Дәрс 6

Аллаһын Падшаһлығы нәдир?

Аллаһын Падшаһлығы һарада јерләшир? (1) Онун Падшаһы кимдир? (2)

Падшаһла бирликдә даһа кимләрсә идарә едәҹәкми? Елә исә, онларын сајы нә гәдәрдир? (3)

Сон ҝүнләрдә јашадығымыз нәдән ҝөрүнүр? (4)

Аллаһын Падшаһлығы ҝәләҹәкдә бәшәријјәт үчүн нәләр едәҹәк? (5-7)

1. Иса јердә јашајаркән, өз давамчыларына Аллаһын Падшаһлығынын ҝәлмәси барәдә дуа етмәји өјрәдирди. Падшаһлыг падшаһ тәрәфиндән идарә олунан һөкумәтдир. Аллаһын Падшаһлығы хүсуси һөкумәтдир. О ҝөјдә гурулмуш вә јер үзүнү идарә едәҹәкдир. Падшаһлыг Аллаһын адыны тәгдис едәҹәкдир. Падшаһлыг, Аллаһын ирадәсинин јалныз ҝөјдә дејил, јердә дә һәјата кечмәсинә наил олаҹагдыр (Матта 6:9, 10).

2. Аллаһ вә’д етмишди ки, Онун Падшаһлығынын Падшаһы Иса олаҹагдыр (Лука 1:30-33). Иса јер үзүндә јашајан заман сүбут етди ки, лүтфкар, әдаләтли, камил Һөкмдар олаҹагдыр. Иса ҝөјә гајытдыгдан дәрһал сонра, Аллаһын Падшаһлығында Падшаһ кими тахта әјләшмәди (Ибраниләрә 10:12, 13). Јеһова вә’д етдији сәлаһијјәти Исаја 1914-ҹү илдә верди. О дөврдән е’тибарән Иса, Јеһова тәрәфиндән тә’јин олунмуш Падшаһ кими ҝөјдә идарә едир (Даниел 7:13, 14).

3. Ҝөјдә хидмәт етмәк үчүн, Јеһова һәмчинин садиг киши вә гадынлары да сечмишдир. Онлар падшаһлар, һакимләр вә каһинләр кими Иса илә бирликдә бәшәријјәти идарә едәҹәкләр (Лука 22:28-30; Вәһј 5:9, 10). Иса, онун Падшаһлығына дахил олаҹаг һакимијјәт шәрикләрини “кичик сүрү” адландырды. Онларын сајы 144 000-дир (Лука 12:32; Вәһј 14:1-3).

4. Иса Падшаһ олдугдан дәрһал сонра, Шејтаны вә онун пис мәләкләрини ҝөјдән јерин һүдудларына говду. Елә бу сәбәбдән, јер үзүндәки вәзијјәт 1914-ҹү илдән е’тибарән ҝетдикҹә писләшир (Вәһј 12:9, 12). Мүһарибәләр, аҹлыг, јолухуҹу хәстәликләр, ганунсузлуғун артмасы — бүтүн бунлар, Исанын рәһбәрлик етдијинә вә јашадығымыз пис системин сонуна ишарә едән “әламәтин” бир һиссәсидир (Матта 24:3, 7, 8, 12; Лука 21:10, 11; 2 Тимотејә 3:1-5).

5. Чобан гојунлары кечиләрдән ајырдығы кими, тезликлә Иса да адамлары бир-бириндән ајырараг мүһакимә едәҹәкдир. “Гојунлар” — өзүнү Исанын сәдагәтли вәтәндашлары кими ҝөстәрән кәсләрдир. Онлар јер үзүндә әбәди һәјаты мирас алаҹаглар. “Кечиләр” — Аллаһын Падшаһлығыны инкар едәнләрдир (Матта 25:31-34, 46). Иса, кечиләрлә мүгајисә олунан бүтүн адамлары јахын ҝәләҹәкдә мәһв едәҹәкдир (2 Салониклиләрә 1:6-9). Исанын “гојунлары” сырасында олмаг истәјирсинизсә, Падшаһлыг һаггындакы хәбәрә гулаг асмалы вә билдикләринизә әсасән давранмалысыныз (Матта 24:14).

6. Һал-һазырда Јер күрәси бир чох өлкәләрә бөлүнүб. Һәр өлкәнин өз һөкумәти вар. Халглар тез-тез бир-бири илә мүһарибә едирләр. Лакин Аллаһын Падшаһлығы бүтүн инсан һөкумәтләрини әвәз едәҹәк. Бу, бүтүн јер үзүнү идарә едән јеҝанә һөкумәт олаҹагдыр (Даниел 2:44). Бу Падшаһлығын идарә етдији дөврдә мүһарибәләр, ҹинајәт вә зоракылыг олмајаҹагдыр. Бүтүн инсанлар сүлһдә вә һәмрә’јликдә јашајаҹаглар (Мика 4:3, 4).

7. Исанын Миниллик Һөкмранлығы заманы, садиг инсанлар камилләшәҹәк, Јер күрәси исә ҹәннәтә чевриләҹәкдир. Бу миниллијин сонуна гәдәр, Иса, Аллаһын она бујурдуғу һәр шеји јеринә јетирәҹәкдир. Сонра о, Падшаһлығы Атасына гајтараҹагдыр (1 Коринфлиләрә 15:24). Аллаһын Падшаһлығынын едәҹәји ишләр барәсиндә достларыныза вә јахынларыныза нәјә ҝөрә данышмајасыныз?

[13-ҹү сәһифәдә олан шәкил]

Исанын һөкмранлығы алтында бир даһа нифрәт вә әввәлҹәдән јаранмыш мәнфи рә’ј олмајаҹаг.