ФӘСИЛ 18

Гаршыныза Аллаһа әбәдијјән хидмәт етмәк мәгсәдини гојун

1, 2. Аллаһ һаггында билик әлдә етмәкдән савајы нә тәләб олунур?

БӨЈҮК хәзинә сахланылан бағлы бир гапы архасында дурдуғунузу тәсәввүр един. Фәрз едәк ки, сәлаһијјәтли бир шәхс сизә оранын ачарыны вериб вә дејиб ки, истәдијинизи ҝөтүрә биләрсиниз. Бу ачардан истифадә етмәјинҹә онун сизә һеч бир фајдасы олмајаҹагдыр. Ејни шеји әлдә едилән билик һаггында да демәк олар, ону истифадә етмәлисиниз ки, дәјәрини дә дәрк едәсиниз.

² Бу, хүсусилә дә Аллаһ һаггындакы билијә аиддир. Ахы Јеһова Аллаһ вә Иса Мәсиһ һаггындакы билик әбәди һәјата апарыр (Јәһја 17:3). Лакин бу үмидин һәјата кечмәси үчүн, садәҹә олараг билијә јијәләнмәк кифајәт дејил. Гијмәтли бир ачары истифадә етмәк лазым ҝәлдији кими, Аллаһ һаггындакы билији дә һәјатынызда тәтбиг етмәлисиниз. Иса демишдир ки, Аллаһын ирадәсини јеринә јетирән ‘Падшаһлыға ҝирәҹәкдир’. Белә бир инсан Аллаһа әбәдијјән хидмәт етмәк үстүнлүјүнә малик олаҹагдыр! (Матта 7:21, И–93; 1 Јәһја 2:17).

3. Аллаһын бизә даир ирадәси нәдән ибарәтдир?

³ Аллаһын ирадәсинин нәдән ибарәт олдуғуну өјрәндикдән сонра, ону јеринә јетирмәк чох ваҹибдир. Неҹә дүшүнүрсүнүз, Аллаһын сизин үчүн ирадәси нәдир? Буну нөвбәти сөзләрлә ифадә етмәк олар: Исаны тәглид етмәк. 1 Петер 2:21 ајәсиндә охујуруг: “Сиз бунун үчүн чағырылдыныз. Чүнки Мәсиһ дә бизә бир нүмунә гојараг, бизим үчүн изтираб чәкди ки, биз Онун изләри илә ҝедәк”. Беләликлә, Аллаһын ирадәсини јеринә јетирмәк үчүн сизә, Исанын нүмунәсини мүмкүн гәдәр даһа јахшы тәглид етмәк лазымдыр. Бунунла да, сиз Аллаһ һаггындакы билији һәјата кечирмиш олаҹагсыныз.

ИСА АЛЛАҺ ҺАГГЫНДАКЫ БИЛИКДӘН НЕҸӘ ИСТИФАДӘ ЕДИРДИ?

4. Нәјә ҝөрә Иса Јеһова һаггында бу гәдәр чох билирди вә өз билијиндән неҹә истифадә едирди?

⁴ Иса Мәсиһин Аллаһ һаггындакы дәрин билији башгаларындан чох иди. О, јер үзүнә ҝәлмәздән өнҹә узун мүддәт ҝөјдә Јеһова Аллаһла бәрабәр јашамыш вә чалышмышдыр (Колослулара 1:15, 16). Бәс Иса бу биликдән неҹә истифадә едирди? О, садәҹә бу билијә саһиб олмагла кифајәтләнмирди. Иса бу билији һәјата кечирирди. Буна ҝөрә дә Иса инсанларла мәрһәмәтлә, сәбирлә вә мәһәббәтлә давранырды. Бу саһәдә Иса өзүнүн сәмави Атасыны тәглид едир вә Јеһованын шәхсијјәти вә јоллары һаггындакы билији рәһбәр тутурду (Јәһја 8:23, 28, 29, 38; 1 Јәһја 4:8).

5. Иса нәјә ҝөрә вәфтиз олунду вә вәфтизинин мә’насына мүвафиг олараг неҹә һәјат сүрүрдү?

⁵ Билик һәм дә Исаны гәтијјәтли аддым атмаға тәшвиг етди. Мәсәлән, о, Галилејадан Иордан чајына, Јәһја тәрәфиндән вәфтиз олундуғу јерә ҝәлиб чыхды (Матта 3:13-15). Исанын вәфтизи һансы символик мә’наны дашыјырды? Иса јәһуди иди, о, артыг Аллаһа һәср олунмуш халгын ичиндә доғулмушду. Беләликлә, Иса доғулдуғу андан Аллаһа һәср олунмушду (Чыхыш 19:5, 6). Вәфтиз олунмагла, Јеһованын һәмин вахт үчүн она даир олан ирадәсини јеринә јетирмәк мәгсәдилә Иса өзүнү Аллаһа тәгдим етди (Ибраниләрә 10:5, 7). Бәли, Иса вәфтизинин мә’насына мүвафиг һәјат сүрүрдү. О, бүтүн гүввәсини Јеһоваја хидмәтә сәрф едир вә фүрсәт дүшән кими Аллаһ һаггында билдикләрини инсанларла бөлүшүрдү. Иса Аллаһын ирадәсини јеринә јетирмәкдән зөвг алыр вә дејирди ки, бу, онун үчүн гидаја бәрабәрдир (Јәһја 4:34).

6. Иса һансы мә’нада өзүнү инкар етди?

⁶ Иса чох ҝөзәл дәрк едирди ки, Јеһованын ирадәсини јеринә јетирмәк она чох баһа, һәтта һәјаты баһасына баша ҝәләҹәк. Бунунла белә, Иса шәхси марагларыны икинҹи јерә гојмагла өзүнү инкар етди. Аллаһын ирадәси онун үчүн һәмишә биринҹи јердә иди. Бәс биз Исанын камил нүмунәсини неҹә тәглид едә биләрик?

ӘБӘДИ ҺӘЈАТА АПАРАН АДДЫМЛАР

7. Вәфтиз олунмаздан әввәл һансы бә’зи аддымлары атмаг лазымдыр?

⁷ Исадан фәргли олараг, биз гејри-камилик вә јалныз нөвбәти ваҹиб аддымлары атдыгдан сонра вәфтиз олуна биләрик. Башланғыҹ үчүн Јеһова Аллаһ вә Иса Мәсиһ һаггындакы дәгиг билији бүтүн үрәкдән гәбул етмәк лазымдыр. Бу, бизи иман ҝөстәрмәјә вә Аллаһа дәрин мәһәббәт бәсләмәјә тәшвиг едәҹәкдир (Матта 22:37-40; Ромалылара 10:17; Ибраниләрә 11:6). Аллаһын ганун, принсип вә нормаларына табе олмамыз, бизи төвбә етмәјә вә кечмиш ҝүнаһларымыза ҝөрә Аллаһа мәгбул пешманчылыг ифадә етмәјә тәшвиг едәҹәкдир. Бу исә бизи дөнмәјә, јә’ни Аллаһы танымаздан әввәл етдијимиз һәр ҹүр сәһв һәрәкәтләрдән имтина етмәјә јөнәлдир (Һәвариләрин ишләри 3:19). Әлбәттә ки, әҝәр биз дүзҝүн давранмаг әвәзинә әввәлки кими ҝизлиндә һәр һансы ҝүнаһ ишләтмәјә давам едириксә, демәли, биз һәлә әсл мә’нада дүзәлмәмишик вә сөзсүз ки, Аллаһы алдада билмәрик. Јеһова инсанларда һәр бир икиүзлүлүјү ҝөрүр (Лука 12:2, 3).

8. Падшаһлыг һаггындакы тәблиғ ишиндә иштирак етмәк истәјирсинизсә, сиз нә етмәлисиниз?

⁸ Будур, артыг нечә вахтдыр ки, сиз Аллаһ һаггында билик әлдә едирсиниз. Өз руһани мәгсәдләриниз барәдә дәриндән дүшүнмәк вахты дејилми? Јәгин ки, үрәјиниз өјрәндикләринизи доғмаларыныза, достларыныза вә башга инсанлара данышмаг арзусу илә чырпыныр. Чох еһтимал ки, сиз дә, фүрсәт дүшән кими башгалары илә хош хәбәри бөлүшән Иса кими давранырсыныз (Лука 10:38, 39; Јәһја 4:6-15). Инди, ола билсин ки, сиз даһа чох етмәк арзусундасыныз. Мәсиһчи ағсаггаллары Јеһованын Шаһидләринин тәблиғ фәалијјәтләриндә мүнтәзәм иштирак етмәјә һазыр олуб-олмадығынызы мүәјјән етмәк үчүн, сизинлә мәмнунијјәтлә сөһбәт едә биләрләр. Әҝәр һазырсынызса, ағсаггаллар тәблиғдә Шаһидләрдән бирини мүшајиәт етмәјинизә гајғы ҝөстәрәҹәкләр. Исанын шаҝирдләри онун ҝөстәришләринә риајәт едир вә хидмәтләрини мүтәшәккил шәкилдә иҹра едирдиләр (Марк 6:7, 30; Лука 10:1). Падшаһлыг һаггындакы хәбәри евдән-евә вә јахуд башга бир јолла тәблиғ едәркән бу ҹүр көмәк сизин үчүн фајдалы олаҹагдыр (Һәвариләрин ишләри 20:20, 21).

9. Инсан Аллаһа неҹә һәср олунур вә һәср олунма онун һәјатына неҹә тә’сир едир?

⁹ Хош хәбәри јығынҹағынызын әразисиндә јашајан инсанларын һамысына тәблиғ етмәк — сәмими гәлбли инсанлары тапмағын үсулу, һәмчинин иманынызы ҝөстәрмәк үчүн имкандыр (Һәвариләрин ишләри 10:34, 35; Јагуб 2:17, 18, 26). Мүнтәзәм олараг мәсиһчи ҝөрүшләринә ҝәлмәјиниз вә тәблиғ ишиндә шүурлу тәрздә иштирак етмәјиниз, төвбә едиб дәјишилдијинизи вә инди Аллаһ һаггындакы билијә мүвафиг јашамаг гәрарына ҝәлдијинизи ҝөстәрәҹәкдир. Бәс нөвбәти мүвафиг аддым һансыдыр? Јеһова Аллаһа һәср олунмаг. Бу о демәкдир ки, сиз шәхси дуанызда һәјатынызы көнүллү олараг Аллаһа тәгдим етдијинизи вә ирадәсини бүтүн үрәкдән јеринә јетирмәји арзуладығынызы Она сөјләјирсиниз. Беләликлә, Јеһоваја һәср олунуб, Иса Мәсиһин асан бојундуруғуну гәбул етмәк олар (Матта 11:29, 30).

ВӘФТИЗИН СИЗИН ҮЧҮН ДАШЫДЫҒЫ МӘ’НА

10. Јеһоваја һәср олундугдан сонра вәфтиз олунмаг нәјә ҝөрә лазымдыр?

¹⁰ Иса демишдир ки, онун бүтүн шаҝирдләри вәфтиз олунмалыдырлар (Матта 28:19, 20). Өзүнүзү Аллаһа һәср етдикдән сонра бу нә үчүн ваҹибдир? Јеһоваја һәср олундуғунуз үчүн, О, сизин Ону севдијинизи билир. Амма, шүбһәсиз ки, сиз Аллаһа олан мәһәббәтиниз һаггында башгаларынын да билмәсини истәјирсиниз. Вәфтиз, һамынын гаршысында Јеһова Аллаһа һәср олундуғунузу билдирмәјә имкан јарадыр (Ромалылара 10:9, 10).

11. Вәфтиз һансы мә’наны дашыјыр?

¹¹ Вәфтиз зәнҝин символик мә’наја маликдир. Суја салындығыныз, јахуд, мәҹази диллә десәк, суја “басдырылдығыныз” заман, сиз санки әввәлки һәјат тәрзиниз үчүн өлүрсүнүз. Судан чыхдығыныз заман исә санки өз ирадәнизә дејил, Аллаһын ирадәсинә табе олан јени һәјата гәдәм гојурсунуз. Әлбәттә, бу о демәк дејил ки, сиз артыг сәһвләрә јол вермәјәҹәксиниз, чүнки биз һамымыз гејри-камилик вә һәр ҝүн ҝүнаһ ишләдирик. Лакин Јеһованын һәср олунмуш вә вәфтиз едилмиш хидмәтчиси кими, сиз Онунла хүсуси мүнасибәтләрә саһиб олаҹагсыныз. Јеһова төвбә етдијинизи вә тәвазөкарлыгла вәфтиз олундуғунузу ҝөрәрәк, Исанын фидијә гурбанлығы әсасында ҝүнаһларынызы бағышламаға һазырдыр. Беләликлә, вәфтиз Аллаһ гаршысында тәмиз виҹдан бәхш едир (1 Петер 3:21).

12. а) “Ата... наминә”, б) “Оғул... наминә”, в) “Мүгәддәс Руһ наминә” вәфтиз олунмаг нә демәкдир?

¹² Иса давамчыларына бујурду ки, јени шаҝирдләри “Ата, Оғул вә Мүгәддәс Руһ наминә” вәфтиз етсинләр (Матта 28:19). Иса нәји нәзәрдә тутурду? “Ата... наминә” вәфтиз олунмаг она ишарә едир ки, вәфтиз олунан шәхс бүтүн үрәкдән Јеһова Аллаһы бир Јарадан вә Каинатын тамһүгуглу Һөкмдары кими гәбул едир (Мәзмур 36:9; 83:18; Ваиз 12:2). “Оғул... наминә” вәфтиз олунмаг о демәкдир ки, һәмин шәхс Иса Мәсиһи — хүсусән дә онун фидијә гурбанлығыны — Аллаһын тәгдим етдији јеҝанә хилас васитәси кими гәбул едир (Һәвариләрин ишләри 4:12). “Мүгәддәс Руһ наминә” вәфтиз олунмаг исә, вәфтизә намизәд олан шәхсин Јеһованын мүгәддәс руһуну, јә’ни фәал гүввәсини, нијјәтләрини һәјата кечирмәк вә руһла идарә олунан тәшкилаты илә бирликдә хидмәтчиләрини Өзүнүн адил ирадәсини иҹра етмәкдә мөһкәмләндирмәк үчүн Аллаһын истифадә етдији васитә кими гәбул етдијини ҝөстәрир (Тәквин 1:2; Мәзмур 104:30; Јәһја 14:26; 2 Петер 1:21).

ВӘФТИЗ ОЛУНМАҒА ҺАЗЫРСЫНЫЗМЫ?

13, 14. Јеһова Аллаһа хидмәт етмәји сечәркән нәјә ҝөрә горхмалы дејилик?

¹³ Вәфтизин бу гәдәр зәнҝин мә’на дашымасы вә инсанын һәјатында ән ваҹиб дөнүш нөгтәсини тәшкил етмәси, бу аддымы атмагдан чәкиндирмәлидирми? Әсла јох. Вәфтиз олунмаг гәрарыны дүшүнмәдән гәбул етмәк дүзҝүн олмаса да, бу, шүбһәсиз ки, сизин ән мүдрик гәрарыныздыр.

¹⁴ Вәфтиз сизин Јеһова Аллаһа хидмәт етмәк сечиминизи ҝөстәрир. Таныдығыныз инсанлар һаггында дүшүнүн. Мәҝәр онларын һәр бири бу вә ја диҝәр тәрздә өз “ағаларына” хидмәт етмирми? Бә’зиләри вар-дөвләтә хидмәт едир (Матта 6:24). Диҝәрләри сә’јлә карјералары үчүн чалышыр вә ја јалныз өзләринин гејдинә галыр ки, бунунла да арзуларынын јеринә јетмәси онлар үчүн һәјатларынын башлыҹа мәгсәдинә чеврилир. Бир башгалары јалан аллаһлара ибадәт едирләр. Сиз исә һәгиги Аллаһ олан Јеһоваја хидмәт етмәји үстүн тутмусунуз. Аллаһдан башга һеч ким бу гәдәр мәрһәмәт, шәфгәт вә мәһәббәт ҝөстәрмир. Аллаһ инсанлара хиласа апаран мәгсәдјөнлү иш вермәклә, онлары шәрәфләндирир. О Өз хидмәтчиләринә әбәди һәјат мүкафатыны верир. Бәли, Исанын нүмунәсини тәглид етмәјимиздә вә һәјатымызы Јеһоваја һәср етмәјимиздә горхулу бир шеј јохдур. Әслиндә бу, Аллаһа хош олан вә сағлам дүшүнҹәдән ирәли ҝәлән јеҝанә сечимдир (1 Краллар 18:21).

15. Вәфтизә нә мане ола биләр?

¹⁵ Буна бахмајараг, сизин вәфтиз олунманыза башгалары тә’сир ҝөстәрмәли дејил. Бу, Јеһова илә сизин аранызда олан шәхси мәсәләдир (Галатијалылара 6:4). Артыг руһани наилијјәтләр әлдә етдијиниз үчүн, ола билсин, белә дүшүнүрсүнүз: “Вәфтиз олунмағыма нә мане олур?” (Һәвариләрин ишләри 8:35, 36). Өзүнүздән соруша биләрсиниз: “Доғмаларымын мүгавимәт ҝөстәрмәсими мәнә манеә төрәдир? Мүгәддәс Китаб нөгтеји-нәзәриндән јанлыш олан вә ја ҝүнаһа сүрүкләјән ишләрлә һәлә дә әлагәм вармы? Бәлкә мән ҹәмијјәтин рә’јиндән горхурам?” Бурада дүшүнмәли бә’зи амилләр вар, амма һәр шеји ајдын шәкилдә ҝөтүр-гој етмәк јахшы оларды.

16. Јеһоваја хидмәт етмәкдән һансы фајданы әлдә едәҹәксиниз?

¹⁶ Јеһоваја хидмәтдәки үстүнлүкләри нәзәрә алмадан, анҹаг иткиләри ҝөрмәк мүдрик давраныш олмаз. Мисал үчүн, аилә тәрәфиндән ҝөстәрилән мүгавимәти ҝөтүрәк. Иса вә’д етмишдир ки, әҝәр шаҝирдләри онун ардынҹа ҝетдикләри үчүн јахынларыны итирәрләрсә, бөјүк руһани аиләјә малик олаҹаглар (Марк 10:29, 30). Һәмиманлыларыныз сизә гардашлыг мәһәббәти тәзаһүр етдирәҹәк, тә’гибләрә таб ҝәтирмәкдә көмәк едәҹәк вә һәјата апаран јолда сизә дәстәк олаҹаглар (1 Петер 5:9). Хүсусән дә јығынҹағын ағсаггаллары сизә проблемләри вә диҝәр чәтинликләри һәлл етмәјә көмәк едәҹәкләр (Јагуб 5:14-16). Бу дүнјанын рә’јинә ҝәлдикдә исә, өзүнүздән соруша биләрсиниз: “Үмумијјәтлә Каинатын Јараданынын илтифаты вә мәним сечдијим јолун Она ҝәтирдији севинҹ нә иләсә мүгајисә олуна биләрми?” (Сүлејманын мәсәлләри 27:11).

ҺӘСР ОЛУНМАҒА ВӘ ВӘФТИЗӘ МҮВАФИГ ЈАШАМАГ

17. Нәјә ҝөрә вәфтизин сон дејил, башланғыҹ олдуғуну дүшүнмәк лазымдыр?

¹⁷ Јадда сахламаг лазымдыр ки, вәфтиз руһани инкишафынызын сону дејил. Бу, тәсдиг едилмиш хидмәтчи вә Јеһованын Шаһидләриндән бири кими, Аллаһа өмүр боју едилән хидмәтин башланғыҹыдыр. Вәфтиз чох ваҹиб олса да, хиласа зәманәт дејил. Иса демәмишдир ки, “вәфтиз олан һәр кәс хилас олаҹагдыр”. Әксинә, о демишдир: “Ахыра гәдәр сәбр едән хилас олаҹагдыр” (Матта 24:13). Буна ҝөрә дә, Аллаһын Падшаһлығыны ахтармагла, һәјатымызда ән ваҹиб јери она ајырмалыјыг (Матта 6:25-34).

18. Вәфтиздән сонра гаршыныза гоја биләҹәјиниз бә’зи мәгсәдләр һансылардыр?

¹⁸ Јеһоваја хидмәти давам етдирмәк үчүн, гаршыныза руһани мәгсәдләр гојмаг јахшы оларды. Бу ҹүр дәјәрли мәгсәдләрдән бири — Аллаһын Кәламыны шәхсән өјрәнмәјин сајәсиндә Онун һаггындакы билијинизи ҝенишләндирмәкдир. Мүгәддәс Китабы һәр ҝүн охумағы планлашдырын (Мәзмур 1:1, 2). Мүнтәзәм олараг мәсиһчи ҝөрүшләриндә иштирак един, чүнки орадакы үнсијјәт сизә руһани ҹәһәтдән ҝүҹ верәҹәкдир. Нәјә ҝөрә јығынҹагларда шәрһ вермәји, бунунла да Јеһованы иззәтләндирмәји вә башгаларыны руһландырмағы гаршыныза мәгсәд гојмајасыныз? (Ромалылара 1:11, 12). Гаршыныза гоја биләҹәјиниз мәгсәдләрдән бири, дуаларынызы даһа мәзмунлу етмәк ола биләр (Лука 11:2-4).

19. Мүгәддәс руһ һансы хүсусијјәтләри тәзаһүр етдирмәкдә сизә көмәк едә биләр?

¹⁹ Әҝәр вәфтизинизә мүвафиг јашамаг истәјирсинизсә, даима өз һәрәкәтләринизә диггәт јетирмәли, Аллаһын мүгәддәс руһунун сиздә мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг кими кејфијјәтләр инкишаф етдирмәсинә јол вермәлисиниз (Галатијалылара 5:22, 23; 2 Петер 3:11). Унутмајын ки, Јеһова Ондан мүгәддәс руһ диләјиб, Она сәдагәтлә хидмәт едәнләрин һамысына Өз руһундан верир (Лука 11:13; Һәвариләрин ишләри 5:32). Беләликлә, бу руһу алмаг үчүн Аллаһа дуа един вә Она хош олан хүсусијјәтләри тәзаһүр етдирмәк үчүн Ондан көмәк диләјин. Аллаһын руһунун рәһбәрлијинә нә гәдәр чох јол версәниз, бир о гәдәр дә бу хүсусијјәтләр сөзләриниздә вә давранышынызда өзүнү бирузә верәҹәкдир. Бәли, мәсиһчи јығынҹағында һәр кәс Мәсиһә даһа чох бәнзәмәк үчүн “јени” инсан олмаға чалышыр (Колослулара 3:9-14). Биз руһани инкишафын мүхтәлиф мәрһәләләриндә олдуғумуза ҝөрә, һәр биримизин өз чәтинликләри вар. Гејри-камил олдуғунуздан, Мәсиһә бәнзәмәк үчүн сизә чохлу сә’ј ҝөстәрмәк лазымдыр. Амма һеч вахт руһдан дүшмәјин, чүнки Аллаһын көмәклији илә бу мүмкүн олан ишдир.

20. Хидмәтдә Исаны неҹә тәглид едә биләрсиниз?

²⁰ Сизин руһани мәгсәдләриниз арасында — севинмәк баҹарығында Исаны даһа јахшы тәглид етмәк мәгсәди дә олмалыдыр (Ибраниләрә 12:1-3). О, хидмәти севирди. Әҝәр Падшаһлыг һаггында тәблиғ етмәк үстүнлүјүнүз варса, тәблиғин сизин үчүн ади шејә чеврилмәсинә јол вермәјин. Башгаларына Аллаһын Падшаһлығы һаггында өјрәдәркән, Иса кими, мәмнунлуг һисси дујмаға чалышын. Сизин Аллаһын Кәламынын даһа јахшы мүәллими олмағыныза көмәк етмәк мәгсәдилә јығынҹагда верилән мәсләһәтләри һәјата кечирин. Вә әмин олун ки, хидмәтинизи давам етдирмәк үчүн Јеһова сизә ҝүҹ верәҹәкдир (1 Коринфлиләрә 9:19-23).

21. а) Јеһованын вәфтиз олунмуш садиг хидмәтчиләри гијмәтләндирдијини һарадан билирик? б) Аллаһ бу пис системә кәсдији һөкмү јеринә јетирдији заман сағ галмаг үчүн вәфтизин ролу нә гәдәр ваҹибдир?

²¹ Исаны сәдагәтлә тәглид етмәјә чалышан һәср олунмуш вә вәфтиз едилмиш инсан Аллаһ үчүн хүсусилә дәјәрлидир. Јеһова милјардларла инсанын үрәјини ҝөрүр вә белә инсанларын нә гәдәр аз олдуғуну билир. О, онлара хәзинә кими, “дәјәрли” кәсләр кими бахыр (Һаггај 2:7). Мүгәддәс Китаб пејғәмбәрликләри ҝөстәрир ки, Аллаһ үчүн һәмин инсанлар бу пис системә кәсилмиш һөкм иҹра едиләҹәк заман хилас олмаг үчүн ишарә олунмушлар кимидирләр (Һезекиел 9:1-6; Малаки 3:16, 18). Сиз “әбәди һәјата тә’јин олунанларын”, јә’ни мејлли оланларын сырасындасынызмы? (Һәвариләрин ишләри 13:48). Аллаһын хидмәтчиси кими үзәринизә ишарә гојулмасыны истәјирсинизми? Һәср вә вәфтиз олунма бу ҹүр ишарәнин бир һиссәсидир вә бунлар хилас үчүн ваҹибдир.

22. “Бөјүк издиһам” нәјә үмид едә биләр?

²² Үмумдүнја Туфанындан сонра Нуһ вә онун аиләси тәмизләнмиш торпаға чыхдылар. Еләҹә дә бу ҝүн, Аллаһ һаггындакы билији һәјата кечирән вә Јеһованын илтифатына наил олан “бөјүк издиһам”ын бу пис системин сонунда сағ галмаг вә тамамилә тәмизләнмиш торпагда әбәди јашамаг үмиди вар (Вәһј 7:9, 14). Бәс о заман һәјат неҹә олаҹагдыр?

БИЛИЈИНИЗИ ЈОХЛАЈЫН

• Јеһова Онун һаггындакы билијиниздән неҹә истифадә етмәнизи истәјир?

• Вәфтизә апаран бә’зи аддымлар һансылардыр?

• Нәјә ҝөрә вәфтиз сон дејил, башланғыҹдыр?

• Биз өз һәср олунмамыза вә вәфтизимизә мүвафиг неҹә јашаја биләрик?

[172-ҹи сәһифәдәки шәкил]

Дуада өзүнүзү Јеһоваја һәср етмисинизми?

[174-ҹү сәһифәдәки шәкил]

Вәфтиз олунманыза мане олан нәдир?