ФәсилЛ 9
Дирилмәјә үмидин ҝүҹү
1. Дирилмәјә үмид олмасајды, өлүләри нә ҝөзләјәрди?
ӘЗИЗЛӘРИНДӘН кимсә вәфат едибми? Дирилмә олмасајды онлары бир даһа ҝөрмәјә үмидин олмазды. Онлар Мүгәддәс Китабын тәсвир етдији вәзијјәтдә галаҹагдылар: «Өлүләр һеч нә билмир... ҝедәҹәјин өлүләр дијарында [ибраниҹә шеол] нә иш, нә фикир, нә билик, нә дә һикмәт вар» (Ваиз 9:5, 10).
2. Дирилмә һансы еҹазкар үмиди верир?
2 Јеһова мәрһәмәт ҝөстәрәрәк, дирилмә васитәсилә сајсыз-һесабсыз өлмүш инсана мисилсиз бир имкан — өлүләрдән дирилиб әбәди јашамаг имканы верир. Беләликлә, инди гәбирдә ујујан әзизләринә Аллаһын јени дүнјасында говушмаг үмиди сәнә тәсәлли верә биләр (Марк 5:35, 41, 42; Һәвариләрин ишләри 9:36-41).
3. а) Дирилмәнин Јеһованын нијјәтиндә мүһүм јер тутдуғуну нәјин әсасында демәк олар? б) Дирилмә хүсусән һансы вәзијјәтләрдә бизим үчүн ҝүҹ мәнбәјидир?
3 Дирилмә бизи өлүм гаршысындакы сарсыдыҹы горхудан азад едир. Шејтан иддиа едир ки, «инсан ҹанына ҝөрә һәр шејини верәр». Бу иддиасыны сүбут етсин дејә Јеһова она әлиндән ҝәләни етмәсинә изин верә биләр. Лакин Јеһова һеч вахт јол вермәз ки, Шејтан Онун садиг хидмәтчиләринә чарәси тапылмаз бир зәрәр вурсун (Әјјуб 2:4). Иса өләнәдәк Аллаһа садиг галды вә Аллаһ ону ҝөјдә јашамаг үчүн дирилтди. Иса фидијә гурбаны кими верилмиш камил инсан һәјатынын дәјәрини Атасынын ҝөјдәки тахты гаршысында тәгдим етди. Беләликлә бәшәријјәт үчүн һәјата јол ачылды. Исанын һакимијјәт шәрики — «кичик сүрү» дирилмә васитәсилә онунла Сәмави Падшаһлыгда бирләшмәјә үмид едир (Лука 12:32). Диҝәрләринин јер үзү Ҹәннәтдә әбәди јашамаға дирилмәк үмиди вар (Мәзмур 37:11, 29, КМ). Һәјат үчүн тәһлүкәли сынагларла гаршылашанда дирилмәјә үмид бүтүн мәсиһчиләр үчүн «ән үстүн» ҝүҹ мәнбәјинә чеврилир (2 Коринфлиләрә 4:7).
Дирилмә иманымызын тәмәлидир
4. а) Нә үчүн дирилмә ‘ибтидаи тәлимләрә’ аиддир? б) Дүнјада дирилмәјә аид һансы тәсәввүрләр вар?
4 Ибраниләрә 6:1, 2 (И–93) ајәләринә әсасән дирилмә ‘ибтидаи тәлим’ сајылыр. Дирилмә иман тәмәлинин бир һиссәсидир, она инанмадан јеткин мәсиһчи олмаг гејри-мүмкүндүр (1 Коринфлиләрә 15:16-19). Гејд етмәк лазымдыр ки, Мүгәддәс Китабын дирилмә тәлими дүнјадакы тәсәввүрләрдән бүсбүтүн фәргләнир. Сајы ҝетдикҹә чохалан руһани ҹәһәтдән јохсул адамлар «һәр нә варса, бу дүнјада вар» фикри илә јашајырлар. Буна ҝөрә дә онлар даима ејш-ишрәт сорағындадырлар. Христиан дүнјасына аид олан вә олмајан әнәнәви динләрин нүмајәндәләри инсанда өлмәз руһун олдуғуна инанырлар. Лакин бу, Мүгәддәс Китабын дирилмә һаггындакы тәлиминә зиддир, чүнки өлмәз руһ олсајды дирилмәјә еһтијаҹ галмазды. Бу тәсәввүрләри бир-биринә ујғунлашдырмаг ҹәһди үмид әвәзинә чашбашлыг јарадыр. Һәгигәти өјрәнмәк истәјән сәмими инсанлара неҹә көмәк едә биләрик?
5. а) Дирилмәнин мәғзини анламаг үчүн нәји билмәк лазымдыр? б) Сәнҹә өлүләрин вәзијјәти вә руһ барәдә һәгигәти һансы Мүгәддәс Китаб ајәләри васитәсилә изаһ етмәк олар? в) Марагланан адамын истифадә етдији Мүгәддәс Китаб тәрҹүмәси һәгигәти тәһриф едирсә, она неҹә көмәк етмәк олар?
5 Дирилмәнин еҹазкар бир тәдбир олдуғуну баша дүшмәк үчүн әввәлҹә адамларын руһ вә өлүләрин вәзијјәти һаггында дүзҝүн анлајышы олмалыдыр. Чох вахт Мүгәддәс Китаб һәгигәтини ахтаран адама Аллаһын Кәламындан бир нечә ајә охумаг кифајәт едир (Ваиз 9:5,10; Јешаја 38:18,19; Мәзмур 146:3, 4, КМ; Јагуб 2:26). Лакин бәзи мүасир Мүгәддәс Китаб тәрҹүмәләри вә һекајә формасында јазылмыш нәшрләри өлүләрин вәзијјәти илә бағлы һәгигәти тәһриф едирләр. Буна ҝөрә дә марагланан адамла Мүгәддәс Китабын јазылдығы дилләрдә ишләнән сөзләри мүзакирә етмәк лазым ҝәлә биләр.
6. Руһун нә олдуғуну анламагда башгаларына неҹә көмәк едә биләрик?
6 Ибрани сөзү руаһ вә она мүвафиг јунан сөзү пневма Мүгәддәс Китабда «руһ» сөзү илә тәрҹүмә едилиб. Аллаһын Кәламыны дәриндән тәдгиг етдикдә ҝөрмәк олар ки, орижинал дилләрдән «руһ» кими тәрҹүмә едилмиш мәфһум инсанлары вә һејванлары ҹанландыран һәјат гүввәсинә аид едилир. Бу мәфһум әсла өлүм заманы бәдәндән ајрылыб башга јердә шүурлу сурәтдә мөвҹуд олмаға давам едән ҝөзәҝөрүнмәз вә дујулмаз варлыг мәнасыны дашымыр.
7. Шеолда, һадесдә вә ҝеһеннада олан өлүләрин вәзијјәтини Мүгәддәс Китаб васитәсилә неҹә изаһ едәрдиниз?
7 Бундан әлавә бәзи тәрҹүмәләрдә ибрани сөзү «шеол» вә јунан сөзү «һадес» «өлүләр дијары» вә «өлүләр аләми», јунан сөзү ҝеһенна «ҹәһәннәм» кими тәрҹүмә олунур. Бу сөзләр орижинал дилләрдәки сөзләрин мәнасыны тәһриф едир. «Шеол» вә «һадес» сөзләри ејни мәналы сөзләрдир (Мәзмур 16:10; Һәвариләрин ишләри 2:27). Мүгәддәс Китабдан ајдын олур ки, һәм шеол, һәм һадес бәшәријјәтин үмуми мәзарыны билдирир вә һәјата јох, өлүмә аиддир (Мәзмур 89:48; Вәһј 20:13). Мүгәддәс Јазылар һәмчинин үмуми мәзардан дирилмә васитәсилә гајытмағын мүмкүнлүјүнү дә изаһ едир (Әјјуб 14:13; Һәвариләрин ишләри 2:31). Ҝеһенна исә үмуми мәзар дејил. Әксинә, о там мәһвин символудур. Шеолда вә ја һадесдә оланлардан фәргли олараг, ҝеһеннаја дүшәнләрин нә вахтса јенидән јашајаҹагларына һеч бир үмид јохдур. Һеч јердә јазылмајыб ки, онларын руһу ҝеһеннада шүурлу галыб јашамаға давам едир (Матта 10:28).
8. Дирилмәнин маһијјәтини анламаг адамын дүшүнҹә вә давранышына неҹә тәсир ҝөстәрә биләр?
8 Марагланан адамла бу мәсәләләри арашдырдыгдан сонра, дирилмәнин онун үчүн нә мәна кәсб етдијини анламасына көмәк етмәк олар. О, Јеһованын мәһәббәтлә тәгдим етдији ҝөзәл әнама ҝөрә јәгин ки, чох миннәтдар олаҹаг. Әзизләринин өлүмүндән хиффәт чәкәнләр, Аллаһын јени дүнјасында онларла јенидән ҝөрүшәҹәкләринә севинә биләрләр. Бунлар ајдын оланда, Мәсиһин өлүмүнүн мәнасыны анламаг да асанлашыр. Биринҹи әсрдә јашамыш мәсиһчиләр баша дүшүрдүләр ки, Иса Мәсиһин дирилмәси мәсиһчи иманынын тәмәлидир вә бу дирилмә башгаларынын дирилмәсинә јол ачыр. Онлар Исанын дирилмәсини вә бу дирилмәнин вердији үмиди сәјлә тәблиғ едирдиләр. Бу ҝүн дә дирилмәнин маһијјәтини дәрк едәнләр, бу дәјәрли һәгигәти башгалары илә бөлүшмәјә ҹан атырлар (Һәвариләрин ишләри 5:30-32; 10:42, 43).
‘Һадесин ачарынын’ тәтбиги
9. Иса «өлүмүн вә өлүләр аләминин [һадесин] ачарлары»ны илк нөвбәдә неҹә тәтбиг едир?
9 Иса илә бәрабәр онун сәмави Падшаһлығында һакимијјәт сүрмәјә сечиләнләр бир ҝүн өлмәлидирләр. Амма онлар Исанын вердији бу зәманәти јахшы билирләр: «Өлү идим вә будур, әбәди олараг диријәм... Өлүмүн вә өлүләр аләминин [һадесин] ачарлары мәндәдир» (Вәһј 1:18). О нәји нәзәрдә тутурду? Бу сөзләрлә Иса диггәти өзү илә баш верән һадисәләрә јөнәлдирди. О да өлмүшдү. Лакин Аллаһ ону һадесдә гојмады. Өлүмүнүн үчүнҹү ҝүнү Јеһова ону руһани шәхсијјәт кими дирилтди вә она өлмәзлик бәхш етди (Һәвариләрин ишләри 2:32, 33; 10:40). Бундан әлавә, Аллаһ башгаларыны бәшәријјәтин үмуми мәзарындан вә Адәмин ҝүнаһынын нәтиҹәләриндән хилас етмәк үчүн Исаја «өлүмүн вә өлүләр аләминин [һадесин] ачарлары»ны верди. Бу ачарларын васитәсилә Иса өз садиг давамчыларыны һәјата гајтара биләр. Илк нөвбәдә о, өз јығынҹағынын мәсһ олунмуш үзвләрини дирилдир вә Атасынын она бәхш етдији кими, онлара чох гијмәтли бир әнам, ҝөјләрдә өлмәз һәјаты бәхш едир (Ромалылара 6:5; Филипилиләрә 3:20, 21).
10. Садиг мәсһ олунмуш мәсиһчиләрин дирилмәси нә вахт баш верир?
10 Садиг мәсһ олунмуш мәсиһчиләр ҝөјдә јашамаг үчүн нә вахт дириләҹәкләр? Мүгәддәс Китаба әсасән онларын дирилмәси артыг башлајыб. Һәвари Павел изаһ етмишди ки, бу дирилмә Мәсиһин 1914-ҹү илдә башламыш ҝөзәҝөрүнмәз иштиракы заманы баш верәҹәк (1 Коринфлиләрә 15:23). Инди онун иштиракы дөврү олдуғундан садиг мәсһ олунмушлар јердәки һәјатларыны баша вуранда, өлүм јухусунда галмырлар, чүнки Ағалары артыг гајыдыб. Онлар өләндә дәрһал, «бир ан ичиндә, бир ҝөз гырпымында» дәјишәрәк руһани шәхсијјәт кими дирилирләр. Онлар хошбәхтдирләр, чүнки јахшы әмәлләри «онларла ҝедир» (1 Коринфлиләрә 15:51, 52; Вәһј 14:13).
11. Үмумиликдә инсанлар үчүн һансы дирилмә олаҹаг вә бу дирилмә нә вахт башлајаҹаг?
11 Лакин Падшаһлыг варисләринин ҝөјләр һәјатына дирилдилмәси јеҝанә дирилмә дејилдир. Вәһј 20:6 ајәсиндә буна ‘илк дирилмә’ дејилир. Демәли, башга бир дирилмә дә олаҹаг. Сонракы дирилмәдә дириләнләрин јерүзү Ҹәннәтдә әбәди хошбәхт јашамаға үмидләри олаҹаг. Бу дирилмә нә вахт башлајаҹаг? «Вәһј» китабы бунун, «јер вә ҝөј», јәни мүасир пис систем, өз һаким даирәләри илә бирҝә јох едиләндән сонра баш верәҹәјини ҝөстәрир. Көһнә систем чох тезликлә сона јетәҹәк. Бундан сонра, Аллаһын тәјин етдији вахтда јер үзүндә дирилмә башланаҹаг (Вәһј 20:11, 12).
12. Аллаһа садиг адамлардан кимләр јер үзүндә һәјата дирилдиләҹәк вә нәјә ҝөрә бу үрәјимизи риггәтә ҝәтирир?
12 Јер үзүндә јашамаға кимләр дирилдиләҹәк? Онларын арасында гәдимдән бәри Јеһоваја сәдагәтлә хидмәт етмиш кишиләр вә гадынлар олаҹаг. Бу адамлар дирилмәјә бәсләдикләри ҝүҹлү иман сајәсиндә башга бир фидијә илә ‘азадлығы гәбул етмәмишләр’. Башга сөзлә, онлар ишҝәнҹә илә гәтлә јетирилмәк тәһлүкәси алтында белә, Аллаһын гаршысында нөгсансызлыгларыны ахыра гәдәр горујуб сахламышлар. Онларла шәхсән таныш олмаг вә Мүгәддәс Китабда гысаҹа нәгл едилән һадисәләр һаггында билаваситә бу һадисәләрин шаһидләриндән әтрафлы мәлумат алмаг неҹә дә севиндириҹи олаҹаг! Јер үзүндә јашамаға һәмчинин Јеһованын илк садиг шаһиди Һабил; дашгындан өнҹә Аллаһын хәбәрдарлығыны ҹәсарәтлә тәблиғ етмиш Һанок вә Нуһ; мәләкләрә гонагпәрвәрлик ҝөстәрмиш Ибраһим вә Сара; Сина дағында Ганун алмыш Муса; б.е.ә. 607-ҹи илдә Јерусәлимин дағылмасынын шаһиди олмуш Јеремја вә онун кими диҝәр ҹәсарәтли пејғәмбәрләр; вә Аллаһын Исаны Өз Оғлу адландырдығыны ешитмиш вәфтизчи Јәһја да дирилдиләҹәк. Бу пис дүнјанын ахыр ҝүнләриндә вәфат етмиш чохлу садиг киши вә гадын да һәјата гајтарылаҹаг (Ибраниләрә 11:4-38; Матта 11:11).
13, 14. а) Һадеслә вә орада оланларла нә баш верәҹәк? б) Даһа кимләр дирилдиләҹәк вә нә үчүн?
13 Мүәјјән вахтдан сонра Јеһованын садиг хидмәтчиләриндән әлавә диҝәр адамлар да дириләҹәк вә бәшәријјәтин үмуми мәзарында һеч ким галмајаҹаг. Иса һадесин ачарыны ишә салыб орадан бүтүн инсанлары азад етдијиндән, бу мәзар бошалаҹаг. Һәвари Јәһја она верилән ҝөрүнтүдә һадесин ‘одлу ҝөлә атылдығыны’ ҝөрмүшдү (Вәһј 20:14). Бу нә демәкдир? Бу о демәкдир ки, бәшәријјәтин үмуми мәзары — һадес тамамилә мәһв едиләҹәк. Һадес јох олаҹаг, орада артыг өлү галмајаҹаг. Иса Јеһованын бүтүн садиг хидмәтчиләри илә јанашы, мәрһәмәтиндән ирәли ҝәләрәк гејри-салеһләри дә һәјата гајтараҹаг. Аллаһын Кәламы бизи әмин едир: «Һәм салеһ, һәм дә салеһ олмајан өлүләрин дирилмәси олаҹагдыр» (Һәвариләрин ишләри 24:15).
14 Гејри-салеһ инсанлар тәзәдән өлүмә мәһкум едилмәк үчүн дирилдилмәјәҹәкләр. Аллаһын Падшаһлығы алтында бүтүн јер үзүндә салеһлик һөкм сүрәҹәк вә һәјатларыны Јеһованын нормаларына ујғунлашдыра билсинләр дејә, онлара көмәк едиләҹәк. Ҝөрүнтүдә «һәјат китабы» ачылыр. Бу ону билдирир ки, дириләнләрә адларыны ора јаздырмаг имканы вериләҹәк. Онларын һәр бири дириләндән сонракы «әмәлләринә ҝөрә һөкм» олунаҹаг (Вәһј 20:12, 13). Беләликлә онларын дирилиб нәтиҹәдә «[иттиһамедиҹи] һөкмә дүчар» олмаг дејил, ‘һәјата говушмаг’ имканы олаҹаг (Јәһја 5:28, 29).
15. а) Кимләр дирилдилмәјәҹәк? б) Дирилмә һаггында һәгигәти билмәк бизә неҹә тәсир ҝөстәрмәлидир?
15 Бунунла белә бүтүн өлүләр дирилдилмәјәҹәк. Бәзиләри бағышланылмаз ҝүнаһлар ишләтмишләр. Онлар һадесдә дејил, әбәди мәһв јери олан ҝеһеннададырлар. Артыг јахынлашан «бөјүк мәшәггәт»дә мәһв едиләҹәк адамлар да ора дүшәҹәкләр (Матта 12:31, 32; 23:33; 24:21, 22; 25:41, 46; 2 Салониклиләрә 1:6-9). Һәрчәнд Јеһова бөјүк рәһминдән ирәли ҝәләрәк өлүләри һадесдән азад едир, анҹаг дирилмәјә үмид бизә һәјатымызы неҹә ҝәлди јашамаға әсас вермир. Билә-билә Јеһованын һакимијјәтинә гаршы чыханлар һеч вахт дирилдилмәјәҹәкләр. Буну өјрәндикдән сонра Онун ирадәсинә ујғун һәјат сүрмәклә Аллаһын мәрһәмәти үчүн дәриндән миннәтдар олдуғумузу ҝөстәрәҹәјик.
Дирилмәјә үмид ҝүҹ мәнбәјидир
16. Дирилмәјә үмид бизи неҹә ҝүҹләндирә биләр?
16 Дирилмәјә үмид бәсләјәнләр бундан гүввә алырлар. Адам гоҹаланда һәтта тәбабәт онун өмрүнү чох узада билмир (Ваиз 8:8). Амма Јеһоваја Онун тәшкилаты илә бирҝә сәдагәтлә хидмәт едириксә, ҝәләҹәјә инамла бахырыг. Биз билирик ки, Аллаһын тәјин етдији вахтда дирилмә сајәсиндә јенидән јашајаҹағыг. Һәјат неҹә дә ҝөзәл олаҹаг! Һәвари Павел ону «һәгиги һәјат» адландырыр (1 Тимотејә 6:19, һашијә; Ибраниләрә 6:10-12).
17. Јеһованын гаршысында нөгсансызлығымызы горумагда бизә нә көмәк едир?
17 Дирилмәнин олаҹағыны вә бу тәдбирин Аллаһ тәрәфиндән ҝөрүлдүјүнү билдикдә иманымыз мөһкәмләнир. Амансыз тәгибчиләр бизи өлүмлә һәдәләјәндә белә, бу билик Аллаһа садиг галмағымыза ҝүҹ верир. Шејтан узун мүддәтдир ки, өлүм горхусу васитәсилә адамлары әсарәтдә сахлајыр. Лакин Иса бу горхуја табе олмады. О сон нәфәсинә кими Јеһоваја садиг галды. Иса өз фидијә гурбанлығы сајәсиндә башгаларынын да бу горхудан азад олмаларына имкан јаратды (Ибраниләрә 2:14, 15).
18. Јеһованын хидмәтчиләринә нөгсансыз галмагда һәмишә нә көмәк етмишдир?
18 Тарих боју Јеһованын хидмәтчиләри, Мәсиһин фидијә гурбанлығына вә дирилмәјә иманлары сајәсиндә нөгсансызлыгларыны горујуб сахлаја билмишләр. Онлар ән чәтин сынагларда белә, Јеһованы өз ҹанларындан чох севдикләрини ҝөстәрмишләр (Вәһј 12:11). Аллаһын хидмәтчиләри һикмәтлә давранараг, индики һәјатларыны хилас етмәк мәгсәдилә Мүгәддәс Китаб принсипләриндән имтина етмирләр (Лука 9:24, 25). Онлар билирләр ки, Јеһованын һакимијјәтини сәдагәтлә дәстәкләдикләри үчүн инди һәјатларыны итирсәләр белә, Аллаһ онлары дирилдиб мүкафатландыраҹаг. Сәнин дә иманын бу ҹүр мөһкәмдирми? Әҝәр Јеһованы үрәкдән севиб дирилмәнин һәгиги мәнасыны там дәрк етсән, сәнин дә иманын бу ҹүр мөһкәм олаҹаг.
Тәкрар үчүн суаллар
• Дирилмәнин мәғзини анламаг үчүн нәјә ҝөрә өлүләрин вәзијјәтини ајдынлашдырмаг лазымдыр?
• Һәјата кимләр гајтарылаҹаг вә бу билик бизә неҹә тәсир ҝөстәрмәлидир?
• Дирилмәјә үмид бизи неҹә мөһкәмләндирир?
[84, 85-ҹи сәһифәләрдәки шәкил]
Јеһова вәд едир ки, салеһләрин вә гејри-салеһләрин дирилмәси олаҹаг