк мәһәббәт ҝөстәрмишдир (Јәһја 3:16). Аллаһ бу ҹүр мәһәббәт тәзаһүр етдирмәклә, тәглид үчүн ән ҝөзәл нүмунә вермишдир. «Әҝәр Аллаһ бизи белә севдисә, биз дә бир-биримизи севмәлијик» дејә, һәвари Јәһја јазмышдыр (1 Јәһја 4:11).
10. ‘Гардашлыгла’ үнсијјәт етмәјин фајдасы нәдәдир?
10 Падшаһлыг Залында кечирилән ҝөрүшләрә ҝәлдијиниз заман мәһәббәт ҝөстәрмәк үчүн сизин ҝөзәл имканыныз јараныр. Сиз тамамилә фәргли инсанларла ҝөрүшәҹәксиниз. Сөзсүз ки, онлардан чохуна дәрһал јахынлыг һисс едәҹәксиниз. Әлбәттә ки, һәтта Јеһованын хидмәтчиләри арасында да мүхтәлиф инсанлара раст ҝәлмәк олур. Ола билсин ки, сиз әввәлләр мараглары вә характери илә сиздән фәргләнән кәсләрдән гачынмысыныз. Лакин мәсиһчиләр ‘гардашлығы севмәлидирләр’ (1 Петер 2:17). Буна ҝөрә дә, Падшаһлыг Залына ҝәләнләрин һамысы илә, һәтта сиздән јашҹа бөјүк оланларла вә хасијјәтҹә, дәрисинин рәнҝи вә тәһсили илә сиздән фәргләнән кәсләрин һәр бири илә таныш олмағы гаршыныза мәгсәд гојун. Сиз, јәгин ки, онларын һәр бириндә һансыса ҝөзәл хүсусијјәти тапаҹагсыныз.
11. Јеһованын халгынын олдугҹа мүхтәлиф инсанлардан ибарәт олмасы нәјә ҝөрә сизин үчүн манеә олмалы дејил?
11 Јығынҹаг олдугҹа мүхтәлиф инсанлардан ибарәтдир, лакин бу сизин үчүн манеә олмамалыдыр. Мисал үчүн тәсәввүр един ки, сиз өз автомобилиниздә машын ахыны илә ҝедирсиниз. Машынларын һамысы ејни сүр’әтлә һәрәкәт етмир вә онларын һамысы ејни вәзијјәтдә дејилдир. Онлардан бә’зиләри артыг хејли јол гәт етмиш, диҝәрләри исә сизин машыныныз кими һәлә тәзәҹә јериндән тәрпәнмәјә башлајыр. Араларында бу гәдәр фәргин олмасына бахмајараг, онларын һамысы бир јолда һәрәкәт едир. Бу, јығынҹагдакы инсанлары чох хатырладыр. Биз һамымыз мәсиһчи кејфијјәтләрини ејни сүр’әтлә инкишаф етдирмирик. Бундан әлавә, һәр биримизин физики вә емосионал вәзијјәти фәрглидир. Бә’зиләри Јеһоваја артыг чох илләрдир ки, ибадәт едирләр, башгалары исә онлара һәлә јениҹә гошулублар. Буна бахмајараг, биз һамымыз әбәди һәјата апаран бир јолдајыг вә «бир фикирдә вә ејни рә’јдә» бирләшмишик (1 Коринфлиләрә 1:10). Буна ҝөрә дә, јығынҹағы тәшкил едәнләрин зәиф ҹәһәтләрини дејил, јахшы ҹәһәтләрини нәзәрә алмаға чалышын. Сиз бундан бөјүк севинҹ әлдә едәҹәксиниз, чүнки Аллаһын һәгигәтән дә бу инсанларла олдуғуну ҝөрәҹәксиниз. Мәҝәр сиз онларын арасында олмаг истәмирсинизми? (1 Коринфлиләрә 14:25).
12, 13. а) Әҝәр јығынҹагда кимсә сизин хәтринизә дәјибсә, нә етмәк лазымдыр? б) Кин сахламамаг нәјә ҝөрә ваҹибдир?
12 Бүтүн инсанлар гејри-камилдир вә бә’зән јығынҹагда ким исә сөзү вә ја һәрәкәтилә хәтринизә дәјә биләр (Ромалылара 3:23). Шаҝирд Јагуб буну анладығы үчүн јазмышдыр: «Һамымыз чох сәһв едирик. Сөзүндә сәһв етмәјән, камил инсандыр» (Јагуб 3:2). Әҝәр ким исә хәтринизә дәјсә, сиз буна неҹә реаксија ҝөстәрәҹәксиниз? Мүгәддәс Китаб мәсәли белә сәсләнир: «Инсанын бәсирәти гәзәбини ҝеҹикдирир; вә сәһви бағышламаг онун ҝөзәллијидир» (Сүлејманын мәсәлләри 19:11). Бәсирәт — мүәјјән сөз вә ја һәрәкәтләрин архасында инсанын әсл нијјәтини ҝөрүб, баша дүшмәк габилијјәтидир. Әксәријјәтимиз шәхси сәһвләримизә ҝәлдикдә өзүмүзә аз ҝүзәштә ҝетмирик. Бәс нәјә ҝөрә башгаларыны баша дүшмәк вә онларын сәһвләрини бағышламаг үчүн дә бу ҹүр бәсирәт тәзаһүр етдирмәјәк? (Матта 7:1-5; Колослулара 3:13).
13 Һеч заман унутмаг олмаз ки, әҝәр Јеһованын бизи бағышламасыны истәјириксә, ҝәрәк биз дә башгаларыны бағышлајаг (Матта 6:9, 12, 14, 15). Һәгигәтә мүвафиг јашајараг, биз башгаларына гаршы мәһәббәт тәзаһүр етдирмәлијик (1 Јәһја 1:6, 7; 3:14-16; 4:20, 21). Бу сәбәбдән, әҝәр јығынҹагда киминләсә аранызда проблем јаранырса, һеч вахт кин сахламајын. Мәһәббәти ҝејинмиш инсан проблеми һәлл етмәјә чалышаҹаг вә әҝәр киминсә хәтринә дәјибсә, үзр истәмәји ләнҝитмәјәҹәк (Матта 5:23, 24; 18:15-17).
14. Биз һансы хүсусијјәтләри ҝејинмәлијик?
14 Бизим руһани ҝејимимиз мәһәббәтлә бағлы диҝәр хүсусијјәтләри дә өзүнә дахил етмәлидир. Павел јазырды: «Шәфгәт, хејирхаһлыг, тәвазөкарлыг, һәлимлик вә сәбирлилик ҝејин». Мәһәббәтлә ејни сәвијјәдә олан бу хүсусијјәтләр, Аллаһа мәгбул олан «јени» инсана хасдыр (Колослулара 3:10, 12). «Јени» мәнлији ҝејинмәк үчүн сә’ј ҝөстәрәҹәксинизми? Әҝәр сизин руһани ҝејиминиз гардашлара мәһәббәтдән ибарәт оларса, Мәсиһин өз давамчылары һаггында дедији фәргләндириҹи әламәтә саһиб олаҹагсыныз: «Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк» (Јәһја 13:35).
СЫҒЫНАҸАГ
15. Нәјә ҝөрә јығынҹағы сығынаҹагла мүгајисә етмәк олар?
15 Јығынҹаг һәмчинин инсанын өзүнү тәһлүкәсиз һисс едә биләҹәји бир сығынаҹагдыр. Сиз јығынҹагда һәмишә Аллаһын ирадәсинә мүвафиг давранмаға чалышан сәмими инсанлары тапаҹагсыныз. Онларын чоху, бәлкә дә һәлә сизин гаршыда мүбаризә апармалы олдуғунуз пис давраныш вә адәтләрдән јаха гуртарыблар (Титуса 3:3). Бу инсанлар сизә көмәк ҝөстәрә биләрләр, чүнки бизә «бир-биринизин јүкләрини дашыјын» дејилмишдир (Галатијалылара 6:2). Тәбии ки, сизин әвәзинизә һеч ким әбәди һәјата апаран јол илә ҝетмәјәҹәкдир (Галатијалылара 6:5; Филипилиләрә 2:12). Лакин Јеһова, һәмишә бизим көмәк вә дајаг әлдә едә биләҹәјимиз ҝөзәл бир гурулушу — мәсиһчи јығынҹағыны нәзәрдә тутуб. Нә дәрәҹә мүрәккәб проблемләрлә гаршылашсаныз да, сиз, мәһәббәт һөкм сүрән вә бәдбәхт һадисәләр вә сыхынтылар заманы сизи дәстәкләјәҹәк гијмәтли тәсәлли мәнбәји олан јығынҹаға маликсиниз. (Лука 10:29-37; Һәвариләрин ишләри 20:35 ајәси илә мүгајисә един.)
16. Јығынҹағын ағсаггаллары бизә һансы көмәји тәгдим едирләр?
16 Сизә көмәјә ҝәләнләрин арасында — «инсанлар тимсалында һәдијјәләр» (ЈД), јә’ни «сүрүнү» көнүллү шәкилдә вә сә’јлә отаран тә’јин едилмиш ағсаггаллар вә нәзарәтчиләр вар (Ефеслиләрә 4:8, 11, 12; Һәвариләрин ишләри 20:28; 1 Петер 5:2, 3). Онлар һаггында пејғәмбәр Ишаја јазмышдыр: «Инсан јелдән сахланаҹаг бир јер кими вә туфана гаршы өртүлү бир јер кими, гураг јердә ахар сулар кими, јоруҹу дијарда бөјүк гаја көлҝәси кими олаҹаг» (Ишаја 32:2).
17. а) Иса илк нөвбәдә һансы көмәји ҝөстәрмәк истәјирди? б) Аллаһ Өз халгына нәји вермәји вә’д етмишдир?
17 Тәәссүфләр олсун ки, Иса јер үзүндә оланда дини рәһбәрләр бу ҹүр мәһәббәтли нәзарәти тә’мин етмирдиләр. Халгын вәзијјәти Исаны дәриндән нараһат едирди вә о, инсанлара илк нөвбәдә руһани ҹәһәтдән көмәк етмәји чох истәјирди. Исанын инсанлара јазығы ҝәлирди, чүнки онлар «чобансыз гојунлар кими тагәтсиз вә дағыныг идиләр» (Матта 9:36). Бу сөзләр, бизим ҝүнләрдә дә мүхтәлиф проблемләр үзүндән әзаб чәкән вә руһани көмәк вә дајаг үчүн мүраҹиәт етмәјә һеч бир јерләри олмајан чох инсанларын аҹынаҹаглы вәзијјәтини неҹә дә дәгиг тәсвир едир! Лакин Јеһованын халгынын бу ҹүр руһани дајағы вар, чүнки Аллаһ вә’д етмишдир: «Үзәрләринә онлары ҝүдәҹәк чобанлар гојаҹағам; вә артыг горхмајаҹаглар вә әсмәҹәјә дүшмәјәҹәкләр вә әскилмәјәҹәкләр» (Јеремја 23:4).
18. Әҝәр руһани ҹәһәтдән көмәк лазымдырса, нәјә ҝөрә ағсаггаллара мүраҹиәт етмәлијик?
18 Јығынҹағынызын ағсаггаллары илә таныш олун. Онларын Аллаһ һаггындакы билији һәјатда неҹә тәтбиг етмәјә даир тәҹрүбәләри чохдур, чүнки онлар нәзарәтчиләр үчүн олан Мүгәддәс Китаб тәләбләринә мүвафигдирләр (1 Тимотејә 3:1-7; Титуса 1:5-9). Әҝәр Аллаһын тәләбләринә зидд ҝедән адәт вә хүсусијјәтләрдән јаха гуртармаг үчүн сизә руһани көмәк лазымдырса, ағсаггаллара мүраҹиәт етмәјә утанмајын. Сиз ҝөрәҹәксиниз ки, ағсаггаллар Павелин мәсләһәтинә риајәт едирләр: «Ҹәсарәтсизләри руһландырын, зәифләрә јардым един, һамыја гаршы сәбирли олун» (1 Салониклиләрә 2:7, 8; 5:14).
ЈЕҺОВАНЫН ХАЛГЫ АРАСЫНДАКЫ ТӘҺЛҮКӘСИЗЛИКДӘН ҺӘЗЗ АЛЫН
19. Јеһова Онун тәшкилатында сығынаҹаг ахтаран инсанлара һансы хејир-дуалары верир?
19 Гејри-мүкәммәл шәраитләрдә јашамағымыза бахмајараг, Јеһова бизә руһани гида, палтар вә сығынаҹаг бәхш едир. Әлбәттә ки, Ҹәннәтин хејир-дуаларыны дадмаг үчүн, Аллаһын вә’д етдији јени дүнјаны ҝөзләмәлијик. Лакин Јеһованын тәшкилатына мәхсус олан инсанлар руһани ҹәннәтин тәһлүкәсизлијиндән артыг индидән һәзз алырлар. Бу ҹүр инсанлар барәсиндә Һезекиел пејғәмбәрлик етмишдир: «Тәһлүкәсиз јашајаҹаглар вә онлары горхудан олмајаҹаг» (Һезекиел 34:28; Мәзмур 4:8).
20. Јеһова Она ибадәт наминә гурбан вердикләринизин әвәзини неҹә өдәјәҹәкдир?
20 Кәламы вә тәшкилаты васитәсилә мәһәббәтлә бу гәдәр руһани бәхшишләр тәгдим етдији үчүн, биз Јеһоваја неҹә дә миннәтдар ола биләрик! Аллаһын халгына гошулун. Достларынызын вә гоһумларынызын нә дүшүнәҹәкләриндән горхараг, Јеһованы даһа јахшы танымаг сә’јиниздә онларын сизә мане олмаларына јол вермәјин. Сизи Јеһованын Шаһидләри илә үнсијјәт етмәјинизә вә Падшаһлыг Залындакы јығынҹаг ҝөрүшләринә ҝетмәјинизә ҝөрә мүһакимә едә биләрләр. Лакин Аллаһ Она ибадәт јолунда гурбан вердијиниз һәр шејин әвәзини артыгламасы илә өдәјәҹәкдир (Малаки 3:10). Бундан әлавә, Иса демишдир: «Елә бир адам јохдур ки, Мәним адым вә Мүждә наминә евини, гардашларыны, баҹыларыны, анасыны, атасыны, арвадыны, ушагларыны вә јахуд торпагларыны атмыш олсун, вә инди, бу заманда, әзијјәтләрлә бәрабәр, јүз гат артыг евләр, гардашлар, баҹылар, аталар вә аналар, ушаглар вә торпаглар, ҝәләҹәк дөврдә дә әбәди һәјат алмасын» (Марк 10:29, 30). Бәли, нәји итирсәниз дә, нәјә таб ҝәтирмиш олсаныз да, сиз Аллаһын халгы арасында ҝөзәл гардашлыға вә руһани сығынаҹаға малик олаҹагсыныз.
БИЛИЈИНИЗИ ЈОХЛАЈЫН
• «Садиг вә ағыллы гул» кимдир?
• Јеһова һансы гурулушун васитәсилә бизи руһән гидаландырыр?
• Мәсиһчи јығынҹағына мәнсуб оланлар бизә неҹә көмәк ҝөстәрирләр?