Мәктәбин нәзарәтчиси үчүн рәһбәрлик

ҺӘР јығынҹагда бир ағсаггал Теократик Хидмәт Мәктәбинин нәзарәтчиси тәјин олунур. Әҝәр сәнә дә бу мәсулијјәт һәвалә едилибсә, бу ишдә шөвглү олмағын вә һәр бир шаҝирдин тәрәгги етмәси үчүн гајғы ҝөстәрмәјин мәктәбин јығынҹағыныза фајда ҝәтирмәсиндә ваҹиб рол ојнаја биләр.

Сәнин ән әсас ишин һәр һәфтә кечирилән Теократик Хидмәт Мәктәбини апармагдыр. Ҝөрүшдә јалныз тапшырығы оланларын јох, башгаларынын да иштирак етдијини унутма. Мәктәби елә кечир ки, бүтүн јығынҹағы һәрәкәтә тәшвиг едән хатырлатмалар сәсләнсин; хатырлатмалар мәктәбин бу китабын 5-дән 8-дәк сәһифәләриндә гејд олунан мәгсәдләриндән һеч олмаса бирини өзүнә дахил етсин.

Истәр охумаг тапшырығы илә, истәр сәһнәҹиклә, истәрсә дә нитглә чыхыш едән һәр бир шаҝирдә мараг ҝөстәр. Етдикләринә садәҹә бир тапшырыг кими јох, Јеһоваја хидмәтдә тәрәгги етмәк имканы кими бахмаға онлара көмәк ет. Сөзсүз ки, тәрәгги етмәләри үчүн өзләринин сәј ҝөстәрмәләри ваҹибдир. Анҹаг сәнин онлара сәмими мараг ҝөстәрмәјин, дәрсләрин нәдә фајдалы олдуғуну баша дүшмәләринә көмәк етмәјин вә орадакы мәсләһәтләри неҹә тәтбиг етмәји баша салмағын да мүһүм рол ојнајыр. Бу сәбәбдән, фајдалы фикирләр сөјләјә билмәк үчүн һәр бир чыхыша диггәтлә гулаг ас.

Диггәт јетир ки, ҝөрүшү вахтында башлајыб, вахтында битирәсән. Мәсләһәт вермәјә ајрылан вахтдан кәнара чыхмамагла өзүн ҝөзәл нүмунә гој. Әҝәр шаҝирд ајрылан вахты кечирсә, сән, јахуд көмәкчин она ишарә вермәлисиниз. Шаҝирд ҹүмләсини битириб сәһнәни тәрк етмәлидир. Програмын диҝәр һиссәсиндә вахтдан кәнара чыхылырса, сән өз шәрһини гыса ет вә ҝөрүшдән сонра һәмин һиссә илә чыхыш едән гардашла мәсәләни мүзакирә ет.

Сән ҝөрүшдә иштирак едирсәнсә, мәктәби өзүн кечирмәлисән. Әҝәр мүәјјән сәбәбә ҝөрә јығынҹаг ҝөрүшүндә олмајаҹагсанса, мәктәби ағсаггаллар шурасынын әввәлҹәдән тәјин етдији башга ағсаггал кечирмәлидир. Графики һазырламагда, тапшырыг бланкыны јазмагда вә пајламагда, јахуд чыхыш едә билмәјәнләрин јеринә башгасыны тапмагда көмәк лазымдырса, ағсаггаллар шурасы бир хидмәти көмәкчијә бу мәсәләләрдә сәнә көмәк етмәји тапшыра биләр.

Шаҝирдләрин мәктәбә јазылмасы. Бүтүн тәблиғчиләри мәктәбә јазылмаға тәшвиг ет. Јығынҹагла сых әлагәдә олан инсан Мүгәддәс Китаб тәлимләри илә разылашыр вә мәсиһчи принсипләринә ујғун јашајырса, мәктәбә јазыла биләр. Кимсә мәктәбә јазылмаг истәдијини билдирәндә ону сәмими тәрифлә. Әҝәр о, һәлә тәблиғчи дејилсә, сән мәктәбин нәзарәтчиси кими, мәктәбә јазылмаг үчүн тәләбләри онунла мүзакирә етмәлисән. Мүмкүндүрсә, буну онунла Мүгәддәс Китаб өјрәнмәси кечирәнин (вә ја мәсиһчи валидејнинин) иштиракы илә ет. Тәләбләр вәфтиз олунмамыш тәблиғчи олмаг истәјәнләр үчүн олан тәләбләрлә ејнидир. Бу тәләбләри «Хидмәтимизи јеринә јетирмәк үчүн тәшкил олунмушуг» китабынын 98-100-ҹү сәһифәләриндә (рус.) тапмаг олар. Мәктәбә јазыланларын сијаһысыны һәр дәфә тәзәлә.

Дәрс бланкындан неҹә истифадә етмәк лазымдыр? Дәрс бланкы һәр бир шаҝирдин шәхси китабынын 79-дан 81-дәк сәһифәләриндә јерләшир. Рәнҝли сүтунлардан ҝөрүндүјү кими мәктәбдә охумаг тапшырығыны алан шаҝирдләрә 1-дән 17-дәк олан дәрсләри вермәк олар. Өзүнә сәһнәҹик дахил едән тапшырыглара 7-ҹи, 52-ҹи вә 53-ҹү дәрсләрдән башга, бүтүн дәрсләр аиддир. Нитгләр үчүн исә 7-ҹи, 18-ҹи вә 30-ҹу дәрсләрдән савајы бүтүн дәрсләр мүнасибдир.

Шаҝирдә һансыса дәрсин үзәриндә ишләмәк тапшырыланда, мәктәбин нәзарәтчиси шаҝирдин китабындакы дәрс бланкында һәмин дәрсин гаршысындакы «Дәрсин верилдији тарих» графасында карандашла дәрсин верилдији тарихи гејд етмәлидир. Шаҝирд тапшырығы јеринә јетирәндән сонра тәкликдә бу дәрсә аид олан чалышманы (вә ја чалышмалары) едиб-етмәдијини соруш. Әҝәр едибсә, бланкдакы мүвафиг чәрчивәјә ишарә гој. Шаҝирдә һәмин дәрсин үзәриндә ишләмәјә давам етмәји мәсләһәт ҝөрүрсәнсә, бланкда әлавә гејдә еһтијаҹ јохдур; «Дәрсин битирилдији тарих» графасыны садәҹә бош сахла. Јалныз шаҝирд башга дәрсин үзәриндә ишләмәјә һазыр олдуғу һалда, ораны долдурмаг олар. Бундан әлавә, онун китабында шәрти вәзијјәтләрин сијаһысы ҝәтирилән 82-ҹи сәһифәдә һәр чыхышында истифадә етдији шәрти вәзијјәтин гаршысында чыхышын тарихини јазмаг лазымдыр. Һәм дәрс бланкы, һәм дә шәрти вәзијјәтләрин сијаһысы елә тәртиб олунуб ки, онларын һәр биринин үзәриндә ики дәфә ишләмәк мүмкүн олсун. Програм бојунҹа китаб шаҝирдин өзүндә олмалыдыр.

Шаҝирдә һәр дәфә јалныз бир дәрсин үзәриндә ишләмәји тапшыр. Адәтән дәрсләри дәрс бланкындакы ардыҹыллыға ујғун олараг вермәк мәсләһәт ҝөрүлүр. Лакин әҝәр шаҝирд чох баҹарыглыдырса, ону тәшвиг ет ки, мүәјјән дәрсләри өзү сәрбәст шәкилдә арашдырыб, орадакы мәсләһәтләри тәтбиг етсин. Мәктәбдә үзәриндә ишләмәси үчүн исә сәнин фикринҹә онун баҹарыглы натиг вә мүәллим олмасына хүсусилә көмәји дәјәҹәк дәрсләри тапшырмаг олар.

Һәр бир дәрсин үзәриндә ишләјиб, орадакы мәсләһәтләри тәтбиг етмәк һәтта чох илләр мәктәбә јазылан шаҝирдләрә дә фајда ҝәтирә биләр. Конкрет саһәләрдә инкишаф етмәјә еһтијаҹы олан шаҝирдә көмәк етмәк үчүн дәрс бланкындакы дәрсләри ардыҹыл вермәк әвәзинә, она лазым олан дәрсләри сеч.

Мәсләһәти неҹә вермәк лазымдыр? Мәсләһәт верәркән Мүгәддәс Китабдакы нүмунәләрдән вә принсипләрдән јахшы истифадә ет. Шаҝирдләр ҝөрмәлидирләр ки, һәм мәсләһәт, һәм дә онун верилмә тәрзи Аллаһын Кәламындакы јүксәк принсипләрә әсасланыб.

Унутма ки, сән баҹы-гардашларынын әмәкдашысан (2 Кор. 1:24). Сәнә дә онлар кими натиглик вә мүәллимлик баҹарығыны јахшылашдырмаг үчүн сәј ҝөстәрмәк лазымдыр. «Теократик Хидмәт Мәктәбиндә тәлим алырыг» китабыны шәхсән өјрән, орадакы мәсләһәтләри тәтбиг ет вә бу ишдә диҝәрләринә нүмунә гој.

Буну едәркән гаршына мәгсәд гој ки, шаҝирдләрин јахшы охумасына, мәһарәтли натиг вә баҹарыглы мүәллим олмасына көмәк едәсән. Буна наил олмаг мәгсәдилә шаҝирдә дәрсин мәғзини, онун нә үчүн ваҹиб олдуғуну вә нитгин мүхтәлиф ҹәһәтләрини неҹә инкишаф етдирә биләҹәјини баша дүшмәси үчүн лазыми көмәји ҝөстәр. Бу дәрслик бу ишдә сәнә көмәк едәҹәк шәкилдә тәртиб олунуб. Анҹаг әксәр һалларда сәндән садәҹә китабдан фикирләр охумаг јох, јазыланларын мәнасыны вә неҹә тәтбиг едилдијини баша салмаг тәләб олунур.

Әҝәр шаҝирд һансыса мәгамын өһдәсиндән јахшы ҝәлибсә, ону тәрифлә. Мәһз нәјин јахшы алындығыны вә бунун нә үчүн ваҹиб олдуғуну гысаҹа гејд ет. Әҝәр мүәјјән шејин үзәриндә бир аз да ишләмәлидирсә, бунун нә үчүн лазым ҝәлдијини баша дүшүб-дүшмәдијинә әмин ол. Буна неҹә наил ола биләҹәјини мүзакирә ет. Конкрет, ејни заманда мүлајим ол.

Јадда сахла ки, бир чохларына сәһнәдән чыхыш етмәк чох чәтин ҝәлир. Әҝәр инсан тапшырығын өһдәсиндән ҝәлә билмәдијини дүшүнүрсә, өзүнү јенидән сынамаға тәрәддүд едә биләр. «Әзилмиш гамышы» гырмајан, «түстүләнән пилтәни» сөндүрмәјән Исадан нүмунә ҝөтүр (Мат. 12:20). Шаҝирдин емосионал вәзијјәтини нәзәрә ал. Мәсләһәт верәркән шаҝирдин мәктәбә тәзәликҹә јазылдығына, јохса тәҹрүбәли тәблиғчи олдуғуна фикир вер. Меһрибанлыгла вә сәмими-гәлбдән дејилән тәриф инсана әлиндән ҝәлән һәр шеји етмәјә ҝүҹ верә биләр.

Һәр бир шаҝирдин ләјагәтинә һөрмәтлә јанаш. Ромалылара 12:10 ајәсиндә дејилир: «Бир-биринизи һөрмәтдә габаглајын». Бу, Теократик Хидмәт Мәктәбиндә мәсләһәт верән гардаш үчүн неҹә дә јериндә олан нәсиһәтдир! Әҝәр шаҝирд сәндән јашҹа бөјүкдүрсә, 1 Тимотејә 5:1, 2 ајәләриндәки ҝөстәришләрә диггәтлә әмәл ет. Тапшырыға даир мәсләһәт хејирхаһлыгла вериләрсә, јашындан асылы олмајараг, ону гәбул етмәк һәр кәсә асан олаҹаг (Сүл. мәс. 25:11).

Мәсләһәт верәркән шаҝирдин диггәтини тәлимин мәгсәдинә јөнәлт. Мәгсәд садәҹә чыхыша ҝөрә тәриф сөзләри вә нөвбәти дәрсә кечә биләҹәјини ешитмәк олмамалыдыр. Һәмчинин мәгсәд башгаларыны валеһ едәҹәк натиг вә ја мүәллим олмаг да олмамалыдыр (Сүл. мәс. 25:27). Бизим арзумуз нитг әнамындан Јеһоваја һәмд етмәк вә башгаларынын Онун һаггында өјрәнмәсинә вә Ону севмәсинә көмәк етмәк үчүн истифадә етмәкдир. Алдығымыз тәлимин мәгсәди Матта 24:14 вә 28:19, 20 ајәләриндә вурғуланан башлыҹа ишимизи јахшы иҹра етмәк үчүн бизи јарагландырмагдыр. Мүәјјән вахт кечәндән сонра тәләбләрә ҹаваб верән вәфтиз олунмуш гардашлардан ‘Аллаһын сүрүсүнүн’ гајғысына галмаг ишиндә натиг вә мүәллим гисминдә иштирак етмәк хаһиш олуна биләр (1 Пет. 5:2, 3).

Шаҝирдләрә тапшырыг алдыгдан сонра китабдан мүвафиг дәрси бир неҹә ҝүн әрзиндә охумағы мәсләһәт ҝөр. Онлары тәшвиг ет ки, өјрәндикләрини мәктәбдә алдыглары тапшырыглары һазырлајаркән, ҝүндәлик сөһбәтләриндә, јығынҹаг ҝөрүшүндә шәрһ верәндә вә тәблиғ хидмәтиндә тәтбиг етсинләр.

Тапшырыглары неҹә вермәк лазымдыр? Тапшырығы ән азы үч һәфтә әввәлҹәдән вермәк лазымдыр. Шәраит јол вердикдә, бүтүн тапшырыглар јазылы шәкилдә верилмәлидир.

Өзүнә јығынҹаға тәлим вермәји дахил едән һиссәләрлә ағсаггаллар, хүсусән дә бунун өһдәсиндән јахшы ҝәлә биләҹәк ағсаггаллар, һәмчинин јахшы мүәллимлик габилијјәти олан хидмәти көмәкчиләр чыхыш етмәлидир.

Һансы тапшырыглары баҹылара, һансылары исә гардашлара вермәји гәрарлашдыраркән мәктәбин програмындакы тәлиматлара риајәт ет. Әҝәр гардашлар аз, баҹылар исә чохдурса, диггәт јетир ки, гардашлар охумаг тапшырығындан әлавә башга тапшырыгларла да кифајәт гәдәр чыхыш едә билсинләр.

Тапшырыг верәркән шаҝирдин шәраитини нәзәрә ал. Һәмин ҝүн Хидмәти ҝөрүшдә чыхышы, јахуд һәмин һәфтә јығынҹагда ачыг мәрузәси олан ағсаггала вә ја хидмәти көмәкчијә мәктәбдә нитглә чыхыш етмәји тапшырмаг нә дәрәҹәдә зәруридир? Әҝәр баҹынын ушагларындан биринин һәмин ахшам тапшырығы варса вә еһтимал ки, о, ушаға һазырлашмаға көмәк едәҹәксә, баҹыја тапшырыг вермәјә еһтијаҹ вармы? Хүсусән ушаглара вә јенијетмәләрә, һәмчинин вәфтиз олунмајанлара тапшырыг верәркән диггәт јетир ки, мүвафиг мөвзу сечәсән. Шаҝирдин тапшырығынын вә үзәриндә ишләдији дәрсин бир-бири илә узлашыб-узлашмадығына да фикир вер.

Адәтән баҹылара верилән тапшырыгларда шаҝирд шәрти вәзијјәти 78 вә 82-ҹи сәһифәләрдәки тәлимата мүвафиг шәкилдә өзү сечир. Она тәрәф мүгабили кими бир нәфәри тәјин етмәк лазымдыр, мүәјјән һалларда исә она ики нәфәр көмәк едә биләр. Шаҝирд һәр һансы вәзијјәтә хүсусилә ујғун ҝәлән бир нәфәри көмәкчи тәјин етмәји хаһиш етсә, онун истәјини нәзәрә ал.

Әлавә синифләр. Мәктәбә 50-дән чох шаҝирд јазылыбса, тапшырыгларыны тәгдим етмәләри үчүн әлавә синифләр тәшкил етмәк олар. Јерли тәләбата ујғун олараг, әлавә синифләрдә ја бүтүн тапшырыглар, ја да сон ики тапшырыг тәгдим едилә биләр.

Һәр әлавә синифдә мәсләһәт вермәк үчүн баҹарыглы гардаш тәјин олунмалыдыр вә јахшы олар ки, бу, ағсаггал олсун. Лазым ҝәләрсә, буну баҹарыглы хидмәти көмәкчи дә едә биләр. Мәсләһәт верәҹәк гардашлар ағсаггаллар шурасы тәрәфиндән тәјин олунмалыдыр. Мәктәбин нәзарәтчиси бу гардашларла сых әмәкдашлыг етмәлидир ки, тәлим алан шаҝирдин нөвбәти дәфә һарада чыхыш етмәсиндән асылы олмајараг, она ардыҹыл мәсләһәтләр версин.

Оху үзрә мәшғәләләр. Ағсаггаллар шурасы гәрар верә биләр ки, јығынҹағын кечирилдији дилдә охумағы өјрәнмәјә еһтијаҹы оланлар вар. Белә олан һалда Теократик Хидмәт Мәктәбинә аид олан мәшғәләләр тәшкил едә биләрсән. Бу мәшғәләләрин мәгсәди ора јазыланлара охумағы өјрәтмәк, јахуд онлары бу саһәдә тәкмилләшдирмәк ола биләр.

Бу ҹүр мәшғәләләр Теократик Хидмәт Мәктәбиндә шаҝирдләрин тапшырыглары илә паралел кечирилмәмәлидир. Лазыми көмәји ҝөстәрмәк үчүн мәктәбә ајрыландан артыг вахт тәләб олуна биләр. Ағсаггаллар һансы көмәјин лазым ҝәлдијини вә мәшғәләләрин нә вахт кечирилмәли олдуғуну мүәјјәнләшдирә биләрләр. Тәләбата ујғун олараг мәшғәлә груп шәклиндә, јахуд фәрди кечирилә биләр.

Мәшғәләләри кечирмәк үчүн баҹарыглы мүәллим тәләб олунур. Јахшы олар ки, бу иш охумағы јахшы баҹаран вә дили јахшы билән гардаша һәвалә едилсин. Әҝәр гардаш јохдурса, ағсаггаллар баҹарыглы вә нүмунәви баҹыдан мәшғәләләри апармағы хаһиш едә биләрләр. О, дәрс кечәркән башыны өртмәлидир (1 Кор. 11:3-10; 1 Тим. 2:11, 12).

Бир чох дилләрдә «Охумагла вә јазмагла мәшғул ол» брошүрасы дәрҹ едилиб. Бу брошүранын мәгсәди охујуб-јазмағы өјрәтмәкдир. Бу мәшғәләләрә јазыланларын охума габилијјәтиндән асылы олараг, башга тәдрис вәсаитләриндән дә истифадә етмәк олар. Шаҝирдләр охумағы өјрәнәндән сонра Теократик Хидмәт Мәктәбинин програмында иштирак етмәјә тәшвиг олунмалыдырлар.

Теократик Хидмәт Мәктәбинин нәзарәтчиси кими, сән јығынҹаға бөјүк фајда ҝәтирә биләрсән. Јахшы һазырлаш вә ишинә Ромалылара 12:6-8 ајәләриндәки нәсиһәтә ујғун олараг, Аллаһдан олан гијмәтли тапшырыг кими јанаш.