Динләјиҹиләри руһландыр вә мөһкәмләндир

АЛЛАҺЫН хидмәтчиләринин үзләшдикләри проблемләрдән асылы олмајараг, мәсиһчи јығынҹағы онлары руһландырмалыдыр. Бу сәбәбдән, ағсаггаллар хүсусилә диггәт јетирмәлидирләр ки, чыхышлары вә вердикләри мәсләһәтләр руһландырыҹы олсун. Ағсаггаллар «күләјә гаршы бир пәнаһҝаһ, фыртынаја гаршы сығынаҹаг, гураглыгда булаглар, ҹансыхыҹы торпагда көлҝә салан бөјүк гаја кими» олмалыдырлар (Јешаја 32:2).

Әҝәр сән ағсаггалсанса, сөјләдијин мәрузәләр тәравәт вә тәсәлли ҝәтирирми? Јеһоваја сәдагәтлә хидмәт етмәк истәјәнләрә гол-ганад верирми? Инсанларын лагејд мүнасибәтинә вә ја тәгибләрә бахмајараг, мәтанәтлә Аллаһын ирадәсинин јеринә јетирмәк үчүн онлары мөһкәмләндирирми? Бәс әҝәр динләјиҹиләрдән кимсә чәтин игтисади вәзијјәт вә ја сағалмаз ҹидди хәстәлик уҹбатындан руһдан дүшүбсә, онда неҹә? Сөзләринлә гардашларыны үрәкләндирә биләрсән (Әјј. 16:5).

Бир натиг кими, малик олдуғун имкандан истифадә едиб, гардашларына Јеһоваја вә Онун вердији шејләрә үмид вә гүввә мәнбәји кими бахмаға көмәк ет (Ром. 15:13; Ефес. 6:10).

Јеһованын етдикләрини хатырлат. Гардашлары ҹәсарәтләндирмәјин әсас үсулларындан бири кечмишдә халгы дара дүшәндә Јеһованын онлара неҹә көмәк етдијини ҝөстәрмәкдир (Ром. 15:4).

Исраил халгы дүшмән халгларын мәскунлашдығы Вәд едилмиш дијара дахил олмаздан әввәл, Јеһова Мусаја тапшырды ки, Јешуаја ‘ҹәсарәт верәрәк гүввәтләндирсин’. Муса буну неҹә етди? Јешуанын јанында о, бүтүн халга Мисирдән чыханда Јеһованын онлар үчүн етдији шејләри хатырлатды (Ганун. т. 3:28; 7:18). О, һәмчинин Јеһованын көмәјилә еморлулар үзәриндә чалдыглары гәләбәләр һагда данышды. Сонра Муса Јешуаны чағырыб деди: «Ҹәсарәтли вә мөһкәм ол!» (Ганун. т. 31:1-8). Сән дә һәмиманлыларыны руһландырмаға чалышаркән Јеһованын онлар үчүн индијәдәк етдији шејләри хатырлатмагла онлары мөһкәмләндирирсәнми?

Проблемләр һәрдән инсанлары тагәтдән елә салыр ки, онларда Падшаһлығын хејир-дуаларыны ҝөрәҹәкләринә шүбһә јараныр. Јеһованын вәдләринин тамамилә етибарлы олдуғуну онлара хатырлат (Јешуа 23:14).

Бәзи өлкәләрдә хош хәбәрин тәблиғинә дөвләт тәрәфиндән гадаға гојулур. Белә вәзијјәтләрдә гајғыкеш ағсаггаллар һәмиманлыларына Иса Мәсиһин һәвариләринин нүмунәсиндән ҝүҹ әлдә етмәјә көмәк едә биләрләр (Һәв. иш. 4:1–5:42). Шүбһәсиз ки, «Естер» китабында тәсвир олундуғу кими, Јеһованын һадисәләрин ҝедишатына неҹә истигамәт вердијини хатырлатмаг гардашлары ҹәсарәтләндирәҹәк.

Һәрдән елә олур ки, кимсә јығынҹаға ҝәлир, лакин руһани аддымлар атмыр. Ола билсин, беләләри кечмишдә ишләтдикләри ҝүнаһлара ҝөрә Аллаһын онлары һеч вахт бағышламајаҹағыны дүшүнүрләр. Белә олдугда, Јеһованын Менашше падшаһла неҹә даврандығыны данышмаг олар (2 Салн. 33:1-16). Јахуд һәјат тәрзини дәјишиб мәсиһчи олан вә Аллаһ тәрәфиндән салеһ елан олунан, гәдим Коринф шәһәриндә јашајан инсанлар һагда даныша биләрсән (1 Кор. 6:9-11).

Бәлкә, кимсә гаршылашдығы проблемләрә Аллаһын лүтфүнү итирдијинин әламәти кими бахыр? Бу ҹүр дүшүнән инсанлара Әјјубун башына ҝәләнләри вә нөгсансызлығыны горудуғу үчүн Јеһованын она бол-бол хејир-дуа вердијини хатырлатмаг олар (Әјј. 1:1-22; 10:1; 42:12, 13; Мәз. 34:19). Әјјубун сахта тәсәлливериҹиләри јанлыш олараг иддиа едирдиләр ки, бу шејләр ҝүнаһ ишләтдији үчүн онун башына ҝәлир (Әјј. 4:7, 8; 8:5, 6). Бунун там әксинә олараг, шаҝирдләри мөһкәмләндирәркән вә онлары ‘имана бағлы галмаға тәшвиг едәркән’ Павел вә Барнаба демишди: «Биз Аллаһын Сәлтәнәтинә чох әзијјәтләрлә ҝирмәлијик» (Һәв. иш. 14:21, 22). Сән дә бүтүн мәсиһчиләрдән әзијјәтләрә таб ҝәтирмәјин тәләб олундуғуну вә тәһәммүл етмәјин Аллаһын ҝөзүндә чох дәјәрли олдуғуну ҝөстәрәрәк, сынаглара мәруз галанлары мөһкәмләндирә биләрсән (Сүл. мәс. 27:11; Мат. 24:13; Ром. 5:3, 4; 2 Тим. 3:12).

Динләјиҹиләрини шәхси тәҹрүбәләриндә Јеһованын Өз вәдләринә садиг галмасына неҹә шаһид олдуглары һагда дүшүнмәјә тәшвиг ет. Кичик хатырлатмалар Јеһованын артыг онларла вәд етдији кими даврандығыны ҝөрмәләринә көмәк едәҹәк. Мәзмур 32:8 ајәсиндә охујуруг: «Сәнә тәлим верәҹәјәм, ҝедәҹәјин јолу өјрәдәҹәјәм. Нәсиһәт верәҹәјәм, ҝөзүм сәнин үстүндә олаҹаг». Јеһованын онлары неҹә мөһкәмләндирдијини вә аддымларына неҹә истигамәт вердијини хатырламаға көмәк етсән, Онун шәхсән гајғыларына галдығыны вә һазырда гаршылашдыглары һәр бир чәтинликдә јардым әлини узадаҹағыны баша дүшәҹәкләр (Јешаја 41:10, 13; 1 Пет. 5:7).

Аллаһын һазырда ҝөрдүјү ишләрдән валеһ олдуғуну ҝөстәр. Һәмиманлыларыны руһландырмаға чалышаркән онларын диггәтини Јеһованын инди ҝөрдүјү ишләрә јөнәлт. Данышаркән бу ишләрин сәни валеһ етдијини ҝөстәрсән, динләјиҹиләрин дә үрәјиндә ејни һиссләр ојанаҹаг.

Һәјатын чәтинликләринин өһдәсиндән ҝәлмәкдә Јеһованын бизә неҹә көмәк етдијини нәзәрдән кечир. О, бизә ән јахшы һәјат јолуну ҝөстәрир (Јешаја 30:21). Ҹинајәтин, әдаләтсизлијин, јохсуллуғун, хәстәликләрин вә өлүмүн сәбәбләрини изаһ едир, еләҹә дә бүтүн бунларын көкүнү неҹә кәсәҹәји һагда мәлумат верир. О, бизи мәһәббәтли баҹы-гардашларла әһатә едиб. Бизә дуа етмәк кими гијмәтли имканы бәхш едиб. Онун Шаһидләри олмаг шәрәфинә лајиг ҝөрүб. Мәсиһин артыг ҝөјдә тахта чыхдығыны вә бу көһнә системин сүрәтлә сонуна јахынлашдығыны ҝөрә билмәјимиз үчүн ҝөзләримизи ачыб (Вәһј 12:1-12).

Јығынҹаг ҝөрүшләри вә конгресләр дә Јеһованын хејир-дуасыдыр. Бу бәхшишләр һагда сәмими миннәтдарлыгла данышсан, башгалары даһа гәтијјәтли олаҹаглар ки, гардашларла бир јерә јығышмаға етинасыз јанашмасынлар (Ибр. 10:23-25).

Јеһованын хидмәтдә ҝөстәрдијимиз сәјләрә хејир-дуа вердији һагда мәлуматлар да гүввә мәнбәјидир. Биринҹи әсрдә Павел вә Барнаба Јерусәлимә ҝедәндә башга халглардан олан инсанларын мәсиһчилији гәбул етмәси һагда әтрафлы данышмагла «гардашлара бөјүк севинҹ ҝәтирдиләр» (Һәв. иш. 15:3). Сән дә руһландырыҹы һадисәләри бөлүшмәклә һәмиманлыларыны севиндирә биләрсән.

Әмәкләринин фајда ҝәтирдијини ҝөрмәк инсанлары чох севиндирир. Хидмәтдә етдикләри шејләрә ҝөрә һәмиманлыларыны тәрифлә. Гоҹалыг вә хәстәлик уҹбатындан имканларынын мәһдуд олмасына бахмајараг, сәдагәтлә тәһәммүл ҝөстәрәнләри тәрифлә. Јеһованын ады наминә ҝөстәрдикләри мәһәббәти Онун унутмадығыны јадларына сал (Ибр. 6:10). Сынагдан чыхмыш иман гијмәтли хәзинәдир (1 Пет. 1:6, 7). Гардашларын бу хатырлатмалара еһтијаҹы вар.

Ҝәләҹәк үмид һагда шөвглә даныш. Јеһованы севән һәр кәс үчүн әсас руһланма мәнбәји Онун ҝәләҹәклә бағлы вәдләридир. Јәгин ки, сәни динләјәнләрдән чоху бу вәдләр һагда дәфәләрлә ешидиб. Лакин бу шејләр һагда миннәтдарлыгла данышмағын, бу вәдләри онлар үчүн даһа реал едәҹәк, онларын јеринә јетәҹәјинә әминликләрини мөһкәмләндирәҹәк вә үрәкләринин миннәтдарлыгла долуб-дашмасына көмәк едәҹәк. Теократик Хидмәт Мәктәбиндә өјрәндикләрини тәтбиг етмәјин сәнә бу ишдә көмәји дәјәҹәк.

Өз халгы үчүн әсас руһланма вә гүввә мәнбәји Јеһованын Өзүдүр. Анҹаг бу хејир-дуаларын чатдырылмасында сән Онунла әмәкдашлыг едә биләрсән. Јығынҹаг гаршысында чыхыш етмәк буну етмәк үчүн ән ҝөзәл имкандыр.