Руһ һаггында һәгигәт
«Сиз һәгигәти дәрк едәҹәксиниз; вә һәгигәт сизи азад едәҹәкдир» (ЈӘҺЈА 8:32).
1. Нәјә ҝөрә руһ вә өлүм һаггында етигадларымызы јохламаг ваҹибдир?
ӨЛҮМ вә ахирәт дүнјасы илә бағлы етигадлар чох вахт инсанын мәнсуб олдуғу динин вә мәдәнијјәтин тәсири нәтиҹәсиндә јараныр. Ҝөрдүјүмүз кими, бу етигадлар руһун дәфәләрлә дүнјаја ҝәлдикдән сонра өзүнүн ахырынҹы мәгсәдинә чатмасындан тутмуш бир дәфә сүрдүјү өмрүн инсанын сон талејини мүәјјән етмәсинәдәк мүхтәлиф тәлимләри өзүнә дахил едир. Бунун нәтиҹәсиндә кимиси өләркән мүтләг һәгигәтә говушаҹағына, диҝәри нирванаја чатаҹағына, бир башгасы исә сәмави мүкафаты алаҹағына үмид едир. Бәс онда һәгигәт һарададыр? Етигадларымыз бизим әһвал-руһијјәмизә, һәрәкәтләримизә вә гәрарларымыза тәсир етдијиндән һәмин суалларын ҹавабыны ахтармалы дејиликми?
2, 3. а) Биз нә үчүн Мүгәддәс Китабда руһ һаггында дејиләнләрә етибар едә биләрик? б) Мүгәддәс Китаба әсасән, руһ нәдир?
2 Дүнјада ән гәдим китаб олан Мүгәддәс Китаба илк инсанын јарадылдығы вахта аид мәлуматлар да дахилдир. Орадакы тәлимләр инсан фәлсәфәсиндән вә адәт-әнәнәсиндән узагдыр. Мүгәддәс Китаб руһ һаггында һәгигәти ајдын шәкилдә ачыглајыр: руһ инсанын һәјат гүввәсидир, өлән инсанын мөвҹудлуғуна тамамилә сон гојулур вә Аллаһын јаддашында оланлар вахты чатанда дирилдиләҹәкләр. Буну билмәк сизин үчүн һансы мәнаны кәсб едир?
3 Иса давамчыларына демишди: «Сиз һәгигәти дәрк едәҹәксиниз; вә һәгигәт сизи азад едәҹәкдир» (Јәһја 8:32). Бәли, һәгигәт инсана азадлыг верир. Бәс руһ һаггында һәгигәт бизи нәдән азад едир?
Горху вә үмидсизликдән азадлыг
4, 5. а) Руһ һаггында һәгигәт һансы горхуну дәф едир? б) Дирилмә үмиди өлүмҹүл хәстәлијә тутулмуш јенијетмәни неҹә мөһкәмләндирмишди?
4 «Уорлд бук» енсиклопедијасында дејилир ки, инсанларын әксәријјәти өлүмдән горхур вә бу һагда фикирләшмәкдән белә гачырлар. Бир тарихчинин сөзләринә ҝөрә, Гәрбдә «өлүм» сөзүнү, демәк олар ки, ишләтмирләр. Бәзи халгларда инсанын өлдүјүнү сөјләмәк үчүн «һәјатдан көчдү», «дүнјасыны дәјишди» кими ифадәләрдән истифадә едирләр. Әслиндә, инсанлар өлүм заманы нә баш вердијини билмәдикләри үчүн өлүмдән горхурлар, белә ки, өлүм әксәријјәт үчүн сирдир. Өлүм заманы нәјин баш вердијини билмәк бу горхуну азалдыр.
5 Мисал үчүн 15 јашлы Микеленин вәзијјәтинә нәзәр салаг. Лејкемија хәстәлији онун һәјатына фаҹиәви шәкилдә сон гојду. Онун анасы Паула өтән ҝүнләри хатырлајараг дејир: «Микелен өлүмдән горхмадығыны дејирди, чүнки өлүмүн мүвәггәти олдуғуну билирди. Биз тез-тез Аллаһын јени дүнјасы вә дириләҹәк инсанлар һаггында данышардыг. Микелен Јеһова Аллаһа вә дирилмәјә зәррә гәдәр дә шүбһә етмирди, әксинә, онун иманы сарсылмаз иди». Дирилмәјә үмид бу ҹәсур ҝәнҹ гызы өлүм горхусундан азад етмишди.
6, 7. Руһ һаггында һәгигәт һансы мәнада инсаны үмидсизликдән азад едир? Изаһ един.
6 Бәс һәгигәт Микеленин валидејнләринә неҹә тәсир етмишди? «Әзиз баламызын өлүмү һәјатымызын ән ағрылы-аҹылы анлары иди, — дејә онун атасы Ҹеф сөјләјир. — Амма биз Јеһованын дирилмә вәдинә зәррә гәдәр дә олсун шүбһә етмирик вә әзиз гызымыз Микелени јенидән бағрымыза басаҹағымыз ҝүнү сәбирсизликлә ҝөзләјирик. Бу, неҹә дә хошбәхт анлар олаҹаг!»
7 Бәли, руһ һаггында һәгигәт инсаны әзиз адамын өлүмүнүн ҝәтирдији үмидсизликдән азад едир. Әлбәттә, доғма адамы итирмәјин вурдуғу јараны һеч нә тамамилә сағалда билмәз. Анҹаг дирилмә үмиди инсана гәлб раһатлығы ҝәтирир вә ағры-аҹыја дөзмәјә ҝүҹ верир.
8, 9. Өлүләрин вәзијјәти һаггында һәгигәт бизи һансы горхудан азад едир?
8 Өлүләрин вәзијјәти һагда Мүгәддәс Јазыларда дејиләнләр һәмчинин бизи өлүләр гаршысында горхудан азад едир. Бу һәгигәти өјрәнәндән сонра бир заманлар өләнин вәзијјәти илә бағлы мөвһуматларын буховунда олан чохлары артыг ҹаду, әламәт, тилсим вә дуалардан горхмур, һәмчинин әҹдадларынын руһу ҝери гајыдыб дириләрә зәрәр вурмасын дејә онлары разы салмаг үчүн баһа баша ҝәлән гурбанлар вермирләр. Доғрудан да, өлүләр ‘һеч нә билмәдикләри’ үчүн бүтүн бунлар мәнасыздыр (Ваиз 9:5).
9 Мүгәддәс Китабда руһ һаггында дејилән һәгигәт инсана азадлыг верир вә етибарлыдыр. Инди исә ҝәлин Мүгәддәс Китабын сизә бәхш етдији ҝөзәл үмид һаггында данышаг.
[29-ҹу сәһифәдәки јазы]
Руһ һаггында һәгигәт инсаны өлүм горхусундан, өлүләр гаршысында горхудан вә әзиз адамы итирмәјин ҝәтирдији үмидсизликдән азад едир